ຂ່າວຫຼ້າສຸດ

ບາງກອກ​ແອ​ເວ ເປີດ​ເສັ້ນທາງ​ບິນ ຊຽງ​ໃໝ່-ກະບີ່ ແລະ ຊຽງ​ໃໝ່-ຫຼວງ​ພະ​ບາງ

266 04 ມ.ນ. 2019 ຂ່າວໜ້າ​ໜຶ່ງ
ບາງກອກ​ແອ​ເວ ເປີດ​ເສັ້ນທາງ​ບິນ ຊຽງ​ໃໝ່-ກະບີ່ ແລະ ຊຽງ​ໃໝ່-ຫຼວງ​ພະ​ບາງ

    ບໍລິສັດ ການບິນ​ກຸງ​ເທບ​ຈຳກັດ (ມະຫາຊົນ) ຫຼື ສາຍ​ການບິນ​ບາງກອກ​ແອ​ເວ ໄດ້​ຈັດ​ພິທີ​ຖະແຫຼງ​ຂ່າວ​ເປີດ​ເສັ້ນ​ບິນ​ໃໝ່​ຊຽງ​ໃໝ່-ກະບີ່ ແລະ ຊຽງ​ໃໝ່-ຫຼວງ​ພະ​ບາງ (​ສປປ ລາວ) ຂຶ້ນ​ວັນ​ທີ 28 ກຸມພາ 2019 ທີ່​ຊຽງ​ໃໝ່ ປະເທດ​ໄທ ຖະແຫຼງ​ໂດຍ​ທ່ານ ວະ​ຣົງ​ອິດ​ສະ​ຣະ​ເສນາ ນະ​ອະ​ຍຸດ​ທະ​ຍາ ຮອງ​ກຳມະການ​ຜູ້ອຳນວຍການ​ໃຫຍ່​ຝ່າຍ​ຂາຍ​ສາຍ​ການບິນ ແລະ ທ່ານ​ນາງ ພັກ​ຄະ​ນັນ ວິນິດ​ໄສ ຜູ້ອຳນວຍການ​ການທ່ອງທ່ຽວ​ແຫ່ງ​ປະເທດ​ໄທ ສຳນັກງານ​ຊຽງ​ໃໝ່ ມີ​ທ່ານ​ນາງ ຈັນ​ທິບ ທອງ​ກັນຍາ ຮອງ​ຜູ້ອຳນວຍການ​ໃຫຍ່​ສຳນັກ​ຜູ້ອຳນວຍການ​ໃຫຍ່​ສາຍ​ການບິນ​ບາງກອກ​ແອ​ເວ ແລະ ສື່​ມວນ​ຊົນ​ໄທ ແລະ ລາວ​ເຂົ້າ​ຮ່ວມ.

     ທ່ານ ວະ​ຣົງ​ອິດ​ສະ​ຣະ​ເສນາ ນະ​ອະ​ຍຸດ​ທະ​ຍາ ໄດ້​ກ່າວ​ວ່າ: ການ​ເປີດ​ເສັ້ນທາງ​ການບິນ​ຊຽງ​ໃໝ່-ກະບີ່ ແລະ ຊຽງ​ໃໝ່-ຫຼວງ​ພະ​ບາງ ສາຍ​ການບິນ​ຖື​ເປັນ​ໜຶ່ງ​ໃນ​ກົນລະຍຸດ​ການ​ຂະຫຍາຍ​ເຄື່ອ​ຄ່າຍ​ເສັ້ນທາງ​ບິນ​ຂອງ​ບາງກອກ​ແອ​ເວ​ໃຫ້​ຄວບ​ຄຸມ​ປະເທດ​ໃນ​ກຸ່ມ CLMV (ກຳປູເຈຍ ລາວ ມຽນ​ມາ ຫວຽດນາມ) ໂດຍ​ໃຊ້​ຊຽງ​ໃໝ່​ເປັນ​ຈຸດ​ສູນ​ກາງ​ການບິນ​ທາງ​ພາກ​ເໜືອ ເນື່ອງ​ຈາກ​ຊຽງ​ໃໝ່​ເປັນ​ເມືອງ​ທ່ອງ​ທ່ຽວ​ທີ່​ສຳຄັນ​ອັນ​ດັບ​ຕົ້ນ​ຂອງ​ປະເທດ​ໄທ ແລະ ມີ​ຊື່​ສຽງ​ໄປ​ທົ່ວ​ໂລກ ມີ​ນັກ​ທ່ອງ​ທ່ຽວ​ເດີນທາງ​ມາ​ຈາກ​ສາຍ​ການບິນ​ພາຍ​ໃນ​ປະເທດ ແລະ ສາຍ​ການບິນ​ຈາກ​ຕ່າງປະເທດ ເຊິ່ງ​ມີ​ປະລິມານ​ເພີ່ມ​ຂຶ້ນ​ທຸກ​ປີ ການ​ເປີດ​ເສັ້ນທາງ​ບິນ​ຕົງ​ຈາກ​ຊຽງ​ໃໝ່​ໄປ​ຍັງ​ເມືອງ​ຕ່າງໆ​ຈະ​ຊ່ວຍ​ອຳນວຍ​ຄວາມ​ສະດວກ​ໃຫ້​ແກ່​ຜູ້ໂດຍສານ​ໂດຍ​ບໍ່​ຕ້ອງ​ເດີນທາງ​ກັບ​ໄປ​ຕໍ່​ເຄື່ອງ​ທີ່​ບາງກອກ ປັດຈຸບັນ​ບາງກອກ​ແອ​ເວ ມີ​ສາຍ​ການບິນ​ຈາກ​ແຂວງ​ຊຽງ ໃໝ່​ໄປ​ຍັງ​ເມືອງ​ຕ່າງໆ ທັງ​ໃນ​ປະເທດ ແລະ ຕ່າງປະເທດ​ໄດ້ແກ່: ບາງກອກ ສະ​ໝຸຍ ພູ​ເກັດ ຊຽງ​ໃໝ່ ແມ່​ຮ່ອງ​ສອນ ຢາງ​ກຸ້ງ ມັນ​ທະເລ (ມຽນ​ມາ) ແລະ ຮ່າ​ໂນ້ຍ (ຫວຽດນາມ) ແລະ ສອງ​ສາຍ​ເສັ້ນທາງ​ບິນ​ດັ່ງກ່າວ​ເຊິ່ງ​ທັງ 2 ເມືອງ​ເປັນ​ທີ່​ຮູ້ຈັກ ແລະ ໄດ້​ຮັບ​ຄວາມ​ນິຍົມ​ຈາກ​ນັກ​ທ່ອງ​ທ່ຽວ​ທົ່ວ​ໂລກ ເຊິ່ງ​ການ​ເຊື່ອມ​ຕໍ່​ລະຫວ່າງ​ເສັ້ນທາງ​ບິນ​ຊຽງ​ໃໝ່-ຫຼວງ​ພະ​ບາງ​ຈະ​ເຮັດ​ໃຫ້​ບາງກອກ​ແອ​ເວ​ມີ​ສາຍ​ການບິນ​ຄວບ​ຄຸມ​ໃນ​ກຸ່ມ​ປະເທດ CLMV ເພີ່ມ​ເຕີມ​ຄື: ​ສປປ ລາວ ໂດຍ​ເລັ່ງ​ເຫັນ​ວ່າ​ນະຄອນຫຼວງ​ພະ​ບາງ ເປັນ​ທີ່​ຮູ້ຈັກ​ຂອງ​ນັກ​ທ່ອງ​ທ່ຽວ​ທັງ​ຊາວ​ໄທ ແລະ ຕ່າງປະເທດ​ທີ່​ມັກ​ຮັກ​ໃນ​ວັດທະນະທຳ ຕ້ອງການ​ຄວາມ​ງຽບ​ສະຫງົບ ວິຖີ​ຊີວິດ​ລຽບ​ງ່າຍ​ເລືອກ​ເດີນທາງ​ມາ​ພັກຜ່ອນ ເຊິ່ງ​ອົງການ​ຢູ​ເນັດ​​ສ​ໂກ​ໄດ້​ຂຶ້ນ​ທະບຽນ​ໃຫ້​ນະຄອນຫຼວງ​ພະ​ບາງ ເປັນ​ມໍລະດົກ​ໂລກ ດ້ານ​ວັດທະນະທຳ​ເຊື່ອ​ວ່າ​ສາຍ​ການບິນ​ນີ້​ຈະ​ໄດ້​ຮັບ​ຄວາມ​ນິຍົມ”

