ຂ່າວຫຼ້າສຸດ

ຖວ​​ທ ສີ​ສັດຕະ​ນາກ ຕ້ອງ​ຫັນ​ວຽກ​ງານເຂົ້າ​ສູ່​ລະບຽບ​ຫຼັກການ​ໜັກ​ແໜ້ນ​ກວ່າ​ເກົ່າ

184 01 ມີ.ນ. 2019 ຂ່າວໜ້າ​ໜຶ່ງ
ຖວ​​ທ ສີ​ສັດຕະ​ນາກ ຕ້ອງ​ຫັນ​ວຽກ​ງານເຂົ້າ​ສູ່​ລະບຽບ​ຫຼັກການ​ໜັກ​ແໜ້ນ​ກວ່າ​ເກົ່າ

   ກອງ​ປະຊຸມ​ສະຫຼຸບ​ວຽກ​ງານ​ຫ້ອງການ ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ເມືອງ​ສີ​ສັດຕະ​ນາກ ປະຈຳ​ປີ 2018 ແລະ ທິດ​ທາງ​ແຜນການ​ປີ 2019 ຈັດ​ຂຶ້ນ​ວັນ​ທີ 27 ກຸມພາ 2019 ໂດຍ​ມີ​ທ່ານ ໂພ​ຄຳ ໄຊ​ຍະ​ສອນ ເຈົ້າເມືອງ​ສີ​ສັດຕະ​ນາກ ທ່ານ ຄຳ​ປະດິດ ເຂັມ​ມານິດ ຫົວໜ້າ​ພະ​ແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນະຄອນຫຼວງ​ພ້ອມ​ດ້ວຍ ທ່ານ​ຮອງ​ເຈົ້າເມືອງ ຫົວໜ້າ​ຫ້ອງການ ຖວ​​ທ ເມືອງ ບັນດາ​ຫົວໜ່ວຍ​ທຸລະ​ກິດ ຮ້ານ​ບໍລິການ ແຂກ​ຖືກ​ເຊີນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ທ່ານ ຂັນແກ້ວ ສິມ​ມະ​ລີ ຫົວໜ້າ​ຫ້ອງການ ຖວ​​ທ ເມືອງ​ສີ​ສັດຕະ​ນາກ ກ່າວ​ວ່າ: ຜ່ານ​ການຈັດຕັ້ງ​ປະຕິບັດ​ວຽກ​ງານ ໃນ​ປີຜ່ານມາ ສາມາດ​ຍາດ​ແຍ່ງ​ຜົນງານ​ມາ​ໄດ້​ຫຼາຍ​ດ້ານ ໂດຍ​ອີງໃສ່​ຈຸດ​ພິເສດ​ທີ່​ຕັ້ງ​ຂອງ​ຫ້ອງການ ທີ່​ມີ​ສຳນັກງານ​ອົງການ ສະ​ຖາ​ບັນ​ການ​ສຶກ​ສາ ລວມ​ທັງ​ຫ້າງ​ຮ້ານ​ຜູ້​ປະກອບ​ການ​ບໍລິການ​ເປັນ​ຈຳນວນ​ຫຼາຍ ເຮັດ​ໃຫ້​ມີ​ທັງ​ຂໍ້​ສະດວກ ແລະ ຂໍ້​ຫຍຸ້ງຍາກ​ໃນ​ການ​ຄຸ້ມ​ຄອງ ແຕ່​ດ້ວຍ​ຄວາມ​ເອົາໃຈໃສ່​ໃກ້ຊິດຕິດແທດ ຊີ້​ນຳ​ຈາກ​ຂັ້ນ​ເທິງ ເຮັດ​ໃຫ້​ສາມາດ​ດຳເນີນ​ວຽກ​ງານ​ຜ່ານ​ຜ່າ​ຂໍ້​ຫຍຸ້ງຍາກ​ມາ​ໄດ້.

