ຫົວ​ເຫວີຍ ນຳ​ສະເໜີ​ຜະລິດ​ຕະ​ພັນ ແລະ ການ​ບໍລິການ 5G

242 04 ມ.ນ. 2019 ຂ່າວໜ້າ​ໜຶ່ງ
ຫົວ​ເຫວີຍ ນຳ​ສະເໜີ​ຜະລິດ​ຕະ​ພັນ ແລະ ການ​ບໍລິການ 5G

    ກອງ​ປະຊຸມ MWC (Mobile World Congress ຈັດ​ຂຶ້ນ​ວັນ​ທີ 25 ກຸມພາ 2019 ຢູ່​ບາ​ເຊ​ໂລ​ນາ ປະເທດ​ແອັດ​ສະ​ປາຍ ເຊິ່ງ​ຫົວ​ເຫວີຍ​ໄດ້​ຈັດ​ງານ​ວາງສະແດງ ແລະ ສຳ​ມະ​ນາ​ແລກປ່ຽນ​ຄວາມ​ຄິດ​ເຫັນ​ກັນ​ຢ່າງ ກວ້າງຂວາງ​ກັບ​ລູກ​ຄ້າ ແລະ ຄູ່​ຮ່ວມ​ມື​ຈາກ​ທົ່ວ​ໂລກ ພາຍ​ໃຕ້​ຫົວຂໍ້ "ສ້າງ​ການ​ເຊື່ອມ​ຕໍ່​ກັບ​ໂລກ​ອັດ​ສະ​ຣິ​ຍະ​ຢ່າງ​ທົ່ວ​ເຖິງ ແລະ ເຕັມ​ຮູບ​ແບບ" ຫົວ​ເຫວີຍ​ໄດ້​ມຸ່ງ​ໝັ້ນ​ຊ່ວຍ​ການ​ຂະຫຍາຍ​ຂອບ​ເຂດ​ທຸລະ​ກິດ ແລະ ການ​ເຕີບ​ໂຕ​ໃໝ່ ຂອງ​ຜູ້​ໃຫ້​ບໍລິການ​ໂທລະ​ຄົມ ໂດຍ​ຜ່ານ​ການ​ນະ​ວັດຕະ​ກຳ​ໃນ​ເຄືອ​ຂ່າຍ​ການ​ບໍລິການ ແລະ ຮູບ​ແບບ​ດຳເນີນ​ທຸລະ​ກິດ.

    ຫົວ​ເຫວີຍ ໄດ້​ນຳ​ສະເໜີ​ຜະລິດ​ຕະ​ພັນ ແລະ ການ​ບໍລິການ 5G ແບບ End-to-End ເຊັ່ນ: 5G ໄຊທ໌ ແບບ Simplified (Simplified 5G Sites) ໂຄງ​ສ້າງ​ການ​ກຳນົດ​ຮູບ​ແບບ​ການ​ເຊື່ອມ​ຕໍ່​ເຄືອ​ຂ່າຍ (Protocols) ແລະ ການ​ດຳເນີນ​ງານ ແລະ ການ​ບຳລຸງ​ຮັກສາ (O&M) ຜະລິດ​ຕະ​ພັນ ແລະ ການ​ບໍລິການ​ໃໝ່ ຈະ​ຊ່ວຍ​ຜູ້​ໃຫ້ ບໍລິການ​ໂທລະ​ຄົມ​ສາມາດ​ຂະຫຍາຍ​ເຄືອ​ຂ່າຍ 5G ຂະໜາດ​ໃຫຍ່​ດ້ວຍ​ປະ​ສິດທິ​ຜົນ​ສູງ.

      ຍຸກ 5G ໄດ້​ມາ​ຮອດ​ແລ້ວ ແລະ ປັນ­ຍາ​ປະ­ດິດ (AI) ກໍ​ໄດ້​ກາຍ­ເປັນ​ເຕັກ​ໂນ​ໂລ​ຊີ​​ທີ່​ໄດ້​ນຳ​ໃຊ້​ທົ່ວ​ໄປ ມວນ​ມະ­ນຸດ ແລະ ນະ​ວັດ­ຕະ​ກຳ​ຈະ​ສືບ­ຕໍ່​ພັດ­ທະ­ນາ ແລະ ຊຸກ­ຍູ້​ດ້ວຍ​ຄວາມ​ກ້າວ­ໜ້າ​ໃນ​ວິ­ທະ­ຍາ­ສາດ ແລະ ເຕັກ ໂນ​ໂລ​ຊີ ໂລກ​ທີ່​ອັດ​ສະ​ຣິ​ຍະ​ໃນ​ອະ­ນາ­ຄົດ​ຈະ​ເປັນ "ໝູ່​ບ້ານ​ດິ​ຈິ​ຕອນ" ທີ່​ທຸກ​ຄົນ​ເຊື່ອມ​ຕໍ່​ຢ່າງ​ໃກ້­ຊິດ.

