ປະທານ ສຟລ ຢືນຢັນຄຳສັ່ງ 15 ມີຜົນດີຫຼາຍຕໍ່ປ່າໄມ້

203 27 ກ.ພ. 2019 ຂ່າວໜ້າ​ໜຶ່ງ
ປະທານ ສຟລ ຢືນຢັນຄຳສັ່ງ 15 ມີຜົນດີຫຼາຍຕໍ່ປ່າໄມ້

    ພາຍ­ຫຼັງ​ທີ່​ລັດ­ຖະ­ບານ​ໄດ້​ອອກ​ຄຳ​ສັ່ງ 15/ນຍ ເມື່ອ 2-3 ປີ­ຜ່ານ­ມາ​ນີ້ ການ­ຈັດ­ຕັ້ງ​ປະ­ຕິ­ບັດ​ມີ​ຜົນ­ສຳ­ເລັດ​ດີ​ພໍ​ສົມ­ຄວນ ເຫັນ​ໄດ້​ຈາກ​ປ່າ­ໄມ້​ຖືກ​ທຳ­ລາຍ​ຫຼຸດ​ລົງ ການ​ສົ່ງ​ອອກ​ໄມ້​ທ່ອນ​ໄປ​ຍັງ​ຕະ­ຫຼາດ​ຕ່າງ­ປະ­ເທດ​ຖືກ​ຢຸດ­ຕິ ທີ່​ສຳ­ຄັນ​ພື້ນ​ທີ່​ສີ­ຂຽວ​ໃນ​ຂອບ​ເຂດ​ທົ່ວ​ປະ­ເທດ​ເພີ່ມ​ຂຶ້ນ ທັງ​ນີ້ ຮຽກ­ຮ້ອງ​ໃຫ້​ໜ່ວຍ​ງານ​ພາກ​ລັດ​ເບິ່ງ​ຄືນ ການ​ແກ້​ໄຂ​ໄມ້​ເກົ່າ​ທີ່​ບໍ່​ໝົດ​ເປັນ​ຈັກ​ເທື່ອ.

    ທ່ານ ຄຳ​ໄພ ສົມ​ຊະ­ນະ ປະ­ທານ​ສະ­ມາ­ຄົມ​ເຟີ​ນິ​ເຈີ​ລາວ ເປີດ­ເຜີຍ​ໃຫ້​ຮູ້​ວ່າ: ໃນ​ກອງ​ປະ­ຊຸມ​ສະ­ພາ​ການ​ຄ້າ ແລະ ອຸດ​ສະ­ຫະ​ກຳ​ແຫ່ງ​ຊາດ ທີ່​ຈັດ​ຂຶ້ນ​ເມື່ອ​ເດືອນ​ມັງ­ກອນ​ຜ່ານ​ມາ ທີ່​ຫໍ​ປະ­ຊຸມ​ແຫ່ງ​ຊາດ ໂດຍ​ໃຫ້​ກຽດ​ເຂົ້າ​ຮ່ວມ​ໂອ້​ລົມ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ກໍ​ໄດ້​ກ່າວ​ຫຼາຍ​ບັນ­ຫາ​ທີ່​ມີ​ຄວາມ​ສຳ­ຄັນ ພ້ອມ​ຮຽກ­ຮ້ອງ​ນັກ­ທຸ­ລະ­ກິດ​ທີ່​ມີ​ຜົນ­ງານ ເຮັດ​ແທ້​ທຳ​ຈິງ​ເຕີບ​ໃຫຍ່​ມາ​ກັບ​ພັກ-ລັດ ກໍ​ຈົ່ງ​ປະ­ກອບ­ສ່ວນ​ຊ່ວຍ­ເຫຼືອ​ປະ­ເທດ​ຊາດ​ໃນ​ຍາມ​ພົບ​ບັນ­ຫາ ແລະ ນຳ­ພາ​ປະ­ຊາ­ຊົນ​ຜະ­ລິດ ພ້ອມ​ຊອກ​ຕະ­ຫຼາດ​ຈຳ­ໜ່າຍ​ໃຫ້​ເຂົາ­ເຈົ້າ​ໄດ້​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ເທື່ອ​ລະ​ກ້າວ.

