ຫຼາຍບັນຫາທີ່ປະຊາຊົນສະເໜີໃຫ້ ສສຊ ເລັ່ງແກ້ໄຂ

350 27 ກ.ພ. 2019 ຂ່າວໜ້າ​ໜຶ່ງ

    ອຳ­ນາດ​ການ​ປົກ­ຄອງ​ບ້ານ ແລະ ປະ­ຊາ­ຊົນ​ບ້ານ​ບຶງ​ຂະ​ຫຍອງ ແລະ ບ້ານ​ໂສກ​ປ່າ​ຫຼວງ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ໄດ້​ໃຫ້­ການ​ຕ້ອນ­ຮັບ​ການ​ລົງ​ມາ​ຢ້ຽມ­ຢາມ​ພົບ​ປະ​ຂອງ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ຊຸດ​ທີ VIII ແລະ ສະ­ມາ­ຊິກ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສສ ນວ) ຊຸດ​ທີ I ທີ່​ວັດ​ບ້ານ​ໂສກ​ປ່າ​ຫຼວງ ວັນ​ທີ 25 ກຸມ­ພາ 2019 ນຳ­ພາ​ໂດຍ​ທ່ານ ຄຳ​ເຜີຍ ວົງ­ສາ​ຄຳ​ຜຸຍ ສສຊ ຊຸດ​ທີ VIII ທັງ​ເປັນ​ສະ­ມາ­ຊິກ ສສ ນວ ຊຸດ​ທີ I ແລະ ທ່ານ​ນາງ ຄຳ​ແຫວນ ສິງ​ບັນ­ດິດ ຮອງ​ປະ­ທານ​ຄະ­ນະ​ກຳ­ມະ­ການ​ວັດ­ທະ­ນະ­ທຳ-ສັງ­ຄົມ ແລະ ບັນ­ດາ­ເຜົ່າ ສະ­ພາ​ປະ­ຊາ­ຊົນ ນວ ຊຸດ​ທີ I.

    ໂອ­ກາດ​ນີ້ ສສຊ ແລະ ສສ ນວ ໄດ້​ຮັບ​ຟັງ​ລາຍ​ງານ​ສະ­ພາບ​ລວມ​ໂດຍ​ຫຍໍ້​ຂອງ​ບ້ານ​ທີ່​ໄດ້​ສະ­ເໜີ ຈາກ​ນັ້ນ​ໄດ້​ນຳ​ເອົາ​ຜົນ­ສຳ­ເລັດ​ຂອງ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ ສສຊ ຊຸດ​ທີ VIII ແລະ ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ ສສ ນວ ຊຸດ​ທີ I ທີ່​ທັງ​ສອງ​ສະ­ພາ​ໄດ້​ເຫັນ​ດີ​ເອ­ກະ​ພາບ​ກັນ ຮັບ­ຮອງ​ພິ­ຈາ­ລະ­ນາ​ແກ້​ໄຂ​ບັນ­ຫາ​ສຳ­ຄັນ​ຂອງ​ຊາດ ກໍ​ຄື ຂອງ ນວ ເພື່ອ​ນຳ​ມາ​ເຜີຍ­ແຜ່​ໃຫ້​ປະ­ຊາ­ຊົນ​ໄດ້​ຮັບ​ຊາບ ໃນ​ການ​ເຮັດ​ໜ້າ­ທີ່​ເປັນ​ຕົວ​ແທນ​ໃຫ້​ປະ­ຊາ­ຊົນ​ບັນ­ດາ­ເຜົ່າ ໃນ​ການ​ນຳ​ເອົາ​ຂໍ້​ຄິດ​ເຫັນ ຄຳ​ສະ­ເໜີ​ທີ່​ຂັດ­ຂ້ອງ​ຕ່າງໆ​ຢູ່​ຂັ້ນ​ພື້ນ­ຖານ ທີ່​ເຫັນ​ວ່າ​ບໍ່​ມີ​ຄວາມ​ສອດ­ຄ່ອງ ບໍ່​ໄດ້​ຮັບ​ການ​ແກ້​ໄຂ​ຢ່າງ​ເປັນ​ທຳ​ເໝາະ​ສົມ ພ້ອມ​ຮັບ​ເອົາ ແລະ ນຳ​ສະ­ເໜີ​ຕໍ່­ໃຫ້​ພາກ­ສ່ວນ​ກ່ຽວ­ຂ້ອງ​ລົງ​ແກ້​ໄຂ.

     ພ້ອມ​ນີ້ ປະ­ຊາ­ຊົນ​ໄດ້​ສະ­ເໜີ​ຫຼາຍ​ບັນ­ຫາ​ຕໍ່​ຜູ້​ແທນ ເພື່ອ​ໃຫ້​ນຳ­ໄປ​ພິ­ຈາ­ລະ­ນາ​ແກ້​ໄຂ​ຢ່າງ​ຮີບ​ດ່ວນ ເປັນ­ຕົ້ນ ບັນ­ຫາ​ນະ­ໂຍ­ບາຍ​ອອກ​ໃບ​ຕາ­ດິນ ໃຫ້​ປະ­ຊາ­ຊົນ​ທີ່​ອາ­ໄສ​ຢູ່​ດິນ​ຈັບ­ຈອງ​ບໍ­ລິ­ເວນ​ບ້ານ​ບຶງ​ຂະ​ຫຍອງ ບັນ­ຫາ​ລາ­ຄາ​ຄ່າ​ຊົດ​ເຊີຍ​ດິນ​ຂອງ​ປະ­ຊາ­ຊົນ​ທີ່​ຖືກ​ໂຄງ­ການ​ບຶງ​ທາດ­ຫຼວງ ແມ່ນ​ມີ​ລາ­ຄາ​ຕ່ຳ​ສະ­ເໜີ​ໃຫ້​ພາກ­ສ່ວນ​ກ່ຽວ­ຂ້ອງ​ພິ­ຈາ­ລະ­ນາ​ດ້ານ​ລາ­ຄາ​ຊົດ​ເຊີຍ ສະ­ເໜີ​ເບິ່ງ​ຄືນ​ການ​ໃສ່​ວິ­ໄນ​ຜູ້​ພິ­ພາກ­ສາ​ທີ່​ກະ­ທຳ​ຄວາມ​ຜິດ​ຢ່າງ​ເອົາ​ຈິງ​ເອົາ​ຈັງ ແລະ ສະ­ເໜີ​ໃຫ້​ແກ້​ໄຂ​ບັນ­ຫາ​ຄົນ​ຂໍ­ທານ​ໃຫ້​ໝົດ​ໄປ​ຈາກ​ສັງ­ຄົມ ແລະ ເອົາ­ໃຈ­ໃສ່​ເບິ່ງ​ຄືນ​ບັນ­ຫາ​ການ​ຕັດ­ສິນ​ຂອງ​ສານ​ຊັກ​ຊ້າ ແລະ ບັນ­ຫາ​ອື່ນໆ.

ຂ່າວທີ່ກ່ຽວຂ້ອງ