ເບິ່ງບ້ານເຂົາເອົາບົດຮຽນ 27/02/2019

355 27 ກ.ພ. 2019 ຫົວຂໍ້ຂ່າວອື່ນໆ

    ເລື່ອງ​ໜ້າ​ສົນ­ໃຈ​ປະ­ຈຳ​ວັນ​ນີ້ ລວມ​ມີ​ບັນ­ຫາ​ການ​ບໍ­ລິ­ຈາກ​ອະ​ໄວ​ຍະ​ວະ​ຂອງ​ມະ­ນຸດ​ຢູ່ ສປ ຈີນ ແລະ ບັນ­ຫາ​ການ​ມີ​ເພດ​ສຳ­ພັນ​ນອກ​ສົມ­ລົດ (ຫຼິ້ນ​ຊູ້) ຢູ່​ອິນ​ໂດ​ເນ​ເຊຍ.

    ທີ່ ສປ ຈີນ: ມີ​ເລື່ອງ​ອ່າວ​ເກົ່າ​ຈາກ​ໜັງ­ສື­ພິມ​ວຽງ​ຈັນ​ທາມ (2/12/2017) ທີ່​ສະ­ຫຼຸບ​ກ່ຽວ​ກັບ​ການ​ບໍ­ລິ­ຈາກ​ອະ​ໄວ​ຍະ​ວະ​ຂອງ​ສ່ວນ​ບຸກ­ຄົນ​ເພື່ອ​ການ​ແພດ​ໃນ ສປ ຈີນ ໂດຍ​ມີ​ລາຍ​ລະ­ອຽດ​ວ່າ ໃນ​ປີ 2017 ບຸກ­ຄົນ​ທີ່​ໄດ້​ສະ­ໝັກ​ໃຈ​ບໍ­ລິ­ຈາກ​ອະ​ໄວ​ຍະ​ວະ​ທັງ​ໝົດ​ພາຍ​ໃນ​ຮ່າງ­ກາຍ​ຂອງ​ຕົນ ເພື່ອ​ການ​ແພດ​ກ່ອນ​ເສຍ​ຊີ­ວິດ​ນັ້ນ ໄດ້​ບັນ­ລຸ​ຕົວ​ເລກ 4.207 ຄົນ (ສະ­ຖິ­ຕິ​ຮອດ​ທ້າຍ​ເດືອນ​ຕຸ­ລາ 2017) ສ່ວນ​ການ​ບໍ­ລິ­ຈາກ​ອະ​ໄວ​ຍະ​ວະ​ສ່ວນ​ໃດ​ສ່ວນ​ໜຶ່ງ​ໃນ​ຮ່າງ­ກາຍ​ຂອງ​ຕົນ​ກ່ອນ​ເສຍ​ຊີ­ວິດ​ນັ້ນ ມີ​ເຖິງ 11.896 ອັນ ລື່ນ​ປີ 2016 ໃນ​ປີ 2016 ມີ​ຜູ້​ບໍ­ລິ­ຈາກ​ອະ​ໄວ​ຍະ​ວະ​ເພື່ອ​ການ​ແພດ​ຈຳ­ນວນ 4.080 ຄົນ ມີ​ອະ​ໄວ​ຍະ​ວະ​ປະ­ເພດ​ຕ່າງໆ ຈຳ­ນວນ 11.037 ອັນ ເວ­ລາ​ນັ້ນ ທາງ​ຄະ­ນະ​ກຳ­ມາ​ທິ​ການ​ຮັບ ແລະ ປ່ຽນ​ຖ່າຍ​ອະ​ໄວ​ຍະ​ວະ​ໄດ້ ຄາດ​ຄະ­ເນ​ວ່າ ພາຍ​ໃນ​ທ້າຍ​ປີ 2017 ຈຳ­ນວນ​ຜູ້​ສະ­ໝັກ​ໃຈ​ບໍ­ລິ­ຈາກ​ອະ​ໄວ​ຍະ​ວະ​ຂອງ​ຕົນ​ກ່ອນ​ຕາຍ​ນັ້ນ ຈະ​ບັນ­ລຸ​ຕົວ​ເລກ 5.000 ຄົນ ຖ້າ​ນັບ​ທັງ​ບຸກ­ຄົນ​ທີ່​ສະ­ໝັກ​ບໍ­ລິ­ຈາກ​ໃນ​ຂະ­ນະ​ທີ່​ຍັງ​ມີ​ຊີ­ວິດ​ຢູ່​ນັ້ນ ກໍ​ຈະ​ບັນ­ລຸ​ຕົວ​ເລກ 7.000 ຄົນ ຂ່າວ​ບອກ​ວ່າ ສປ ຈີນ ໄດ້​ເກືອດ​ຫ້າມ​ນຳ​ໃຊ້​ອະ​ໄວ​ຍະ​ວະ​ຈາກ​ນັກ­ໂທດ​ປະ­ຫານ ນັບ​ແຕ່​ປີ 2015 ເປັນ­ຕົ້ນ​ມາ ແລະ ນຳ​ໃຊ້​ສະ­ເພາະ​ແຕ່​ອະ​ໄວ​ຍະ​ວະ​ທີ່​ບໍ­ລິ­ຈາກ​ດ້ວຍ​ຄວາມ​ສະ­ໝັກ​ໃຈ ຢ່າງ​ຖືກ​ກົດ­ໝາຍ.

