ຂ່າວຫຼ້າສຸດ

ມີ​ຫຼາຍ​ກວ່າ​ພັນ​ຄົນ​ໄດ້​ຮັບ​ການ​ກວດ​ສຸຂະພາບ​ຕາ​ໂດຍ​ບໍ່​ເສຍ​ຄ່າ

343 04 ມ.ນ. 2019 ຂ່າວໜ້າ​ໜຶ່ງ
ມີ​ຫຼາຍ​ກວ່າ​ພັນ​ຄົນ​ໄດ້​ຮັບ​ການ​ກວດ​ສຸຂະພາບ​ຕາ​ໂດຍ​ບໍ່​ເສຍ​ຄ່າ

    ມູນ​ນິທິ​ເຟຣດ​ໂຮ​ໂລ ປະຈຳ​ລາວ ຮ່ວມ​ກັບ ກະຊວງ​ສາທາລະນະ​ສຸກ ແລະ ກະຊວງ​ການ​ຕ່າງປະເທດ ຈັດ​ກິດຈະກຳ​ກວດ​ແທກ​ສາຍຕາ ແລະ ຜ່າຕັດ​ແກ່ນ​ຕາ​ຂຸ້ນ​ໂດຍ​ບໍ່​ເສຍ​ຄ່າ ເພື່ອ​ສະເຫຼີມສະຫຼອງ​ວັນ​ແມ່ຍິງ​ສາກົນ 8 ມີນາ ຄົບຮອບ 109 ປີ ຂຶ້ນ​ວັນ​ທີ 1 ມີນາ 2019 ທີ່​ສູນ​ການ​ຮ່ວມ​ມື​ສາກົນ ແລະ ເຝິກອົບຮົມ (ITCT) ນະຄອນຫຼວງ​ວຽງ​ຈັນ ເປັນ​ປະທານ​ຂອງ​ທ່ານ​ນາງ ຈັນ​ສະໝອນ ສາຍ​ກັນຍາ ຮອງ​ຫົວໜ້າ​ກົມ​ການ​ເງິນ ທັງ​ເປັນ​ຮັກສາ​ການ​ປະທານ​ສະຫະພັນ​ແມ່ຍິງ ກະຊວງ​ການ​ຕ່າງປະເທດ ມີ​ທ່ານ ສີ​ເພັດ​ທະ​ວົງ ສີ​ສະເຫຼີມ​ສັກ ຮອງ​ອຳນວຍ​ການ​ສູນ​ປິ່ນປົວ ແລະ ຮັກສາ​ສຸຂະພາບ​ຕາ (ທົ່ງ​ປົ່ງ) ພ້ອມ​ດ້ວຍ​ຜູ້ຕາງໜ້າ​ຈາກ​ອົງການ​ເຟຣດ​ໂຮ​ໂລ ຕະຫຼອດ​ຮອດ​ພະນັກງານ​ແພດ​ໝໍ ແລະ ປະຊາຊົນ ໂດຍ​ສະເພາະ ຜູ້​ມີ​ບັນຫາ​ທາງ​ສາຍຕາ​ເຂົ້າ​ຮ່ວມ​ເປັນ​ຈຳນວນ​ຫຼວງຫຼາຍ.

    ການ​ຈັດ​ກິດຈະກຳ​ຄັ້ງ​ນີ້ ມີ​ຄວາມ​ສຳຄັນ ແລະ ເປັນ​ປະໂຫຍດ​ໃຫ້​ແກ່​ວຽກ​ງານ​ຮັກສາ​ສຸຂະພາບ​ຕາ ໂດຍ​ສະເພາະ ການ​ເຜີຍແຜ່​ຂໍ້​ມູນ​ກ່ຽວ​ກັບ​ບັນຫາ​ຕາບອດ​ທີ່​ຫຼີກ​ລ່ຽງ​ໄດ້​ໃຫ້​ແກ່​ປະຊາຊົນ​ລາວ ຕາມ​ສະຖິຕິ​ທາງ​ມູນ​ນິທິ​ເຟຣດ​ໂຮ​ໂລ ໄດ້​ປະ​ເມີນ​ໃນ​ປີ 2017 ຊີ້​ໃຫ້​ເຫັນ​ວ່າ ປະມານ 75% ຂອງ​ຄົນ​ຜູ້​ທີ່​ເປັນ​ພະຍາດ​ກ່ຽວ​ກັບ​ຕາ​ຍັງ​ບໍ່​ທັນ​ເຂົ້າ​ເຖິງ​ການ​ບໍລິການ​ປິ່ນປົວ ແລະ ຮັກສາ​ສຸຂະພາບ​ຕາ ພ້ອມ​ນັ້ນ ກໍ​ພົບ​ເຫັນ​ວ່າ​ມີ​ຈຳນວນ​ແມ່ຍິງ​ທີ່​ເປັນ​ພະຍາດ​ຕາ​ຫຼາຍ​ກວ່າ​ຜູ້​ຊາຍ ເຊິ່ງ​ເປັນ​ບັນຫາ​ອຸປະສັກ​ໃຫຍ່​ຫຼວງ​ຕໍ່​ການ​ດຳລົງ​ຊີວິດ ແລະ ເປັນ​ອຸປະສັກ​ໃຫຍ່​ຫຼວງ​ຕໍ່​ການ​ສ້າງສາ​ພັດທະນາ​ເສດຖະກິດ-ສັງຄົມ.

    ສຳລັບ​ການ​ຈັດ​ກິດຈະກຳ​ຄັ້ງ​ນີ້ ເພື່ອ​ເປັນ​ການ​ສ້າງ​ຂະ​ບວນ​ການ​ຄຳນັບ​ຮັບ​ຕ້ອນ ວັນ​ແມ່ຍິງ​ສາກົນ​ທີ 8 ມີນາ ທີ່​ຈະ​ມາ​ຮອດ​ໃນ​ມໍ່ໆ​ນີ້ ພ້ອມ​ນັ້ນ ເພື່ອ​ເປັນ​ການ​ບໍລິການ​ໃຫ້​ພະນັກງານ ທະຫານ ຕຳຫຼວດ ແລະ ປະຊາຊົນ​ລາວ​ທົ່ວ​ປະເທດ ໄດ້​ເຂົ້າ​ມາ​ກວດ​ວັດແທກ​ສາຍຕາ ພ້ອມ​ທັງ​ໃຫ້​ແນະນຳ​ການ​ຮັກສາ​ຕາ​ໂດຍ​ບໍ່​ເສຍ​ຄ່າ ນອກຈາກ​ນີ້ ຍັງ​ມີ​ການແຈກຢາຍ​ແວ່ນຕາ ຈຳນວນ 520 ອັນ ຕັດ​ແວ່ນຕາ​ກັບ​ທີ່ 51 ອັນ ແລະ ມີ​ຜູ້​ມາ​ໃຫ້​ບໍລິການ​ກວດ​ສາຍຕາ​ຫຼາຍ​ກວ່າ 1 ພັນ​ຄົນ ໃນ​ນີ້ ມີ​ຈຳນວນ​ໜຶ່ງ​ຕ້ອງ​ໄດ້​ໄປ​ຜ່າຕັດ​ແກ່ນ​ຕາ​ຂຸ້ນ​ໃນ​ວັນ​ທີ 2 ມີນາ 2019 ຢູ່​ສູນ​ປິ່ນປົວ ແລະ ຮັກສາ​ສຸຂະພາບ​ຕາ (ທົ່ງ​ປົ່ງ) ຈຳນວນ 28 ຄົນ​ຕື່ມ​ອີກ.

ຂ່າວທີ່ກ່ຽວຂ້ອງ