ຊ່ວງເຮືອຊີງຂັນທ່ານນາຍົກລັດຖະມົນຕີ ຈະຈັດຂຶ້ນທ້າຍເດືອນໜ້າ

461 26 ກ.ພ. 2019 ວົງຈອນກີລາ
ຊ່ວງເຮືອຊີງຂັນທ່ານນາຍົກລັດຖະມົນຕີ ຈະຈັດຂຶ້ນທ້າຍເດືອນໜ້າ

    ການ​ແຂ່ງ­ຂັນ​ຊ່ວງ​ເຮືອ​ກີ­ລາ 12 ສີ­ພາຍ ແລະ 22 ສີ­ພາຍ​ຍິງ-ຊາຍ ຊ່ວງ​ເຮືອ​ຍາວ 55 ສີ­ພາຍ​ຊາຍ ເຈັດ​ສະ​ກີ ລົດ​ວິ­ບາກ ແລະ ພາ​ຣາ​ມໍ​ເຕີ ຊີງ​ຂັນ​ທ່ານ​ນາ­ຍົກ­ລັດ­ຖະ­ມົນ­ຕີ ສປປ ລາວ ຄັ້ງ​ທີ I ຈະ​ຈັດ​ຂຶ້ນ​ທ້າຍ​ເດືອນ​ມີ­ນາ 2019 ຢູ່​ນະ­ຄອນ­ຫຼວງ​ວຽງ​ຈັນ (ນວ) ເພື່ອ​ສ້າງ​ຂະ​ບວນ​ການ​ຕ້ອນ­ຮັບ​ວັນ​ສ້າງ­ຕັ້ງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ຄົບ­ຮອບ 64 ປີ (22 ມີ­ນາ 1955-22 ມີ­ນາ 2019) ທັງ​ເປັນ​ການ​ສົ່ງ­ເສີມ​ປີ​ທ່ອງ​ທ່ຽວ ລາວ-ຈີນ 2019 ໃຫ້​ມີ​ບັນ­ຍາ­ກາດ​ຟົດ­ຟື້ນ​ມ່ວນ­ຊື່ນ.

    ສະ­ຫະ­ພັນ​ກີ­ລາ​ເຮືອ​ຊ່ວງ ນວ ແຈ້ງ​ໃຫ້​ຊາບ​ເມື່ອ​ບໍ່​ດົນ​ມາ​ນີ້​ວ່າ: ຄະ­ນະ​ຮັບ­ຜິດ­ຊອບ​ເຮືອ​ຊ່ວງ​ບັນ­ດາ​ພະ­ແນກ­ການ ສະ­ໂມ­ສອນ​ກີ­ລາ ບ້ານ ເມືອງ ແຂວງ ບໍ­ລິ­ສັດ ແລະ ພາກ­ສ່ວນ​ຕ່າງໆ​ທົ່ວ​ປະ­ເທດ ເຮືອ​ຕ່າງ­ປະ­ເທດ​ທີ່​ມີ​ເງື່ອນ­ໄຂ ເຂົ້າ​ຮ່ວມ​ການ​ແຂ່ງ­ຂັນ​ດັ່ງ­ກ່າວ ຢູ່​ເຂດ​ເສດ­ຖະ­ກິດ​ພິ­ເສດ​ບຶງ​ທາດ­ຫຼວງ ເມືອງ​ໄຊ​ເຊດ​ຖາ ນວ ແລະ ຮີບ​ຮ້ອນ​ມາ​ສະ­ໝັກ​ນຳ​ຄະ­ນະ​ກຳ­ມະ­ການ​ຈັດ­ການ​ແຂ່ງ­ຂັນ ຢູ່​ສະ­ມາ­ຄົມ​ກີ­ລາ-ກາຍ­ຍະ­ກຳ ນວ (ສູນ​ກີ­ລາ​ບຶງ​ຂະ​ຫຍອງ ຊັ້ນ 2) ເມືອງ​ສີ​ສັດ­ຕະ​ນາກ ນວ ໃນ​ໂມງ​ລັດ​ຖະ​ການ ນັບ​ແຕ່​ມື້​ປະ­ກາດ ເຖິງ​ວັນ​ທີ 19 ມີ­ນາ 2019 ເຊິ່ງ​ຄ່າ​ຂົນ­ສົ່ງ​ເຮືອ​ຍາວ 55 ສີ­ພາຍ​ຊາຍ ໃນ ນວ ແມ່ນ 1 ລ້ານ​ກີບ ແລະ ຕ່າງ​ແຂວງ 5 ລ້ານ​ກີບ.

    ສ່ວນ​ລາ­ງວັນ​ເຮືອ​ກີ­ລາ 12 ແລະ 22 ສີ­ພາຍ​ຍິງ-ຊາຍ ຊະ­ນະ​ເລີດ ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາ­ງວັນ 8 ລ້ານ​ກີບ ຮອງ​ຊະ­ນະ​ເລີດ ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາ­ງວັນ 6 ລ້ານ​ກີບ ທີ 3 ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາ­ງວັນ 4 ລ້ານ​ກີບ ທີ 4 ໄດ້​ຮັບ​ເງິນ​ລາ­ງວັນ 2 ລ້ານ​ກີບ ປະ­ເພດ​ເຮືອ​ຍາວ 55 ສີ­ພາຍ​ຊາຍ ຊະ­ນະ​ເລີດ ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາ­ງວັນ 25 ລ້ານ​ກີບ ຮອງ​ຊະ­ນະ​ເລີດ ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາ­ງວັນ 20 ລ້ານ​ກີບ ທີ 3 ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາ­ງວັນ 18 ລ້ານ​ກີບ ທີ 4 ໄດ້​ຮັບ​ເງິນ​ລາ­ງວັນ 10 ລ້ານ​ກີບ.

ຂ່າວທີ່ກ່ຽວຂ້ອງ