ຂ່າວຫຼ້າສຸດ

ສະເຫຼີມສະຫຼອງ ຄົບຮອບ 20 ປີ ການສ້າງຕັ້ງບໍລິສັດ ກຸ່ມຄຳໄພຊະນະ

226 26 ກ.ພ. 2019 ຂ່າວໜ້າ​ໜຶ່ງ
ສະເຫຼີມສະຫຼອງ ຄົບຮອບ 20 ປີ ການສ້າງຕັ້ງບໍລິສັດ ກຸ່ມຄຳໄພຊະນະ

    ພິ­ທີ​ເປີດ​ອາ­ຄານ​ສຳ­ນັກ­ງານ​ຫຼັງ​ໃໝ່ ແລະ ຈັດ​ງານ​ລ້ຽງ​ເພື່ອ​ສະ­ເຫຼີມ­ສະ­ຫຼອງ ຄົບ­ຮອບ 20 ປີ ຂອງ​ການ​ສ້າງ­ຕັ້ງ​ບໍ­ລິ­ສັດ ກຸ່ມ​ຄຳ​ໄພ​ຊະ­ນະ ຈັດ​ຂຶ້ນ​ວັນ​ທີ 22 ກຸມ­ພາ 2019 ທີ່​ບ້ານ​ທົ່ງ​ສ້າງ​ນາງ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ໃຫ້​ກຽດ​ເຂົ້າ​ຮ່ວມ​ໂດຍ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ບັນ­ດາ​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ ນັກ­ທຸ­ລະ­ກິດ​ທັງ​ພາຍ​ໃນ ແລະ ຕ່າງ­ປະ­ເທດ.

    ທ່ານ ຄຳ​ໄພ ສົມ​ຊະ­ນະ ປະ­ທານ​ບໍ­ລິ­ສັດ ກຸ່ມ​ຄຳ​ໄພ​ຊະ­ນະ ໄດ້​ກ່າວ​ວ່າ: ສຳ­ນັກ­ງານ​ໃຫຍ່ ບໍ­ລິ­ສັດ ກຸ່ມ​ຄຳ​ໄພ​ຊະ­ນະ ເປັນ​ອາ­ຄານ​ສູງ 11 ຊັ້ນ ດ້ວຍ​ມູນ​ຄ່າ​ກໍ່­ສ້າງ​ປະ­ມານ 137 ຕື້​ກີບ ຫຼື 16 ລ້ານ​ໂດ​ລາ​ສະ­ຫະ­ລັດ ເຊິ່ງ​ເປັນ​ສ່ວນ​ໜຶ່ງ​ຂອງ​ຜົນ­ສຳ­ເລັດ ຈາກ​ການ​ທຸ້ມ­ເທ​ສະ­ຕິ​ປັນ­ຍາ​ກຳ­ລັງ​ຊັບ ແລະ ກຳ­ລັງ​ແຮງ​ກາຍ​ຂອງ​ຄອບ­ຄົວ​ສົມ​ຊະ­ນະ ໃນ​ຕະ­ຫຼອດ​ເວ­ລາ 20 ປີ­ຜ່ານ­ມາ ທີ່​ເລີ່ມ​ຕົ້ນ​ຈາກ​ຄອບ­ຄົວ​ທຸກ​ຍາກ​ເປັນ​ພໍ່­ຄ້າ​ນ້ອຍໆ ສູ້​ຊົນ​ຊີ­ວິດ​ທີ່​ແສນ​ຫຍຸ້ງ­ຍາກ​ລຳ­ບາກ ປະ­ກອບ​ດ້ວຍ​ຕົ້ນ​ທຶນ​ກໍ​ບໍ່​ສູງ ແຕ່​ດ້ວຍ​ຄວາມ​ມີ​ນ້ຳ­ໃຈ​ມາ­ນະ​ອົດ­ທົນ​ເຮັດ​ແທ້​ທຳ​ຈິງ​ຂອງ​ປະ­ທານ ຈຶ່ງ​ສາ­ມາດ​ໄຕ່­ເຕົ້າ​ທຶນ­ຮອນ ແລະ ເປີດ​ເປັນ​ບໍ­ລິ­ສັດ ຄຳ​ໄພ​ຊະ­ນະ ໃນ​ວັນ​ທີ 22 ພະ­ຈິກ 1998 ແລະ ກ້າວ​ເປັນ​ກຸ່ມ​ບໍ­ລິ­ສັດ​ໃນ​ເວ­ລາ​ຕໍ່​ມາ ປັດ­ຈຸ­ບັນ​ບໍ­ລິ­ສັດ​ປະ­ກອບ​ມີ 10 ກວ່າ​ກິດ­ຈະ­ການ ເປັນ­ຕົ້ນ ການ​ກໍ່­ສ້າງ​ເຄ­ຫາ​ສະ­ຖານ ຂົວ​ທາງ ແລະ ຊົນ­ລະ­ປະ­ທານ ຄອນ​ກຣີດ​ແຫຼວ ແລະ ຜະ­ລິດ​ຕະ​ພັນ​ຄອນ​ກຣີດ ໂຮງ­ງານ​ຜະ­ລິດ​ເຟີ​ນິ​ເຈີ ແລະ ຜະ­ລິດ​ຕະ​ພັນ​ໄມ້​ຕົບ­ແຕ່ງ​ພາຍ​ໃນ ແລະ ນອກ ຕອກ​ເຈາະ ແລະ ອັດ​ເສົາ​ເຂັມ​ທຸກ​ປະ­ເພດ ບໍ­ລິ­ສັດ ຄຳ​ໄພ​ຊະ­ນະ​ປູກ​ໄມ້ ແລະ ຟາມ​ຄົບ​ວົງ​ຈອນ ການ­ທ່ອງ­ທ່ຽວ ແລະ ຣີ​ສອດ ສະ​ຖາ​ບັນ​ການ​ເງິນ​ຈຸ​ລະ​ພາກ​ບໍ່​ຄຳ​ຈະ­ເລີນ​ຊັບ SNP ແລະ ກິດ­ຈະ­ການ​ອື່ນໆ ໂດຍ​ຜົນ​ການ​ດຳ­ເນີນ​ທຸ­ລະ​ກິດ​ທີ່​ປະ­ສົບ​ຜົນ­ສຳ­ເລັດ​ດັ່ງ­ກ່າວ ເຮັດ​ໃຫ້​ບໍ­ລິ­ສັດ​ໄດ້​ຮັບ​ລາ­ງວັນ​ຫຼວງ­ຫຼາຍ ເປັນ­ຕົ້ນ ລາ­ງວັນ​ທຸ­ລະ​ກິດ​ດີ­ເດັ່ນ 4 ປີ​ຊ້ອນ (2016-2019) ແລະ ລາ­ງວັນ​ທຸ­ລະ​ກິດ​ດີ­ເດັ່ນ​ອາ​ຊຽນ​ປີ 2016 ຈາກ​ສະ­ພາ​ອຸດ­ສາ­ຫະ­ກຳ ແລະ ການ​ຄ້າ​ແຫ່ງ​ຊາດ​ລາວ.

ຂ່າວທີ່ກ່ຽວຂ້ອງ