ມອບ-ຮັບທຶນພັດທະນາເມືອງໃຫ້ກັບ 8 ແຂວງ

212 26 ກ.ພ. 2019 ຂ່າວໜ້າ​ໜຶ່ງ
ມອບ-ຮັບທຶນພັດທະນາເມືອງໃຫ້ກັບ 8 ແຂວງ

    ພິ­ທີ​ລົງ​ນາມ​ຂໍ້​ຕົກ­ລົງ​ການ​ມອບ-ຮັບ​ທຶນ​ພັດ­ທະ­ນາ​ເມືອງ (ທພມ) ປີ 2019 ລະ­ຫວ່າງ​ຫ້ອງ­ການ​ແຜນ​ງານ​ປັບ­ປຸງ​ບູ­ລະ­ນະ​ການ​ປົກ­ຄອງ ກະ­ຊວງ​ພາຍ​ໃນ ກັບ 12 ເມືອງ​ທີ່​ໄດ້​ຮັບ​ທຶນ ຈັດ​ຂຶ້ນ​ວັນ​ທີ 22 ກຸມ­ພາ 2019 ທີ່​ສູນ​ເຝິກ­ອົບ­ຮົມ​ສະ­ຫະ­ພັນ​ແມ່­ຍິງ ນະ­ຄອນ­ຫຼວງ​ວຽງ​ຈັນ ໂດຍ​ການ​ລົງ​ນາມ​ລະ­ຫວ່າງ​ທ່ານ ນິ­ສິດ ແກ້ວ​ປັນ­ຍາ ຫົວ­ໜ້າ​ກົມ​ແຜນ­ການ ແລະ ການ​ຮ່ວມ​ມື ກະ­ຊວງ​ພາຍ​ໃນ ຫົວ­ໜ້າ​ກອງ​ເລ­ຂາ​ແຜນ​ງານ​ປັບ­ປຸງ​ບູ­ລະ­ນະ​ການ​ປົກ­ຄອງ​ແຫ່ງ​ຊາດ (NGPAR Programme) ແລະ ຕົວ​ແທນ​ຈາກ 12 ໂຄງ­ການ​ຂອງ 12 ເມືອງ​ໃນ 8 ແຂວງ ທີ່​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ທຶນ​ພັດ­ທະ­ນາ​ເມືອງ ມີ​ທ່ານ ຄຳ​ມູນ ວິ​ພົງ​ໄຊ ຮອງ​ລັດ­ຖະ­ມົນ­ຕີ​ກະ­ຊວງ​ພາຍ​ໃນ ຕົວ​ແທນ​ອົງ­ການ​ຜູ້​ໃຫ້​ທຶນ ໂດຍ​ສະ­ເພາະ ອົງ­ການ​ສະ­ຫະ​ປະ­ຊາ​ຊາດ​ເພື່ອ​ການ​ພັດ­ທະ­ນາ (UNDP) ອົງ­ການ​ກອງ​ທຶນ​ເພື່ອ​ການ​ພັດ­ທະ­ນາ​ສະ­ຫະ​ປະ­ຊາ​ຊາດ (UNCDF) ແລະ ອົງ­ການ​ຮ່ວມ​ມື​ເພື່ອ​ການ​ພັດ­ທະ­ນາ​ຂອງ​ປະ­ເທດ​ສະ​ວິດ (SDC) ເຂົ້າ​ຮ່ວມ​ເປັນ​ສັກ­ຂີ​ພິ­ຍານ.

    ຈຸດ­ປະ­ສົງ​ຫຼັກ​ຂອງ​ທຶນ​ພັດ­ທະ­ນາ ແມ່ນ​ເພື່ອ​ຜັນ​ຂະ­ຫຍາຍ​ວຽກ​ງານ​ສາມ​ສ້າງ​ເຂົ້າ​ໃນ​ການ​ປັບ­ປຸງ ແລະ ພັດ­ທະ­ນາ​ລະ­ບົບ​ບໍ­ລິ­ຫານ​ລັດ​ຢູ່​ຂັ້ນ​ທ້ອງ­ຖິ່ນ ໂດຍ​ສະ­ເພາະ​ແມ່ນ​ຂັ້ນ​ເມືອງ ໃຫ້​ເປັນ​ຫົວ­ໜ່ວຍ​ເຂັ້ມ­ແຂງ​ຮອບ­ດ້ານ ພ້ອມ​ນັ້ນ ທຶນ​ດັ່ງ­ກ່າວ ຈະ​ເປັນ​ການ​ສ້າງ​ຄວາມ​ເຂັ້ມ­ແຂງ​ໃຫ້​ແກ່​ອົງ­ການ​ປົກ­ຄອງ​ຂັ້ນ​ເມືອງ ໃນ​ວຽກ​ງານ​ບໍ­ລິ­ຫານ​ລັດ ການ​ໃຫ້​ບໍ­ລິ­ການ​ຂອງ​ລັດ ແລະ ການ​ສ້າງ​ແຜນ­ການ-ງົບ­ປະ­ມານ ເພື່ອ​ພັດ­ທະ­ນາ​ທ້ອງ­ຖິ່ນ ຕາມ​ບຸ­ລິ­ມະ­ສິດ​ຄວາມ​ຕ້ອງ­ການ​ຂອງ​ຊຸມ​ຊົນ ໃນ​ຂອບ​ເຂດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ເມືອງ ພາຍ​ໃຕ້​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ແລະ ເປົ້າ​ໜາຍ​ການ​ພັດ­ທະ­ນາ​ທີ່​ຍືນ​ຍົງ ທັງ​ຮັບ­ປະ­ກັນ​ຄວາມ​ສະ­ດວກ ວ່ອງ­ໄວ ປອດ​ໃສ ແລະ ຖືກ­ຕ້ອງ​ຕາມ​ລະ­ບຽບ​ກົດ​ໜາຍ.

