ຮອງລັດຖະມົນຕີ ລົງຊຸກຍູ້ວຽກງານສາທາຢູ່ແຂວງຫຼວງນ້ຳທາ

247 28 ກ.ພ. 2019 ຂ່າວໜ້າ​ໜຶ່ງ
ຮອງລັດຖະມົນຕີ ລົງຊຸກຍູ້ວຽກງານສາທາຢູ່ແຂວງຫຼວງນ້ຳທາ

    ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ທັງ​ເປັນ​ປະ­ທານ​ຄະ­ນະ​ກຳ­ມະ­ການ​ປະ­ສານ​ງານ​ກອງ​ທຶນ​ໂລກ ພ້ອມ​ດ້ວຍ​ຄະ­ນະ ໄດ້​ລົງ​ຕິດ­ຕາມ​ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຕ້ານ​ເອດ ວັນ­ນະ​ໂຣກ ແລະ ໄຂ້­ຍຸງ ຢູ່​ແຂວງ​ຫຼວງ​ນ້ຳ​ທາ ໃນ​ວັນ​ທີ 18-21 ກຸມ­ພາ 2019 ໂດຍ​ສະ­ເພາະ ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ໂຄງ­ການ​ກອງ​ທຶນ​ໂລກ ໃນ​ສົກ​ປີ 2017-2018 ແລະ ທິດ​ທາງ​ແຜນ­ການ​ປີ 2019.

    ພາຍ­ຫຼັງ​ໄດ້​ຮັບ​ຟັງ​ລາຍ​ງານ​ຈາກ​ພະ​ແນກ​ສາ­ທາ­ລະ­ນະ​ສຸກ​ແຂວງ ຄະ­ນະ​ໄດ້​ລົງ​ຢ້ຽມ­ຢາມ​ສະ­ຖານ­ທີ່​ບໍ­ລິ­ການ ເປັນ­ຕົ້ນ ສຸກ­ສາ­ລາ​ບ້ານ​ທາດ ສຸກ­ສາ­ລາ​ຊຽງ​ກົກ ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ລອງ ໂຮງ­ໝໍ​ເມືອງ​ລອງ ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ສິງ ໂຮງ­ໝໍ​ເມືອງ​ສິງ ສຸກ­ສາ­ລາ​ກົກ​ມ່ວງ ສຸກ­ສາ­ລາ​ນ້ຳ​ດ້າຍ ໂຮງ­ໝໍ​ແຂວງ ແລະ ດ່ານ​ສາ­ກົນ​ບໍ່​ເຕັນ.

