ຂ່າວຫຼ້າສຸດ

ຊາວໜຸ່ມຈັດກິດຈະກຳ ຕ້ອນຮັບວັນສຳຄັນຂອງຊາດ

144 27 ກ.ພ. 2019 ວົງຈອນກີລາ

    ເພື່ອ​ເປັນ​ການ​ສ້າງ​ຂະ​ບວນ​ການ​ຕ້ອນ­ຮັບ​ວັນ​ສຳ­ຄັນ​ຂອງ​ຊາດ-ຂອງ​ພັກ ແລະ ຂອງ​ຊາວ​ໜຸ່ມ​ໃຫ້​ເປັນ​ຂະ​ບວນ​ຟົດ­ຟື້ນ​ຕໍ່​ເນື່ອງ ຕິດ​ພັນ​ກັບ​ການ​ສ້າງ​ຂະ​ບວນ​ການ​ຮອບ­ດ້ານ ໂດຍ​ສະ­ເພາະ​ແມ່ນ​ຂະ​ບວນ​ການ 3 ຫຼຸດ 3 ເພີ່ມ ແລະ ບັນ­ຫາ​ຢາ​ເສບ​ຕິດ​ໃນ​ຖັນ​ແຖວ​ຊາວ​ໜຸ່ມ-ເຍົາ­ວະ​ຊົນ ໃຫ້​ຫຼຸດ​ໜ້ອຍ​ຖອຍ​ລົງ.

    ວັນ​ທີ 23 ກຸມ­ພາ 2019 ຄະ­ນະ​ຊາວ​ໜຸ່ມ​ນະ­ຄອນ­ຫຼວງ​ວຽງ​ຈັນ (ນວ) ຈັດ​ແຂ່ງ­ຂັນ​ກີ­ລາ​ບານ­ບ້ວງ ຊີງ​ຂັນ​ທ່ານ​ເລ­ຂາ​ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ ນວ ຂຶ້ນ​ທີ່​ເດີ່ນ​ກີ­ລາ​ໂຮງ­ຮຽນ​ລຽວ​ໂຕ້ ມີ​ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ປະ­ທານ​ສະ­ຫະ­ພັນ​ກີ­ລາ​ບານ­ບ້ວງ​ແຫ່ງ​ຊາດ ທ່ານ ພັນ​ປະ­ສົງ ໄຊ​ຍະ​ວົງ­ສາ ຮອງ​ເລ­ຂາ​ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ ນວ ທ່ານ ສົມ​ປະ­ສົງ ຈັນ­ທະ​ວົງ ຜູ້​ອຳ­ນວຍ​ໂຮງ­ຮຽນ ມສ ລຽວ​ໂຕ້ ພ້ອມ​ດ້ວຍ​ນັກ­ກີ­ລາ-ຄູ​ເຝິກ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ການ​ແຂ່ງ­ຂັນ​ຄັ້ງ​ນີ້​ມີ 21 ທີມ​ເຂົ້າ​ຮ່ວມ​ທີ່​ມາ​ຈາກ​ພາກ​ລັດ ແລະ ເອ­ກະ​ຊົນ ປະ­ກອບ​ມີ 2 ຮຸ່ນ​ຄື: ຮຸ່ນ​ມັດ­ທະ­ຍົມ​ຕອນ​ຕົ້ນ ແລະ ຮຸ່ນ​ມັດ­ທະ­ຍົມ​ຕອຍ​ປາຍ ໃນ​ນັ້ນ​ມັດ­ທະ­ຍົມ​ຕອນ​ຕົ້ນ 12 ທີມ ຍິງ 2 ທີມ ແລະ ມັດ­ທະ­ຍົມ​ຕອນ​ປາຍ 9 ທີມ ຍິງ 2 ທີມ ສຳ­ລັບ​ລາ­ງວັນ​ທີ 1 ມັດ­ທະ­ຍົມ​ຕອນ​ຕົ້ນ ແລະ ຕອນ​ປາຍ ປະ­ເພດ​ຊາຍ ໄດ້​ຮັບ​ເງິນ­ສົດ 8 ແສນ​ກີບ ພ້ອມ​ຂັນ​ລາ­ງວັນ 1 ໜ່ວຍ ລາ­ງວັນ​ທີ 2 ໄດ້​ຮັບ​ເງິນ­ສົດ 6 ແສນ​ກີບ ລາ­ງວັນ​ທີ 3 ໄດ້​ຮັບ​ເງິນ­ສົດ 4 ແສນ​ກີບ ແລະ ລາ­ງວັນ​ທີ 4 ໄດ້​ຮັບ​ເງິນ­ສົດ 2 ແສນ​ກີບ ທີມ​ຍິງ​ມັດ­ທະ­ຍົມ​ຕອນ​ຕົ້ນ ແລະ ຕອນ​ປາຍ ລາ­ງວັນ​ທີ 1 ໄດ້​ຮັບ​ເງິນ­ສົດ 4 ແສນ​ກີບ ພ້ອມ​ຂັນ 1 ໜ່ວຍ ລາ­ງວັນ​ທີ 2 ໄດ້​ຮັບ​ເງິນ­ສົດ 3 ແສນ​ກີບ.

ຂ່າວທີ່ກ່ຽວຂ້ອງ