EU ຈະເລີີ່ມໃຊ້ເຕັກໂນໂລຊີປັນຍາປະດິດ ກວດຄົນຂ້າມຊາຍແດນ

279 26 ກ.ພ. 2019 ຫົວຂໍ້ຂ່າວອື່ນໆ

    ຖ້າ​ທ່ານ​ເດີນ­ທາງ​ຂ້າມ​ຊາຍ​ແດນ​ລະ­ຫວ່າງ​ປະ­ເທດ​ຕ່າງໆ ໃນ​ເຂດ​ຂອງ​ເອີ​ຣົບ ໃນ​ອະ­ນາ­ຄົດ ທ່ານ​ອາດ​ຕ້ອງ​ຕອບ​ຄຳ​ຖາມ​ຕ່າງໆ ທີ່​ຖາມ​ໂດຍ​ໂປຣ​ແກຣມ​ຄອມ​ພິວ​ເຕີ ທີ່​ເຮັດ​ໜ້າ­ທີ່​ເປັນ​ເຈົ້າ​ໜ້າ­ທີ່​ທີ່​ດ່ານ​ກວດ​ຄົນ​ເຂົ້າ​ເມືອງ.

    ຢ່າງ­ໃດ​ກໍ​ຕາມ ທີມ​ນັກ­ວິ­ທະ­ຍາ­ສາດ​ໃນ​ອັງ­ກິດ ບອກ​ວ່າ ໂປຣ​ແກຣມ​ຄອມ​ພິວ​ເຕີ​ຕ່າງ​ຈາກ​ເຈົ້າ​ໜ້າ­ທີ່​ມະ­ນຸດ ບ່ອນ​ທີ່​ສາ­ມາດ​ຈັບ​ການ​ຕົວະ​ໄດ້​ດີ​ກວ່າ.

    ທ່ານ ຄີວ​ລີ່ ຄຣັອກ​ເກັດ (Keeley Crockett) ຜູ້​ຊ່ຽວ­ຊານ​ດ້ານ​ເຕັກ​ໂນ​ໂລ​ຊີ​ປັນ­ຍາ​ປະ­ດິດ ທີ່​ມະ­ຫາ­ວິ­ທະ­ຍາ­ໄລ​ແມນ​ເຊ​ສ​ເຕີ ເມ​ໂທຣ ໂພ​ລິ​ແທນ (Manchester Metropolitan) ກ່າວ​ວ່າ ໂປຣ​ແກຣມ​ນີ້ ຈັບ​ຜິດ​ຄົນ​ຈາກ​ພຶດ­ຕິ​ກຳ​ທີ່​ສະ­ແດງ​ອອກ​ທາງ​ໃບ​ໜ້າ ໂດຍ​ຈະ​ກວດ​ຈັບ​ເບິ່ງ​ປະ­ຕິ­ກິ­ລິ­ຍາ​ທີ່​ສະ­ແດງ​ອອກ ເຊັ່ນ: ສາຍ­ຕາ​ທີ່​ຫຼຽວ​ເບິ່ງ​ຂວາ​ເບິ່ງ​ຊ້າຍ ແຕ່​ຈະ​ບໍ່​ເບິ່ງ​ວ່າ​ກຳ­ລັງ​ຍິ້ມ ຫຼື ກຳ­ລັງ​ເໜັງ​ຕີງ​ໃບ​ໜ້າ.

    ທ່ານ ຄຣັອກ​ເກັດ ຜູ້​ຊ່ຽວ­ຊານ​ເຕັກ​ໂນ​ໂລ​ຊີ AI ຊ່ວຍ​ພັດ­ທະ­ນາ​ໂປຣ​ແກຣມ​ກວດ​ຄົນ​ຂ້າມ​ຊາຍ​ແດນ​ນີ້ ທີ່​ເອີ້ນ​ວ່າ i-Border-Control ນີ້ ກ່າວ​ວ່າ ໂປຣ​ແກຣມ​ດັ່ງ­ກ່າວ ສາ­ມາດ​ກວດ​ຈັບ​ການ​ປ່ຽນ­ແປງ​ທາງ​ສີ​ໜ້າ​ໄດ້ 38 ຮູບ​ແບບ​ພາຍ​ໃນ​ເວ­ລາ​ສັ້ນໆ ສາ­ມາດ​ວິ­ເຄາະ​ນ້ຳ​ສຽງ ກວດ​ຂໍ້​ມູນ ໄບ​ໂອ​ເມ​ຕຣິກ ທີ່​ລວມ​ເຖິງ​ເສັ້ນ­ເລືອດ​ເທິງ​ຝາ​ມື ຫຼື ລາຍ​ນິ້ວ​ມື.

    ງານ​ກວດ­ກາ​ຄົນ​ເຂົ້າ​ເມືອງ​ຕາມ​ແນວ​ຊາຍ​ແດນ ໄດ້​ກາຍ­ເປັນ​ປະ­ເດັນ​ຮ້ອນ​ທົ່ວ​ເອີ​ຣົບ ຂະ­ນະ​ທີ່​ມີ​ຄົນ​ອົບ​ພະ​ຍົບ​ເຂົ້າ​ເມືອງ​ຫຼາຍ​ສິບ​ພັນ​ຄົນ ສ່ວນ​ຫຼາຍ​ມາ​ຈາກ​ອາ​ຟຣິ​ກາ ແລະ ຕາ­ເວັນ​ອອກ​ກາງ ພະ­ຍາ­ຍາມ​ເດີນ­ທາງ​ເຂົ້າ​ໄປ​ໃນ ເອີ​ຣົບ.

    ຢ່າງ­ໃດ​ກໍ​ຕາມ ເຕັກ​ໂນ​ໂລ​ຊີ​ປັນ­ຍາ​ປະ­ດິດ​ກວດ​ຄົນ​ຂ້າມ​ຊາຍ​ແດນ​ນີ້ ຈະ​ບໍ່​ນຳ­ໄປ​ໃຊ້​ທົດ​ແທນ​ເຈົ້າ​ໜ້າ­ທີ່​ຮັກ­ສາ​ຄວາມ​ປອດ​ໄພ​ຊາຍ​ແດນ​ທີ່​ເປັນ​ມະ­ນຸດ.

    ທ່ານ ຄຣັອກ​ເກັດ ກ່າວ​ວ່າ ໂປຣ​ແກຣມ​ກວດ​ຄົນ​ຂ້າມ​ຊາຍ​ແດນ i-Border-Control ນີ້ ບໍ່​ສາ­ມາດ​ຕັດ­ສິນ​ໃຈ​ໄດ້​ອັດ­ຕະ­ໂນ­ມັດ ແຕ່​ຈະ​ປະ​ເມີນ​ຄວາມ​ສ່ຽງ​ອອກ​ມາ​ເປັນ​ຄະ­ແນນ​ສຳ­ລັບ​ນັກ​ເດີນ­ທາງ​ຂ້າມ​ຊາຍ​ແດນ​ແຕ່­ລະ­ຄົນ.

    ໂປຣ​ແກຣມ​ກວດ​ຄົນ​ຂ້າມ​ຊາຍ​ແດນ ເຊິ່ງ​ເປັນ​ຕົວ​ແບບ​ນີ້ ໄດ້​ຮັບ​ເງິນ​ສະ­ໜັບ­ສະ­ໜູນ ໂດຍ​ໂຄງ­ການ Horizon 2020 ຂອງ​ສະ­ຫະ­ພາບ​ເອີ​ຣົບ.

ຂ່າວທີ່ກ່ຽວຂ້ອງ