ວຽງຈັນ-ໂຮ່ຈີມິງ ແລະ ນາຊາຍທອງ ກອດຄໍເຂົ້າຮອບຮອງບານເຕະກີລານັກຮຽນທົ່ວ ນວ

429 28 ກ.ພ. 2019 ວົງຈອນກີລາ

    ທີມ​ນັກ­ຮຽນ​ໂຮງ­ຮຽນ​ມັດ­ທະ­ຍົມ​ຕອນ​ປາຍ​ມິດ­ຕະ­ພາບ​ວຽງ​ຈັນ-ໂຮ່​ຈີ​ມິງ ກອດ​ຄໍ​ແຊັມ​ເກົ່າ​ທີມ​ນັກ­ຮຽນ​ຂອງ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ​ເມືອງ (ສກມ) ນາ​ຊາຍ​ທອງ​ເຂົ້າ​ຮອບ​ຮອງ​ຊະ­ນະ​ເລີດ ການ​ແຂ່ງ­ຂັນ​ບານ­ເຕະ​ກີ­ລາ​ນັກ­ຮຽນ​ສາ­ມັນ​ສຶກ​ສາ​ທົ່ວ​ນະ­ຄອນ­ຫຼວງ​ວຽງ​ຈັນ (ນວ) ປະ­ຈຳ​ສົກ­ຮຽນ 2018-2019.

    ວັນ​ທີ 27 ກຸມ­ພາ 2019 ຢູ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ ໄດ້​ຈັດ​ແຂ່ງ­ຂັນ​ກີ­ລາ​ບານ­ເຕະ​ລະ­ດັບ​ນັກ­ຮຽນ​ຍິງ-ຊາຍ ກີ­ລາ​ນັກ­ຮຽນ​ສາ­ມັນ​ສຶກ​ສາ​ທົ່ວ ນວ ປະ­ຈຳ​ສົກ­ຮຽນ 2018-2019 ຮອບ 8 ທີມ​ສຸດ​ທ້າຍ​ມີ 4 ຄູ່​ຍິງ 1 ຄູ່​ລົງ​ແຂ່ງ­ຂັນ ໂດຍ​ລາຍ­ການ​ນີ້ ຈັດ​ຂຶ້ນ​ເພື່ອ​ຄັດ​ເລືອກ​ນັກ­ຮຽນ​ພອນ​ສະ­ຫວັນ​ດີ­ເດັ່ນ ກຽມ​ສົ່ງ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ຢູ່​ແຂວງ​ຊຽນ​ຂວາງ ໃນ​ທ້າຍ​ປີ​ນີ້ ສຳ­ລັບ​ປະ­ເພດ​ທີມ​ຊາຍ​ມີ 11 ທີມ​ແລະ ທີມ​ຍິງ 9 ທີມ ເຂົ້າ​ຮ່ວມ ເຊິ່ງ​ມາ​ຈາກ​ຫ້ອງ­ການ ສກມ 9 ຕົວ​ເມືອງ ມສ ມິດ­ຕະ­ພາບ​ລາວ-ຫວຽດ­ນາມ ມ​ປາຍ ມິດ­ຕະ­ພາບ​ວຽງ​ຈັນ-ໂຮ່​ຈີ​ມິງ ແລະ ມສ ວຽງ​ຈັນ ໂດຍ​ການ​ແຂ່ງ­ຂັນ​ທີມ​ເສຍ​ຕົກ​ຮອບ ທີມ​ຊະ­ນະ​ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ ໂດຍ​ກຳ­ນົດ​ເງື່ອນ­ໄຂ​ນັກ­ກີ­ລາ​ທີມ​ຊາດ​ໃນ​ຮຸ່ນ​ອາ­ຍຸ​ບໍ່​ເກີນ 16 ປີ​ສາ­ມາດ​ຮ່ວມ​ທີມ​ໄດ້ 3 ຄົນ.

    ສຳ­ລັບ​ຜົນ​ການ​ແຂ່ງ­ຂັນ​ຮອບ 8 ທີມ​ສຸດ​ທ້າຍ ວັນ​ທີ 27 ກຸມ­ພາ 2019 ມ​ປາຍ ມິດ­ຕະ­ພາບ​ວຽງ​ຈັນ-ໂຮ​ຈີ​ມິງ ຊະ­ນະ​ໂຮງ­ຮຽນ ມສ ມິດ­ຕະ­ພາບ​ລາວ-ຫວຽດ­ນາມ 4-0 ປະ­ຕູ ຜ່ານ​ເຂົ້າ​ໄປ​ຫຼິ້ນ​ໃນ​ຮອບ 4 ທີມ​ສຸດ​ທ້າຍ​ພົບ​ແຊັມ​ເກົ່າ​ທີມ​ຫ້ອງ­ການ ສກມ ນາ​ຊາຍ​ທອງ​ທີ່​ເອົາ​ຊະ­ນະ​ທີມ ສກມ ປາກ​ງື່ມ 4-0 ປະ­ຕູ ສ່ວນ ສກມ ໄຊ​ທາ­ນີ ກັບ ສກມ ຈັນ­ທະ​ບູ​ລີ (ທີມ​ຊາຍ) ແລະ ສກມ ຫາດ​ຊາຍ​ຟອງ​ກັບ ສກມ ໄຊ​ເຊດ​ຖາ (ທີມ​ຍິງ) ຈະ​ລາຍ​ງານ​ໃຫ້​ຊາບ​ຕື່ມ​ອີກ.

    ສຳ­ລັບ​ຜົນ​ການ​ແຂ່ງ­ຂັນ​ວັນ​ທີ 26 ກຸມ­ພາ 2019 ມີ 4 ຄູ່ ປະ­ເພດ​ຊາຍ​ທີມ​ນັກ­ກີ­ລາ​ເຕະ­ບານ​ນັກ­ຮຽນ ສກມ ສີ​ໂຄດ​ຕະ­ບອງ​ຊະ­ນະ​ຈຸດ​ໂທດ ທີມ ສກມ ໄຊ​ເຊດ​ຖາ 5-4 ປະ­ຕູ (ຫຼັງ​ໃນ​ເກມ​ສະ­ເໝີ 1-1 ປະ­ຕູ) ຜ່ານ​ເຂົ້າ​ຮອບ 4 ທີມ​ສຸດ​ທ້າຍ ປະ­ເພດ​ທີມ​ຍິງ ສກມ ຈັນ­ທະ​ບູ​ລີ ເສຍ​ໃຫ້ ສກມ ປາກ​ງື່ມ 1-0 ປະ­ຕູ ສກມ ໄຊ​ທາ­ນີ ຊະ­ນະ ສກມ ນາ​ຊາຍ​ທອງ 1-0 ປະ­ຕູ ມສ ວຽງ​ຈັນ ເສຍ​ໃຫ້ ສກມ ສີ​ສັດ­ຕະ​ນາກ 0-4 ປະ­ຕູ.

    ສຳ­ລັບ​ວັນ​ທີ 28 ກຸມ­ພາ 2019 ຈະ​ແຂ່ງ­ຂັນ​ຮອບ 4 ທີມ​ສຸດ​ທ້າຍ​ຍິງ-ຊາຍ​ຕອນ​ເຊົ້າ 2 ຄູ່ ແລະ​ຕອນ​ແລງ 2 ຄູ່ ສ່ວນ​ຜົນ​ຈະ​ເປັນ​ແນວ­ໃດ​ຈະ​ລາຍ​ງານ​ໃຫ້​ຊາບ​ຕື່ມ​ອີກ.

ຂ່າວທີ່ກ່ຽວຂ້ອງ