ຂ່າວຫຼ້າສຸດ

ໄຊທານີ ກຽມຈັດງານວາງສະແດງ ແລະ ຂາຍສິນຄ້າ 2019

179 27 ກ.ພ. 2019 ຂ່າວໜ້າ​ໜຶ່ງ

    ເມືອງ​ໄຊ​ທາ­ນີ ໄດ້​ເລີ່ມ​ຈັດ​ງານ​ວາງ­ສະ­ແດງ ແລະ ຂາຍ​ສິນ­ຄ້າ ຄັ້ງ​ທຳ​ອິດ​ປີ 2014 ມີ​ຊາວ​ກະ­ສິ­ກອນ ຊ່າງ​ຫັດ­ຖະ­ກຳ ແລະ ຫົວ­ໜ່ວຍ​ທຸ­ລະ​ກິດ​ພາຍ​ໃນ​ເມືອງ ໃຫ້​ຄວາມ​ສົນ­ໃຈ ແລະ ເຂົ້າ​ຮ່ວມ​ງານ​ນັບ​ມື້​ເພີ່ມ​ຂຶ້ນ​ຢ່າງ​ຕໍ່​ເນື່ອງ ແລະ ປີ​ນີ້​ຈະ​ໄດ້​ຈັດ​ຂຶ້ນ​ໃນ​ວັນ​ທີ 5-11 ມີ­ນາ 2019 ທີ່​ບ້ານ​ໂນນ​ສະ­ອາດ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ (ເສັ້ນ­ທາງ​ເລກ 10 ທາງ​ໄປ​ທ່າ​ງອນ) ຄາດ​ວ່າ​ຈະ​ມີ​ສິນ­ຄ້າ​ກະ­ສິ­ກຳ ຫັດ­ຖະ­ກຳ ສິນ­ຄ້າ ODOP ແລະ ບັນ­ດາ​ນັກ­ທຸ­ລະ­ກິດ​ຜູ້​ປະ­ກອບ​ການ​ເຂົ້າ​ຮ່ວມ​ງານ​ຄັ້ງ​ນີ້​ຫຼາຍ​ກວ່າ 120 ຫົວ­ໜ່ວຍ.

    ທ່ານ ຄຳ​ປ່ຽນ ອິນ​ທະ​ລື­ຊາ ຮອງ​ເຈົ້າ­ເມືອງ​ໄຊ​ທາ­ນີ ໄດ້​ຖະ­ແຫຼງ​ຂ່າວ​ກ່ຽວ​ກັບ​ການ​ຈັດ​ງານ​ຕະ­ຫຼາດ­ນັດ​ວາງ­ສະ­ແດງ ແລະ ຂາຍ​ສິນ­ຄ້າ ເມືອງ​ໄຊ​ທາ­ນີ ປີ 2019 ໃນ​ວັນ​ທີ 21 ກຸມ­ພາ ຜ່ານ​ມາ​ວ່າ: ການ​ຈັດ​ງານ​ຕະ­ຫຼາດ­ນັດ ເພື່ອ​ຊຸກ­ຍູ້​ສົ່ງ­ເສີມ​ການ​ຜະ­ລິດ​ກະ­ສິ­ກຳ ຫັດ­ຖະ­ກຳ ແລະ ອຸດ­ສາ­ຫະ­ກຳ​ປຸງ​ແຕ່ງ ຕະ­ຫຼອດ​ເຖິງ​ຫົວ­ຄິດ​ປະ­ດິດ​ສ້າງ​ຂອງ​ປະ­ຊາ­ຊົນ ຜູ້​ປະ­ກອບ​ການ​ພາຍ​ໃນ​ເມືອງ​ໃຫ້​ມີ​ການ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ແລະ ກາຍ­ເປັນ​ສິນ­ຄ້າ​ທີ່​ມີ​ຄຸ­ນະ­ພາບ​ສູງ​ສາ­ມາດ​ແຂ່ງ­ຂັນ​ກັບ​ຕະ­ຫຼາດ​ໄດ້ ພ້ອມ​ນີ້ ຍັງ​ແນ­ໃສ່​ເປີດ​ໂອ­ກາດ​ໃຫ້​ບັນ­ດາ​ກຸ່ມ​ການ​ຜະ­ລິດ​ຕ່າງໆ ໄດ້​ພົບ​ປະ​ແລກ­ປ່ຽນ​ປະ­ສົບ​ການ ເຕັກ­ນິກ​ການ​ຜະ­ລິດ ການ​ວາງ​ແຜນ​ຕະ­ຫຼາດ​ທີ່​ຮັດ­ກຸມ ແລະ ເປີດ​ກວ້າງ​ສູ່​ຕະ­ຫຼາດ​ພາກ​ພື້ນ​ເທື່ອ​ລະ​ກ້າວ ໃນ​ງານ​ຄັ້ງ​ນີ້ ນອກ­ຈາກ​ຈຳ­ໜ່າຍ​ສິນ­ຄ້າ​ຄຸນ​ນະ​ພາບ​ດີ ລາ­ຄາ​ເໝາະ​ສົມ​ແລ້ວ ຜູ້​ເຂົ້າ​ຮ່ວມ​ງານ​ຍັງ​ຈະ​ໄດ້​ຮັບ​ຊົມ​ການ​ແຂ່ງ­ຂັນ​ສິ­ລະ​ປະ ແລະ ກີ­ລາ​ກະ­ຕໍ້​ຫວາຍ ຂັ້ນ​ມັດ­ທະ­ຍົມ ຊີງ​ຂັນ​ເຈົ້າ­ເມືອງ​ໄຊ​ທາ­ນີ​ຕື່ມ​ອີກ.

ຂ່າວທີ່ກ່ຽວຂ້ອງ