    ທ່ານ ຄຳ​ໄພ ສົມ​ຊະ­ນະ ກ່າວ​ຕື່ມ​ວ່າ ທ່ານ​ນາ­ຍົກ​ຍັງ​ຍົກ​ເຖິງ 15/ນຍ ໂດຍ​ໃນ 2-3 ປີ­ຜ່ານ­ມາ ການ­ຈັດ­ຕັ້ງ​ປະ­ຕິ­ບັດ​ມີ​ຜົນ­ສຳ­ເລັດ​ດີ​ພໍ​ສົມ­ຄວນ ແລະ ກໍ​ໄດ້​ສຽງ​ຕອບ​ຮັບ​ໃນ​ທາງ​ທີ່​ດີ​ຈາກ​ສາ­ກົນ ລວມ​ທັງ​ພາຍ​ໃນ ໂດຍ​ລວມ​ແມ່ນ​ດີ​ຫຼາຍ ແລະ ສາ­ມາດ​ຫຼຸດ​ການ​ທຳ­ລາຍ​ປ່າ­ໄມ້ ການ​ສົ່ງ​ອອກ​ໄມ້​ທ່ອນ ເຮັດ​ໃຫ້​ພື້ນ​ທີ່​ສີ­ຂຽວ​ໃນ​ທົ່ວ​ປະ­ເທດ​ມີ​ເນື້ອ­ທີ່​ເພີ່ມ​ຂຶ້ນ ຄື​ດັ່ງ​ທີ່​ຮັບ​ຮູ້​ແລ້ວ ໄມ້​ຕົ້ນ​ໜຶ່ງ​ຈະ​ຕັດ​ໄດ້​ຕ້ອງ​ໃຊ້​ເວ­ລາ 50-100 ປີ ທີ່​ຈະ​ເປັນ​ໄມ້​ຮົ່ມ​ເຢັນ​ໃຫ້​ກັບ​ທຸກ​ສິ່ງ​ທີ່​ມີ​ຊີ­ວິດ​ທັງ​ໝົດ ແລະ ມາ​ເບິ່ງ​ຄືນ​ການ​ສົ່ງ​ໄມ້​ທ່ອນ​ອອກ​ຫຼາຍ 10 ປີ­ຜ່ານ­ມາ ແຕ່​ລາຍ​ໄດ້​ເຂົ້າ​ງົບ​ແຫ່ງ​ຊາດ ໄດ້​ບໍ່​ສົມ​ມາ​ພາ​ຄວນ​ທັງໆ​ທີ່​ເປັນ​ປະ­ເທດ​ຕົ້ນ​ທາງ ແຕ່​ປະ­ເທດ​ປາຍ­ທາງ​ຜັດ​ມີ​ຕົວ​ເລກ​ສູງ​ຫຼາຍ​ຍ້ອນ​ໄດ້​ປຸງ​ແຕ່ງ​ກ່ອນ ແລະ ສິ່ງ​ນີ້​ແມ່ນ​ບໍ່​ທັນ​ແມ່ນ​ຄຳ​ຕອບ​ໄດ້​ໃນ​ການ​ຫຼຸດ​ຕົວ​ເລກ​ທຸກ​ຍາກ ແຕ່​ປ່າ­ໄມ້​ຫຼຸດ​ລົງ​ແລ້ວ​ເກີດ​ໄພ​ທຳ​ມະ​ຊາດ ໂດຍ​ສະ­ເພາະ ໄພ​ແຫ້ງ­ແລ້ງ ແລະ ໄພ​ນ້ຳ​ຖ້ວມ​ທີ່​ຮຸນ​ແຮງ​ຂຶ້ນ ຈຶ່ງ​ມີ​ການ​ອອກ​ແຈ້ງ​ການ​ໃຫ້​ຢຸດ.