ສຳລັບ​ເສັ້ນທາງ​ການບິນ​ຊຽງ​ໃໝ່-ກະບີ່ (ຖ້ຽວ​ດຽວ) ຈະ​ເລີ່ມ​ໃຫ້​ບໍລິການ​ວັນ​ທີ 31 ມີນາ 2019 ອາທິດ​ລະ 3 ຖ້ຽວ (ອາທິດ ອັງຄານ ແລະ ພະຫັດ) ແລະ ຈະ​ປັບ​ໃຫ້​ບໍລິການ​ທຸກ​ວັນ ວັນ​ລະ1 ຖ້ຽວ ນັບ​ແຕ່​ວັນ​ທີ 30 ເມສາ 2019 ເປັນຕົ້ນ​ໄປ ດ້ວຍ​ເຄື່ອງ​ບິນ​ແບບ​ແອ​​ຣບັສ A319 ຂະໜາດ 144 ບ່ອນ​ນັ່ງ ໂດຍ​ຖ້ຽວ​ບິນ PG 246 ອອກ​ຈາກ​ຊຽງ​ໃໝ່ ເວລາ 12:00 ໂມງ ຮອດ​ກະບີ່ ເວລາ 13:55 ໂມງ ສ່ວນ​ເສັ້ນທາງ​ການບິນ​ລະຫວ່າງ​ຊຽງ​ໃໝ່-ຫຼວງ​ພະ​ບາງ​ໄປ-ກັບ ຈະ​ໃຫ້​ບໍລິການ​ອາທິດ​ລະ 3 ຖ້ຽວ (ອັງຄານ ພະຫັດ ແລະ ເສົາ) ດ້ວຍ​ເຄື່ອງ​ບິນ​ແບບ ATR 72-600 ຂະໜາດ 70 ບ່ອນ​ນັ່ງ ໂດຍ​ຖ້ຽວ​ບິນ​ຂາ​ໄປ PG 983 ອອກ​ຈາກ​ຊຽງ​ໃໝ່ ເວລາ 16:30 ໂມງ ຮອດ​ຫຼວງ​ພະ​ບາງ​ເວລາ 17:45 ໂມງ ຖ້ຽວ​ບິນ​ຂາ​ກັບ PG 984 ອອກ​ຈາກ​ຫຼວງ​ພະ​ບາງ ເວລາ 18:30 ໂມງ ຮອດ​ຊຽງ​ໃໝ່​ເວລາ 19:45 ໂມງ ໂດຍ​ຈະ​ເລີ່ມ​ໃຫ້​ບໍລິການ​ແຕ່​ວັນ​ທີ 2 ເມສາ 2019 ເປັນຕົ້ນ​ໄປ ຜູ້​ສົນໃຈ​ສາມາດ​ຈອງ​ທີ່​ນັ່ງ​ໄດ້​ທີ່ www.bangkokair.com.

ຂ່າວທີ່ກ່ຽວຂ້ອງ