ຂ່າວຫຼ້າສຸດ

ຮພກ ຄອງເຈົ້າຫຼຽນຄຳແລ່ນ-ລານທົ່ວປະເທດປີ 2019

156 27 ກ.ພ. 2019 ວົງຈອນກີລາ
ຮພກ ຄອງເຈົ້າຫຼຽນຄຳແລ່ນ-ລານທົ່ວປະເທດປີ 2019

    ນັກ­ກີ­ລາ​ແລ່ນ-ລານ​ໂຮງ­ຮຽນ​ພອນ​ສະ­ຫວັນ​ກີ­ລາ-ກາຍ­ຍະ­ກຳ (ຮພກ) ສາ­ມາດ​ກວາດ​ມາ​ໄດ້​ເຖິງ 30 ຫຼຽນ​ຄຳ 23 ຫຼຽນ​ເງິນ ແລະ 16 ຫຼຽນ​ທອງ ລວມ 69 ຫຼຽນ ຄອງ​ເຈົ້າ​ຫຼຽນ​ຄຳ ໃນ​ການ​ແຂ່ງ­ຂັນ​ກີ­ລາ​ແລ່ນ-ລານ​ຮຸ່ນ​ເຍົາ­ວະ​ຊົນ ແລະ ຮຸ່ນ​ທົ່ວ​ໄປ​ທົ່ວ​ປະ­ເທດ ຄັ້ງ​ທີ ll ປີ 2019 ເພື່ອ​ເປັນ​ການ​ຄັດ​ເລືອກ​ນັກ­ກີ­ລາ​ຮຸ່ນ​ສືບ​ທອດ​ພອນ​ສະ­ຫວັນ​ດີ­ເດັ່ນ ກ້າວ​ສູ່​ທີມ​ຊາດ ກຽມ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ທີ່​ປະ­ເທດ​ຟີ​ລິບ​ປິນ​ເປັນ​ເຈົ້າ­ພາບ ແລະ ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ທີ່​ແຂວງ​ຊຽງ​ຂວາງ​ໃນ​ທ້າຍ​ປີ 2019.

    ລາຍ­ການ​ນີ້​ມີ​ທັງ​ໝົດ 16 ພາກ­ສ່ວນ​ເຂົ້າ​ຮ່ວມ ແບ່ງ​ເປັນ 2 ຮຸ່ນ ຄື: ຮຸ່ນ​ທົ່ວ​ໄປ ແລະ ຮຸ່ນ​ເຍົາ­ວະ​ຊົນ ມີ 50 ລາຍ­ການ ມີ​ນັກ­ກີ­ລາ​ເຂົ້າ​ຮ່ວມ​ການ​ແຂ່ງ­ຂັນ 200 ກວ່າ​ຄົນ ຜ່ານ​ການ​ແຂ່ງ­ຂັນ​ວັນ​ທີ 20-22 ກຸມ­ພາ 2019 ໃນ​ຮຸ່ນ​ເຍົາ­ວະ​ຊົນ ທີ 1 ຮພກ ຍາດ​ມາ​ໄດ້ 22 ຫຼຽນ​ຄຳ 17 ຫຼຽນ​ເງິນ ແລະ 12 ຫຼຽນ​ທອງ ທີ 2 ນະ­ຄອນ­ຫຼວງ​ວຽງ​ຈັນ ຍາດ​ໄດ້ 5 ຫຼຽນ​ຄຳ 7 ຫຼຽນ​ເງິນ ແລະ 7 ຫຼຽນ​ທອງ ແລະ ທີ 3 ແຂວງ​ວຽງ​ຈັນ ຍາດ​ໄດ້ 2 ຫຼຽນ​ເງິນ ແລະ 3 ຫຼຽນ​ທອງ ສ່ວນ​ຮຸ່ນ​ທົ່ວ​ໄປ ທີ 1 ຮພກ ຍາດ​ໄດ້ 8 ຫຼຽນ​ຄຳ 6 ຫຼຽນ​ເງິນ ແລະ 4 ຫຼຽນ​ທອງ ທີ 2 ນະ­ຄອນ­ຫຼວງ​ວຽງ​ຈັນ ຍາດ​ໄດ້ 6 ຫຼຽນ​ຄຳ 4 ຫຼຽນ​ເງິນ ແລະ 9 ຫຼຽນ​ທອງ ແລະ ທີ 3 ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ຍາດ​ໄດ້ 5 ຫຼຽນ​ຄຳ 6 ຫຼຽນ​ເງິນ ແລະ 2 ຫຼຽນ​ທອງ.

    ພິ­ທີ​ປິດ​ການ​ແຂ່ງ­ຂັນ​ຈັດ​ຂຶ້ນ​ວັນ​ທີ 22 ກຸມ­ພາ 2019 ທີ່ ຮພກ ບ້ານ​ສີ​ເກີດ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ມີ​ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ຮອງ​ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ທ່ານ ສິງ​ຄຳ ນາ​ລິນ ຮອງ​ຫົວ­ໜ້າ​ກົມ​ກີ­ລາ​ລະ­ດັບ​ສູງ ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ ມີ​ຄະ­ນະ​ສະ­ຫະ­ພັນ​ແລ່ນ-ລານ ບັນ­ດາ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ​ແຕ່​ລະ​ພາກ­ສ່ວນ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