ສະເໜີແກ້ໄຂການນຳໃຊ້ບັດປະກັນສັງຄົມ ໃຫ້ນຳໃຊ້ໄດ້ໃນທຸກໂຮງໝໍທົ່ວປະເທດ

    ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ຊຸດ​ທີ VIII ແລະ ສະ­ມາ­ຊິກ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສປ ນວ) ຊຸດ​ທີ I ນຳ​ໂດຍ​ທ່ານ ບົວ​ເກດ ພົມ­ມະ­ຈັນ ສສຊ ຊຸດ​ທີ VIII ປະ­ຈຳ​ເຂດ​ເລືອກ​ຕັ້ງ​ທີ 1 ນວ ຄະ­ນະ​ກຳ­ມາ​ທິ​ການ​ຍຸ­ຕິ​ທຳ​ຂອງ​ສະ­ພາ​ແຫ່ງ​ຊາດ ສປ ນວ ຊຸດ​ທີ 1 ລົງ​ພົບ​ປະ​ປະ­ຊາ­ຊົນ ບ້ານ​ຮ່ອງ​ໄກ່­ແກ້ວ ແລະ ບ້ານ​ຮ່ອງ​ແຊງ ເມືອງ​ຈັນ­ທະ​ບູ​ລີ ວັນ​ທີ 21 ກຸມ­ພາ 2019 ຢູ່​ວັດ​ຮ່ອງ​ໄກ່­ແກ້ວ ເພື່ອ​ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 6 ຂອງ ສປ ນວ ຊຸດ​ທີ I ແລະ ຮັບ​ຟັງ​ຄຳ​ຄິດ​ເຫັນ​ຄຳ​ສະ­ເໜີ​ຂອງ​ປະ­ຊາ­ຊົນ ກ່ຽວ​ກັບ​ບັນ­ຫາ​ຂັດ­ຂ້ອງ​ໝອງ​ໃຈ ເພື່ອ​ຈະ​ສະ­ເໜີ​ຕໍ່​ອຳ­ນາດ​ການ​ປົກ­ຄອງ ແລະ ພາກ­ສ່ວນ​ກ່ຽວ­ຂ້ອງ​ປັບ­ປຸງ​ແກ້​ໄຂ.

    ໂອ­ກາດ​ນີ້ ກໍ​ໄດ້​ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 6 ຂອງ ສສ ນວ ຊຸດ​ທີ I ຈາກ​ນັ້ນ ກໍ​ໄດ້​ເປີດ​ໂອ­ກາດ​ໃຫ້​ປະ­ຊາ­ຊົນ​ສະ­ເໜີ​ຂໍ້​ຂ້ອງ​ໃຈ​ຕ່າງໆ ໃນ​ນີ້ ປະ­ຊາ­ຊົນ​ໄດ້​ໃຫ້​ຄວາມ​ສົນ­ໃຈ ແລະ ສະ­ເໜີ​ຕໍ່​ຜູ້​ແທນ​ຫຼາຍ​ກວ່າ ແມ່ນ​ບັນ­ຫາ​ການ​ຫຼຸດ­ຜ່ອນ​ຈຳ­ນວນ​ລັດ­ຖະ­ກອນ ເຊິ່ງ​ອາດ​ສົ່ງ​ຜົນ​ກະ­ທົບ​ຕໍ່​ນັກ​ສຶກ​ສາ​ຈົບ​ໃໝ່ ໃນ​ການ​ຊອກ​ວຽກ​ເຮັດ​ງານ​ທຳ ແລະ ການ­ຈັດ­ຕັ້ງ​ປະ­ຕິ­ບັດ​ນະ­ໂຍ­ບາຍ 6 ສ ຂອງ ນວ ຍັງ​ບໍ່​ສາ­ມາດ​ຈັດ​ຕັ້ງ​ປະ­ຕິ­ບັດ​ໄດ້​ດີ​ເທົ່າ​ທີ່​ຄວນ ເປັນ­ຕົ້ນ ສ ສະ­ອາດ ພ້ອມ​ທັງ​ສະ­ເໜີ​ພາກ­ສ່ວນ​ກ່ຽວ­ຂ້ອງ ແກ້​ໄຂ​ການ​ນຳ​ໃຊ້​ບັດ​ປະ­ກັນ​ສັງ­ຄົມ ໃຫ້​ສາ­ມາດ​ໃຊ້​ໄດ້​ໃນ​ໂຮງ­ໝໍ​ທົ່ວ​ປະ­ເທດ ບັນ­ຫາ​ການ​ຄັດ​ເລືອກ​ເອົາ​ພະ­ນັກ­ງານ-ລັດ­ຖະ­ກອນ ແມ່ນ​ຍັງ​ມີ​ບາງ​ກໍ­ລະ­ນີ ຍັງ​ໄດ້​ຊື້​ຈ້າງ​ເຂົ້າ​ເຮັດ​ວຽກ ບັນ­ຫາ​ການ​ເກັບ​ຄ່າ​ທຳ­ນຽມ​ຂັ້ນ​ບ້ານ​ບໍ່​ເປັນ​ເອ­ກະ​ພາບ ສະ­ເໜີ​ໃຫ້​ພາກ­ສ່ວນ​ກ່ຽວ­ຂ້ອງ ແກ້​ໄຂ​ໃຫ້­ການ​ເກັບ​ຄ່າ​ທຳ­ນຽມ ໃຫ້​ມີ​ລາ­ຄາ​ເອ­ກະ​ພາບ​ກັນ​ທົ່ວ​ປະ­ເທດ ສະ­ເໜີ​ໃຫ້​ກວດ­ຄືນ​ໂຄງ­ການ​ລົງ­ທຶນ​ຂອງ​ລັດ​ບາງ​ໂຄງ­ການ​ຊັກ​ຊ້າ ບໍ່​ສຳ­ເລັດ​ຕາມ​ສັນ­ຍາ ແລະ ສະ­ເໜີ​ໃຫ້​ຄົ້ນ­ຄວ້າ​ແກ້​ໄຂ​ບັນ­ຫາ​ນ້ຳ​ເປື້ອນ ທີ່​ສົ່ງ​ກິ່ນ​ເໝັນ​ຂອງ​ນ້ຳ​ຮ່ອງ​ແຊງ ໂດຍ​ສະ­ເໜີ​ໃຫ້​ພາກ­ສ່ວນ​ກ່ຽວ­ຂ້ອງ​ຊອກ​ຫາ​ວິ­ທີ​ແກ້​ໄຂ.