ຂ່າວຫຼ້າສຸດ

ຈັນທະບູລີ-ນາຊາຍທອງ ເຊື່ອມຊຶມສອງເອກະສານສຳຄັນ

332 28 ກ.ພ. 2019 ຂ່າວໜ້າ​ໜຶ່ງ
ຈັນທະບູລີ-ນາຊາຍທອງ ເຊື່ອມຊຶມສອງເອກະສານສຳຄັນ

    ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ (ນວ) ຈັດ​ເຊື່ອມ​ຊຶມ ແລະ ຜັນ​ຂະ­ຫຍາຍ​ມະ­ຕິ 7 ສະ­ໄໝ​ທີ X ຂອງ​ສູນ​ກາງ​ພັກ​ໃຫ້​ສະ­ມາ­ຊິກ​ພັກ ແລະ ພະ­ນັກ­ງານ-ວິ­ຊາ​ການ ພາຍ​ໃນ​ເມືອງ​ໃນ​ວັນ​ທີ 26 ກຸມ­ພາ 2019 ທີ່​ສູນ​ການ​ຄ້າ​ທົ່ງ​ຂັນ​ຄຳ ໂດຍ​ເປັນ​ປະ­ທານ​ຂອງ​ສະ­ຫາຍ​ນາງ ບົວ​ລອນ ວົງ​ດາ­ລາ​ແສນ ເລ­ຂາ​ພັກ​ເມືອງ ເຈົ້າ­ເມືອງ​ຈັນ­ທະ​ບູ​ລີ ມີ​ຄະ­ນະ​ປະ­ຈຳ​ພັກ ຄະ­ນະ​ພັກ ຫົວ­ໜ້າ ຮອງ​ຫົວ­ໜ້າ​ຫ້ອງ­ການ ກຳ­ລັງ​ປ້ອງ​ກັນ​ຊາດ ປ້ອງ​ກັນ​ຄວາມ​ສະ­ຫງົບ ສະ­ມາ­ຊິກ​ພັກ ແລະ ເລ­ຂາ​ພັກ​ບ້ານ​ເຂົ້າ​ຮ່ວມ.

    ເອ­ກະ­ສານ​ທີ່​ນຳ​ມາ​ເຊື່ອມ​ຊຶມ​ຄັ້ງ​ນີ້ ປະ­ກອບ​ມີ​ເອ­ກະ­ສານ ມະ­ຕິ​ວ່າ​ດ້ວຍ​ເພີ່ມ​ທະ­ວີ​ການ​ແກ້​ໄຂ​ຄວາມ​ຫຍຸ້ງ­ຍາກ ດ້ານ​ເສດ­ຖະ­ກິດ-ການ​ເງິນ ແລະ ສ້າງ​ຄວາມ​ເຂັ້ມ­ແຂງ​ຂອງ​ການ​ຄຸ້ມ​ຄອງ​ມະ­ຫາ​ພາກ ສະ­ເໜີ​ໂດຍ​ສະ­ຫາຍ ອາ­ນຸ­ພາບ ຕຸ​ນາ​ລົມ ກຳ­ມະ­ການ​ສູນ​ກາງ​ພັກ ຮອງ​ເລ­ຂາ​ຄະ­ນະ​ພັກ ປະ­ທານ​ສະ­ພາ​ປະ­ຊາ­ຊົນ ນວ ເຊິ່ງ​ໄດ້​ຍົກ​ໃຫ້​ເຫັນ​ສະ­ພາບ​ຄວາມ​ຫຍຸ້ງ­ຍາກ​ດ້ານ​ເສດ­ຖະ­ກິດ-ການ​ເງິນ ແລະ ບັນ­ດາ​ສາ­ເຫດ​ຕົ້ນ­ຕໍ ທິດ​ທາງ ແລະ ມາດ​ຕະ­ການ​ແກ້​ໄຂ.