    ໂອ­ກາດ​ນີ້ ທ່ານ​ຮອງ​ລັດ­ຖະ­ມົນ­ຕີ ໄດ້​ໂອ້​ລົມ ແລະ ໃຫ້​ທິດ​ຊີ້​ນຳ ໂດຍ​ສະ­ເພາະ ການ­ຈັດ­ຕັ້ງ​ປະ­ຕິ­ບັດ 10 ຕົວ​ຊີ້​ວັດ​ສະ­ເພາະ​ຂອງ​ຂະ­ແໜງ­ການ​ສາ­ທາ­ລະ­ນະ​ສຸກ ທີ່​ສະ­ພາ​ແຫ່ງ​ຊາດ​ໄດ້​ຮັບ­ຮອງ ການ​ປະ­ຕິ­ບັດ​ຄຳ​ຂວັນ 5 ດີ 1 ພໍ­ໃຈ​ການ​ປະ­ຕິ­ບັດ 5 ຂອບ​ປະ­ຕິ​ຮູບ​ສາ­ທາ­ລະ­ນະ​ສຸກ ແລະ ການ​ຄວບ​ຄຸມ 17 ພະ­ຍາດ ສັງ​ລວມ​ຢູ່​ພາຍ​ໃນ 2 ເມືອງ​ນີ້ ເຫັນ​ວ່າ​ສະ­ພາບ​ການ​ພັດ­ທະ­ນາ​ວຽກ​ງານ​ສາ­ທາ­ລະ­ນະ​ສຸກ ມີ​ຜົນ­ສຳ­ເລັດ​ຫຼາຍ​ດ້ານ ຢູ່​ໃນ​ທິດ​ທາງ​ດຽວ​ກັນ ທີ່​ຕິດ​ພັນ​ກັບ 8 ແຜນ​ງານ​ຂອງ​ກະ­ຊວງ​ສາ­ທາ­ລະ­ນະ​ສຸກ​ໃນ​ຂົງ­ເຂດ 17 ພະ­ຍາດ ໃນ​ນັ້ນ ອັດ­ຕາ​ຜູ້​ຕິດ­ເຊື້ອ​ເຮ​ສ​ໄອ​ວີ ແລະ ໄຂ້­ຍຸງ ມີ​ຈຳ­ນວນ​ຫຼຸດ​ໜ້ອຍ​ຖອຍ​ລົງ​ຫຼາຍ ໃນ​ຂະ­ນະ​ທີ່​ການ​ຊອກ​ຄົ້ນ ແລະ ເຂົ້າ​ເຖິງ​ການ​ປິ່ນ­ປົວ​ວັນ­ນະ​ໂຣກ​ເພີ່ມ​ຂຶ້ນ ເຮັດ​ໃຫ້​ຕັດ​ຕ່ອງ​ໂສ້​ການ​ຕິດ­ແປດ ແລະ ການ​ເກີດ​ເປັນ​ພະ­ຍາດ​ໃໝ່​ຫຼຸດ​ລົງ ໃນ​ປີ­ຜ່ານ­ມາ ການ​ບໍ­ລິ­ການ​ສຸ­ຂະ­ພາບ​ທັງ 2 ເມືອງ ເຫັນ​ວ່າ​ປະ­ຊາ­ຊົນ​ຜູ້​ທຸກ​ຍາກ​ດ້ອຍ​ໂອ­ກາດ ຊົນ​ຊາດ​ຊົນ­ເຜົ່າ​ສາ­ມາດ​ເຂົ້າ​ເຖິງ​ການ​ບໍ­ລິ­ການ​ໄດ້​ເປັນ​ຢ່າງ​ດີ ແຕ່​ເຖິງ​ຢ່າງ­ໃດ​ກໍ​ຕາມ ຍັງ​ມີ​ສິ່ງ​ທ້າ​ທາຍ​ບາງ​ດ້ານ ເປັນ­ຕົ້ນ ການ​ຄົ້ນ​ຫາ​ຜູ້​ຕິດ­ເຊື້ອ ຍັງ​ບໍ່​ສາ­ມາດ​ເຂົ້າ​ເຖິງ​ຈຳ­ນວນ​ໜຶ່ງ ເຮັດ​ໃຫ້​ບໍ່​ສາ­ມາດ​ບັນ­ລຸ​ຕາມ​ເປົ້າ​ໝາຍ​ທີ່​ວາງ​ໄວ້ ເນື່ອງ​ຈາກ​ມີ​ງົບ­ປະ­ມານ​ຈຳ­ກັດ ເສັ້ນ­ທາງ​ຄົມ­ມະ­ນາ­ຄົມ​ຍັງ​ບໍ່​ສະ­ດວກ ແລະ ພະ­ນັກ­ງານ​ມີ​ການ​ສັບ​ປ່ຽນ​ໜ້າ­ທີ່​ຢູ່​ເລື້ອຍໆ ດັ່ງ­ນັ້ນ ປີ 2019 ຈະ​ຕ້ອງ​ໄດ້​ສູ້​ຊົນ​ໃຫ້​ບັນ­ລຸ​ຕາມ​ເປົ້າ​ໝາຍ​ທີ່​ວາງ​ໄວ້.

ຂ່າວທີ່ກ່ຽວຂ້ອງ