ເບິ່ງບ້ານເຂົາເອົາບົດຮຽນ 26/02/2019

195 26 ກ.ພ. 2019 ຫົວຂໍ້ຂ່າວອື່ນໆ

    ມື້­ນີ້ ມີ​ຂ່າວ​ກ່ຽວ​ກັບ​ແຜນ​ປັບ​ຂຶ້ນ​ພາ­ສີ​ຢູ່​ປະ­ເທດ​ສະ​ວິດ ຄະ­ດີ​ນາຍ​ແພດ​ບ້າ​ກາມ​ທີ່ ອັງ­ກິດ ແລະ ກ່ຽວ​ກັບ​ກົດ­ໝາຍ​ລົງ­ໂທດ​ຜູ້​ຊາຍ ທີ່​ຍົວະ​ກິນ​ໄຂ່​ແດງ​ແມ່­ຍິງ ແລ້ວ​ເປີດ​ອາດ​ຫຼາດ.

    ທີ່ ປະ­ເທດ​ສະ​ວິດ (ສະ​ວິດ​ເຊີ​ແລນ): ໃນ​ທ້າຍ​ປີ 2017 ສະ​ວິດ ປະ­ເທດ​ທີ່​ຮັ່ງ­ມີ​ສີ​ສຸກ​ລະ­ດັບ​ແຖວ​ໜ້າ​ປະ­ເທດ​ໜຶ່ງ​ຂອງ​ໂລກ ໄດ້​ດຳ­ເນີນ​ຄວາມ​ພະ­ຍາ­ຍາມ ເພື່ອ​ປັບ­ປຸງ​ລະ­ບົບ​ສະ­ຫວັດ­ດີ​ການ-ສັງ­ຄົມ ແນ­ໃສ່​ຮອງ​ຮັບ​ສັງ­ຄົມ​ຜູ້​ເຖົ້າ​ທີ່​ເພີ່ມ​ຂຶ້ນ ຄວາມ​ພະ­ຍາ­ຍາມ​ດັ່ງ­ກ່າວ ເລີ່ມ​ຈາກ​ແຜນ​ປັບ​ຂຶ້ນ​ອັດ­ຕາ​ພາ­ສີ ແຕ່​ກ່ອນ​ຈະ​ລົງ­ມື​ປະ­ຕິ­ບັດ​ຕົວ​ຈິງ ທາງ​ການ​ຂອງ​ປະ­ເທດ​ນີ້ ໄດ້​ຈັດ​ໃຫ້​ມີ​ການ​ລົງ​ປະ­ຊາ​ມະ­ຕິ ເພື່ອ​ໃຫ້​ທົ່ວ​ສັງ­ຄົມ​ລ່ອງ​ຊ່ອງ ເພາະ​ເລື່ອງ​ພາ­ສີ​ນີ້ ເປັນ​ບັນ­ຫາ​ກະ­ທົບ​ໄວ ແລະ ເປັນ​ການ​ປັບ­ປຸງ​ໃນ​ຮອບ 20 ປີ ເນື້ອ​ໃນ​ທີ່​ໃຫ້​ລົງ​ປະ­ຊາ​ມະ­ຕິ​ນັ້ນ ແມ່ນ​ກ່ຽວ​ກັບ​ການ​ຈ່າຍ​ພາ­ສີ​ເພີ່ມ​ເຂົ້າ​ສູ່​ລະ­ບົບ​ສະ­ຫວັດ­ດີ​ການ-ສັງ­ຄົມ ສຳ­ລັບ​ຜູ້​ອາ­ຍຸ​ສູງ ເພາະ​ຜ່ານ​ມາ​ນັ້ນ ເຫັນ​ວ່າ​ດອກ​ເບ້ຍ​ການ​ເສຍ​ພາ­ສີ​ຍັງ​ຕ່ຳ ເຊິ່ງ​ສົ່ງ​ຜົນ​ກະ­ທົບ​ຕໍ່​ກອງ​ທຶນ​ບຳ​ເນັດ ແລະ ບຳ­ນານ ໃນ​ປັດ­ຈຸ­ບັນ ພົນ­ລະ­ເມືອງ​ປະ­ເທດ​ສະ​ວິດ ທີ່​ມີ​ອາ­ຍຸ​ລະ­ຫວ່າງ 50-60 ປີ ພວມ​ຢູ່​ໃນ​ໄລ­ຍະ​ກຽມ​ເຂົ້າ​ບຳ­ນານ​ຫຼາຍ​ຂຶ້ນ ເປົ້າ​ໝາຍ​ການ​ປັບ​ຂຶ້ນ​ອັດ­ຕາ​ພາ­ສີ ແມ່ນ​ຈາກ 8% ເປັນ 8,3% ເພີ່ມ​ອັດ­ຕາ​ຫັກ​ເງິນ​ປະ­ກັນ​ສັງ­ຄົມ​ຄ່າ​ຈ້າງ​ຈາກ 10,25% ເປັນ 10,55% ແລະ ເພີ່ມ​ອາ­ຍຸ​ພາ­ສີ​ຂອງ​ແມ່­ຍິງ​ໃຫ້​ເທົ່າ​ທຽມ​ກັບ​ຜູ້​ຊາຍ ຄື ຈາກ​ອາ­ຍຸ 64 ປີ ເປັນ 65 ປີ.

