ຂ່າວຫຼ້າສຸດ

ນັກທ່ອງທ່ຽວ ໃຊ້ບໍລິການບໍລິສັດສຸດໃຈທ່ອງທ່ຽວ ເພີ່ມຂຶ້ນ 20%

260 28 ກ.ພ. 2019 ຂ່າວໜ້າ​ໜຶ່ງ
ນັກທ່ອງທ່ຽວ ໃຊ້ບໍລິການບໍລິສັດສຸດໃຈທ່ອງທ່ຽວ ເພີ່ມຂຶ້ນ 20%

    ທ່ານ ເຄນ ວົງ​ທອງ​ຈິດ ປະ­ທານ​ບໍ­ລິ­ສັດ ສຸດ​ໃຈ​ທ່ອງ​ທ່ຽວ ຈຳ­ກັດ​ຜູ້​ດຽວ ໃຫ້​ສຳ­ພາດ​ເມື່ອ​ບໍ່​ດົນ​ນີ້​ວ່າ: ລັດ­ຖະ­ບານ​ລາວ ໄດ້​ເປີດ​ປີ​ທ່ອງ​ທ່ຽວ​ລາວ 2018 ມີ​ນັກ​ທ່ອງ​ທ່ຽວ​ຕ່າງ­ປະ­ເທດ​ມາ​ໃຊ້​ບໍ­ລິ­ການ​ບໍ­ລິ­ສັດ ສຸດ​ໃຈ​ທ່ອງ​ທ່ຽວ ເພີ່ມ​ຂຶ້ນ​ປະ­ມານ 20% ທຽບ­ໃສ່​ປີ 2017 ຍ້ອນ​ຫຼາຍ​ປັດ​ໄຈ ເປັນ­ຕົ້ນ ພາກ​ລັດ​ໄດ້​ອຳ­ນວຍ​ຄວາມ​ສະ­ດວກ​ການ​ປະ­ກອບ​ເອ­ກະ­ສານ​ວ່ອງ­ໄວ​ຂຶ້ນ​ກວ່າ​ເກົ່າ ເຮັດ​ໃຫ້​ແຂກ​ມີ​ຄວາມ​ປະ​ທັບ​ໃຈ​ຖ້າ​ທຽບ​ປີ 2016 ແລະ 2017 ໃຊ້​ເວ­ລາ​ແລ່ນ​ເອ­ກະ­ສານ 2-3 ວັນ ແຕ່​ປີ 2018 ພຽງ​ແຕ່ 1 ວັນ ຫຼື ເຄິ່ງ​ວັນ​ກໍ​ໄດ້​ແລ້ວ ນອກ​ນີ້ ຍັງ​ມີ​ນະ­ໂຍ­ບາຍ​ໂຄ­ສະ­ນາ​ໃຫ້​ນັກ​ທ່ອງ​ທ່ຽວ​ມາ​ທ່ຽວ​ລາວ ການ​ບໍ­ລິ­ການ​ດີ ສະ­ຖານ­ທີ່​ທ່ອງ​ທ່ຽວ​ມີ​ການ​ພັດ­ທະ­ນາ​ມີ​ຄວາມ​ສວຍ​ງາມ​ຫຼາຍ​ຂຶ້ນ ການ​ນຳ​ເອົາ​ນັກ​ທ່ອງ​ທ່ຽວ​ໄປ​ທ່ຽວ​ຊົມ​ສະ­ຖານ­ທີ່​ຕ່າງໆ ຖ້າ​ແລ່ນ​ເອ­ກະ­ສານ​ບໍ່​ທັນ​ພາກ­ສ່ວນ​ກ່ຽວ­ຂ້ອງ​ຂອງ​ລັດ ກໍ​ມີ​ນະ­ໂຍ­ບາຍ​ໃຫ້​ໄປ​ທ່ຽວ​ກ່ອນ​ແລ້ວ​ແລ່ນ​ເອ­ກະ­ສານ​ຕາມ​ຫຼັງ.

