ໂຄງການຂະຫຍາຍນ້ຳປະປາ ເຮັດໃຫ້ປະຊາຊົນ 2 ພັນກວ່າຄອບຄົວ ໄດ້ຊົມໃຊ້ນ້ຳສະອາດ

271 28 ກ.ພ. 2019 ຂ່າວໜ້າ​ໜຶ່ງ
ໂຄງການຂະຫຍາຍນ້ຳປະປາ ເຮັດໃຫ້ປະຊາຊົນ 2 ພັນກວ່າຄອບຄົວ ໄດ້ຊົມໃຊ້ນ້ຳສະອາດ

    ໂຄງ­ການ​ຂະ­ຫຍາຍ-ປັບ­ປຸງ​ລະ­ບົບ​ຄຸ້ມ​ຄອງ​ນ້ຳ​ປະ­ປາ ນະ­ຄອນ­ຫຼວງ​ວຽງ​ຈັນ (ນວ) ໄດ້​ກໍ່­ສ້າງ​ມາ​ແຕ່​ວັນ​ທີ 15 ເມ­ສາ 2017 ເປັນ­ຕົ້ນ​ມາ ຮອດ​ປັດ­ຈຸ­ບັນ​ສຳ­ເລັດ 100% ພິ­ທີ​ມອບ-ຮັບ​ໄດ້​ຈັດ​ຂຶ້ນ​ວັນ​ທີ 27 ກຸມ­ພາ 2019 ທີ່​ລັດ​ວິ​ສາ​ຫະ​ກິດ​ນ້ຳ​ປະ­ປາ ນວ ສາ­ຂາ​ເມືອງ​ນາ​ຊາຍ​ທອງ ລະ­ຫວ່າງ​ບໍ­ລິ­ສັດ ນໍ​ຣິນ​ໂກ້ ແລະ ລັດ​ວິ​ສາ​ຫະ​ກິດ​ນ້ຳ​ປະ­ປາ ນວ ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ​ຮອງ​ລັດ­ຖະ­ມົນ­ຕີ ບັນ­ດາ​ເຈົ້າ­ເມືອງ ຫົວ­ໜ້າ​ພະ​ແນກ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຕົງ ຈີ້ ເຟີງ ຜູ້​ຊ່ວຍ​ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ ນໍ​ຣິນ​ໂກ້ (NORINCO) ກ່າວ​ວ່າ: ໂຄງ­ການ​ນ້ຳ​ປະ­ປາ ນວ ເປັນ​ໜ້າ­ທີ່​ທາງ​ຍຸດ​ທະ​ສາດ​ທີ່​ສຳ­ຄັນ ກ່ຽວ​ພັນ​ເຖິງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ສຳ­ລັບ​ໂຄງ­ການ​ລວມ​ມີ​ກໍ່­ສ້າງ​ທໍ່​ນ້ຳ​ໃໝ່​ມີ​ຄວາມ​ຍາວ 427 ກິ­ໂລ­ແມັດ ປ່ຽນ​ທໍ່​ນ້ຳ​ເກົ່າ​ມີ​ຄວາມ​ຍາວ 152 ກິ­ໂລ­ແມັດ ກໍ່​ອ່າງ­ເກັບ­ນ້ຳ​ໃໝ່ 3 ແຫ່ງ ແລະ ໂຮງ­ງານ​ນ້ຳ​ຊົນ­ນະ­ບົດ 2 ແຫ່ງ ສ້າງ​ອາ­ຄານ​ນ້ອຍ​ສຳ­ລັບ​ເຮັດ​ວຽກ​ໃຫ້​ບໍ­ລິ­ສັດ​ນ້ຳ​ສະ­ອາດ 8 ແຫ່ງ ແລະ ສະ­ໜອງ​ໂມງ​ວັດ­ແທກ​ລະ­ດັບ​ນ້ຳ ລວມ​ກຳ­ລັງ​ແຮງ​ໃນ​ການ​ສົ່ງ​ນ້ຳ­ຂອງ​ໂຄງ­ການ 30.000 ແມັດ​ກ້ອນ​ຕໍ່​ວັນ ຜູ້​ຊົມ­ໃຊ້​ປະ­ມານ 230.000 ຄົນ ພາຍ­ຫຼັງ​ທີ່​ໄດ້​ນຳ​ໃຊ້​ຈະ​ສະ­ໜອງ​ນ້ຳ​ທີ່​ສະ­ອາດ ແລະ ປອດ​ໄພ​ຕາມ​ມາດ­ຕະ­ຖານ​ຂອງ​ອົງ­ການ​ສຸ​ຂະ​ນາ​ໄມ​ໂລກ ປັບ­ປຸງ​ຄຸນ​ນະ​ພາບ​ຊີ­ວິດ​ຂອງ​ປະ­ຊາ­ຊົນ​ໃນ ນວ ພ້ອມ​ກັນ​ນັ້ນ ໂຄງ­ການ​ຍັງ​ເປັນ​ໂຄງ​ສ້າງ​ພື້ນ­ຖານ​ທີ່​ສຳ­ຄັນ​ຂອງ ນວ ເຊິ່ງ​ໄດ້​ນຳ​ໃຊ້​ລະ­ບົບ​ການ​ຕິດ­ຕາມ​ກວດ­ກາ​ຂອງ​ໂຮງ­ງານ​ນ້ຳ​ສະ­ອາດ ຕິດ­ຕາມ​ກວດ­ກາ​ການ​ຄວບ​ຄຸມ​ລະ­ບົບ​ເຄືອ​ຄ່າຍ​ຂອງ 4 ໂຮງ­ງານ​ນ້ຳ​ທີ່​ມີ​ຢູ່​ໃນ ນວ ແລະ ເພີ່ມ​ປະ­ສິດ­ທິ­ພາບ​ຂອງ​ການ​ຄຸ້ມ​ຄອງ​ນ້ຳ​ສະ­ອາດ.