    ສ່ວນ​ມະ­ຕິ​ວ່າ​ດ້ວຍ​ການ​ປັບ­ປຸງ​ຮາກ​ຖານ​ການ­ເມືອງ ຂອງ​ລະ­ບອບ​ປະ­ຊາ­ທິ­ປະ­ໄຕ​ປະ­ຊາ­ຊົນ​ໃຫ້​ເຂັ້ມ­ແຂງ ແລະ ໜັກ​ແໜ້ນ ສະ­ເໜີ​ໂດຍ​ສະ­ຫາຍ ສີ​ຫຸນ ສິດ­ທິ​ລື​ໄຊ ຮອງ​ເລ­ຂາ​ຄະ­ນະ​ພັກ ຮອງ​ເຈົ້າ​ຄອງ ນວ ໄດ້​ຍົກ​ໃຫ້​ເຫັນ​ສະ­ພາບ​ຄວາມ​ເປັນ​ຈິງ​ຂອງ​ຮາກ​ຖານ​ການ­ເມືອງ​ໃນ​ປັດ­ຈຸ­ບັນ ທັດ­ສະ­ນະ​ພື້ນ­ຖານ ແລະ ທິດ​ທາງ​ໜ້າ­ທີ່​ກ່ຽວ​ກັບ​ການ​ປັບ­ປຸງ​ຮາກ​ຖານ​ການ­ເມືອງ​ໃນ­ຕໍ່­ໜ້າ ທັງ​ນີ້ ແນ­ໃສ່​ເຮັດ​ໃຫ້​ສະ­ມາ­ຊິກ​ພັກ ແລະ ພະ­ນັກ­ງານ-ວິ­ຊາ​ການ ກໍ​ຄື ອຳ­ນາດ​ການ​ປົກ­ຄອງ​ພາຍ​ໃນ​ເມືອງ​ຈັນ­ທະ​ບູ​ລີ ໄດ້​ຮັບ​ຮູ້ ແລະ ເຂົ້າ­ໃຈ​ກ່ຽວ​ກັບ​ມະ­ຕິ 7 ສະ­ໄໝ​ທີ X ຂອງ​ສູນ​ກາງ​ພັກ ເພື່ອ​ເປັນ​ບ່ອນ​ອີງ​ໃນ​ການ​ນຳ­ໄປ​ປັບ­ປຸງ​ແບບ­ແຜນ​ວິ­ທີ ເຮັດ​ວຽກ​ໃນ​ຂົງ­ເຂດ​ຂອງ​ຕົນ​ໃຫ້​ຖືກ­ຕ້ອງ ແລະ ສອດ­ຄ່ອງ​ຕາມ​ແນວ­ທາງ​ແຜນ​ນະ­ໂຍ­ບາຍ​ຂອງ​ພັກ-ລັດ ວາງ​ອອກ ນຳ­ໄປ​ໜູນ​ໃຊ້​ເຂົ້າ​ໃນ​ວຽກ​ງານ​ຕົວ​ຈິງ​ໃຫ້​ມີ​ປະ­ສິດ­ທິ­ພາບ​ສູງ​ຂຶ້ນ.

    ພ້ອມ​ນີ້ ວັນ​ທີ 27 ກຸມ­ພາ 2019 ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ໄດ້​ຈັດ​ເຊື່ອມ​ຊຶມ ແລະ ຜັນ​ຂະ­ຫຍາຍ​ມະ­ຕິ 7 ສະ­ໄໝ​ທີ X ຂອງ​ສູນ​ກາງ​ພັກ ໃຫ້​ສະ­ມາ­ຊິກ​ພັກ ແລະ ພະ­ນັກ­ງານ-ວິ­ຊາ​ການ​ພາຍ​ໃນ​ເມືອງ​ຂຶ້ນ ທີ່​ປົກ­ຄອງ​ເມືອງ​ນາ​ຊາຍ​ທອງ ໃຫ້​ກຽດ​ເຜີຍ­ແຜ່​ໂດຍ​ສະ­ຫາຍ ອຸ­ດອນ ໄຊ​ມົນ­ຕີ ຄະ­ນະ​ປະ­ຈຳ​ພັກ ຮອງ​ປະ­ທານ​ສະ­ພາ​ປະ­ຊາ­ຊົນ ນວ ຫົວ­ໜ້າ​ໂຮງ­ຮຽນ​ການ­ເມືອງ ແລະ ການ​ປົກ­ຄອງ ນວ.

ຂ່າວທີ່ກ່ຽວຂ້ອງ