ປີ 2019 ໄທ ມີແຜນການເຝິກອົບຮົມໃຫ້ບຸຄະລາກອນລາວ 500 ຄົນ

331 25 ກ.ພ. 2019 ຂ່າວໜ້າ​ໜຶ່ງ
ປີ 2019 ໄທ ມີແຜນການເຝິກອົບຮົມໃຫ້ບຸຄະລາກອນລາວ 500 ຄົນ

    ເພື່ອ​ພ້ອມ​ກັນ​ຈັດ​ຕັ້ງ ແລະ ຜັນ​ຂະ­ຫຍາຍ​ບົດ​ບັນ­ທຶກ​ຄວາມ​ເຂົ້າ­ໃຈ ວ່າ​ດ້ວຍ​ການ​ຮ່ວມ​ມື​ດ້ານ​ແຮງ​ງານ ລະ­ຫວ່າງ ລັດ­ຖະ­ບານ​ລາວ ແລະ ໄທ ໃຫ້​ປາ­ກົດ​ຜົນ​ເປັນ​ຈິງ ວັນ​ທີ 20-22 ກຸມ­ພາ 2019 ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ໄດ້​ເດີນ­ທາງ​ເຂົ້າ​ຮ່ວມ​ກອງ​ປະ­ຊຸມ​ລະ­ດັບ​ລັດ­ຖະ­ມົນ­ຕີ​ແຮງ​ງານ ທີ່​ບາງ­ກອກ ຣາ​ຊະ​ອາ­ນາ­ຈັກ​ໄທ ຕາມ​ການ​ເຊື້ອ​ເຊີນ​ຂອງ​ທ່ານ ພົນ​ຕຳ­ຫຼວດ​ເອກ ອະ­ດຸນ ແສງ​ສິງ​ແກ້ວ ລັດ­ຖະ­ມົນ­ຕີ​ກະ­ຊວງ​ແຮງ​ງານ ຣາ​ຊະ​ອາ­ນາ­ຈັກ​ໄທ.

    ເພື່ອ​ສືບ­ຕໍ່​ການ­ຈັດ­ຕັ້ງ​ຜັນ​ຂະ­ຫຍາຍ​ຖະ­ແຫຼງ­ການ​ຮ່ວມ ກອງ​ປະ­ຊຸມ​ນາ­ຍົກ­ລັດ­ຖະ­ມົນ­ຕີ ສປປ ລາວ ແລະ ຣາ​ຊະ​ອາ­ນາ­ຈັກ​ໄທ ໃນ​ທ້າຍ​ປີ 2018 ຢູ່​ນະ­ຄອນ­ຫຼວງ​ວຽງ​ຈັນ ທົບ​ທວນ​ການ​ຮ່ວມ​ມື​ໃນ​ການ­ຈັດ­ຕັ້ງ​ປະ­ຕິ­ບັດ ບົດ​ບັນ­ທຶກ​ຄວາມ​ເຂົ້າ­ໃຈ​ວ່າ​ດ້ວຍ​ການ​ຮ່ວມ​ມື​ດ້ານ​ແຮງ​ງານ​ໃນ​ປີ 2016 ແລະ ຂໍ້​ຕົກ­ລົງ​ວ່າ​ດ້ວຍ​ການ​ຈ້າງ​ງານ​ປີ 2017 ເພື່ອ​ປົກ​ປ້ອງ​ສິດ­ຜົນ­ປະ­ໂຫຍດ​ຂອງ​ຜູ້​ໃຊ້​ແຮງ​ງານ ແລະ ຜູ້​ອອກ­ແຮງ​ງານ ລາວ-ໄທ ແນ­ໃສ່​ປະ­ກອບ­ສ່ວນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ 2 ປະ­ເທດ ເຊິ່ງ​ໄລ­ຍະ​ຜ່ານ​ມາ 2 ກະ­ຊວງ​ແຮງ​ງານ​ໄດ້​ເອົາ­ໃຈ­ໃສ່​ປະ­ສານ​ສົມ­ທົບ ແລະ ຈັດ​ຕັ້ງ​ປະ­ຕິ­ບັດ​ບັນ­ດາ​ໜ້າ​ວຽກ​ຫຼັກ ທີ່​ກຳ­ນົດ​ໄວ້​ໃນ​ບັດ​ບົດ​ບັນ­ທຶກ​ຄວາມ​ເຂົ້າ­ໃຈ ວ່າ​ດ້ວຍ​ການ​ຮ່ວມ​ມື​ດ້ານ​ແຮງ​ງານ​ໃນ​ປີ 2016 ແລະ ຂໍ້​ຕົກ­ລົງ​ວ່າ​ດ້ວຍ​ການ​ຈ້າງ​ງານ​ປີ 2017 ມີ​ຜົນ­ສຳ­ເລັດ​ຫຼາຍ​ດ້ານ ເປັນ­ຕົ້ນ ລັດ­ຖະ­ບານ​ໄທ ກໍ​ຄື ກະ­ຊວງ​ແຮງ​ງານ​ຣາ​ຊະ​ອາ­ນາ­ຈັກ​ໄທ ໄດ້​ສະ­ໜັບ­ສະ­ໜູນ​ການ​ພັດ­ທະ­ນາ​ສີ­ມື​ແຮງ​ງານ​ໃຫ້​ບຸກ​ຄະ­ລາ​ກອນ ສປປ ລາວ ໃນ​ສາ­ຂາ​ວິ­ຊາ​ຊ່າງ​ຫຼາຍ​ສົມ­ຄວນ ສອງ​ຝ່າຍ​ໄດ້​ເອົາ­ໃຈ­ໃສ່​ປະ­ສານ​ສົມ­ທົບ​ໃນ​ການ​ຄຸ້ມ​ຄອງ​ແຮງ​ງານ​ລາວ ທີ່​ມາ​ອອກ­ແຮງ​ງານ​ຢູ່​ປະ­ເທດ​ໄທ ຖືກ­ຕ້ອງ​ຕາມ​ກົດ­ໝາຍ ຕັ້ງ­ໜ້າ​ຈັດ​ຕັ້ງ​ປະ­ຕິ­ບັດ​ວຽກ​ງານ​ແກ້​ໄຂ​ແຮງ​ງານ​ລາວ ທີ່​ເຮັດ​ວຽກ​ແບບ​ບໍ່​ຖືກ­ຕ້ອງ​ຢູ່​ປະ­ເທດ​ໄທ ດ້ວຍ​ການ​ດຳ­ເນີນ​ປັບ​ສະ­ຖາ­ນະ​ພາບ​ແຮງ​ງານ​ໃຫ້​ຖືກ­ຕ້ອງ​ຕາມ​ກົດ­ໝາຍ​ເປັນ​ລະ­ບົບ​ດີ​ຂຶ້ນ ພ້ອມ​ນີ້ ຍັງ​ໄດ້​ສ້າງ​ສິ່ງ​ອຳ­ນວຍ​ຄວາມ​ສະ­ດວກ ທີ່​ເປັນ​ຈຸດ​ພັກ​ໃນ​ການ​ເດີນ­ທາງ​ກັບ​ຄືນ​ປະ­ເທດ​ສຳ­ລັບ​ແຮງ​ງານ​ລາວ ເອົາ­ໃຈ­ໃສ່​ຊຸກ­ຍູ້​ການ​ຮ່ວມ​ມື ເຊິ່ງ​ໄດ້​ມີ​ການ​ແລກ­ປ່ຽນ​ຄະ­ນະ​ຜູ້​ແທນ​ຢ້ຽມ­ຢາມ​ແລກ​ບົດ­ຮຽນ​ເຊິ່ງ​ກັນ ແລະ ກັນ ເປັນ​ປົກ­ກະ­ຕິ.