    ທ່ານ ຄໍ​ເຜີຍ ວົງ­ສາ​ຄຳ​ຜຸຍ ຜູ້­ອຳ­ນວຍ­ການ​ໃຫຍ່​ລັດ​ວິ​ສາ​ຫະ​ກິດ​ນ້ຳ​ປະ­ປາ ນວ ກ່າວ​ວ່າ: ໂຄງ­ການ​ນີ້ ນຳ​ໃຊ້​ເງິນ​ກູ້​ຢືມ​ດອກ​ເບ້ຍ​ຕ່ຳ​ຈາກ​ຈີນ (NORINCO) ລວມ​ມູນ​ຄ່າ​ປະ­ມານ 850 ຕື້​ກີບ ຫຼື 100 ລ້ານ​ໂດ​ລາ​ສະ­ຫະ­ລັດ ປະ­ກອບ​ມີ 7 ໜ້າ​ວຽກ​ຫຼັກ​ຄື: ຂະ­ຫຍາຍ​ລະ­ບົບ​ທໍ່​ສົ່ງ ແລະ ທໍ່​ແຈກ​ທີ່​ມີ​ຂະ­ໜາດ​ແຕ່ 63-700 ມິ​ລີ​ແມັດ ມີ​ຄວາມ​ຍາວ 427 ກິ­ໂລ­ແມັດ ກວມ​ເອົາ​ພື້ນ​ທີ່​ຂອງ​ເມືອງ​ນາ​ຊາຍ​ທອງ ໄຊ​ທາ­ນີ ແລະ ໄຊ​ເຊດ​ຖາ ປັບ­ປຸງ ແລະ ປ່ຽນ​ຖ່າຍ​ລະ­ບົບ​ທໍ່​ເກົ່າ​ຂະ­ໜາດ​ທໍ່ 63-700 ມິ​ລີ​ແມັດ ມີ​ຄວາມ​ຍາວ 152 ກິ­ໂລ­ແມັດ ໃນ​ເຂດ​ພື້ນ​ທີ່​ເມືອງ​ສີ​ໂຄດ​ຕະ­ບອງ ຈັນ­ທະ​ບູ​ລີ ແລະ ໄຊ​ທາ­ນີ ກໍ່­ສ້າງ​ອ່າງ​ນ້ຳ​ສູງ 3 ແຫ່ງ ຢູ່​ເມືອງ​ນາ​ຊາຍ​ທອງ ໄຊ​ທາ­ນີ ຂະ­ໜາດ​ບັນ­ຈຸ 1.000 ແມັດ​ກ້ອນ ແລະ 1.500 ແມັດ​ກ້ອນ​ຕາມ​ລຳ­ດັບ ກໍ່­ສ້າງ​ລະ­ບົບ​ນ້ຳ​ປະ­ປາ​ຂະ­ໜາດ​ນ້ອຍ (ຂະ­ໜາດ 1.000 ແມັດ​ກ້ອນ​ຕໍ່​ວັນ ແລະ 1.500 ແມັດ​ກ້ອນ​ຕໍ່​ວັນ) ຢູ່​ບ້ານ​ນາ­ລ້ອງ ເມືອງ​ຫາດ​ຊາຍ​ຟອງ ແລະ ບ້ານ​ໂຄກ​ແຫ້ ເມືອງ​ສັງ​ທອງ ເຊິ່ງ​ຈະ​ເຮັດ​ໃຫ້​ປະ­ຊາ­ຊົນ​ໄດ້​ຊົມ­ໃຊ້​ນ້ຳ​ປະ­ປາ​ຫຼາຍ​ກວ່າ 2.233 ຄອບ­ຄົວ.

    ນອກ​ນັ້ນ​ຍັງ​ໄດ້​ກໍ່­ສ້າງ​ອາ­ຄານ​ຫ້ອງ­ການ​ຂອງ​ສາ­ຂາ ແລະ ປັບ­ປຸງ​ປ່ອງ​ບໍ­ລິ­ການ​ຂອງ 4 ເມືອງ​ໃນ 5 ຫ້ອງ­ການ​ຄື: ເມືອງ​ໄຊ​ທາ­ນີ ຈັນ­ທະ​ບູ​ລີ ສີ​ໂຄດ​ຕະ­ບອງ ຫາດ​ຊາຍ​ຟອງ ແລະ ປ່ອງ​ບໍ­ລິ­ການ​ຈັນ​ສະ­ຫວ່າງ ກໍ່­ສ້າງ ແລະ ຕິດ​ຕັ້ງ​ລະ­ບົບ​ຄວບ​ຄຸມ​ທັນ​ສະ­ໄໝ​ຢູ່​ຫ້ອງ­ການ​ໃຫຍ່​ໂພນ​ເຄັງ (SCADA) ແລະ ສະ­ໜອງ​ອຸ­ປະ­ກອນ ແລະ ກົງ​ເຕີ​ນ້ຳ 20.000 ct (ພວມ​ຢູ່​ໃນ​ຂັ້ນ​ຕອນ​ການ​ຕິດ​ຕັ້ງ).

    ສຳ­ລັບ​ໂຄງ­ການ​ຂະ­ຫຍາຍ-ປັບ­ປຸງ​ລະ­ບົບ​ຄຸ້ມ​ຄອງ​ນ້ຳ​ປະ­ປາ​ຢູ່​ລັດ​ວິ​ສາ​ຫະ​ກິດ​ນ້ຳ​ປະ­ປາ ນວ ສາ­ຂາ​ເມືອງ​ນາ​ຊາຍ​ທອງ ຈະ​ສາ­ມາດ​ສະ­ໜອງ​ນ້ຳ​ປະ­ປາ​ໃຫ້​ປະ­ຊາ­ຊົນ​ເຂດ​ເມືອງ​ນາ​ຊາຍ​ທອງ ແລະ ບໍ­ລິ­ເວນ​ໃກ້​ຄຽງ​ໄດ້​ຫຼາຍ​ກວ່າ 85.000 ຄົນ ໄດ້​ມີ​ລະ­ບົບ​ນ້ຳ​ປະ­ປາ​ຊົມ­ໃຊ້​ກວມ​ເອົາ​ຫຼາຍ​ບ້ານ ເຊິ່ງ​ບ້ານ​ສຸດ​ທ້າຍ​ແມ່ນ​ເຂດ​ຊາຍ​ແດນ​ລະ­ຫວ່າງ ນວ ແລະ ແຂວງ​ວຽງ​ຈັນ ບ້ານ​ນາ​ດີ ຕາມ​ສາຍ​ທາງ​ເລກ​ທີ 13 ເໜືອ ກໍ່​ສາ­ມາດ​ຕິດ​ຕັ້ງ​ກົງ​ເຕີ​ນ້ຳ​ປະ­ປາ​ໄດ້.

ຂ່າວທີ່ກ່ຽວຂ້ອງ