ລາວ-ຫວຽດນາມ ເພີ່ມທະວີການຮ່ວມມື ແລະ ຮ່ວມລົງນາມເອກະສານ 9 ສະບັບ

455 25 ກ.ພ. 2019 ຂ່າວໜ້າ​ໜຶ່ງ
ລາວ-ຫວຽດນາມ ເພີ່ມທະວີການຮ່ວມມື ແລະ ຮ່ວມລົງນາມເອກະສານ 9 ສະບັບ

    ໂດຍ​ຕອບ​ສະ­ໜອງ​ຕາມ​ຄຳ​ເຊີນ​ຂອງ​ສະ­ຫາຍ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່ ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ​ປະ­ຊາ­ຊົນ ປະ­ຕິ­ວັດ​ລາວ ປະ­ທານ​ປະ­ເທດ ສະ­ຫາຍ ຫງວ​ຽນ ຟູ ຈ້ອງ ເລ­ຂາ­ທິ­ການ​ໃຫຍ່ ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ​ກອມ​ມູ​ນິດ​ຫວຽດ­ນາມ ປະ­ທານ​ປະ­ເທດ ແຫ່ງ ສສ ຫວຽດ­ນາມ ພ້ອມ​ຄະ­ນະ​ຜູ້​ແທນ​ຂັ້ນ​ສູງ​ຂອງ​ພັກ-ລັດ ສສ ຫວຽດ­ນາມ ໄດ້​ເດີນ­ທາງ​ມາ​ຢ້ຽມ­ຢາມ ສັນ­ຖະ­ວະ­ໄມ­ຕີ ສປປ ລາວ ຢ່າງ​ເປັນ​ທາງ​ການ ວັນ​ທີ 24-25 ກຸມ­ພາ​ນີ້.

    ພິ­ທີ​ຕ້ອນ­ຮັບ ສະ­ຫາຍ ຫງວ​ຽນ ຟູ ຈ້ອງ ພ້ອມ​ຄະ­ນະ​ຢ່າງ​ເປັນ​ທາງ​ການ ໄດ້​ຈັດ​ຂຶ້ນ​ຢ່າງ​ສົມ​ກຽດ ວັນ​ທີ 24 ກຸມ­ພາ 2019 ທີ່​ທຳ​ນຽບ​ປະ­ທານ​ປະ­ເທດ ໂດຍ​ມີ​ສະ­ຫາຍ ບຸນ​ຍັງ ວໍ­ລະ​ຈິດ ພ້ອມ​ດ້ວຍ​ບັນ­ດາ​ສະ­ຫາຍ​ການ​ນຳ​ຂັ້ນ​ສູງ​ເຂົ້າ​ຮ່ວມ.