    ຜົນງານ​ຕົວ​ຈິງ​ໃນ​ໄລຍະ​ຜ່ານ​ມາ ສາມາດ​ບັນລຸ​ແຜນການ​ວຽກ​ງານ​ຈຸດ​ສຸມ​ໃນ​ການ​ປະກອບສ່ວນ​ປີ​ທ່ອງ​ທ່ຽວ​ລາວ 2018 ສືບຕໍ່​ປະກອບສ່ວນ​ວຽກ​ງານ​ຂະ​ບວນ​ການ ປີ​ທ່ອງ​ທ່ຽວ​ລາວ?ຈີນ 2019 ຢ່າງ​ເປັນ​ຂະ​ບວນ ໂດຍ​ສະເພາະ ເອົາໃຈ ໃສ່​ຕິດຕາມ​ຄຸ້ມ​ຄອງ​ວຽກ​ງານ​ຂອດ​ບໍລິການ ລົງ​ຊຸກຍູ້​ວຽກ​ງານ​ກວດກາ​ຈັດ​ສັນ​ຄວາມ​ບໍ່​ເປັນ​ລະບຽບ​ຮຽບ​ຮ້ອຍ​ພາຍ​ໃນ​ເມືອງ ໄດ້​ສົມທົບ​ກັບ​ພະ​ແນກ ຖວ​​ທ ນວ ລົງ​ກວດກາ​ຮ້ານ​ບັນເທີງ?ຄາ​ລາ​ໂອ​ເກະ ຈຳນວນ 3 ຄັ້ງ ພ້ອມ​ກັບ​ການ​ລົງ​ຊຸກຍູ້​ສະ​ຖາ​ບັນ​ການ​ສຶກ​ສາ​ພາຍ​ໃນ​ເມືອງ ໃນ​ການ​ສົ່ງເສີມ​ສິລະ​ປະ​ວັນນະຄະດີ ປົກ​ປັກ​ຮັກສາ​ສິລະ​ປະ ວັດທະນະທຳ ຮີດຄອງ​ປະເພນີ​ອັນ​ດີງາມ​ຂອງ​ຊາດ ພິເສດ​ໄດ້​ຈັດ​ເຝິກອົບຮົມ​ພິທີການ​ຕ່າງໆ ລວມ​ທັງ​ການ​ເຝິກອົບຮົມ​ລຳວົງ​ມາດຕະຖານ ໃຫ້​ຫ້ອງການ​ອ້ອມ​ຂ້າງ ແລະ 37 ບ້ານ ພາຍ​ໃນ​ເມືອງ ແລະ ວຽກ​ງານ​ອື່ນໆ​ອີກ​ຫຼາຍ​ດ້ານ.

    ສ່ວນ​ທິດ​ທາງ​ແຜນການ 2019 ມີ​ຫຼາຍ​ວຽກ​ງານ​ຈະ​ຕ້ອງ​ໄດ້​ສືບຕໍ່​ຈັດ​ຕັ້ງ​ປະຕິບັດ ໂດຍ​ສະເພາະ ໃນ​ການ​ຊຸກຍູ້ ແລະ ສ້າງ​ເງື່ອນໄຂ​ອຳນວຍ​ຄວາມ​ສະດວກ ໃນ​ການ​ປະຕິບັດ​ໂຄງການ​ສ້າງ​ຄອບຄົວ​ວັດທະນະທຳ ສືບຕໍ່​ຕິດຕາມ​ກວດກາ​ບັນດາ​ຫົວໜ່ວຍ​ທຸລະ​ກິດ​ວັດທະນະທຳ​ພາຍ​ໃນ​ເມືອງ​ໃຫ້​ທົ່ວ​ເຖິງ ສົ່ງ​ແຈ້ງ​ການ​ກ່ຽວ​ກັບ​ການ​ອອກ​ອະນຸຍາດ ໃຫ້​ບັນດາ​ຫົວໜ່ວຍ​ທຸລະ​ກິດ​ພາຍ​ໃນ​ເມືອງ ພ້ອມ​ລົງ​ກວດກາ​ເຮັດ​ບົດ​ບັນທຶກ​ຮ້ານ​ອາຫານ ຮ້ານ​ກິນ​ດື່ມ ພາຍ​ໃນ​ເມືອງ​ທີ່​ມາ​ຂໍອະນຸຍາດ​ສຶບ​ຕໍ່ ແລະ ສ້າງ​ໃໝ່​ໃນ​ປີ 2018 ໃຫ້​ສຳເລັດ ກອງ​ປະຊຸມ​ໃນ​ຄັ້ງ​ນີ້ ຍັງ​ໄດ້​ເປີດ​ໂອກາດ​ໃຫ້​ບັນດາ​ຜູ້​ເຂົ້າ​ຮ່ວມ​ໄດ້​ຮ່ວມ​ກັນ​ປະກອບ​ຄຳ​ຄິດ​ຄຳ​ເຫັນ ໃສ່​ບົດ​ສະຫຼຸບ​ວຽກ​ງານ ຂອງ ຖວ​​ທ ເມືອງ.

