ລ້ານ​ຊ້າງ​ປະກັນ​ໄພ ສືບຕໍ່​ຊ່ວຍເຫຼືອ​ສ້າງ​ໂຮງຮຽນ ໃຫ້​ເມືອງ​ສັງ​ທອງ

241 01 ມ.ນ. 2019 ຂ່າວໜ້າ​ໜຶ່ງ
ລ້ານ​ຊ້າງ​ປະກັນ​ໄພ ສືບຕໍ່​ຊ່ວຍເຫຼືອ​ສ້າງ​ໂຮງຮຽນ ໃຫ້​ເມືອງ​ສັງ​ທອງ

     ບໍລິສັດ ລ້ານ​ຊ້າງ​ປະກັນ​ໄພ ມະຫາຊົນ ຮ່ວມ​ກັບ ກອງ​ທຶນ​ມູນ​ນິທິ​ວັດທະນະທຳ​ດີ​ບີ​ຄິມ​ຈຸນ​ກິ  (ສ ເກົາຫຼີ) ໄດ້​ກໍ່ສ້າງ ອາຄານ​ຮຽນ​ໂຮງຮຽນ​ອະນຸບານ ສ້າງ​ສະຖານທີ່​ຫຼິ້ນ​ໃຫ້​ເດັກ ແລະ ສ້ອມແປງ​ອາຄານ​ຮຽນ​ໃຫ້​ໂຮງຮຽນ​ປະຖົມ​ຫ້ວຍ​ຕົມ ເມືອງ​ສັງ​ທອງ ນະຄອນຫຼວງ​ວຽງ​ຈັນ ພ້ອມ​ທັງ​ມອບ​ອຸປະກອນ​ການ​ສຶກ​ສາ​ມູນ​ຄ່າ​ເກືອບ 400 ລ້ານ​ກີບ​ໃຫ້​ເມືອງ​ສັງ​ທອງ ພິທີ​ມອບ?ຮັບ​ໄດ້​ຈັດ​ຂຶ້ນ​ວັນ​ທີ 28 ກຸມພາ 2019 ກ່າວ​ມອບ​ໂດຍ​ທ່ານ ໂດ໋ ດັງ​ຄ່າງ ອຳນວຍ​ການ​ໃຫຍ່​ບໍລິສັດ ລ້ານ​ຊ້າງ​ປະກັນ​ໄພ ມະຫາຊົນ ແລະ ກ່າວ​ຮັບ​ໂດຍ​ທ່ານ​ນາງ ແກ້ວ ພົມ​ມະ​ລາດ ຮອງ​ເຈົ້າເມືອງ​ສັງ​ທອງ ມີ​ຜູ້ຕາງໜ້າ​ຈາກ​ພະ​ແນກ​ສຶກ​ສາ​ທິ​ການ ແລະ ກີລາ ນະຄອນຫຼວງ​ວຽງ​ຈັນ ຫ້ອງການ​ສຶກ​ສາ​ທິ​ການ ແລະ ກີລາ ເມືອງ​ສັງ​ທອງ ອຳນາດ​ການ​ປົກຄອງ​ບ້ານ ຄະນະ​ອຳນວຍ​ການ ພະນັກງານ​ຄູ?ອາຈານ ພະນັກງານ​ບໍລິສັດ ແລະ ນັກຮຽນ​ເຂົ້າ​ຮ່ວມ.

   ສຳລັບ​ໂຄງການ​ສ້ອມແປງ​ອາຄານ​ເກົ່າ​ໂຮງຮຽນ​ປະຖົມ​ຂະໜາດ​ກວ້າງ 8 ແມັດ ຍາວ 42 ແມັດ ມີ 6 ຫ້ອງ​ຮຽນ ໄດ້​ປ່ຽນ​ຖ່າຍ​ໂຄງ​ຫຼັງຄາ ຕິດ​ເພດານ ພ້ອມ​ພັດ​ລົມ ເທ​ພື້ນ ແລະ ດຶງ​ໄຟຟ້າ​ເຂົ້າ​ອາຄານ​ຮຽນ ສ່ວນ​ໂຄງການ​ກໍ່ສ້າງ​ໂຮງຮຽນ​ອະນຸບານ​ເລີ່ມ​ວັນ​ທີ 27 ທັນວາ 2018 ແລະ ສຳເລັດ​ວັນ​ທີ 27 ກຸມພາ 2019 ອາຄານ​ມີ​ຂະໜາດ​ກວ້າງ 8 ແມັດ ຍາວ 15 ແມັດ ມີ 2 ຫ້ອງ​ຮຽນ ໃນ​ນີ້​ໄດ້​ປະກອບ​ອຸປະກອນ​ຄົບ​ຊຸດ.