      ທ່ານ ທັນ​ສະ­ໄໝ ກົມ​ມະ​ສິດ ລັດ­ຖະ­ມົນ­ຕີ ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ ພ້ອມ​ຄະ­ນະ ໄດ້​ເຂົ້າ​ຮ່ວມ ແລະ ຢ້ຽມ­ຢາມ​ບັນ­ດາ​ການ­ສະ­ແດງ​ເຕັກ​ໂນ​ໂລ​ຊີ​ໃໝ່​ຢູ່​ຫໍ​ວາງ­ສະ­ແດງ​ຂອງ​ຫົວ​ເຫວີຍ ໃນ​ກອງ​ປະ­ຊຸມ GSMA Mobile World Congress ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ James Wu ປະ­ທານ​ບໍ­ລິ­ສັດ​ຫົວ​ເຫວີຍ​ພາກ​ພື້ນ​ອາ­ຊີ​ຕາ­ເວັນ​ອອກ­ສຽງ​ໃຕ້ ທ່ານ Mark Wang ຜູ້­ອຳ­ນວຍ­ການ​ໃຫຍ່ ບໍ­ລິ­ສັດ ຫົວ​ເຫວີຍ​ເຕັກ​ໂນ​ໂລ​ຢີ (ລາວ) ຈຳ­ກັດ​ຜູ້​ດຽວ.

     ໂອ­ກາດ​ນີ້ ກໍ​ໄດ້​ແນະ­ນຳ​ຜົນ​ປະ­ຕິ­ບັດ​ງານ​ຂອງ​ຫົວ​ເຫວີຍ​ຢູ່​ທົ່ວ​ໂລກ ແລະ ຢູ່​ປະ­ເທດ​ລາວ​ໃນ​ປີ 2018 ຈາກ​ນັ້ນ ກໍ​ໄດ້​ສົນ­ທະ­ນາ​ກັນ​ກ່ຽວ​ກັບ​ການ​ພັດ­ທະ­ນາ 5G ຢູ່​ລາວ​ໃນ​ອະ­ນາ­ຄົດ ຫົວ​ເຫວີຍ​ເຊື່ອ​ວ່າ​ຍຸກ 5G ກຳ­ລັງ​ມາ​ຮອດ ແລະ ມັນ​ຈະ​ຊ່ວຍ​ການ​ເຕີບ​ໂຕ​ດ້ານ​ເສດ­ຖະ­ກິດ ແລະ ປັບ­ປຸງ​ຊີ­ວິດ​ຂອງ​ປະ­ຊາ­ຊົນ ຕາມ​ຄວາມ​ເໝາະ​ສົມ ນອກ​ນີ້ ຍັງ​ໄດ້​ແບ່ງ­ປັນ​ຄວາມ​ຄິດ​ເຫັນ​ກ່ຽວ​ກັບ​ການ​ປະ­ຕິ­ບັດ​ນະ­ໂຍ­ບາຍ ແລະ ກົດ­ໝາຍ ທີ່​ກ່ຽວ­ຂ້ອງ ເພື່ອ​ປັບ­ປຸງ ສະ­ພາບ​ແວດ​ລ້ອມ​ການ​ດຳ­ເນີນ​ທຸ­ລະ​ກິດ​ຂອງ​ການ​ພັດ­ທະ­ນາ​ຕະ­ຫຼາດ​ໂທລະ​ຄົມ ເພື່ອ​ເປັນ​ການ​ຊຸກ­ຍູ້​ໃຫ້​ບໍ­ລິ­ສັດ ໂທລະ​ຄົມ​ລົງ­ທຶນ​ເພີ່ມ​ເຕີມ​ເພື່ອ​ຍົກ​ລະ­ດັບ​ຄຸນ​ນະ​ພາບ​ຂອງ​ການ​ບໍ­ລິ­ການ​ແກ່​ລູກ​ຄ້າ.    

ຂ່າວທີ່ກ່ຽວຂ້ອງ