ຜູ້ນຳຂັ້ນສູງ ສສ ຫວຽດນາມ ສຳເລັດການຢ້ຽມຢາມ ສປປ ລາວ

348 26 ກ.ພ. 2019 ຂ່າວໜ້າ​ໜຶ່ງ
ຜູ້ນຳຂັ້ນສູງ ສສ ຫວຽດນາມ ສຳເລັດການຢ້ຽມຢາມ ສປປ ລາວ

    ພິ­ທີ​ສົ່ງ​ສະ­ຫາຍ ຫງວຽນ ຟູ ຈ້ອງ ເລ­ຂາ­ທິ­ການ​ໃຫຍ່ ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ​ກອມ​ມູ​ນິດ​ຫວຽດ­ນາມ ປະ­ທານ​ປະ­ເທດ ແລະ ຄະ­ນະ​ຜູ້​ແທນ​ຂັ້ນ​ສູງ​ພັກ-ລັດ ສສ ຫວຽດ­ນາມ ໄດ້​ຈັດ​ຂຶ້ນ​ວັນ​ທີ 25 ກຸມ­ພາ 2019 ທີ່​ນະ­ຄອນ­ຫຼວງ​ວຽງ​ຈັນ ພາຍ­ຫຼັງ​ສຳ­ເລັດ​ການ​ຢ້ຽມ­ຢາມ​ສັນ­ຖະ­ວະ­ໄມ­ຕີ ສປປ ລາວ ຢ່າງ​ເປັນ​ທາງ​ການ​ເປັນ​ເວ­ລາ 2 ວັນ ໃຫ້​ກຽດ​ອອກ​ສົ່ງ​ໂດຍ​ສະ­ຫາຍ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່ ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ປະ­ທານ​ປະ­ເທດ ພ້ອມ​ດ້ວຍ​ການ​ນຳ​ຂັ້ນ​ສູງ ແລະ ອອກ​ສົ່ງ​ທີ່​ສະ­ໜາມ​ບິນ​ສາ­ກົນ​ວັດ​ໄຕ ໂດຍ​ສະ­ຫາຍ ພັນ​ຄຳ ວິ­ພາ​ວັນ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ຮອງ​ປະ­ທານ​ປະ­ເທດ ສະ­ຫາຍ ສິນ​ລະ​ວົງ ຄຸດ​ໄພ­ທູນ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທູດ​ຫວຽດ­ນາມ​ປະ­ຈຳ​ລາວ ທູດ​ລາວ​ປະ­ຈຳ​ຫວຽດ­ນາມ ພ້ອມ​ດ້ວຍ​ຊາວ​ນະ­ຄອນ­ຫຼວງ​ວຽງ​ຈັນ ແລະ ຊາວ​ຫວຽດ­ນາມ

    ໃນ​ໄລ­ຍະ​ການ​ຢ້ຽມ­ຢາມ​ລາວ​ຄັ້ງ​ນີ້ ໃນ​ວັນ​ທີ 24 ກຸມ­ພາ 2019 ສະ­ຫາຍ ຫງວຽນ ຟູ ຈ້ອງ ໄດ້​ພົບ​ປະ​ເຈລະ­ຈາ​ກັບ​ສະ­ຫາຍ ບຸນ​ຍັງ ວໍ­ລະ​ຈິດ ພົບ​ປະ​ແລກ­ປ່ຽນ​ຄຳ​ຄິດ​ເຫັນ​ກັບ​ສະ­ຫາຍ ທອງ​ລຸນ ສີ​ສຸ​ລິດ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ນາ­ຍົກ­ລັດ­ຖະ­ມົນ­ຕີ ແລະ ສະ­ຫາຍ​ນາງ ປາ­ນີ ຢາ​ທໍ່​ຕູ້ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ປະ­ທານ​ສະ­ພາ​ແຫ່ງ​ຊາດ ຢ້ຽມ­ຢາມ ແລະ ກວດ­ກາ​ຄວາມ​ຄືບ​ໜ້າ​ຂອງ​ໂຄງ­ການ​ປຸກ​ສ້າງ​ຫໍ​ສະ­ພາ​ແຫ່ງ​ຊາດ​ລາວ ເຊິ່ງ​ເປັນ​ຂອງ­ຂວັນ​ຂອງ​ພັກ-ລັດ ແລະ ປະ­ຊາ­ຊົນ​ຫວຽດ­ນາມ ຢ້ຽມ­ຢາມ​ບັນ­ດາ​ອະ­ດີດ​ການ​ນຳ​ພັກ-ລັດ​ລາວ​ຈຳ­ນວນ​ໜຶ່ງ ແລະ ເຂົ້າ​ຮ່ວມ​ງານ​ລ້ຽງ​ຕ້ອນ­ຮັບ​ຈັດ​ໂດຍ ສະ­ຫາຍ ບຸນ​ຍັງ ວໍ­ລະ​ຈິດ.

