ສ້າງ​ຫ້ອງ​ກວດ​ສອບ​ຄຸນ​ນະ​ພາບ​ເຄື່ອງໃຊ້​ໄຟຟ້າ ແລະ ເອ​ເລັກ​ໂຕຣ​ນິກ

392 01 ມ.ນ. 2019 ຂ່າວໜ້າ​ໜຶ່ງ
ສ້າງ​ຫ້ອງ​ກວດ​ສອບ​ຄຸນ​ນະ​ພາບ​ເຄື່ອງໃຊ້​ໄຟຟ້າ ແລະ ເອ​ເລັກ​ໂຕຣ​ນິກ

    ພິທີ​ເປີດ​ຫ້ອງ​ກວດ​ສອບ​ຄຸນ​ນະ​ພາບ​ເຄື່ອງໃຊ້​ໄຟຟ້າ ແລະ ເຄື່ອງ​ເອ​ເລັກ​ໂຕຣ​ນິກ​ທີ່​ນຳ​ເຂົ້າ​ຈຳໜ່າຍ ແລະ ຜະລິດ​ຢູ່​ລາວ ປະຈຳ​ສາງ​ທ່າ​ນາ​ແລ້ງ ເມືອງ​ຫາດ​ຊາຍ​ຟອງ ນະຄອນຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 26 ກຸມພາ 2019 ມີ​ທ່ານ ບໍ່​ວຽງ​ຄຳ ວົງ​ດາລາ ລັດຖະມົນຕີ​ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ທັງ​ເປັນ​ປະທານ​ສະພາ​ວິທະຍາສາດ​ແຫ່ງ​ຊາດ ມີ​ບັນດາ​ຮອງ​ລັດຖະມົນຕີ ຫົວໜ້າ​ກົມ ພະແນກການ​ພາກສ່ວນ​ກ່ຽວຂ້ອງ  ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ ວຽງ​ທອງ ວົງ​ທະວິ​ໄລ ຫົວໜ້າ​ກົມ​ມາດຕະຖານ ແລະ ວັດແທກ ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ກ່າວ​ວ່າ: ການ​ເປີດ​ຫ້ອງ​ກວດ​ສອບ​ຄຸນ​ນະ​ພາບ​ເຄື່ອງໃຊ້​ໄຟຟ້າ ແລະ ເຄື່ອງ​ເອ​ເລັກ​ໂຕຣ​ນິກ​ຄັ້ງ​ນີ້ ເພື່ອ​ສ້າງ​ຄວາມ​ເຂັ້ມແຂງ​ໃຫ້​ແກ່​ພື້ນຖານ​ຄຸນ​ນະ​ພາບ​ແຫ່ງ​ຊາດ ກໍ​ຄື ການ​ເພີ່ມ​ທະວີ​ວຽກ​ງານ​ການ​ກວດກາ​ມາດຕະຖານ ແລະ ກວດ​ສອບ​ຄຸນ​ນະ​ພາບ​ເຄື່ອງໃຊ້​ໄຟຟ້າ ແລະ ເຄື່ອງ​ເອ​ເລັກ​ໂຕຣ​ນິກ ໃຫ້​ມີ​ຄວາມ​ເຂັ້ມແຂງ ນອກ​ນີ້ ຍັງ​ເປັນ​ສ່ວນ​ໜຶ່ງ​ໃນ​ການ​ສ້າງ​ຄວາມ​ເຊື່ອ​ໝັ້ນ​ດ້ານ​ຄຸນ​ນະ​ພາບ​ຜະລິດ​ຕະ​ພັນ​ເຄື່ອງໃຊ້​ໄຟຟ້າ ແລະ ເຄື່ອງ​ເອ​ເລັກ​ໂຕຣ​ນິກ​ໃຫ້​ແກ່​ຜູ້​ບໍລິໂພກ​ກໍ​ຄື ຜູ້​ຊົມໃຊ້.

    ພ້ອມ​ດຽວ​ກັນ​ນີ້ ການ​ສ້າງ​ຫ້ອງ​ກວດ​ສອບ​ຍັງ​ເປັນ​ການ​ເລັ່ງ​ໃສ່​ເພື່ອ​ຕອບ​ສະໜອງ​ນະໂຍບາຍ​ຂອງ​ລັດຖະບານ​ໃນ​ການ​ສ້າງ​ພື້ນຖານ​ໂຄງ​ລ່າງ​ດ້ານ​ຄຸນ​ນະ​ພາບ​ແຫ່ງ​ຊາດ ສະໜອງ​ການ​ບໍລິການ​ກວດ​ສອບ​ຄຸນ​ນະ​ພາບ​ເຄື່ອງໃຊ້​ໄຟຟ້າ ແລະ ເຄື່ອງ​ເອ​ເລັກ​ໂຕຣ​ນິກ​ໃຫ້​ກັບ​ສັງຄົມ ເພີ່ມ​ລາຍ​ຮັບ​ແຫ່ງ​ຊາດ ສ້າງ​ລາຍ​ຮັບ​ໃຫ້​ລັດຖະບານ​ຈາກ​ການ​ເກັບ​ຄ່າ​ກວດ​ສອບ​ຄຸນ​ນະ​ພາບ ແລະ ກວດ​ສອບ​ອື່ນໆ​ທີ່​ກ່ຽວຂ້ອງ ຊ່ວຍ​ປົກ​ປ້ອງ​ສິດຜົນປະໂຫຍດ​ຂອງ​ຜູ້​ຊົມໃຊ້​ໃຫ້​ໄດ້​ນຳ​ໃຊ້​ສິນຄ້າ​ທີ່​ດີ ມີ​ຄຸນ​ນະ​ພາບ ຄາ​ລາ​ຍຸຕິ​ທຳ ຕອບ​ສະໜອງ​ການ​ສະກັດ​ກັ້ນ​ການ​ນຳ​ເຂົ້າ​ຜະລິດ​ຕະ​ພັນ ແລະ ສິນຄ້າ​ທີ່​ບໍ່​ໄດ້​ຄຸນ​ນະ​ພາບ ແລະ ບໍ່​ສອດຄ່ອງ​ກັບ​ມາດຕະຖານ ທີ່​ກຳນົດ​ໄວ້​ໃນ​ມາດຕະຖານ​ແຫ່ງ​ຊາດ​ພາກ​ພື້ນ ແລະ ສາກົນ.

ຂ່າວທີ່ກ່ຽວຂ້ອງ