    ໂດຍ​ລວມ​ແລ້ວ ປີ​ທ່ອງ​ທ່ຽວ​ລາວ 2018 ມີ​ຫຼາຍ​ອັນ​ປ່ຽນ­ແປງ ຈຶ່ງ​ເຮັດ​ໃຫ້​ເປັນ​ທີ່​ປະ​ທັບ​ໃຈ​ຂອງ​ນັກ​ທ່ອງ​ທ່ຽວ​ຕ່າງ­ປະ­ເທດ ຢາກ​ເຂົ້າ​ມາ​ທ່ຽວ​ປະ­ເທດ​ລາວ​ນັບ​ມື້​ຫຼາຍ​ຂຶ້ນ ຈາກ​ສິ່ງ​ອຳ­ນວຍ​ຄວາມ​ສະ­ດວກ​ຕ່າງໆ ໃນ​ນີ້​ບໍ­ລິ­ສັດ ສຸດ​ໃຈ​ທ່ອງ​ທ່ຽວ ກໍ​ໄດ້​ປະ­ກອບ­ສ່ວນ​ເຮັດ​ໜ້າ­ທີ່​ບໍ­ລິ­ການ​ນັກ​ທ່ອງ​ທ່ຽວ ຮ່ວມ​ເປັນ​ເຈົ້າ­ພາບ​ທີ່​ດີ​ຕ້ອນ­ຮັບ​ແຂກ​ດ້ວຍ​ຮອຍ​ຍິ້ມ​ແຈ່ມ​ໃສ ເຮັດ​ໃຫ້​ນັກ​ທ່ອງ​ທ່ຽວ​ມາ​ໃຊ້​ບໍ­ລິ­ການ​ລົດ​ທ່ອງ​ທ່ຽວ​ບໍ­ລິ­ສັດ​ຢ່າງ​ຫຼວງ­ຫຼາຍ ຍ້ອນ​ມີ​ພາ­ຫະ­ນະ​ພຽງ 35 ຄັນ ຈຶ່ງ​ບໍ່​ພຽງ­ພໍ​ເວ­ລາ​ນັກ​ທ່ອງ​ທ່ຽວ​ເຂົ້າ​ມາ​ຈຳ­ນວນ​ຫຼາຍ​ພ້ອມ​ກັນ ແລະ ປັດ­ຈຸ­ບັນ​ບໍ­ລິ­ສັດ​ກຳ­ລັງ​ຂໍ​ໂກ​ຕ້າ​ນຳ­ພາ​ກລັດ​ກ່ຽວ​ກັບ​ລົດ​ທ່ອງ​ທ່ຽວ ເພື່ອ​ຈະ​ໄດ້​ຮອງ​ຮັບ​ນັກ​ທ່ອງ​ທ່ຽວ​ໂອ­ກາດ​ເປີດ​ປີ​ທ່ອງ​ທ່ຽວ ລາວ-ຈີນ 2019 ເປັນ­ຕົ້ນ ກຽມ​ຄວາມ​ພ້ອມ​ດ້ານ​ການ​ບໍ­ລິ­ການ​ພາ­ຫະ­ນະ​ໃຫ້​ມີ​ຄວາມ​ສະ­ອາດ​ມີ​ຄວາມ​ປອດ​ໄພ ປັດ­ຈຸ­ບັນ ນັກ​ທ່ອງ​ທ່ຽວ​ຕ່າງ­ປະ­ເທດ​ທີ່​ມາ​ໃຊ້​ບໍ­ລິ­ການ​ບໍ­ລິ­ສັດ ສຸດ​ໃຈ​ທ່ອງ​ທ່ຽວ ຫຼາຍ​ກວ່າ​ໝູ່​ແມ່ນ ສປ ຈີນ ອັນ​ດັບ 2 ສ ເກົາ­ຫຼີ ອັນ​ດັບ 3 ເອີ​ຣົບ.