    ພາຍ­ຫຼັງ​ສຳ­ເລັດ​ພິ­ທີ​ຕ້ອນ­ຮັບ​ຢ່າງ​ເປັນ​ທາງ​ການ ສອງ​ຝ່າຍ​ໄດ້​ພົບ​ປະ​ໂດຍ​ສະ­ຫາຍ ບຸນ​ຍັງ ວໍ­ລະ​ຈິດ ໄດ້​ກ່າວ​ສະ­ແດງ​ຄວາມ​ຍິນ​ດີ​ຕ້ອນ­ຮັບ ແລະ ຕີ​ລາ­ຄາ​ສູງ ທີ່​ສະ­ຫາຍ ຫງວ​ຽນ ຟູ ຈ້ອງ ໄດ້​ເລືອກ​ເອົາ ສປປ ລາວ ເປັນ​ປະ­ເທດ​ທຳ​ອິດ ໃນ​ການ­ເຄື່ອນ­ໄຫວ​ຕ່າງ­ປະ­ເທດ ພາຍ­ຫຼັງ​ຖືກ​ເລືອກ​ຕັ້ງ​ເປັນ​ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ສສ ຫວຽດ­ນາມ ມາ​ຢ້ຽມ­ຢາມ​ສັນ­ຖະ­ວະ­ໄມ­ຕີ ສປປ ລາວ ຢ່າງ​ເປັນ​ທາງ​ການ ເຊິ່ງ​ໄດ້​ນຳ​ເອົາ​ໄມ­ຕີ​ຈິດ​ມິດ­ຕະ­ພາບ ແລະ ຄວາມ​ຮັກ­ແພງ​ທີ່​ເຕັມ​ໄປ​ດ້ວຍ​ມິດ​ຈິດ​ມິດ​ໃຈ​ອັນ​ດູດ­ດື່ມ ສະ­ໜິດ­ສະ­ໜົມ ຖານ​ສະ­ຫາຍ​ອ້າຍ​ນ້ອງ ແລະ ຄວາມ​ສາ­ມັກ­ຄີ​ພິ­ເສດ​ຈາກ​ພັກ-ລັດ ແລະ ປະ­ຊາ­ຊົນ​ຫວຽດ­ນາມ​ອ້າຍ​ນ້ອງ​ມາ­ສູ່​ພັກ-ລັດ ແລະ ປະ­ຊາ­ຊົນ​ລາວ ພ້ອມ​ນັ້ນ ຖື​ເປັນ​ການ​ປະ­ກອບ­ສ່ວນ​ສຳ­ຄັນ ເຂົ້າ​ໃນ​ການ​ເພີ່ມ​ພູນ​ຄູນ​ສ້າງ ສາຍ​ພົວ­ພັນ​ມິດ­ຕະ­ພາບ​ອັນ​ຍິ່ງ​ໃຫຍ່ ຄວາມ​ສາ­ມັກ­ຄີ​ແບບ​ພິ­ເສດ ແລະ ການ​ຮ່ວມ​ມື​ຮອບ­ດ້ານ​ລະ­ຫວ່າງ​ສອງ​ພັກ ສອງ​ລັດ ແລະ ປະ­ຊາ­ຊົນ​ສອງ​ຊາດ ລາວ-ຫວຽດ­ນາມ ທີ່​ປະ­ທານ ໂຮ່​ຈີ​ມິງ ຜູ້​ຍິ່ງ​ໃຫຍ່ ປະ­ທານ ໄກ­ສອນ ພົມ­ວິ­ຫານ ແລະ ປະ­ທານ ສຸ​ພາ­ນຸ​ວົງ ທີ່​ເຄົາ­ລົບ​ຮັກ ເປັນ​ຜູ້​ສ້າງ​ຖະ​ນຸ​ຖະ­ໜອມ ແລະ ໄດ້​ຮັບ​ການ​ເສີມ​ຂະ­ຫຍາຍ​ໂດຍ​ບັນ­ດາ​ການ​ນຳ​ຮຸ່ນ​ຕ່າງໆ ບັນ­ດາ​ນັກ­ຮົບ​ປະ­ຕິ­ວັດ ແລະ ປະ­ຊາ­ຊົນ​ສອງ​ປະ­ເທດ ຈົນ​ໄດ້​ກາຍ­ເປັນ​ມໍ­ລະ­ດົກ​ລວມ​ອັນ​ລ້ຳ​ຄ່າ​ຂອງ​ສອງ​ຊາດ.

