ຂ່າວຫຼ້າສຸດ

ແສງ​ສະຫວັນ ຍົກ​ລະດັບ​ເປັນ​ສະ​ຖາ​ບັນ​ເປີດ​ຫຼັກສູດ​ປະລິນຍາ​ຕີ

304 04 ມ.ນ. 2019 ຂ່າວໜ້າ​ໜຶ່ງ
ແສງ​ສະຫວັນ ຍົກ​ລະດັບ​ເປັນ​ສະ​ຖາ​ບັນ​ເປີດ​ຫຼັກສູດ​ປະລິນຍາ​ຕີ

   ວັນ​ທີ 1 ມີນາ 2019 ທີ່​ສະ​ຖາ​ບັນທຸ​ລະ​ກິດ​ແສງ​ສະຫວັນ ທ່ານ ຄຳ​ແສນ ສີສະ​ວົງ ປະທານ​ກຸ່ມ​ການ​ສຶກ​ສາ​ແສງ​ສະຫວັນ ທັງ​ເປັນ​ຫົວໜ້າ​ສະ​ຖາ​ບັນທຸ​ລະ​ກິດ​ແສງ​ສະຫວັນ ໄດ້​ຖະແຫຼງ​ຂ່າວ​ວ່າ: ແສງ​ສະຫວັນ​ໄດ້​ຍົກ​ຖານະ​ວິທະຍາໄລ​ບໍລິຫານ​ທຸລະ​ກິດ​ແສງ​ສະຫວັນ​ຂຶ້ນ​ເປັນ​ສະ​ຖາ​ບັນທຸ​ລະ​ກິດ​ແສງ​ສະຫວັນ ແລະ ເປີດ​ການ​ຮຽນ-ການ​ສອນ​ຫຼັກສູດ​ປະລິນຍາ​ຕີ ເລີ່ມ​ຈັດ​ຕັ້ງ​ປະຕິບັດ​ນັບ​ແຕ່​ທ້າຍ​ເດືອນ​ມີນາ​ນີ້​ເປັນຕົ້ນ​ໄປ ເຊິ່ງ​ກຸ່ມ​ການ​ສຶກ​ສາ​ແສງ​ສະຫວັນ​ໄດ້​ສ້າງຕັ້ງ​ຂຶ້ນ​ປີ 1998 ປະກອບ​ມີ​ໂຮງຮຽນ​ສອງ​ພາສາ 3 ແຫ່ງ ໂຮງຮຽນ​ນາໆຊາດ 1 ແຫ່ງ ສະ​ຖາ​ບັນທຸ​ລະ​ກິດ​ແສງ​ສະຫວັນ 1 ແຫ່ງ ແລະ ໂຮງຮຽນ​ນ້ຳ​ເທີນ 2 ຈຳນວນ 1 ແຫ່ງ ເພື່ອ​ສ້າງ​ຜູ້​ບໍລິຫານ​ໃຫ້​ບໍລິສັດ ໄຟຟ້າ​ນ້ຳ​ເທີນ 2.

