ຮັບຮອງ 7 ບ້ານຂອງເມືອງໄຊເຊດຖາ ເປັນບ້ານສາມັກຄີປອງດອງ

221 26 ກ.ພ. 2019 ຂ່າວໜ້າ​ໜຶ່ງ
ຮັບຮອງ 7 ບ້ານຂອງເມືອງໄຊເຊດຖາ ເປັນບ້ານສາມັກຄີປອງດອງ

    ພິ­ທີ​ປະ­ກາດ 7 ບ້ານ ກຸ່ມ III ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ (ນວ) ເປັນ​ບ້ານ​ສາ­ມັກ­ຄີ​ປອງ​ດອງ ຈັດ​ຂຶ້ນ​ວັນ​ທີ 22 ກຸມ­ພາ 2019 ຢູ່​ຫ້ອງ­ການ​ປົກ­ຄອງ​ບ້ານ​ນາ​ໄຊ ໂດຍ​ມີ​ທ່ານ ບຸນ​ທ່ຽງ ຂຸນ​ສີ ປະ­ທານ​ແນວ​ລາວ​ສ້າງ​ຊາດ ນວ ທ່ານ ຄຳ​ສະ­ຫວັນ ໂຄດ​ໄຊ ຮອງ​ເຈົ້າ­ເມືອງ​ໄຊ​ເຊດ​ຖາ ທ່ານ ອຸ­ດອນ ໂພ­ທິ​ສານ ປະ­ທານ​ແນວ​ລາວ​ສ້າງ​ຊາດ​ເມືອງ​ໄຊ​ເຊດ​ຖາ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ບຸນ​ລອງ ວົງ​ໄຊ ໄດ້​ຕາງ­ໜ້າ​ປະ­ທານ​ແນວ​ລາວ​ສ້າງ​ຊາດ 7 ບ້ານ ກ່າວ​ເຖິງ​ຜົນ​ໄດ້​ຮັບ​ຕົວ​ຈິງ​ໃນ​ແຕ່​ລະ​ມາດ­ຖານ​ຂອງ​ບ້ານ​ສາ­ມັກ­ຄີ​ປອງ​ດອງ ວ່າ: ປະ­ຊາ­ຊົນ​ພາຍ​ໃນ​ບ້ານ​ມີ​ຄວາມ​ສາ­ມັກ­ຄີ​ປອງ​ດອງ ເຄົາ­ລົບ​ນັບ­ຖື​ໃຫ້​ກຽດ​ເຊິ່ງ​ກັນ ແລະ ກັນ ມີ​ຄວາມ​ສະ­ເໝີ­ພາບ​ລະ­ຫວ່າງ​ຍິງ-ຊາຍ ມີ​ນ້ຳ­ໃຈ​ເອື້ອ­ເຟື້ອ​ເພື່ອ​ແຜ່​ຊ່ວຍ­ເຫຼືອ​ເຊິ່ງ​ກັນ ແລະ ກັນ ພ້ອມ​ທັງ​ເປັນ​ບ້ານ​ທີ່​ມີ​ຄວາມ​ສາ­ມັກ­ຄີ ແລະ ຖືກ­ຕ້ອງ​ປອງ​ດອງ​ກັບ​ບ້ານ​ໃກ້​ຄຽງ ໂດຍ​ບໍ່​ໄດ້​ມີ​ການ​ຈຳ­ແນກ​ເຜົ່າ ແລະ ສາ­ສະ­ໜາ ທຸກ​ຄອບ­ຄົວ​ພາຍ​ໃນ​ບ້ານ ຕັ້ງ­ໜ້າ​ເອົາ­ໃຈ­ໃສ່​ປະ­ກອບ­ສ່ວນ​ໃນ​ການ​ປົກ​ປັກ​ຮັກ­ສາ ເສີມ​ຂະ­ຫຍາຍ​ມູນ­ເຊື້ອ​ວັດ­ທະ­ນະ­ທຳ ແລະ ຮີດ­ຄອງ​ປະ­ເພ­ນີ​ອັນ​ດີ­ງາມ ທີ່​ເປັນ​ເອ­ກະ­ລັກ​ຂອງ​ເຜົ່າ-ຂອງ​ຊາດ​ຢ່າງ​ມີ​ສີ­ສັນ ນອກ​ນີ້​ຍັງ​ເປັນ​ບ້ານ​ພົ້ນ​ທຸກ ມີ​ກອງ​ທຶນ​ພັດ­ທະ­ນາ​ບ້ານ ຫຼື ມີ​ຄັງ​ສະ​ສົມ​ຂອງ​ບ້ານ ເພື່ອ​ເປັນ​ແຫຼ່ງ​ສະ​ສົມ​ທຶນ­ຮອນ ປ່ອຍ​ກູ້​ແບບ​ນະ­ໂຍ­ບາຍ​ໃຫ້​ຄອບ­ຄົວ​ທີ່​ມີ​ເງື່ອນ­ໄຂ​ມີ​ຄວາມ​ຈຳ­ເປັນ ໃນ​ການ​ແກ້​ໄຂ​ຊີ­ວິດ​ການ​ເປັນ​ຢູ່​ສ້າງ​ເສດ­ຖະ­ກິດ​ຄອບ­ຄົວ ປະ­ກອບ­ສ່ວນ​ເຮັດ​ໃຫ້​ພື້ນ­ຖານ​ເສດ­ຖະ­ກິດ​ຂອງ​ບ້ານ​ມີ​ການ​ຂະ­ຫຍາຍ­ຕົວ​ຢ່າງ​ໝັ້ນ​ທ່ຽງ ນຳ​ໃຊ້ ແລະ ປົກ​ປັກ​ຮັກ­ສາ​ສິ່ງ­ແວ­ດລ້ອມ​ຢ່າງ​ມີ​ປະ​ສິດ­ທິ​ຜົນ ແລະ ຍືນ​ຍົງ.

    ໃນ​ພິ­ທີ​ຍັງ​ໄດ້​ມອບ​ໃບ­ຢັ້ງ­ຢືນ​ໃຫ້ 7 ບ້ານ ປະ­ກອບ​ມີ: ບ້ານ​ຝາຍ ບ້ານ​ໂພນ​ໄຊ ບ້ານ​ນາ​ໄຊ ບ້ານ​ສີ​ສັງ­ວອນ ບ້ານ​ສະ­ພັງ​ໝໍ້ ບ້ານ​ໂພນ​ທັນ ແລະ ບ້ານ​ຮ່ອງ​ແກ ເຊິ່ງ​ມອບ​ໂດຍ​ທ່ານ ບຸນ​ທ່ຽງ ຂຸນ​ສີ.

ຂ່າວທີ່ກ່ຽວຂ້ອງ