    ໂອ­ກາດ​ນີ້ ສະ­ຫາຍ ຫງວ​ຽນ ຟູ ຈ້ອງ ໄດ້​ສະ­ແດງ​ຄວາມ​ປິ​ຕິ​ຊົມ­ຊື່ນ​ເປັນ​ຢ່າງ​ຍິ່ງ ທີ່​ໄດ້​ນຳ­ພາ​ຄະ­ນະ​ຜູ້​ແທນ​ຂັ້ນ​ສູງ​ພັກ-ລັດ ສສ ຫວຽດ­ນາມ ເດີນ­ທາງ​ມາ​ຢ້ຽມ­ຢາມ​ສັນ­ຖະ­ວະ­ໄມ­ຕີ ສປປ ລາວ ຢ່າງ​ເປັນ​ທາງ​ການ​ເປັນ​ຄັ້ງ​ທຳ​ອິດ ພາຍ­ຫຼັງ​ທີ່​ໄດ້​ຮັບ​ເລືອກ​ຕັ້ງ​ເປັນ​ປະ­ທານ​ປະ­ເທດ ແຫ່ງ ສສ ຫວຽດ­ນາມ ໃນ​ກອງ​ປະ­ຊຸມ​ສະ­ພາ​ແຫ່ງ​ຊາດ ເທື່ອ​ທີ 6 (ສະ­ໄໝ​ທີ XIV) ໃນ​ປີ2018 ເຊິ່ງ​ເປັນ​ການ­ສະ­ແດງ​ເຖິງ​ຄວາມ​ມີ​ຊີ­ວິດ​ຊີ­ວາ ແຫ່ງ​ສາຍ​ພົວ­ພັນ​ມິດ­ຕະ­ພາບ​ອັນ​ເປັນ​ມູນ­ເຊື້ອ​ຄວາມ​ສາ­ມັກ­ຄີ​ພິ­ເສດ ການ​ຮ່ວມ​ມື​ຮອບ­ດ້ານ​ລະ­ຫວ່າງ ຫວຽດ­ນາມ-ລາວ ພ້ອມ​ທັງ​ສະ­ແດງ​ຄວາມ​ຂອບ​ອົກ​ຂອບ­ໃຈ​ຢ່າງ​ສູງ ຕໍ່​ການ​ຕ້ອນ­ຮັບ​ຢ່າງ​ອົບ​ອຸ່ນ ສົມ​ກຽດ ບົນ​ນ້ຳ­ໃຈ​ໄມ­ຕີ​ຈິດ​ມິດ­ຕະ­ພາບ​ທີ່​ຍິ່ງ​ໃຫຍ່ ຄວາມ​ສາ­ມັກ­ຄີ​ພິ­ເສດ ຖານ​ສະ­ຫາຍ​ອ້າຍ​ນ້ອງ​ອັນ​ສະ­ໜິດ­ສະ­ໜົມ ຂອງ​ບັນ­ດາ​ສະ­ຫາຍ​ການ​ນຳ​ຂັ້ນ​ສູງ​ພັກ-ລັດ ແລະ ປະ­ຊາ­ຊົນ​ລາວ​ທີ່​ມີ​ຕໍ່​ຄະ­ນະ.

    ການ​ພົບ​ປະ​ຄັ້ງ​ນີ້ ສອງ​ຝ່າຍ​ໄດ້​ແຈ້ງ​ໃຫ້​ກັນ​ຊາບ ກ່ຽວ​ກັບ​ສະ­ພາບ​ການ​ທີ່​ພົ້ນ​ເດັ່ນ​ຂອງ​ແຕ່​ລະ​ພັກ ແຕ່​ລະ​ປະ­ເທດ ນັບ​ແຕ່​ຕົ້ນ​ສະ­ໄໝ​ຂອງ​ກອງ​ປະ­ຊຸມ​ໃຫຍ່ ຂອງ​ແຕ່​ລະ​ພັກ​ເປັນ­ຕົ້ນ​ມາ ຕີ​ລາ­ຄາ​ການ​ພົວ­ພັນ​ຮ່ວມ​ມື​ລະ­ຫວ່າງ​ສອງ​ພັກ ສອງ​ລັດ ໃນ​ໄລ­ຍະ​ທີ່​ຜ່ານ​ມາ ແລະ ປຶກ­ສາ​ຫາ­ລື​ທິດ​ທາງ​ການ​ຮ່ວມ​ມື​ໃນ­ຕໍ່­ໜ້າ ເພື່ອ​ນຳ​ເອົາ​ການ​ພົວ­ພັນ​ຮ່ວມ​ມື​ແບບ​ພິ­ເສດ​ລະ­ຫວ່າງ​ສອງ​ພັກ ສອງ​ລັດ ແລະ ປະ­ຊາ­ຊົນ​ສອງ​ປະ­ເທດ ກ້າວ​ໄປ​ສູ່​ຈຸດ​ສູງ​ອັນ​ໃໝ່ ໃນ​ນີ້ ໄດ້​ຕີ​ລາ­ຄາ​ສູງ​ຕໍ່​ຜົນ­ສຳ­ເລັດ​ຮອບ ດ້ານ​ສຳ­ຄັນ​ຂອງ​ແຕ່​ລະ​ປະ­ເທດ ໃນ​ການ­ຈັດ­ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ຫຼ້າ​ສຸດ​ຂອງ​ພັກ​ຕົນ ແລະ ສະ­ແດງ​ຄວາມ​ເຊື່ອ​ໝັັ້​ນວ່າ ພາຍ​ໃຕ້​ການ​ນຳ­ພາ​ອັນ​ຖືກ­ຕ້ອງ​ຂອງ​ພັກ ທັງ​ສອງ​ພາ­ລະ­ກິດ​ປ່ຽນ­ແປງ​ໃໝ່​ຢູ່​ແຕ່​ລະ​ປະ­ເທດ ຈະ​ສືບ­ຕໍ່​ມີ​ຜົນ­ສຳ­ເລັດ​ໃໝ່ ນຳ​ເອົາ​ປະ­ເທດ​ຊາດ​ກ້າວ​ຂຶ້ນ ຢ່າງ​ໜັກ​ແໜ້ນ ໂດຍ​ສະ­ເພາະ​ແມ່ນ​ການ​ປະ­ຕິ­ບັດ​ມະ­ຕິ​ຂອງ​ກອງ​ປະ­ຊຸມ​ໃຫຍ່ ຄັ້ງ​ທີ X ຂອງ​ພັກ ສປປ ລາວ ແລະ ຄັ້ງ​ທີ XII ຂອງ​ພັກ​ກອມ​ມູ​ນິດ​ຫວຽດ­ນາມ ເພື່ອ​ກ້າວ​ໄປ​ສູ່​ການ​ກະ­ກຽມ​ດຳ­ເນີນ​ກອງ​ປະ­ຊຸມ​ໃຫຍ່​ຄັ້ງ​ຕໍ່​ໄປ​ຂອງ​ພັກ​ຕົນ ໃຫ້​ປະ­ສົບ​ຜົນ­ສຳ­ເລັດ​ຕົວ​ຈິງ ພ້ອມ​ນັ້ນ ການ​ນຳ​ຂັ້ນ​ສູງ​ຂອງ​ລາວ-ຫວຽດ­ນາມ ໄດ້​ສະ­ແດງ​ຄວາມ​ຂອບ­ໃຈ ແລະ ຮູ້​ບຸນ­ຄຸນ​ເຊິ່ງ​ກັນ ແລະ ກັນ ທີ່​ໄດ້​ໃຫ້­ການ​ສະ­ໜັບ­ສະ­ໜູນ ແລະ ຊ່ວຍ­ເຫຼືອ​ເຊິ່ງ​ກັນ​ມາ​ໂດຍ​ຕະ­ຫຼອດ ທັງ​ໃນ​ໄລ­ຍະ​ຕໍ່­ສູ້​ກູ້​ຊາດ​ໃນ​ເມື່ອ​ກ່ອນ ແລະ ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ປະ­ເທດ​ຊາດ ໃນ​ປັດ­ຈຸ­ບັນ​ຢູ່​ແຕ່​ລະ​ປະ­ເທດ.

