ຂ່າວຫຼ້າສຸດ

ປຸກລະດົມທຸກພາກສ່ວນ ສ້າງກິດຈະກຳຕ້ອນຮັບປີທ່ອງທ່ຽວ ລາວ-ຈີນ

196 27 ກ.ພ. 2019 ຂ່າວໜ້າ​ໜຶ່ງ
ປຸກລະດົມທຸກພາກສ່ວນ ສ້າງກິດຈະກຳຕ້ອນຮັບປີທ່ອງທ່ຽວ ລາວ-ຈີນ

    ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ໄດ້​ຈັດ​ກອງ​ປະ­ຊຸມ​ວຽກ​ງານ​ຄຸ້ມ​ຄອງ ແລະ ສ້າງ​ກິດ­ຈະ­ກຳ​ເພື່ອ​ຕ້ອນ­ຮັບ​ປີ​ທ່ອງ​ທ່ຽວ​ລາວ-ຈີນ 2019 ຂຶ້ນ​ວັນ​ທີ 26 ກຸມ­ພາ 2019 ທີ່​ພະ​ແນກ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ ຖວ​ທ ນວ ແລະ ທ່ານ ບຸນ​ທອງ ນັນ­ທະ​ວົງ ປະ­ທານ​ກຸ່ມ​ທຸ­ລະ​ກິດ​ທ່ອງ​ທ່ຽວ ນວ ມີ​ຜູ້­ຕາງ­ໜ້າ​ສະ­ພາ​ການ​ຄ້າ​ຫູ​ໜານ​ຈີນ ປະ­ຈຳ​ລາວ ສະ­ມາ­ຄົມ​ທຸ­ລະ​ກິດ​ທ່ອງ​ທ່ຽວ ນວ ບໍ­ລິ­ສັດ​ທ່ອງ​ທ່ຽວ ໂຮງ­ແຮມ ຮ້ານ​ອາ­ຫານ ຣີ​ສອດ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໃນ​ຜ່ານ​ມາ​ພະ​ແນກ ຖວ​ທ ນວ ໄດ້​ຈັດ​ຕັ້ງ​ປະ­ຕິ­ບັດ​ການ​ຄຸ້ມ​ຄອງ​ທຸ­ລະ​ກິດ​ທ່ອງ​ທ່ຽວ ດ້ວຍ​ຮູບ​ການ​ເປັນ­ຕົ້ນ​ໄດ້​ເຜີຍ­ແຜ່​ກົດ­ໝາຍ ວ່າ​ດ້ວຍ​ການ­ທ່ອງ­ທ່ຽວ​ອອກ​ສູ່​ລວງ​ກວ້າງ ເຂົ້າ​ເຖິງ​ບັນ­ດາ​ຂະ­ແໜງ­ການ​ພາກ​ລັດ ອຳ­ນາດ​ການ​ປົກ­ຄອງ​ແຕ່​ລະ​ຂັ້ນ​ເພື່ອ​ຮັບ​ຮູ້ ແລະ ເຂົ້າ­ໃຈ​ພາ­ລະ​ບົດ­ບາດ​ໃນ​ການ​ຄຸ້ມ​ຄອງ ໃຫ້​ການ­ເຄື່ອນ­ໄຫວ​ດຳ­ເນີນ​ທຸ­ລະ​ກິດ​ຢ່າງ​ສອດ­ຄ່ອງ​ຕາມ​ລະ­ບຽບ​ກົດ­ໝາຍ ມີ​ການ​ປັບ­ປຸງ​ຍົກ​ລະ­ດັບ​ເຕັກ­ນິກ​ວິ­ຊາ​ການ ບໍ­ລິ­ການ​ເປັນ​ປະ­ຈຳ ເພື່ອ​ຮັກ­ສາ​ໄດ້​ການ​ດຶງ​ດູດ​ນັກ​ທ່ອງ​ທ່ຽວ ແລະ ພິ­ຈາ­ລະ­ນາ​ປະ­ກອບ​ຄຳ​ເຫັນ​ທາງ​ດ້ານ​ວິ­ຊາ​ການ ໂຄງ­ການ​ລົງ­ທຶນ​ຂອງ​ພາຍ​ໃນ ແລະ ຕ່າງ­ປະ­ເທດ ໃນ​ການ​ສ້າງ­ຕັ້ງ​ສະ­ຖານ­ທີ່​ທ່ອງ​ທ່ຽວ​ທີ່​ມີ​ການ​ລົງ­ທຶນ​ໃນ​ລະ­ດັບ​ສູງ ແລະ ໄດ້​ສ້າງ­ຕັ້ງ​ກຸ່ມ​ທຸ­ລະ​ກິດ​ທ່ອງ​ທ່ຽວ ນວ ທັງ​ໄດ້​ລົງ​ກວດ­ກາ​ເປັນ​ປົກ­ກະ­ຕິ ເພື່ອ​ແນະ­ນຳ​ໃຫ້​ບັນ­ດາ​ທຸ­ລະ​ກິດ​ໄດ້​ເອົາ­ໃຈ­ໃສ່ ໃນ​ການ​ຄຸ້ມ​ຄອງ​ນັກ​ທ່ອງ​ທ່ຽວ​ໃນ​ການ​ບໍ­ລິ­ການ​ທີ່​ມີ​ຄຸນ​ນະ​ພາບ ແລະ ແກ້​ໄຂ​ບັນ­ດາ​ປາ­ກົດ­ການ​ຫຍໍ້­ທໍ້​ທີ່​ເກີດ​ຂຶ້ນ​ພາຍ​ໃນ​ທຸ­ລະ​ກິດ​ທ່ອງ​ທ່ຽວ​ທັນ​ເວ­ລາ​ປົກ­ກະ­ຕິ ແລະ ເວ­ລາ​ມີ​ຫາງ​ສຽງ​ສຳ­ລັບ​ການ​ພັດ­ທະ­ນາ​ການ­ທ່ອງ­ທ່ຽວ ແມ່ນ​ໄດ້​ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ໂຄງ­ການ​ຕ່າງໆ ທັງ​ໃນ​ການ​ລົງ­ທຶນ​ຂອງ​ລັດ ສ້າງ​ສິ່ງ​ອຳ­ນວຍ​ຄວາມ​ສະ­ດວກ​ທາງ​ດ້ານ​ໂຄງ​ລ່າງ​ເຂົ້າ​ເຖິງ​ແຫຼ່ງ​ທ່ອງ​ທ່ຽວ ຊຸກ­ຍູ້​ອຳ­ນວຍ​ຄວາມ​ສະ­ດວກ​ໃຫ້​ແກ່​ການ​ດຶງ​ດູດ​ການ​ລົງ­ທຶນ ໄປ​ພ້ອມ​ກັບ​ການ​ໂຄ­ສະ­ນາ ແລະ ສົ່ງ­ເສີມ​ການ­ທ່ອງ­ທ່ຽວ.

