ຂ່າວຫຼ້າສຸດ

ງານ​ບຸນມະໂຫລານ​ສົ່ງເສີມ​ການ​ອ່ານ​ຈັດ​ຂຶ້ນ​ອາທິດ​ນີ້

173 04 ມີ.ນ. 2019 ຂ່າວໜ້າ​ໜຶ່ງ
ງານ​ບຸນມະໂຫລານ​ສົ່ງເສີມ​ການ​ອ່ານ​ຈັດ​ຂຶ້ນ​ອາທິດ​ນີ້

   ງານ​ບຸນມະໂຫລານ​ສົ່ງເສີມ​ການ​ອ່ານ ນະຄອນຫຼວງ​ວຽງ​ຈັນ (ນວ) ຄັ້ງ​ທີ I ຈະ​ໄດ້​ຈັດ​ຂຶ້ນ​ວັນ​ທີ 7-17 ມີນາ 2019 ທີ່​ສູນ​ການ​ຄ້າ​ສາກົນ (World Trade Centre) ໃກ້​ກັບ​ສູນ​ການ​ຄ້າ​ວຽງ​ຈັນ​ເຊັນ​ເຕີ ນວ ພາຍ​ໃນ​ງານ​ມີ​ການວາງສະແດງ​ສື່​ສິ່ງ​ພິມ​ຕ່າງໆ ເປັນຕົ້ນ ປຶ້ມ​ອ່ານ ຖາມ-ຕອບ​ຄວາມ​ຮູ້​ຮອບ​ຕົວ​ສຳລັບ​ນັກຮຽນ ກີລາ​ຕ່າງໆ ແຈກ​ຢາຍ​ປຶ້ມ​ໃຫ້ການ​ນຳ​ພັກ-ລັດ ແລະ ໂຮງຮຽນ​ທົ່ວ ນວ ພ້ອມ​ທັງ​ຈະ​ໄດ້​ພົບ​ກັບ​ນັກ​ຂຽນ ນັກ​ແຕ່ງ ແລະ ນັກ​ເວົ້າ​ທີ່​ມີ​ປະສົບ​ການ​ສູງ​ຈາກ​ພາຍ​ໃນ ແລະ ຕ່າງປະເທດ.

    ງານ​ດັ່ງກ່າວ​ຈັດ​ຂຶ້ນ​ເພື່ອ​ລະດົມ​ໃຫ້​ຄົນ​ລາວ​ເລັງ​ເຫັນ​ເຖິງ​ຄວາມ​ສຳຄັນ​ຂອງ​ການ​ອ່ານ ແລະ ສົ່ງເສີມ​ໃຫ້​ອ່ານໜັງສື​ຢ່າງ​ຕໍ່​ເນື່ອງ ລວມ​ເຖິງ​ການ​ຊ່ວຍເຫຼືອ​ຂອງ​ພໍ່​ແມ່​ຜູ້​ປົກຄອງ ຄູ ແລະ ບັນດາ​ລັກ ຮັບ​ຮູ້ ແລະ ມີ​ຄວາມ​ເຂົ້າໃຈ​ເຕັກນິກ​ວິທີ​ການ​ສົ່ງເສີມ​ການ​ອ່ານ​ແກ່​ເດັກ ແລະ ເຍົາວະ​ຊົນ​ຢ່າງ​ເໝາະ​ສົມ ແລະ ໄດ້ຜົນ ນອກ​ນີ້ ຍັງ​ໄດ້​ເປີດ​ໂອກາດ​ໃຫ້​ຄົນ​ລາວ​ໄດ້​ສຳຜັດ​ກັບ​ປຶ້ມ​ຈາກ​ນາໆຊາດ ເພື່ອ​ເປີດ​ໂລ​ກະທັດ ແລະ ເບິ່ງ​ເຫັນ​ການ​ພັດທະນາ​ອຸດສາຫະກຳ​ປຶ້ມ​ໃນ​ຕ່າງປະເທດ ແລະ ຂະນະ​ດຽວ​ກັນ​ກໍ​ເປີດ​ໂອກາດ​ໃຫ້​ຄົນ​ຕ່າງ​ຊາດ​ໄດ້​ສຳຜັດ​ກັບ​ປຶ້ມ​ອ່ານ​ຂອງ​ລາວ ແລະ ຍັງ​ເປັນ​ສື່​ກາງ​ໃນ​ການ​ສ້າງ​ໂອກາດ​ໃຫ້​ກັບ​ນັກ​ຂຽນ ແລະ ສຳນັກ​ພິມ​ຂອງ​ລາວ​ໃນ​ການຈຳໜ່າຍ​ລິ​ຂະ​ສິດ​ໃຫ້​ກັບ​ຕ່າງປະເທດ ເຮັດ​ໃຫ້​ສຳນັກ​ພິມ​ມີ​ຄວາມ​ຕື່ນ​ຕົວ ປັບປຸງ ແລະ ພັດທະນາ​ການ​ຜະລິດ​ປຶ້ມ​ອ່ານ​ໃຫ້​ມີ​ຄຸນ​ນະ​ພາບ ມີ​ຫຼາຍ​ສີສັນ ເປັນ​ປະໂຫຍດ​ຕໍ່​ຜູ້​ອ່ານ ແລະ ພັດທະນາ​ເສດຖະກິດ-ສັງຄົມ​ຂອງ​ປະເທດ​ຊາດ ໃຫ້​ເຂັ້ມແຂງ​ຂຶ້ນ​ເປັນ  ກ້າວໆ.

    ພິທີ​ຖະແຫຼງ​ຂ່າວ​ງານ​ບຸນມະໂຫລານ​ສົ່ງເສີມ​ການ​ອ່ານ ນວ ຄັ້ງ​ທີ I ຈັດ​ຂຶ້ນ​ວັນ​ທີ 1 ມີນາ 2019 ຢູ່​ສຳນັກງານ​ປົກຄອງ ນວ ຮ່ວມ​ຖະແຫຼງ​ຂ່າວ​ມີ​ທ່ານ ພອນ​ຈັນ ແພງ​ພູ​ວັນ ຮອງ​ຫົວໜ້າ​ພະ ແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນວ ທ່ານ ສົມ​ພອນ ສອນ​ດາລາ ຮອງ​ຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ ນວ ແລະ ທ່ານ ວຽງ​ສະໄໝ ພາ​ສະເຫຼີມ​ສຸກ ຮອງ​ຫົວໜ້າ​ຫ້ອງ​ວ່າການ ນວ ມີ​ພາກສ່ວນ​ທີ່​ກ່ຽວຂ້ອງ ແລະ ສື່​ມວນ​ຊົນ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