    ພາຍ­ຫຼັງ​ການ​ພົບ​ປະ​ສອງ​ຝ່າຍ ສະ­ຫາຍ ບຸນ​ຍັງ ວໍ­ລະ​ຈິດ ແລະ ສະ­ຫາຍ ຫງວ​ຽນ ຟູ ຈ້ອງ ໄດ້​ເຂົ້າ​ຮ່ວມ​ເປັນ​ສັກ­ຂີ​ພິ­ຍານ ໃນ​ການ​ລົງ​ນາມ​ບັນ­ດາ​ເອ­ກະ­ສານ​ຮ່ວມ​ມື​ລະ­ຫວ່າງ​ສອງ​ປະ­ເທດ ຈຳ­ນວນ 9 ສະ­ບັບ ປະ­ກອບ​ມີ ສັນ­ຍາ​ວ່າ​ດ້ວຍ​ການ​ຮ່ວມ​ມື​ດ້ານ​ການ​ເງິນ ໄລ­ຍະ​ປີ 2019-2020 ສັນ­ຍາ​ວ່າ​ດ້ວຍ​ການ​ຮ່ວມ​ມື​ພັດ­ທະ­ນາ​ໂຄງ­ການ​ພະ­ລັງ­ງານ​ໄຟ­ຟ້າ ແລະ ບໍ່​ແຮ່ ຂໍ້​ຕົກ­ລົງ​ວ່າ​ດ້ວຍ​ການ​ຂຸດ​ຄົ້ນ​ທ່າ­ແຮງ​ບົ່ມ​ຊ້ອນ ໃນ​ການ​ກໍ່­ສ້າງ​ເສັ້ນ­ທາງ​ລົດ­ໄຟ ວຽງ​ຈັນ-ຫວຸງ​ອາງ ບົດ​ບັນ­ທຶກ​ການ​ຮ່ວມ​ມື​ລະ­ຫວ່າງ​ສອງ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ລາວ-ຫວຽດ­ນາມ ໃນ​ຂົງ­ເຂດ​ດ້ານ​ການ​ປ່ຽນ­ແປງ​ສະ­ພາບ​ດິນ​ຟ້າ​ອາ­ກາດ ແລະ ອະ­ນຸ​ຮັກ​ຊີ­ວະ​ນາໆພັນ ບົດ​ບັນ­ທຶກ​ມອບ-ຮັບ​ໂຄງ­ການ​ສ້າງ​ຖານ​ຂໍ້​ມູນ​ຂ່າວ­ສານ​ພູມ​ສັນ­ຖານ​ຮັບ​ໃຊ້​ສິ່ງ­ແວ­ດລ້ອມ​ຢູ່ ສປປ ລາວ ບົດ​ບັນ­ທຶກ​ການ​ຮ່ວມ​ມື​ວ່າ​ດ້ວຍ​ການ­ຈັດ­ຕັ້ງ​ຜັນ​ຂະ­ຫຍາຍ​ໂຄງ­ການ​ປ່ຽນ​ຖ່າຍ​ອຸ­ປະ­ກອນ ໃຫ້​ແກ່​ສະ­ຖາ­ນີ​ວິ­ທະ­ຍຸ​ກະ­ຈາຍ­ສຽງ​ແຫ່ງ​ຊາດ​ລາວ ບົດ​ບັນ­ທຶກ​ມອບ-ຮັບ​ໂຄງ­ການ​ກໍ່­ສ້າງ​ສູນ​ບໍ­ລິ­ການ​ເຕັກ­ນິກ​ກະ­ສິ­ກຳ​ແຂວງ​ຫົວ­ພັນ ຂໍ້​ຕົກ­ລົງ​ວ່າ​ດ້ວຍ​ການ​ປະ­ຕິ­ບັດ​ໂຄງ­ການ​ສ້ອມ­ແປງ​ຍົກ​ລະ­ດັບ​ເຂດ​ອະ­ນຸ­ສອນ​ສະ­ຖານ ປະ­ທານ ໂຮ່​ຈີ​ມິງ ຢູ່​ບ້ານ​ຊຽງ​ຫວາງ ເມືອງ​ໜອງ​ບົກ ແຂວງ​ຄຳ​ມ່ວນ ແລະ ບົດ​ບັນ­ທຶກ​ການ​ມອບ-ຮັບ​ໂຄງ­ການ​ເພີ່ມ​ທະ­ວີ ຄວາມ​ອາດ​ສາ­ມາດ​ໃນ​ການ​ຄົ້ນ­ຄວ້າ​ວິ­ທະ­ຍາ­ສາດ​ໃຫ້​ແກ່​ສະ­ພາ​ວິ­ທະ­ຍາ­ສາດ​ແຫ່ງ​ຊາດ​ລາວ.