    ທ່ານ ໂດ໋ ດັງ​ຄ່າງ ກ່າວ​ວ່າ: ພວກ​ເຮົາ​ໄດ້​ມີ​ຫຼາຍ​ໂຄງການ​ອາສາ​ສະໝັກ​ໃນ​ໄລຍະ​ຜ່ານ​ມາ ກັບ​ແນວທາງ​ທຸລະ​ກິດ​ປະກັນ​ໄພ​ເພື່ອ​ປະຊາຊົນ ເຊິ່ງ​ຄັ້ງ​ນີ້​ໄດ້​ເລືອກ​ເອົາ​ໂຮງຮຽນ​ປະຖົມ​ຫ້ວຍ​ຕົມ ເຊິ່ງ​ເປັນ​ສະຖານທີ່​ມີ​ພື້ນຖານ​ໂຄງ​ລ່າງ​ຍັງ​ພົບ​ຄວາມ​ຫຍຸ້ງຍາກ​ຫຼາຍ​ບັນຫາ ເພື່ອ​ເປັນ​ການ​ແບ່ງປັນ ແລະ ຊ່ວຍເຫຼືອ ລ້ານ​ຊ້າງ​ປະກັນ​ໄພ ແລະ ກອງ​ທຶນ​ມູນ​ນິທິ​ວັດທະນະທຳ​ດີ​ບີ​ຄິມ​ຈຸນ​ກິ ຕ້ອງການ​ນຳ​ເອົາ​ຄວາມ​ຮັກ ແລະ ຄວາມ​ເຫັນໃຈ​ມາສູ່​ປະຊາຊົນ ແລະ ນັກຮຽນ​ນັກ​ສຶກ​ສາ​ໃນ​ທຸກ​ພື້ນ​ທີ່​ທຸກ​ຍາກ ພິເສດ​ຄັ້ງ​ນີ້​ມີ​ນັກ​ສຶກ​ສາ​ຈາກ ສ ເກົາຫຼີ 20 ຄົນ ແລະ ນັກ​ສຶກ​ສາ​ຈາກ​ມະຫາວິທະຍາໄລ​ແຫ່ງ​ຊາດ​ລາວ 10 ຄົນ ເພື່ອ​ທາສີ ປູກ​ຕົ້ນໄມ້​ໃຫ້​ສອງ​ຫ້ອງ​ຮຽນ​ທີ່​ຫາກໍ່​ສຳເລັດ​ການ​ກໍ່ສ້າງ ເພື່ອ​ເພີ່ມ​ຄວາມ​ສົດໃສ​ງາມ​ຕາ ແລະ ເພີ່ມ​ທັກ​ສະ ກໍ​ຄື ໄດ້​ຈັດ​ກິດຈະກຳ​ຮ່ວມ​ກັບ​ນັກຮຽນ ຜ່ານ​ການເຄື່ອນໄຫວ​ຂອງ​ນັກ​ສຶກ​ສາ 2 ປະເທດ​ໄດ້​ມີ​ໂອກາດ​ເກັບ​ກ່ຽວ​ປະສົບ​ການ​ດຳລົງ​ຊີວິດ ສົນທະນາ ແລະ ຮຽນ​ຮູ້​ເຊິ່ງ​ກັນ ແລະ ກັນ.

    ທ່ານ ບຸນ​ຮຽງ ສຸລິນ​ທາ ອຳນວຍ​ການ​ໂຮງຮຽນ​ປະຖົມ​ຫ້ວຍ​ຕົມ ກ່າວ​ວ່າ: ໂຮງຮຽນ​ປະຖົມ​ຫ້ວຍ​ຕົມ ເປັນ​ກຽດ​ຮັບ​ເອົາ​ນ້ຳໃຈ​ຊ່ວຍເຫຼືອ​ຈາກ ບໍລິສັດ ລ້ານ​ຊ້າງ​ປະກັນ​ໄພ ແລະ ກອງ​ທຶນ​ມູນ​ນິທິ​ວັດທະນະທຳ​ດີ​ບີ ຄິມ​ຈຸນ​ກິ ນັ້ນ​ແມ່ນ​ໂຮງຮຽນ​ລ້ຽງ​ເດັກ​ຈຳນວນ​ໜຶ່ງ​ຫຼັງ​ກວ້າງຂວາງ​ສວຍ​ງາມ ເຊິ່ງ​ຂອງຂວັນ​ລ້ຳ​ຄ່າ​ນີ້​ບໍ່​ພຽງ​ແຕ່​ຊ່ວຍ​ໃຫ້​ຄູ​ອາຈານ​ຫຼຸດຜ່ອນ​ຄວາມ​ຫຍຸ້ງຍາກ​ມີ​ກຳລັງ​ໃຈ​ສິດສອນ ແລະ ຊ່ວຍ​ດຶງ​ດູດ​ໃຫ້​ນັກຮຽນ​ເອົາໃຈໃສ່​ຕໍ່​ການ​ຮ່ຳຮຽນ ສຳລັບ​ສົກຮຽນ 2018?2019 ໂຮງຮຽນ​ປະຖົມ​ຫ້ວຍ​ຕົມ​ມີ 6 ຫ້ອງ ມີ​ນັກຮຽນ 102 ຄົນ ນັກຮຽນ​ສ່ວນ​ຫຼາຍ​ມາ​ຈາກ​ຄອບຄົວ​ທຸກ​ຍາກ ມີ​ສະພາບ​ແວດ​ລ້ອມ​ທີ່​ພົບ​ຄວາມ​ຫຍຸ້ງຍາກ​ພື້ນຖານ​ໂຄງ​ລ່າງ ອຸປະກອນ​ການ​ສຶກ​ສາ​ຂອງ​ນັກຮຽນ​ຍັງ​ຂາດເຂີນ​ຫຼາຍ​ຢ່າງ ບໍ່​ມີ​ໄຟຟ້າ ເຮັດ​ໃຫ້​ໂຮງຮຽນ​ພົບ​ກັບ​ຫຼາຍ​ຂໍ້​ຫຍຸ້ງຍາກ​ໃນ​ການ​ສິດສອນ.

ຂ່າວທີ່ກ່ຽວຂ້ອງ