ລາວ-ກຳປູເຈຍ ຫາລືການຮ່ວມມືໃນຫຼາຍດ້ານ

284 25 ກ.ພ. 2019 ຂ່າວໜ້າ​ໜຶ່ງ
ລາວ-ກຳປູເຈຍ ຫາລືການຮ່ວມມືໃນຫຼາຍດ້ານ

    ທ່ານ ປຣາກ ໂຊ​ຄົນ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ຮ່ວມ​ມື​ສາ­ກົນ ຣາ​ຊະ​ອາ­ນາ­ຈັກ​ກຳ­ປູ­ເຈຍ ປະ­ທານ​ຄະ­ນະ​ກຳ­ມາ​ທິ​ການ​ຮ່ວມ​ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ ກຳ­ປູ­ເຈຍ-ລາວ ພ້ອມ​ຄະ­ນະ​ໄດ້​ເດີນ­ທາງ​ຢ້ຽມ­ຢາມ ສປປ ລາວ ແລະ ເຂົ້າ​ຮ່ວມ​ກອງ​ປະ­ຊຸມ​ຄະ­ນະ​ກຳ­ມາ​ທິ​ການ​ຮ່ວມ ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ ລາວ-ກຳ­ປູ­ເຈຍ ຄັ້ງ​ທີ 13 ຢູ່​ນະ­ຄອນ­ຫຼວງ​ວຽງ​ຈັນ ວັນ​ທີ 21-22 ກຸມ­ພາ 2019 ຕາມ​ຄຳ​ເຊີນ​ຂອງ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ສປປ ລາວ ເພື່ອ​ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ອັນ​ດີ­ງາມ​ລະ­ຫວ່າງ ລາວ-ກຳ­ປູ­ເຈຍ.

    ວັນ​ທີ 22 ກຸມ­ພາ 2019 ຢູ່​ສູນ​ການ​ຮ່ວມ​ມື​ສາ­ກົນ ແລະ ການ​ເຝິກ­ອົບ­ຮົມ ໄດ້​ຈັດ​ກອງ​ປະ­ຊຸມ​ຄະ­ນະ​ກຳ­ມາ​ທິ​ການ​ຮ່ວມ​ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ ລາວ-ກຳ­ປູ­ເຈຍ ຄັ້ງ​ທີ 13 ໂດຍ​ເປັນ​ປະ­ທານ​ຮ່ວມ​ຂອງ​ທ່ານ ສະ­ເຫຼີມ​ໄຊ ກົມ​ມະ​ສິດ ແລະ ທ່ານ ປລາກ ໂຊ​ຄົນ ມີ​ຫົວ­ໜ້າ​ເຈົ້າ​ໜ້າ­ທີ່​ອາ­ວຸ­ໂສ ລາວ-ກຳ­ປູ­ເຈຍ ແລະ ພາກ­ສ່ວນ​ກ່ຽວ­ຂ້ອງ​ທັງ​ສອງ​ປະ­ເທດ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ໄດ້​ທົບ​ທວນ­ຄືນ​ຜົນ​ການ­ຈັດ­ຕັ້ງ​ປະ­ຕິ­ບັດ​ບົດ​ບັນ­ທຶກ​ກອງ​ປະ­ຊຸມ ຄັ້ງ​ທີ 12 ທີ່​ໄດ້​ລົງ​ນາມ​ຮ່ວມ​ກັນ​ຢູ່​ຊຽມ​ຣຽບ ຣາ​ຊະ​ອາ­ນາ­ຈັກ​ກຳ­ປູ­ເຈຍ ເດືອນ​ທັນ­ວາ 2014 ແລະ ໄດ້​ສືບ­ຕໍ່​ປຶກ­ສາ​ຫາ­ລື​ແລກ­ປ່ຽນ​ຄວາມ​ຄິດ​ເຫັນ ກ່ຽວ​ກັບ​ການ​ຮ່ວມ​ມື​ສອງ​ຝ່າຍ​ໃນ​ດ້ານ​ຕ່າງໆ ໂດຍ​ສະ­ເພາະ ການ​ຮ່ວມ​ມື​ດ້ານ​ຄວາມ​ໝັ້ນ­ຄົງ ແລະ ປ້ອງ​ກັນ​ຊາດ ການ​ຮ່ວມ​ມື​ດ້ານ​ເສດ­ຖະ­ກິດ ແລະ ວິ­ຊາ​ການ ການ​ຮ່ວມ​ມື​ດ້ານ​ວັດ­ທະ­ນະ­ທຳ ແລະ ສັງ­ຄົມ ການ​ຮ່ວມ​ມື​ດ້ານ​ເສດ­ຖະ­ກິດ​ພາກ​ພື້ນ ແລະ ສືບ­ຕໍ່​ຊຸກ­ຍູ້​ການ​ຮ່ວມ​ມື​ໃນ​ດ້ານ​ອື່ນໆ​ເຊັ່ນ: ວຽກ​ງານ​ຊາຍ​ແດນ ການ​ຮ່ວມ​ມື​ດ້ານ​ກົງ­ສຸນ ການ​ຄ້າ ການ​ສຶກ​ສາ ແລະ ສາ­ທາ­ລະ­ນະ​ສຸກ ນອກ​ນີ້ ສອງ​ຝ່າຍ​ຍັງ​ວາງ​ແນວ­ທາງ​ການ​ພົວ­ພັນ​ຮ່ວມ​ມື​ສອງ​ຝ່າຍ​ໃຫ້​ກວ້າງ­ຂວາງ ແລະ ມີ​ປະ​ສິດ­ທິ​ຜົນ​ນັບ​ມື້​ນັບ​ຫຼາຍ​ຂຶ້ນ ເພື່ອ​ນຳ​ເອົາ​ຜົນ​ປະ­ໂຫຍດ​ຕົວ​ຈິງ​ມາ­ສູ່​ປະ­ຊາ­ຊົນ​ສອງ​ຊາດ ລາວ ແລະ ກຳ­ປູ­ເຈຍ.