    ທີ່ ອັງ­ກິດ: ມີ​ຂ່າວ​ກ່ຽວ​ກັບ​ທ່ານ­ໝໍ​ອັງ­ກິດ​ຄົນ​ໜຶ່ງ ຊື່ ມາ­ນິດ ຊາ (Manish Shah) ອາ­ຍຸ 41 ປີ ສວຍ​ໃຊ້​ວິ­ຊາ​ຊີບ​ບັງ​ໜ້າ ເພື່ອ​ລວນ​ລາມ​ທາງ​ເພດ​ຕໍ່​ເດັກ​ເຍົາ​ໄວ ລວມ​ທັງ​ເດັກ​ທີ່​ມີ​ອາ­ຍຸ​ຕ່ຳ​ກວ່າ 13 ປີ ໜຶ່ງ​ຄົນ ໂດຍ​ລວມ​ແລ້ວ ນາຍ​ແພດ​ບ້າ​ກາມ​ຄົນ​ນີ້ ໄດ້​ກໍ່​ຄະ­ດີ​ທັງ​ໝົດ 118 ເລື່ອງ (The Nation 4/8/2017) ທ່ານ­ໝໍ​ຄົນ​ທີ່​ວ່າ ເຮັດ​ວຽກ​ຢູ່​ເຂດ ຣອມ​ຝອດ ທາງ​ທິດ­ຕາ­ເວັນ­ອອກ​ຂອງ​ນະ­ຄອນ­ຫຼວງ​ລອນ​ດອນ ເພື່ອ​ເຮັດ​ໃຫ້​ຄະ­ດີ​ນີ້​ມີ​ຄວາມ​ໂປ່ງ​ໃສ ກ່ອນ​ຈະ​ຕັດ­ສິນ​ຄວາມ​ຜິດ​ຂອງ​ຜູ້­ກ່ຽວ ທາງ​ການ​ອັງ­ກິດ ໄດ້​ຕິດ​ຕັ້ງ​ໂທລະ­ສັບ​ສາຍ​ສະ­ເພາະ​ເພື່ອ​ເກັບ​ກຳ​ຂໍ້​ມູນ ຫຼື ຄຳ​ຄິດ​ເຫັນ​ຈາກ​ທຸກ​ຄົນ​ທີ່​ມີ​ບັນ­ຫາ​ກັບ​ຄະ­ດີ​ນີ້ ຂ່າວ​ບອກ​ວ່າ ນາຍ​ແພດ ມະ​ນິດ ຊາ ມີ​ກຳ­ນົດ​ປາ­ກົດ​ໂຕ​ຢູ່​ສານ ໃນ​ວັນ​ທີ 31 ສິງ­ຫາ ປີ​ນັ້ນ​ເອງ.