    ສຳ­ລັບ​ສິ່ງ​ທ້າ​ທາຍ​ແມ່ນ​ບັນ­ຫາ​ເສັ້ນ­ທາງ​ເປ່​ເພ ຈຶ່ງ​ບໍ່​ສະ­ດວກ​ໃນ​ການ​ໄປ-ມາ ເປັນ­ຕົ້ນ ເສັ້ນ­ທາງ 13 ເໜືອ​ແຕ່​ນະ­ຄອນ­ຫຼວງ​ວຽງ​ຈັນ​ໄປ-ເມືອງ​ວັງ​ວຽງ ແຂວງ​ວຽງ​ຈັນ ເຊິ່ງ​ເປັນ​ສະ­ຖານ­ທີ່​ທ່ອງ​ທ່ຽວ​ລະ­ດັບ​ຊາດ ທີ່​ນັກ​ທ່ອງ​ທ່ຽວ​ໃຫ້​ຄວາມ​ສົນ­ໃຈ​ຫຼາຍ​ກວ່າ​ໝູ່ ໃນ​ເວ­ລາ​ແຂກ​ຈະ​ມາ​ໃຊ້​ບໍ­ລິ­ການ​ເຂົາ­ເຈົ້າ ຈະ​ມັກ​ຖາມ​ເລື່ອງ​ຄວາມ​ສະ­ດວກ​ໃນ​ການ​ເດີນ­ທາງ​ໄປ​ຫາ​ແຫຼ່ງ​ທ່ອງ​ທ່ຽວ ເມື່ອ​ກ່ອນ​ເດີນ­ທາງ​ໄປ​ວັງ​ວຽງ​ໃຊ້​ເວ­ລາ 4 ຊົ່ວ­ໂມງ ແຕ່​ປັດ­ຈຸ­ບັນ​ໃຊ້​ເວ­ລາ 5 ຊົ່ວ­ໂມງ​ເຄິ່ງ.

    ເພື່ອ​ຮອງ​ຮັບ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ ໃນ​ໂອ­ກາດ​ປີ​ທ່ອງ​ທ່ຽວ ລາວ-ຈີນ 2019 ບໍ­ລິ­ສັດ​ໄດ້​ປັບ­ປຸງ​ຂອດ​ບໍ­ລິ­ການ ເພື່ອ​ໃຫ້​ນັກ​ທ່ອງ​ທ່ຽວ​ສາ­ມາດ​ເຂົ້າ​ຫາ​ໄດ້​ທຸກ​ຊ່ອງ​ທາງ ແລະ ວ່ອງ­ໄວ​ກວ່າ​ເກົ່າ ຈາກ​ຜ່ານ​ມາ​ໄດ້​ໃຊ້​ລະ­ບົບ​ອິນ​ເຕີ​ເນັດ ເຮັດ​ໃຫ້​ລູກ​ຄ້າ​ສາ­ມາດ​ເຂົ້າ​ຫາ​ຂໍ້​ມູນ​ງ່າຍ ແລະ ໃນ​ຕົ້ນ​ເດືອນ​ເມ­ສາ 2019 ຈະ​ເປີດ​ໃຊ້​ລະ­ບົບ​ແອບ​ພີ​ເຄ​ຊັນ​ຂອງ​ບໍ­ລິ­ສັດ ສຸດ​ໃຈ​ທ່ອງ​ທ່ຽວ ເຊິ່ງ​ລູກ​ຄ້າ​ສາ­ມາດ​ຊຳ­ລະ​ຜ່ານ​ທາງ​ທະ­ນາ­ຄານ ເປັນ­ຕົ້ນ ປີ້​ທົວ ຮ້ານ​ອາ­ຫານ ໂຮງ­ແຮມ ແລະ ອື່ນໆ.

ຂ່າວທີ່ກ່ຽວຂ້ອງ