    ກອງ​ປະ­ຊຸມ​ຄັ້ງ​ນີ້ ຍັງ​ໄດ້​ພ້ອມ​ກັນ​ກຳ­ນົດ​ແຜນ​ຈັດ​ຕັ້ງ​ປະ­ຕິ­ບັດ​ຕາມ​ບົດ​ບັນ­ທຶກ​ຄວາມ​ເຂົ້າ­ໃຈ ປີ 2019-2022 ເປັນ­ຕົ້ນ ໄດ້​ເພີ່ມ​ການ​ຮ່ວມ​ມື​ດ້ານ​ການ​ພັດ­ທະ­ນາ​ສີ­ມື​ແຮງ​ງານ ໂດຍ​ສະ­ເພາະ ການ​ສ້າງ​ຂໍ້​ຕົກ­ລົງ​ວ່າ​ດ້ວຍ​ການ​ຮ່ວມ​ມື​ດ້ານ​ການ​ພັດ­ທະ­ນາ​ສີ­ມື​ແຮງ​ງານ ໃນ​ປີ 2019 ຝ່າຍ​ໄທ​ມີ​ແຜນ­ການ​ເຝິກ­ອົບ­ຮົມ​ໃຫ້​ບຸ​ຄະ­ລາ​ກອນ​ພາກ​ລັດ ແລະ ເອ­ກະ​ຊົນ​ຂອງ​ລາວ 500 ຄົນ ດຳ­ເນີນ​ການ​ໃຫ້​ແຮງ​ງານ​ສັນ­ຊາດ​ລາວ ທີ່​ໄດ້​ຮັບ​ເອ­ກະ­ສານ​ຢັ້ງ­ຢືນ​ຖາ­ນະ​ບຸກ­ຄົນ ແລະ ເຮັດ​ວຽກ​ຢູ່​ຣາ​ຊະ​ອາ­ນາ­ຈັກ​ໄທ ໄດ້​ປັບ​ປ່ຽນ​ສະ­ຖາ­ນະ​ເປັນ​ແຮງ​ງານ​ທີ່​ເຂົ້າ​ມາ​ເຮັດ​ວຽກ​ຕາມ​ຂອບ​ບົດ​ບັນ­ທຶກ​ຄວາມ​ເຂົ້າ­ໃຈ ກ່ອນ​ວັນ​ທີ 31 ມີ­ນາ 2020 ໃຫ້​ໜ່ວຍ​ງານ​ກ່ຽວ­ຂ້ອງ​ທັງ 2 ຝ່າຍ​ປຶກ­ສາ​ຫາ­ລື​ຮ່ວມ​ກັນ ເພື່ອ​ຊຸກ­ຍູ້​ແກ້​ໄຂ​ບັນ­ຫາ​ການ​ເດີນ­ທາງ​ເຂົ້າ​ມາ​ຂອງ​ແຮງ​ງານ​ສັນ­ຊາດ​ລາວ ເພື່ອ​ເຮັດ​ວຽກ​ເປັນ​ຊົ່ວ­ຄາວ ໃນ​ໄລ­ຍະ​ເວ­ລາ​ໃດ​ໜຶ່ງ ຫຼື ຕາມ​ລະ­ດູ​ການ ແລະ ໃນ​ທ້ອງ­ຖິ່ນ​ທີ່​ກຳ­ນົດ ເພີ່ມ​ການ​ຮ່ວມ​ມື​ດ້ານ​ວິ­ຊາ​ການ​ໃນ​ການ​ຄຸ້ມ​ຄອງ​ແຮງ​ງານ​ຂອງ​ສອງ​ປະ­ເທດ ເພື່ອ​ນຳ­ໄປ​ສູ່​ການ​ສ້າງ​ຂໍ້​ຕົກ­ລົງ​ຮ່ວມ​ກັນ​ໃນ​ການ​ປົກ​ປ້ອງ​ສິດ­ຜົນ­ປະ­ໂຫຍດ​ຕາມ​ກົດ­ໝາຍ ແລະ ລະ­ບຽບ​ການ​ຂອງ​ສອງ​ປະ­ເທດ ສອງ​ຝ່າຍ​ຮ່ວມ​ກັນ​ໃນ​ການ​ສ້າງ ແລະ ເຊື່ອມ​ໂຍງ​ຖານ​ຂໍ້​ມູນ​ແຮງ​ງານ​ສັນ­ຊາດ ລາວ-ໄທ ທີ່​ເຮັດ​ວຽກ​ຢູ່​ລາວ ແລະ ໄທ ເພື່ອ​ອຳ­ນວຍ​ສະ­ດວກ​ໃນ​ການ​ຕິດ­ຕາມ ແລະ ການ​ຄຸ້ມ​ຄອງ​ແຮງ​ງານ ລາວ-ໄທ ຢ່າງ​ເປັນ​ລະ­ບົບ ແລະ ເພີ່ມ​ການ​ຮ່ວມ​ມື​ດ້ານ​ການ​ປະ­ກັນ​ສັງ­ຄົມ ໂດຍ​ການ​ປຶກ­ສາ​ຫາ­ລື​ສ້າງ​ຂໍ້​ຕົກ­ລົງ​ວ່າ​ດ້ວຍ​ການ​ປະ­ກັນ​ສັງ­ຄົມ​ທີ່​ຈຳ­ເປັນ​ໃຫ້​ແຮງ​ງານ 2 ປະ­ເທດ ແລະ ບັນ­ຫາ​ສຳ­ຄັນ​ອັນ​ໜຶ່ງ 2 ປີ​ຕໍ່­ໜ້າ ກະ­ຊວງ ຮສສ ຈະ​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ລະ­ດັບ​ເຈົ້າ​ໜ້າ­ທີ່​ອາ­ວຸ­ໂສ​ດ້ານ​ແຮງ​ງານ ແລະ ກອງ​ປະ­ຊຸມ​ລະ­ດັບ​ລັດ­ຖະ­ມົນ­ຕີ​ແຮງ​ງານ ລາວ-ໄທ ຄັ້ງ​ຕໍ່​ໄປ ໂດຍ​ຈະ​ກຳ­ນົດ​ວັນ ເວ­ລາ ແລະ ສະ­ຖານ­ທີ່​ຈັດ​ກອງ​ປະ­ຊຸມ ເຊິ່ງ 2 ຝ່າຍ​ຈະ​ໄດ້​ປະ­ສານ​ງານ​ກັນ​ຕໍ່​ໄປ.

    ໂອ­ກາດ​ນີ້ ຍັງ​ໄດ້​ມີ​ການ​ລົງ​ນາມ​ບົດ​ບັນ­ທຶກ​ກອງ​ປະ­ຊຸມ​ລະ­ດັບ​ລັດ­ຖະ­ມົນ­ຕີ​ແຮງ​ງານ ລາວ-ໄທ ໂດຍ ທ່ານ ລີ​ປາວ ຢ່າງ ຫົວ­ໜ້າ​ຫ້ອງ­ການ​ກະ­ຊວງ ຮສສ ສປປ ລາວ ແລະ ທ່ານ ຈະ​ຣິນ ຈັກ­ກະ​ພາກ ຫົວ­ໜ້າ​ຫ້ອງ­ການ​ກະ­ຊວງ​ແຮງ​ງານ ແຫ່ງ ຣາ​ຊະ​ອາ­ນາ­ຈັກ​ໄທ ໂດຍ​ມີ​ທ່ານ​ລັດ­ຖະ­ມົນ­ຕີ​ກະ­ຊວງ​ແຮງ​ງານ​ລາວ ແລະ ໄທ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