ຜູ້​ແທນ​ຂັ້ນ​ສູງ​ເຢຍ​ລະ​ມັນ ຢ້ຽມຢາມ​ວິທະຍາໄລ​ເຕັກນິກ​ລາວ-ເຢຍ​ລະ​ມັນ

184 01 ມີ.ນ. 2019 ຂ່າວໜ້າ​ໜຶ່ງ
ຜູ້​ແທນ​ຂັ້ນ​ສູງ​ເຢຍ​ລະ​ມັນ ຢ້ຽມຢາມ​ວິທະຍາໄລ​ເຕັກນິກ​ລາວ-ເຢຍ​ລະ​ມັນ

     ວັນ​ທີ 28 ກຸມພາ 2019 ທ່ານ Norbert Barthle ເລຂາທິການ​ລັດ​ຖະ​ສະພາ ປະທານ​ຄະນະ​ກຳມະການ  ການ​ຮ່ວມ​ມື​ເສດຖະກິດ ແລະ ການ​ພັດທະນາ ສ ເຢຍ​ລະ​ມັນ ພ້ອມ​ຄະນະ ໄດ້​ໄປ​ຢ້ຽມຢາມ​ວິທະຍາໄລ​ເຕັກນິກ​ລາວ-ເຢຍ​ລະ​ມັນ ໃຫ້​ກຽດ​ຕ້ອນຮັບ​ຄະນະ​ຜູ້​ແທນ​ດັ່ງກ່າວ​ໂດຍ​ທ່ານ ກອງ​ສີ ແສງ​ມະນີ ຮອງ​ລັດຖະມົນຕີ ກະຊວງ​ສຶກ​ສາ​ທິ​ການ ແລະ ກີລາ ມີ​ຫົວໜ້າ​ກົມ​ອາຊີວະ​ສຶກ​ສາ ຜູ້ອຳນວຍການ​ວິທະຍາໄລ​ເຕັກນິກ​ລາວ-ເຢຍ​ລະ​ມັນ ພ້ອມ​ພະນັກງານ-ຄູ ອາຈານ ແລະ ນັກ​ສຶກ​ສາ.

    ທ່ານ ກອງ​ສີ ແສງ​ມະນີ ໄດ້​ສະແດງ​ຄວາມ​ຂອບໃຈ ແລະ ຮູ້​ບຸນຄຸນ​ເປັນ​ຢ່າງ​ສູງ​ຕໍ່​ລັດຖະບານ ແລະ ປະຊາຊົນ​ເຢຍ​ລະ​ມັນ ທີ່​ໄດ້​ໃຫ້ການ​ສະໜັບສະໜູນ​ພັດທະນາ​ວຽກ​ງານ​ອາຊີວະ​ສຶກ​ສາ ລັດຖະບານ ​ສປປ ລາວ ກໍ​ຄື ກະ ຊວງ​ສຶກ​ສາ​ທິ​ການ ແລະ ກີລາ ໄດ້​ຕີ​ລາຄາ​ສູງ​ຕໍ່​ຜົນງານ ແລະ ການ​ຊ່ວຍເຫຼືອ​ຂອງ​ລັດຖະບານ ສ ເຢຍ​ລະ​ມັນ    ໂດຍ​ມີ​ທະນາຄານ​ພັດທະນາ​ເຢຍ​ລະ​ມັນ (KfW) ແລະ ອົງການ​ຮ່ວມ​ມື​ທາງ​ດ້ານ​ເຕັກນິກ​ເຢຍ​ລະ​ມັນ(GIZ) ຮ່ວມ​ກັບ​ພາກສ່ວນ​ທີ່​ກ່ຽວຂ້ອງ​ຂອງ​​ສປປ ລາວ ຈັດ​ຕັ້ງ​ປະຕິບັດ​ໂຄງການ.