    ໃນ​ປີ 2017 ສປ ຈີນ ຢືນ​ຢູ່​ລະ­ດັບ​ທີ 2 ຂອງ​ໂລກ ທີ່​ມີ​ຜູ້​ສະ­ໝັກ​ໃຈ​ບໍ­ລິ­ຈາກ​ອະ​ໄວ​ຍະ​ວະ ຮອງ​ຈາກ​ສະ­ຫະ­ລັດ​ອາ​ເມ​ຣິ​ກາ ທີ່​ມີ​ຜູ້​ບໍ­ລິ­ຈາກ​ເຖິງ 9.000 ຄົນ ແຕ່​ທາງ​ການ​ຄາດ​ຄະ­ເນ​ວ່າ ສປ ຈີນ ຈະ​ຄອງ​ລະ­ດັບ​ທີ 1 ຂອງ​ໂລກ ດ້ານ​ຈຳ­ນວນ​ຜູ້​ບໍ­ລິ­ຈາກ​ອະ​ໄວ​ຍະ​ວະ ພາຍ​ໃນ​ປີ 2020 ການ​ບໍ­ລິ­ຈາກ​ອະ​ໄວ​ຍະ​ວະ​ຢູ່ ສປ ຈີນ ນັ້ນ​ຖືກ­ຕ້ອງ​ຕາມ​ຫຼັກ­ການ​ຂອງ​ສາ­ກົນ ເຊັ່ນ: ຮັບ​ການ​ບໍ­ລິ­ຈາກ​ດ້ວຍ​ຄວາມ​ສະ­ໝັກ​ໃຈ ມີ​ການ​ກວດ­ກາ​ດ້ານ​ຈັນ​ຍາ​ບັນ ແລະ ຈັນ­ຍາ­ທຳ ໃນ​ການ​ປ່ຽນ​ຖ່າຍ​ອະ​ໄວ​ຍະ​ວະ​ໃຫ້​ຜູ້​ທີ່​ມີ​ຄວາມ​ຈຳ­ເປັນ ໂດຍ​ເນັ້ນ​ການ​ຈັດ​ສັນ​ທີ່​ເປັນ​ທຳ ສປ ຈີນ ມີ​ເປົ້າ​ໝາຍ​ສືບ­ຕໍ່​ປັບ­ປຸງ​ລາຍ​ລະ­ອຽດ​ຂອງ​ກົດ­ໝາຍ ແລະ ລະ­ບຽບ​ການ​ກ່ຽວ​ກັບ​ການ​ບໍ­ລິ­ຈາກ ແລະ ການ​ປ່ຽນ​ຖ່າຍ​ອະ​ໄວ​ຍະ​ວະ ໂດຍ​ການ​ເພີ່ມ​ທະ­ວີ​ການ​ຮ່ວມ​ມື​ກັບ​ສາ­ກົນ ທ່ານ ຮົງ​ຈຸນ​ຫຼິງ (Hong Junling) ຮອງ​ປະ­ທານ​ມູນ​ນິ­ທິ​ພັດ­ທະ­ນາ​ການ​ປ່ຽນ​ຖ່າຍ​ອະ​ໄວ​ຍະ​ວະ​ຂອງ ສປ ຈີນ ມີ​ຄຳ​ເຫັນ​ວ່າ ສປ ຈີນ ຍັງ​ຫຼ້າ­ຫຼັງ​ໃຫ້​ຫຼາຍ​ປະ­ເທດ​ກ່ຽວ​ກັບ​ການ​ບໍ­ລິ­ຈາກ​ອະ​ໄວ​ຍະ​ວະ ເພື່ອ​ການ​ແພດ ຕົວ­ຢ່າງ: ຢູ່​ປະ­ເທດ​ແອດ​ສະ​ປາຍ (ສະ​ເປນ) ນັ້ນ​ໂດຍ​ສະ­ເລ່ຍ​ໃນ​ຈຳ­ນວນ​ພົນ­ລະ­ເມືອງ 1 ລ້ານ​ຄົນ​ໃດ ຈະ​ມີ​ຈຳ­ນວນ​ຜູ້​ບໍ­ລິ­ຈາກ​ອະ​ໄວ​ຍະ​ວະ​ຫຼາຍ​ກວ່າ​ເຖິງ 34% ຢູ່ ສ ອາ​ເມ​ຣິ​ກາ ແມ່ນ​ຫຼາຍ​ກວ່າ 25% ຕໍ່ 1 ລ້ານ​ຄົນ ຢູ່ ສປ ຈີນ ມີ​ພຽງ 3,8% ຕໍ່ 1 ລ້ານ​ຄົນ.