    ທີ່ ມຽນ​ມາ: ເລື່ອງ​ການ​ມີ​ເພດ​ສຳ­ພັນ ຈົນ​ເຮັດ​ໃຫ້​ຝ່າຍ​ຍິງ​ຖື­ພາ​ຄາ​ທ້ອງ ແລ້ວ​ຜູ້​ຊາຍ​ເປີດ​ອາດ​ຫຼາດ​ນັ້ນ ຈະ​ໄດ້​ຮັບ​ໂທດ​ຕິດ​ຄຸກ (ສຳ­ລັບ​ຝ່າຍ​ຊາຍ) ສູງ​ສຸດ​ເປັນ​ເວ­ລາ 7 ປີ ຂໍ້​ບັນ­ຍັດ​ທີ່​ວ່າ​ນີ້ ໄດ້​ກຳ­ນົດ​ໄວ້​ໃນ​ກົດ­ໝາຍ​ສະ­ບັບ​ໃໝ່ ທີ່​ມີ​ເປົ້າ​ໝາຍ​ສ້າງ​ຄວາມ​ເຂັ້ມ­ແຂງ ແລະ ປ້ອງ​ກັນ​ສິດ­ທິ​ຂອງ​ແມ່­ຍິງ ທັງ​ເພື່ອ​ກຳ​ຈັດ­ການ​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ ກົດ­ໝາຍ​ໄດ້​ກຳ­ນົດ​ໃຫ້​ພຶດ­ຕິ​ກຳ ການ​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ​ເປັນ​ອາ​ຊະ​ຍາ​ກຳ ກຳ­ນົດ​ໂທດ​ຂົ່ມ​ຂຶ້ນ​ສູງ​ສຸດ​ດ້ານ​ການ​ປະ­ຫານ​ຊີ­ວິດ ສ່ວນ​ຜູ້​ຊາຍ​ຄົນ​ໃດ​ທີ່­ຢູ່​ຮ່ວມ​ຊີ­ວິດ​ກັບ​ແມ່­ຍິງ ແຕ່​ສຸດ​ທ້າຍ​ປະ­ຕິ­ເສດ​ທີ່​ຈະ​ເອົາ​ຍິງ​ຄົນ​ນັ້ນ​ເປັນ​ເມຍ ຈະ​ໄດ້​ຮັບ​ໂທດ​ຕິດ​ຄຸກ​ສູງ​ສຸດ 5 ປີ ແຕ່​ຖ້າ​ຍິງ​ຄົນ​ນັ້ນ​ຖື­ພາ ຝ່າຍ​ຊາຍ​ຈະ​ຕິດ​ຄຸກ​ສູງ​ສຸດ 7 ປີ ພາຍ​ໃຕ້​ກົດ­ໝາຍ​ດັ່ງ­ກ່າວ ແມ່­ຍິງ​ສາ­ມາດ​ຮ້ອງ­ທຸກ​ຫາກ​ພວກ​ເຂົາ​ຖືກ​ນາບ​ຂູ່​ໃຫ້​ຢ້ານ​ກົວ ເມື່ອ​ຢູ່​ຮ່ວມ​ກັບ​ຜູ້​ຊາຍ​ໃນ​ເມື່ອ​ກ່ອນ ມຽນ​ມາ​ບໍ່​ມີ​ກົດ­ໝາຍ​ປ້ອງ​ກັນ​ຄວາມ​ຮຸນ​ແຮງ​ໃນ​ຄອບ­ຄົວ ຫຼື ຕ້ານ​ການ​ລ່ວງ​ລະ­ເມີດ​ທາງ​ເພດ​ໃນ​ສະ­ຖານ­ທີ່​ເຮັດ​ວຽກ ມີ​ພຽງ​ກົດ­ໝາຍ​ອາ­ຍາ​ທີ່​ລົງ­ໂທດ​ໃນ​ຄະ­ດີ​ຂົ່ມ­ຂືນ ແຕ່​ບໍ່​ໄດ້​ກວມ​ເອົາ​ການ​ລ່ວງ​ລະ­ເມີດ​ທາງ​ເພດ​ຕໍ່​ພັນ​ລະ​ຍາ ຍົກ­ເວັ້ນ​ຖ້າ​ພັນ​ລະ​ຍາ​ມີ​ອາ­ຍຸ​ຕ່ຳ​ກວ່າ 13 ປີ​ເທົ່າ​ນັ້ນ.

ຂ່າວທີ່ກ່ຽວຂ້ອງ