    ລັດຖະບານ​ເຢຍ​ລະ​ມັນ ໄດ້​ໃຫ້ການ​ສະໜັບສະໜູນ ​ສປປ ລາວ ໃນ​ຮູບ​ແບບ​ການ​ຮ່ວມ​ມື​ສອງ​ຝ່າຍ​ນັບ​ແຕ່​ປີ 1963 ມີ​ທັງ​ການ​ຮ່ວມ​ມື​ທາງ​ດ້ານ​ການ​ເງິນ ແລະ ການ​ຮ່ວມ​ມື​ທາງ​ດ້ານ​ເຕັກນິກ ໃນ​ປີ 2018 ຜ່ານ​ມາ ລັດ​ຖະ ບານ​ເຢຍ​ລະ​ມັນ​ໄດ້​ໃຫ້ການ​ຊ່ວຍເຫຼືອ​ລ້າ​ແກ່​ລັດຖະບານ​ລາວ ມູນ​ຄ່າ 50 ລ້ານ​ເອີ​ໂຣ ໃນ​ນັ້ນ ການ​ຮ່ວມ​ມື​ທາງ​ດ້ານ​ການ​ເງິນ​ຈຳນວນ 30 ລ້ານ​ເອີ​ໂຣ ແລະ ການ​ຮ່ວມ​ມື​ທາງ​ດ້ານ​ເຕັກນິກ ຈຳນວນ 20 ລ້ານ​ເອີ​ໂຣ ເພື່ອ​ມາ​ພັດທະນາ​ບັນດາ​ຂະແໜງການ​ຕ່າງໆ ໃນ​ນັ້ນ ກໍ​ມີ​ຂະແໜງ​ອາຊີວະ​ສຶກ​ສາ.

    ໃນ​ໂອກາດ​ນີ້ ທ່ານ Norbert Barthle ໄດ້​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ​ຂອງ​ວິທະຍາໄລ​ເຕັກນິກ​ລາວ-ເຢຍ​ລະ​ມັນ ເຊິ່ງ​ຜົນງານ​ດັ່ງກ່າວ​ເປັນ​ສັນ​ຍາ​​​ລັກ​ແຫ່ງ​ການ​ພົວພັນ​ຮ່ວມ​ມື ແລະ ຜົນສຳເລັດ​ຂອງ​ສອງ​ປະເທດ ສ ເຢຍ​ລະ​ມັນ ແລະ ​ສປປ ລາວ ເຮັດ​ໃຫ້​ວິທະຍາໄລ​ເຕັກນິກ​ລາວ-ເຢຍ​ລະ​ມັນ ເປັນ​ວິທະຍາໄລ​ຕົວ​ແບບ ສາມາດ​ນຳໄປ​ຜັນ​ຂະຫຍາຍ​ໃຫ້​ສະ​ຖາ​ບັນ​ການ​ສຶກ​ສາ​ອື່ນໆ​ໃນ ​ສປປ ລາວ.

    ວິທະຍາໄລ​ເຕັກນິກ​ລາວ-ເຢຍ​ລະ​ມັນ ໄດ້​ສ້າງຕັ້ງ​ຂຶ້ນ​ໃນ​ປີ 1964 ໂດຍ​ການ​ສະໜັບສະໜູນ​ຈາກ​ລັດຖະບານ​ເຢຍ​ລະ​ມັນ ຕະຫຼອດ​ໃນ​ໄລຍະ 6 ທົດ​ສະ​ວັດ​ຜ່ານ​ມາ ລັດຖະບານ​ເຢຍ​ລະ​ມັນ​ໄດ້​ໃຫ້ການ​ສະໜັບສະໜູນ​ທາງ​ດ້ານ​ການ​ເງິນ​ຢ່າງ​ຫຼວງຫຼາຍ ເພື່ອ​ເຮັດ​ໃຫ້​ວິທະຍາໄລ​ດັ່ງກ່າວ​ເປັນ​ວິທະຍາໄລ​ຊັ້ນ​ນຳ​ຂອງ​ສາຍ​ອາຊີວະ​ສຶກ​ສາ​ໃນ ​ສປປ ລາວ ປັດຈຸບັນ ວິທະຍາໄລ​ແຫ່ງ​ນີ້​ໄດ້​ມີ​ການ​ພັດທະນາ​ດີ​ຂຶ້ນ​ເທື່ອ​ລະ​ກ້າວ ສາມາດ​ສ້າງ​ກຳລັງ​ແຮງ​ງານ​ລາວ​ໄດ້​ທັງ​ປະລິມານ ແລະ ຄຸນ​ນະ​ພາບ ມາ​ຮອດ​ປັດຈຸບັນ​ມີ​ນັກຮຽນ-ນັກ​ສຶກ​ສາ​ທີ່​ຈົບ​ຈາກ​ວິທະຍາໄລ​ດັ່ງກ່າວ​ຫຼາຍ​ກວ່າ 10 ພັນ​ຄົນ.

ຂ່າວທີ່ກ່ຽວຂ້ອງ