    ຜົນ­ສຳ­ເລັດ​ການ​ຄຸ້ມ​ຄອງ​ການ­ທ່ອງ­ທ່ຽວ ໄດ້​ສະ­ແດງ​ອອກ​ຜ່ານ​ສະ­ຖິ­ຕິ​ການ­ທ່ອງ­ທ່ຽວ​ຄື: ມາ​ເຖິງ​ປັດ­ຈຸ­ບັນ ໄດ້​ມີ​ບໍ­ລິ­ສັດ​ທ່ອງ​ທ່ຽວ 292 ຫົວ­ໜ່ວຍ ໂຮງ­ແຮມ 230 ແຫ່ງ ອາ­ພາດ​ເມັນ 21 ແຫ່ງ ເຮືອນ​ພັກ​ບໍ­ລິ­ການ 194 ແຫ່ງ ຣີ​ສອດ 25 ແຫ່ງ ຮ້ານ​ອາ­ຫານ​ຂຶ້ນ​ກັບ​ພະ​ແນກ ຖວ​ທ ນວ ຄຸ້ມ​ຄອງ 97 ແຫ່ງ ເຊິ່ງ​ໃນ​ປີ 2018 ເປັນ​ປີ​ທ່ອງ​ທ່ຽວ​ລາວ ນວ ມີ​ນັກ​ທ່ອງ​ທ່ຽວ​ເຂົ້າ​ມາ​ຢ້ຽມ­ຢາມ​ທ່ອງ​ທ່ຽວ​ເກືອບ 2 ລ້ານ​ເທື່ອ​ຄົນ ສາ­ມາດ​ສ້າງ​ລາຍ​ຮັບ​ທົ່ວ​ສັງ­ຄົມ​ປະ­ມານ 2.574 ຕື້​ກີບ ຫຼື 300 ລ້ານ​ໂດ​ລາ​ສະ­ຫະ­ລັດ.

    ນອກ​ນັ້ນ ກອງ​ປະ­ຊຸມ​ໄດ້​ປຶກ­ສາ​ຫາ­ລື ແລະ ເປີດ​ໂອ­ກາດ​ໃຫ້​ບັນ­ດາ​ຫົວ­ໜ່ວຍ​ທຸ­ລະ​ກິດ​ການ­ທ່ອງ­ທ່ຽວ ຮ້ານ​ອາ­ຫານ ແລະ ໂຮງ­ແຮມ​ປະ­ກອບ​ຄຳ​ຄິດ​ເຫັນ ເພື່ອ​ລະ­ດົມ​ແນວ​ຄວາມ​ຄິດ​ປະ­ກອບ​ໃສ່​ການ​ສ້າງ​ກິດ­ຈະ­ກຳ ເພື່ອ​ຕ້ອນ­ຮັບ​ປີ​ທ່ອງ​ທ່ຽວ​ລາວ-ຈີນ 2019 ກໍ​ຄື ເພື່ອ​ດຶງ​ດູດ​ນັກ​ທ່ອງ​ທ່ຽວ​ຈີນ​ໃຫ້​ເຂົ້າ​ມາ​ທ່ຽວ​ລາວ ກໍ​ຄື ນວ ໃຫ້​ນັບ​ມື້​ນັບ​ເພີ່ມ​ຂຶ້ນ ແລະ ບັນ­ລຸ​ຕາມ​ແຜນ­ການ​ວາງ​ໄວ້.

ຂ່າວທີ່ກ່ຽວຂ້ອງ