    ທຶນ​ພັດ­ທະ­ນາ​ເມືອງ​ສຳ­ລັບ​ປີ 2019 ມີ​ຈຳ­ນວນ 12 ໂຄງ­ການ ຈາກ 12 ເມືອງ​ຂອງ 8 ແຂວງ (ເມືອງ​ຂວາ ແຂວງ​ຜົ້ງ​ສາ­ລີ ເມືອງ​ສິງ ແຂວງ​ຫຼວງ​ນ້ຳ​ທາ ເມືອງ​ທົ່ງ​ມີ​ໄຊ ແລະ ເມືອງ​ໄຊ​ສະ­ຖານ ແຂວງ​ໄຊ​ຍະ​ບູ​ລີ ເມືອງ​ຊຽງ​ຄໍ້ ແຂວງ​ຫົວ­ພັນ ເມືອງ​ຫີນ​ບູນ ແຂວງ​ຄຳ​ມ່ວນ ເມືອງ​ສາ­ລະ​ວັນ ສະ​ໝ້ວຍ ແລະ ລະ­ຄອນ​ເພັງ ແຂວງ​ສາ­ລະ​ວັນ ເມືອງ​ບາ​ຈຽງ ຈະ­ເລີນ​ສຸກ ແຂວງ​ຈຳ­ປາ​ສັກ ແລະ ເມືອງ​ໄຊ​ເຊດ​ຖາ ແຂວງ​ອັດ​ຕະ​ປື) ທີ່​ໄດ້​ຖືກ​ຄັດ​ເລືອກ ແລະ ໄດ້​ຮັບ​ທຶນ​ດັ່ງ­ກ່າວ ເຊິ່ງ​ຈະ​ນຳ​ໃຊ້​ເຂົ້າ​ໃນ​ການ​ປະ­ຕິ­ບັດ ບັນ­ດາ​ໂຄງ­ການ​ກໍ່­ສ້າງ​ພື້ນ­ຖານ​ໂຄງ​ລ່າງ​ຂະ­ໜາດ​ນ້ອຍ ໃຫ້​ແກ່​ຊຸມ​ຊົນ​ຮາກ​ຖານ​ໃນ​ຂົງ­ເຂດ​ການ​ສຶກ​ສາ ສາ­ທາ­ລະ­ນະ​ສຸກ ໂຍ­ທາ​ທິ​ການ ແລະ ຂົນ­ສົ່ງ ແລະ ການ​ຄ້າ ລວມ​ມູນ​ຄ່າ​ໂຄງ­ການ​ທັງ​ໝົດ 3 ຕື້​ກວ່າ​ກີບ ໃນ​ນັ້ນ 2,8 ຕື້​ກີບ ແມ່ນ​ທຶນ​ພັດ­ທະ­ນາ​ເມືອງ ລັດ­ຖະ­ບານ​ສົມ­ທົບ 560 ລ້ານ​ກີບ ແລະ ທຶນ​ສົມ­ທົບ​ຂອງ​ຊຸມ​ຊົນ 329 ລ້ານ​ກວ່າ​ກີບ.

    ສຳ­ລັບ​ໄລ­ຍະ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ຕາມ​ແຜນ­ການ​ແມ່ນ​ເລີ່ມ​ແຕ່​ເດືອນ​ມັງ­ກອນ ແລະ ສິ້ນ​ສຸດ​ໃນ​ເດືອນ​ທັນ­ວາ 2019.

ຂ່າວທີ່ກ່ຽວຂ້ອງ