    ສຳ­ລັບ​ການ​ຢ້ຽມ­ຢາມ​ລາວ​ໃນ​ວັນ​ທີ 25 ກຸມ­ພາ 2019 ສະ­ຫາຍ ຫງວຽນ ຟູ ຈ້ອງ ພ້ອມ​ຄະ­ນະ ໄດ້​ເຂົ້າ​ວາງ​ພວງ­ມາ­ລາ​ທີ່​ອະ­ນຸ­ສາ­ວະ­ລີ​ນັກ­ຮົບ​ນິ­ລະ­ນາມ (ດາວ​ແດງ) ຖືກ​ຕ້ອນ­ຮັບ​ໂດຍ​ສະ­ຫາຍ ສິນ​ລະ​ວົງ ຄຸດ​ໄພ­ທູນ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ​ຄະ­ນະ​ພັກ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ການ​ນຳ​ນະ­ຄອນ­ຫຼວງ​ຈຳ­ນວນ​ໜຶ່ງ ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ສະ­ຫາຍ ໄຊ​ສົມ​ພອນ ພົມ­ວິ­ຫານ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ປະ­ທານ​ສູນ​ກາງ​ແນວ​ລາວ​ສ້າງ​ຊາດ ສະ­ຫາຍ ວິ­ໄລ​ວົງ ບຸດ​ດາ​ຄຳ ກຳ­ມະ­ການ​ສູນ​ກາງ​ພັກ ປະ­ທານ​ຄະ­ນະ​ກຳ­ມາ​ທິ​ການ​ແຜນ­ການ​ການ​ເງິນ ແລະ ການ​ກວດ​ສອບ​ສະ­ພາ​ແຫ່ງ​ຊາດ ປະ­ທານ​ສະ­ມາ­ຄົມ​ມິດ­ຕະ­ພາບ​ລາວ-ຫວຽດ­ນາມ​ຂັ້ນ​ສູນ​ກາງ ຢ້ຽມ­ຢາມ ແລະ ໂອ້​ລົມ​ພະ­ນັກ­ງານ​ສະ­ຖານ­ທູດ ຕາງ­ໜ້າ​ບັນ­ດາ​ວິ​ສາ​ຫະ​ກິດ ແລະ ຊາວ​ຫວຽດ­ນາມ ທີ່​ກຳ­ລັງ​ດຳ­ລົງ​ຊີ­ວິດ​ຮ່ຳ­ຮຽນ ແລະ ເຮັດ​ວຽກ​ຢູ່​ລາວ ຢ້ຽມ­ຢາມ​ພື້ນ­ຖານ​ວັດ­ທະ­ນະ­ທຳ​ຈຳ­ນວນ​ໜຶ່ງ​ຢູ່​ນະ­ຄອນ­ຫຼວງ​ວຽງ​ຈັນ ສ່ວນ​ສະ­ຫາຍ​ນາງ ຕ່ອງ ທິ ຟ້ອງ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ຮອງ​ປະ­ທານ​ສະ­ພາ​ຜູ້​ປະ­ຈຳ­ການ​ສະ­ພາ​ແຫ່ງ​ຊາດ​ຫວຽດ­ນາມ ພ້ອມ​ຄະ­ນະ ໄດ້​ໄປ​ຢ້ຽມ­ຢາມ​ໂຮງ­ຮຽນ​ມັດ­ທະ­ຍົມ​ສົມ­ບູນ​ມິດ­ຕະ­ພາບ​ລາວ-ຫວຽດ­ນາມ ຖືກ​ຕ້ອນ­ຮັບ​ໂດຍ​ສະ­ຫາຍ​ນາງ ແສງ​ເດືອນ ຫຼ້າ​ຈັນ­ທະ​ບູນ ກຳ­ມະ­ການ​ສູນ​ກາງ​ພັກ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ສະ­ຫາຍ ດອນ ແກ້ວ​ມີ​ໄຊ ຜູ້­ອຳ­ນວຍ­ການ​ໂຮງ­ຮຽນ​ມັດ­ທະ­ຍົມ​ສົມ­ບູນ​ມິດ­ຕະ­ພາບ​ລາວ-ຫວຽດ­ນາມ ພ້ອມ​ດ້ວຍ​ຄູ​ອາ­ຈານ ແລະ ນັກ­ຮຽນ ເຊິ່ງ​ການ​ຢ້ຽມ­ຢາມ​ຄັ້ງ​ນີ້ ຫວຽດ­ນາມ ໄດ້​ມອບ​ຄອມ​ພິວ​ເຕີ​ຕັ້ງ​ໂຕະ ຈຳ­ນວນ 30 ຊຸດ ເປັນ​ຂອງ­ຂວັນ​ໃຫ້​ແກ່​ໂຮງ­ຮຽນ​ດັ່ງ­ກ່າວ.

ຂ່າວທີ່ກ່ຽວຂ້ອງ