ເນັ້ນຈັດກິດຈະກຳຢູ່ທ້ອງຖິ່ນ ແກ້ໄຂສາເຫດຄວາມທຸກຍາກ

203 27 ກ.ພ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ປະ­ຈຳ​ປີ​ຂອງ​ໂຄງ­ການ​ສະ­ໜັບ­ສະ­ໜູນ​ການ​ປົກ­ຄອງ​ເພື່ອ​ການ​ພັດ­ທະ­ນາ ໂດຍ​ພາຍ​ໃຕ້​ແຜນ​ງານ​ປັບ­ປຸງ​ບູ­ລະ­ນະ​ການ​ປົກ­ຄອງ​ແຫ່ງ​ຊາດ ຈັດ​ຂຶ້ນ​ວັນ​ທີ 22 ກຸມ­ພາ 2019 ທີ່​ສູນ​ເຝິກ­ອົບ­ຮົມ​ສະ­ຫະ­ພັນ​ແມ່­ຍິງ ເປັນ​ປະ­ທານ​ຮ່ວມ​ຂອງ​ທ່ານ ຄຳ​ໝັ້ນ ສູນ​ວິ​ເລີດ ລັດ­ຖະ­ມົນ­ຕີ​ກະ­ຊວງ​ພາຍ​ໃນ ແລະ ທ່ານ​ນາງ ຄາ​ລີ​ນ້າ ອິມ​ໂມ​ເນັນ ຜູ້​ປະ­ສານ​ງານ​ຂອງ​ອົງ­ການ​ສະ­ຫະ​ປະ­ຊາ​ຊາດ ທັງ​ເປັນ​ຜູ້­ຕາງ­ໜ້າ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ ປະ­ຈຳ​ລາວ ມີ​ບັນ­ດາ​ຜູ້­ຕາງ­ໜ້າ​ຈາກ​ອົງ­ການ​ຮ່ວມ​ມື​ເພື່ອ​ການ​ພັດ­ທະ­ນາ​ຂອງ​ປະ­ເທດ​ສະ​ວິດ ອົງ­ການ​ກອງ​ທຶນ​ເພື່ອ​ການ​ພັດ­ທະ­ນາ​ຂອງ​ສະ­ຫະ​ປະ­ຊາ​ຊາດ ແລະ ຫົວ­ໜ້າ​ຫ້ອງ­ການ​ກອງ​ເລ­ຂາ​ແຜນ​ງານ​ປັບ­ປຸງ​ບູ­ລະ­ນະ​ການ​ປົກ­ຄອງ​ແຫ່ງ​ຊາດ ແລະ ພະ­ນັກ­ງານ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຄຳ​ໝັ້ນ ສູນ​ວິ​ເລີດ ກ່າວ​ວ່າ: ວຽກ​ງານ​ປັບ­ປຸງ​ບູ­ລະ­ນະ​ການ​ປົກ­ຄອງ ແມ່ນ​ວຽກ​ງານ​ທີ່​ສຳ­ຄັນ​ຂອງ​ລັດ­ຖະ­ບານ ເພື່ອ​ສືບ­ຕໍ່​ປັບ­ປຸງ​ລະ­ບົບ​ກົງ­ຈັກ​ການ­ຈັດ­ຕັ້ງ​ຂອງ​ລັດ ແລະ ການ​ຄຸ້ມ​ຄອງ​ພະ­ນັກ­ງານ-ລັດ­ຖະ­ກອນ ຕາມ​ຄຳ​ຂວັນ​ທີ່​ຮັບ­ຮອງ​ຢູ່​ໃນ​ກອງ​ປະ­ຊຸມ​ປະ­ຈຳ​ປີ​ຂອງ​ຂະ­ແໜງ​ພາຍ​ໃນ ໂດຍ​ສືບ­ຕໍ່​ປັບ­ປຸງ​ກົງ­ຈັກ​ໃຫ້​ກະ­ທັດ​ຮັດ ເຂັ້ມ­ແຂງ ແລະ ສ້າງ​ບຸ​ຄະ­ລາ​ກອນ​ໃນ​ທຸກ​ລະ­ດັບ ລວມ​ເຖິງ​ຂັ້ນ​ເມືອງ ແລະ ຂັ້ນ​ບ້ານ​ທີ່​ມີ​ຄຸນ​ນະ​ພາບ ມີ​ປະ­ສິດ­ທິ­ພາບ ເຊິ່ງ​ເປັນ​ວຽກ​ງານ​ເລັ່ງ​ດ່ວນ ແລະ ຍາວ​ນານ ທີ່​ພວກ​ເຮົາ​ຈະ​ຕ້ອງ​ໄດ້​ເອົາ­ໃຈ­ໃສ່ ການ​ປົກ­ຄອງ​ແມ່ນ​ການ​ບໍ­ລິ­ຫານ​ລັດ​ທີ່​ດີ ແລະ ສ້າງ​ຊັບ­ພະ­ຍາ­ກອນ​ມະ­ນຸດ​ທີ່​ມີ​ຄຸນ​ນະ​ພາບ ເປັນ​ເງື່ອນ­ໄຂ​ທີ່​ຈຳ­ເປັນ​ໃນ​ການ​ພັດ­ທະ­ນາ​ທີ່​ຍືນ​ຍົງ ແລະ ພັດ­ທະ­ນາ​ແບບ​ມີ​ສ່ວນ​ຮ່ວມ ແນ­ໃສ່​ແກ້​ໄຂ​ບັນ­ຫາ​ທີ່​ເປັນ​ສາ­ເຫດ​ຕົ້ນ­ຕໍ​ຂອງ​ຄວາມ­ທຸກ​ຍາກ ແລະ ເພື່ອ​ເປັນ​ການ​ປັບ­ປຸງ​ລະ­ດັບ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໃຫ້​ດີ​ຂຶ້ນ ພ້ອມ​ນັ້ນ ຍັງ​ເນັ້ນ​ໃຫ້​ເອົາ­ໃຈ­ໃສ່​ການ​ປະ­ຕິ­ບັດ​ກິດ­ຈະ­ກຳ​ຢູ່​ທ້ອງ­ຖິ່ນ ໂດຍ​ເນັ້ນ​ໜັກ​ໃສ່​ການ​ພັດ­ທະ­ນາ​ແບບ​ມີ​ສ່ວນ​ຮ່ວມ ທັງ​ເປັນ​ການ​ຊຸກ­ຍູ້​ການ​ປົກ­ຄອງ ແລະ ການ​ພັດ­ທະ­ນາ​ທ້ອງ­ຖິ່ນ​ຢ່າງ​ແຂງ­ແຮງ ປະ­ກອບ­ສ່ວນ​ໃຫ້​ແກ່​ລັດ­ຖະ­ບານ ໃນ​ການ​ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໃນ​ເຂດ​ຫ່າງ​ໄກ​ສອກ­ຫຼີກ ແລະ ກ້າວ​ໄປ​ເຖິງ​ການ​ລຶ­ບລ້າງ​ຄວາມ­ທຸກ​ຍາກ ເອົາ­ໃຈ­ໃສ່​ປະ­ຕິ­ບັດ​ແຜນ­ການ​ໃຫ້​ປະ­ສົບ​ຜົນ­ສຳ­ເລັດ​ຕາມ​ເປົ້າ​ໝາຍ ແລະ ຮ່ວມ​ກັນ​ສ້າງ​ແຜນ​ສຳ­ລັບ​ໄລ­ຍະ​ຕໍ່​ໄປ​ໃຫ້​ລະ­ອຽດ ແນ­ໃສ່​ຊຸກ­ຍູ້​ວຽກ​ງານ​ສາມ​ສ້າງ​ວຽກ​ງານ​ສ້າງ​ຄວາມ​ເຂັ້ມ­ແຂງ​ພັດ­ທະ­ນາ​ທ້ອງ­ຖິ່ນ ແລະ ວຽກ​ງານ​ສ້າງ​ຄວາມ​ເຂັ້ມ­ແຂງ​ໃຫ້​ແກ່​ການ​ພັດ­ທະ­ນາ​ທ້ອງ­ຖິ່ນ ກໍ​ຄື ພັດ­ທະ­ນາ​ປະ­ເທດ​ຢ່າງ​ມີ​ປະ­ສິດ­ທິ­ພາບ.

ຂ່າວທີ່ກ່ຽວຂ້ອງ