    ໂອກາດ​ນີ້ ທ່ານ​ຫົວໜ້າ​ພະ​ແນກ ຖວ​​ທ ນວ ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ການ​ປະກອບສ່ວນ​ຈັດ​ຕັ້ງ​ປະຕິບັດ​ວຽກ​ງານ ຖວ​​ທ ຂອງ​ເມືອງ​ໃນ​ໄລຍະ​ຜ່ານ​ມາ ໂດຍ​ສະເພາະ ການ​ປະກອບສ່ວນ​ເຂົ້າ​ໃນ​ວຽກ​ງານ​ຂະ​ບວນ​ການ​ປີ​ທ່ອງ​ທ່ຽວ​ລາວ 2018 ແລະ ປີ​ທ່ອງ​ທ່ຽວ ລາວ?ຈີນ 2019 ຢ່າງ​ມີ​ໝາກຜົນ​ອັນ​ຈົບງາມ ແຕ່​ໄປ​ຄຽງ​ຄູ່​ກັບ​ຜົນງານ​ນັ້ນ ຍັງ​ມີ​ບາງ​ຈຸດ​ທີ່​ຈະ​ຕ້ອງ​ໄດ້​ເພີ່ມ​ທະວີ​ໃນ​ການ​ເອົາໃຈໃສ່​ປັບປຸງ​ແກ້​ໄຂ ໃນ​ຫຼາຍ​ຂອດ​ວຽກ​ງານ​ທີ່​ຍັງ​ບໍ່​ທັງ​ຈອດ​ກັນ ໂດຍ​ສະເພາະ​ໃນ​ການ​ເອົາໃຈໃສ່​ຈັດ​ຕັ້ງ​ຜັນ​ຂະຫຍາຍ​ລະບຽບ​ຫຼັກການ ແລະ ບາງ​ເນື້ອ​ໃນ​ທາງ​ດ້ານ​ນິຕິ​ກຳ ກ່ຽວ​ກັບ​ວຽກ​ງານ​ທ່ອງ​ທ່ຽວ ວັດທະນະທຳ ແລະ ການ​ບໍລິການ ຍັງ​ເຫັນ​ວ່າ​ບໍ່​ທັນ​ຈະແຈ້ງ​ເຂັ້ມ​ງວດ​ເທົ່າ​ທີ່​ຄວນ ຍັງ​ມີ​ຊ່ອງ​ວ່າງ​ໃນ​ການຈັດຕັ້ງ​ປະຕິບັດ ເພື່ອ​ຮັບປະກັນ​ໃຫ້​ແກ່​ວຽກ​ງານ​ດັ່ງກ່າວ ຮຽກຮ້ອງ​ໃຫ້​ຄະນະ​ຮັບຜິດຊອບ ຕ້ອງ​ເຂັ້ມ​ງວດ ແລະ ປະສານ​ສົມທົບ​ກັບ​ໜ່ວຍ​ງານ​ທີ່​ກ່ຽວຂ້ອງ ເພື່ອ​ປັບປຸງ​ແກ້​ໄຂ​ວຽກ​ງານ​ດັ່ງກ່າວ​ໃຫ້​ຖືກຕ້ອງ​ສອດຄ່ອງ​ຕາມ​ທິດ​ທາງ ແຜນ​ນະໂຍບາຍ ລະບຽບ​ກົດ ໝາຍ​ຂອງ​ລັດ​ວາງ​ອອກ ປະກອບສ່ວນ​ເສີມ​ຂະຫຍາຍ​ທ່າແຮງ​ເຮັດ​ໃຫ້​ວຽກ​ງານ ຖວ​​ທ ໄດ້​ຮັບ​ການ​ພັດທະນາ​ດີ​ຂຶ້ນ​ກວ່າ​ເກົ່າ.

ຂ່າວທີ່ກ່ຽວຂ້ອງ