    ທີ່ ອິນ​ໂດ​ເນ​ເຊຍ: ຢູ່​ອິນ​ໂດ​ເນ​ເຊຍ​ນັ້ນ ຊາຍ​ຄົນ​ໜຶ່ງ​ສາ­ມາດ​ເອົາ​ເມຍ​ໄດ້​ກາຍ​ໜຶ່ງ​ຄົນ ໃນ​ເງື່ອນ­ໄຂ​ສະ­ເພາະ​ໃດ​ໜຶ່ງ ແຕ່​ຕ້ອງ​ໄດ້​ຮັບ​ຄຳ​ເຫັນ​ດີ​ຈາກ​ເມຍ​ຫຼວງ​ກ່ອນ ສ່ວນ​ຜູ້​ທີ່​ເປັນ​ພະ­ນັກ­ງານ​ຂອງ​ລັດ​ນັ້ນ ນອກ­ຈາກ​ໄດ້​ຄຳ​ເຫັນ​ດີ​ຈາກ​ເມຍ​ຫຼວງ​ແລ້ວ ຍັງ​ຕ້ອງ​ໄດ້​ຮັບ​ການ​ອະ­ນຸ­ຍາດ​ຈາກ​ທາງ​ການ­ຈັດ­ຕັ້ງ​ຕື່ມ ສຳ­ລັບ​ການ​ມີ​ເພດ​ສຳ­ພັນ​ນອກ​ສົມ­ລົດ (ຫຼິ້ນ​ຊູ້) ນັ້ນ ຖື​ວ່າ​ເປັນ​ການ​ກະ­ທຳ​ທີ່​ຜິດ​ກົດ­ໝາຍ ໃນ​ທ້າຍ​ປີ 2016 (The Nation 12/12/2016) ໄດ້​ເວົ້າ​ກ່ຽວ​ກັບ​ການ­ເຄື່ອນ­ໄຫວ​ຂອງ​ລັດ​ຖະ​ສະ­ພາ​ອິນ​ໂດ​ເນ​ເຊຍ ເພື່ອ​ເກືອດ​ຫ້າມ​ການ​ມີ​ເພດ​ສຳ­ພັນ​ນອກ​ສົມ­ລົດ ໂດຍ​ໄດ້​ກຳ­ນົດ​ມາດ­ຕາ​ກ່ຽວ​ກັບ “ສິ­ລະ​ທຳ” ເຂົ້າ​ໃນ​ກົດ­ໝາຍ​ອາ­ຍາ (KUHP) ເຊິ່ງ​ໄດ້​ຮັບ​ຄວາມ​ເຫັນ​ດີ​ຈາກ​ສະ­ມາ­ຊິກ​ລັດ​ຖະ​ສະ­ພາ​ພັກ​ຕ່າງໆ ໃນ​ພາ­ສາ​ອິນ​ໂດ​ເນ​ເຊຍ (ບາ​ຮາ​ຊາ) ນັ້ນ ເອີ້ນ​ຄຳ​ວ່າ “ຫຼິ້ນ​ຊູ້” ວ່າ: “ຊີ​ນາ-Zina” Zina ໃນ​ກົດ­ໝາຍ​ອາ­ຍາ​ຂອງ​ອິນ​ໂດ​ເນ​ເຊຍ​ນັ້ນ ໄດ້​ກຳ­ນົດ​ນິ­ຍາຍ​ວ່າ ເປັນ​ການ​ມີ​ເພດ​ສຳ­ພັນ​ລະ­ຫວ່າງ​ຜູ້​ແຕ່ງ­ດອງ​ແລ້ວ​ກັບ​ບຸກ­ຄົນ​ທີ່​ບໍ່​ແມ່ນ​ຜົວ ຫຼື ເມຍ​ຂອງ​ຜູ້­ກ່ຽວ ແຕ່​ສຳ­ລັບ​ມາດ­ຕາ​ສະ­ບັບ​ປັບ­ປຸງ​ນັ້ນ ໄດ້​ຂະ­ຫຍາຍ​ຄວາມ​ໝາຍ​ຂອງ Zina ກວ້າງ​ອອກ​ໃຫ້​ກວມ​ເອົາ​ທັງ​ການ​ມີ​ເພດ​ສຳ­ພັນ​ກ່ອນ​ແຕ່ງ­ດອງ​ລະ­ຫວ່າງ ຍິງ-ຊາຍ.

ຂ່າວທີ່ກ່ຽວຂ້ອງ