    ພາຍ­ຫຼັງ​ສຳ­ເລັດ​ການ​ພົບ​ປະ​ສອງ​ຝ່າຍ ສະ­ຫາຍ ຫງວ​ຽນ ຟູ ຈ້ອງ ພ້ອມ​ຄະ­ນະ ໄດ້​ພົບ​ປະ​ຢ້ຽມ­ຢາມ ສະ­ຫາຍ ທອງ​ລຸນ ສີ​ສຸ​ລິດ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ນາ­ຍົກ­ລັດ­ຖະ­ມົນ­ຕີ ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ພົບ​ປະ​ຢ້ຽມ­ຢາມ ສະ­ຫາຍ​ນາງ ປາ­ນີ ຢາ​ທໍ່​ຕູ້ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ປະ­ທານ​ສະ­ພາ​ແຫ່ງ​ຊາດ ທີ່​ສຳ­ນັກ­ງານ​ສະ­ພາ​ແຫ່ງ​ຊາດ ພ້ອມ​ນີ້ ສະ­ຫາຍ ຫງວ​ຽນ ຟູ ຈ້ອງ ພ້ອມ​ຄະ­ນະ ຍັງ​ໄດ້​ໄປ​ຢ້ຽມ­ຢາມ​ໂຄງ­ການ​ກໍ່­ສ້າງ​ຫໍ​ສະ­ພາ​ແຫ່ງ​ຊາດ​ລາວ ເຊິ່ງ​ເປັນ​ຂອງ­ຂວັນ​ຂອງ​ພັກ-ລັດ ແລະ ປະ­ຊາ­ຊົນ​ຫວຽດ­ນາມ ໃຫ້​ແກ່​ພັກ-ລັດ ແລະ ປະ­ຊາ­ຊົນ ລາວ.

    ໃນ​ວັນ​ດຽວ​ກັນ ສະ­ຫາຍ ຫງວ​ຽນ ຟູ ຈ້ອງ ຍັງ​ໄດ້​ໄປ​ຢ້ຽມ­ຢາມ ສະ­ຫາຍ ຈູມ​ມາ­ລີ ໄຊ​ຍະ​ສອນ ອະ­ດີດ​ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ທີ່​ທຳ​ນຽບ​ປະ­ທານ​ປະ­ເທດ ແລະ ໃນ​ຕອນ​ຄ່ຳ​ວັນ​ດຽວ​ກັນ ສະ­ຫາຍ ບຸນ​ຍັງ ວໍ­ລະ​ຈິດ ໄດ້​ເປັນ​ເຈົ້າ­ພາບ​ຈັດ​ງານ​ລ້ຽງ​ເພື່ອ​ເປັນ​ກຽດ​ແກ່ ສະ­ຫາຍ ຫງວ​ຽນ ຟູ ຈ້ອງ ແລະ ຄະ­ນະ​ຜູ້​ແທນ​ຂັ້ນ​ສູງ​ພັກ-ລັດ ສສ ຫວຽດ­ນາມ ທີ່​ທຳ​ນຽບ​ປະ­ທານ​ປະ­ເທດ.

ຂ່າວທີ່ກ່ຽວຂ້ອງ