    ໂອ­ກາດ​ນີ້ ສອງ​ຝ່າຍ​ຍັງ​ໄດ້​ຮ່ວມ​ກັນ​ຕີ​ລາ­ຄາ​ສູງ​ຕໍ່​ການ​ພົວ­ພັນ ແລະ ການ​ຮ່ວມ​ມື​ລະ­ຫວ່າງ​ສອງ​ປະ­ເທດ ທີ່​ໄດ້​ຮັບ​ການ​ສືບ­ຕໍ່​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ສະ­ແດງ​ອອກ​ຈາກ​ຜົນ­ສຳ­ເລັດ ການ​ແລກ­ປ່ຽນ​ການ​ຢ້ຽມ­ຢາມ​ຂອງ​ຄະ­ນະ​ຜູ້​ແທນ​ຂັ້ນ​ສູງ ແລະ ໃນ​ລະ­ດັບ​ວິ­ຊາ​ການ​ນັບ​ທັງ​ສູນ​ກາງ ແລະ ທ້ອງ­ຖິ່ນ​ຢ່າງ​ເປັນ​ປົກ­ກະ­ຕິ ພິ­ເສດ​ແມ່ນ​ການ​ຢ້ຽມ­ຢາມ​ຢ່າງ​ເປັນ​ທາງ​ການ​ຂອງ​ສົມ­ເດັດ​ອັກ­ຄະ­ມະ­ຫາ­ເສ­ນາ ບໍ­ດີ ເຕ​ໂຈ ຮຸນ​ແຊນ ນາ­ຍົກ­ລັດ­ຖະ­ມົນ­ຕີ​ຣາ​ຊະ​ອາ­ນາ­ຈັກ​ກຳ­ປູ­ເຈຍ ໃນ​ເດືອນ​ທັນ­ວາ 2018 ເຊິ່ງ​ເປັນ​ການ​ປະ­ກອບ­ສ່ວນ​ສຳ­ຄັນ ໃນ​ການ​ຮັດ​ແໜ້ນ​ສາຍ​ພົວ­ພັນ​ມິດ­ຕະ­ພາບ​ທີ່​ເປັນ​ມູນ­ເຊື້ອ ຄວາມ​ສາ­ມັກ­ຄີ​ຖານ​ບ້ານ​ໃກ້​ເຮືອນ​ຄຽງ ການ​ຮ່ວມ​ມື​ລະ­ຫວ່າງ​ສອງ​ປະ­ເທດ ແລະ ປະ­ຊາ­ຊົນ​ສອງ​ຊາດ ລາວ-ກຳ­ປູ­ເຈຍ ທີ່​ມີ​ມູນ­ເຊື້ອ​ຍາວ​ນານ ໃຫ້​ແຕກ​ດອກ​ອອກ​ຜົນ​ຍິ່ງໆ​ຂຶ້ນ ນອກ​ນີ້ ສອງ​ຝ່າຍ​ຍັງ​ໄດ້​ແລກ­ປ່ຽນ​ຄຳ​ຄິດ​ເຫັນ​ຕໍ່​ບັນ­ຫາ​ພາກ​ພື້ນ ແລະ ສາ­ກົນ ທີ່​ຕ່າງ​ຝ່າຍ​ມີ​ຄວາມ​ສົນ­ໃຈ​ຮ່ວມ​ກັນ.

    ພາຍ­ຫຼັງ​ສຳ­ເລັດ​ກອງ​ປະ­ຊຸມ​ດັ່ງ­ກ່າວ ທັງ​ສອງ​ຝ່າຍ​ໄດ້​ລົງ​ນາມ​ຮ່ວມ​ກັນ ເພື່ອ​ຮັບ­ຮອງ​ເອົາ​ບົດ​ບັນ­ທຶກ​ກອງ​ປະ­ຊຸມ​ຄະ­ນະ​ກຳ­ມາ​ທິ​ການ​ຮ່ວມ ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ ລາວ-ກຳ­ປູ­ເຈຍ ຄັ້ງ​ທີ 13 ດ້ວຍ​ຜົນ­ສຳ­ເລັດ​ອັນ​ຈົບ­ງາມ ສຳ­ລັບ​ກອງ​ປະ­ຊຸມ ຄັ້ງ​ທີ 14 ຝ່າຍ​ກຳ­ປູ­ເຈຍ ຈະ​ເປັນ​ເຈົ້າ­ພາບ.

    ວັນ​ດຽວ​ກັນ​ນີ້ ທ່ານ ປລາກ ໂຊ​ຄົນ ພ້ອມ​ຄະ­ນະ ຍັງ​ໄດ້​ເຂົ້າ​ຢ້ຽມ​ຄຳ­ນັບ ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ສປປ ລາວ ຢູ່​ທຳ​ນຽບ​ປະ­ທານ​ປະ­ເທດ ຢ້ຽມ​ຄຳ­ນັບ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ສປປ ລາວ ຢູ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ.

ຂ່າວທີ່ກ່ຽວຂ້ອງ