    ແຕ່​ທັງ​ນີ້​ປະ­ທານ​ສະ­ມາ­ຄົມ​ເຟີ​ນິ​ເຈີ​ລາວ ສະ­ເໜີ​ວ່າ: ພວກ​ເຮົາ​ຈະ​ຄຸມ​ກັນ​ແນວ­ໃດ ວ່າ​ຕົ້ນ​ກຳ­ເນີດ​ໄມ້​ນັ້ນ​ມາ​ແຕ່​ໃສ ຖືກ­ຕ້ອງ​ແລ້ວ ຫຼື ບໍ່ ແລະ ຂໍ​ໃຫ້​ເພີ່ມ​ສະ​ເປັກ​ໄມ້​ທີ່​ເຮັດ​ເປັນ​ເຟີ​ນິ​ເຈີ ໂດຍ​ອີງ­ໃສ່​ລູກ​ຄ້າ​ຕ້ອງ­ການ ຈຶ່ງ​ຈະ​ໄປ​ໄດ້ ຈຶ່ງ​ເປັນ​ການ​ສົ່ງ­ເສີມ ຖ້າ​ເຮົາ​ກຳ­ນົດ​ໃຫ້​ນ້ອຍ ແລະ ບາງ​ເກີນ​ໄປ​ກໍ​ຈະ​ເປັນ​ຂີ້​ເລື່ອຍ ສຸດ​ທ້າຍ​ທຸກ​ຝ່າຍ​ກໍ​ອັບ​ປະ­ໂຫຍດ ຈຸດ​ນີ້​ເຮົາ​ຄວນ​ເບິ່ງ​ກົນ​ໄກ​ຕະ­ຫຼາດ ຂໍ​ໃຫ້​ເຈົ້າ​ໜ້າ­ທີ່​ກ່ຽວ­ຂ້ອງ ແລະ ເຈົ້າ​ຂອງ​ໂຮງ­ງານ​ມີ​ຄວາມ​ຈິງ​ໃຈ ວ່າ​ໄມ້​ມີ​ຕົ້ນ​ກຳ­ເນີດ​ມາ​ຈາກ​ໃສ​ກ່ອນ​ເຂົ້າ​ໂຮງ­ງານ ໃຫ້​ເຈົ້າ​ໜ້າ­ທີ່​ຄຸ້ມ​ຄອງ​ຕ້ອງ​ປະ­ຕິ­ບັດ​ຢ່າງ​ເຂັ້ມ​ງວດ.

    ຂະ­ນະ​ທີ່​ຕໍ່​ກັບ​ປະ­ເດັນ​ມີ​ການ​ຂໍ​ແກ້​ໄຂ​ໄມ້​ເກົ່າ ໄມ້​ໂດກ​ແມ່ນ​ມີ​ຂຶ້ນ​ທຸກ​ປີ ດ້ານ​ນີ້​ກໍ​ຂໍ​ໃຫ້​ພາກ​ລັດ​ເບິ່ງ​ຄືນ ຫຼື ອາດ​ຈະ​ກຳ­ນົດ​ເວ­ລາ​ໃນ​ການ​ແກ້​ໄຂ​ຢ່າງ​ຈະ­ແຈ້ງ ບໍ່​ດັ່ງ­ນັ້ນ ໄມ້​ເກົ່າ​ກໍ​ຈະ​ບໍ່​ໝົດ​ເປັນ​ຈັກ​ເທື່ອ ແລະ ສຸດ​ທ້າຍ​ໄມ້​ກໍ​ໝົດ​ໄປ​ທຸກໆ​ປີ ລັດ​ກໍ​ເສຍ​ລາຍ​ຮັບ ສ່ວນ​ປະ­ຊາ­ຊົນ​ກໍ​ຈະ​ປະ​ເຊີນ​ກັບ​ບັນ­ຫາ​ໄພ​ທຳ​ມະ​ຊາດ​ທີ່​ຮຸນ​ແຮງ ແລະ ຍາກ​ທີ່​ຈະ​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ໄດ້ ທ່ານ ຄຳ​ໄພ ສົມ​ຊະ­ນະ ກ່າວ.

ຂ່າວທີ່ກ່ຽວຂ້ອງ