    ສຳລັບ​ເງື່ອນໄຂ​ການ​ຍົກ​ລະດັບ​ວິທະຍາໄລ​ຂຶ້ນ​ເປັນ​ສະ​ຖາ​ບັນ​ແສງ​ສະຫວັນ ເປັນ​ບາດກ້າວ​ໃໝ່​ຂອງ​ຄຸນ​ນະ​ພາບ​ການ​ສຶກ​ສາ​ພາກ​ເອກະ​ຊົນ​ທີ່​ຈະ​ເລື່ອນ​ຈາກ​ມີ​ແຕ່​ຊັ້ນ​ສູງ​ໃນ​ຜ່ານ​ມາ​ໃຫ້​ຂຶ້ນ​ເປັນ​ຊັ້ນ​ປະລິນຍາ​ຕີ​ໂດຍ​ການ​ຜ່ານ​ການ​ກວດກາ​ດ້ານ​ຄຸນ​ນະ​ພາບ​ກົມ​ກ່ຽວຂ້ອງ​ຂອງ​ກະຊວງ​ສຶກ​ສາ​ທິ​ການ ແລະ ກີລາ ເຊິ່ງ​ວິທະຍາໄລ​ແສງ​ສະຫວັນ​ເປັນ​ສະ​ຖາ​ບັນ​ການ​ສຶກ​ສາ​ແຫ່ງ​ໜຶ່ງ ທີ່​ມີ​ປະສົບ​ການ​ໃນ​ການ​ຮຽນ-ການ​ສອນ​ມາ​ກ່ອນ​ແລ້ວ ມີ​ສະຖານທີ່ 2 ບ່ອນ​ຄື: ຢູ່​ບ້ານ​ສີ​ສະຫວາດ ເມືອງ​ຈັນທະ​ບູ​ລີ ແລະ ຢູ່​ຫຼັກ 21 ເມືອງ​ໄຊ​ທານີ ນະຄອນຫຼວງ​ວຽງ​ຈັນ ປັດຈຸບັນ​ມີ​ອາຄານ​ຮຽນ 5 ຫຼັງ ໃນ​ນັ້ນ​ອາຄານ 6 ຊັ້ນ 2 ຫຼັງ ອາຄານ 3 ຊັ້ນ 1 ຫຼັງ ແລະ ອາຄານ 4 ຊັ້ນ 2 ຫຼັງ ພ້ອມ​ນັ້ນ ມີ​ສິ່ງ​ອຳນວຍ​ຄວາມ​ສະດວກ​ສະໜອງ​ໃຫ້​ແກ່​ການ​ຮຽນ-ການ​ສອນ ມີ​ບຸ​ຄະລາ​ກອນ​ພຽງພໍ​ໃນ​ການ​ສິດສອນ ແລະ ດຳເນີນ​ວຽກ​ງານ​ບໍລິຫານ​ທີ່​ປະກອບ​ມີ​ທັງ​ພະນັກງານ​ຄົນ​ລາວ ແລະ ຄົນ​ຕ່າງປະເທດ​ທີ່​ມີ​ວຸດ​ທິ​ການ​ສຶກ​ສາ​ເໝາະ​ສົມ​ແກ່​ການ​ສອນ​ໃນ​ຫຼັກສູດ​ຕ່າງໆ ແລະ ໄດ້​ມາດຕະຖານ​ການ​ຍົກ​ລະດັບ​ສະ​ຖາ​ບັນ​ຂອງ​ກະຊວງ​ສຶກ​ສາ​ທິ​ການ ແລະ ກີລາ ພ້ອມ​ນັ້ນ ຍັງ​ໄດ້​ຮັບ​ອະນຸຍາດ ຕາມ​ຂໍ້​ຕົກລົງ​ຂອງ​ລັດຖະມົນຕີ​ກະຊວງ​ສຶກ​ສາ​ທິ​ການ ແລະ ກີລາ ວ່າ​ດ້ວຍ​ການ​ຍົກ​ຖານະ​ວິທະຍາໄລ​ບໍລິຫານ​ທຸລະ​ກິດ​ແສງ​ສະຫວັນ​ຂຶ້ນ​ເປັນ​ສະ​ຖາ​ບັນທຸ​ລະ​ກິດ​ແສງ​ສະຫວັນ ຂໍ້​ຕົກລົງ​ວ່າ​ດ້ວຍ​ການ​ຮັບຮອງ ແລະ ອະນຸມັດ​ນຳ​ໃຊ້​ຫຼັກສູດ​ປະລິນຍາ​ຕີ 3 ສາຂາ​ວິຊາ​ຄື: ຜູ້​ປະກອບ​ການ ບໍລິຫານ​ທຸລະ​ກິດ ແລະ ພາສາ​ອັງກິດ ຢູ່​ສະ​ຖາ​ບັນທຸ​ລະ​ກິດ​ແສງ​ສະຫວັນ.

    ປັດຈຸບັນ ແສງ​ສະຫວັນ​ມີ​ຫຼັກສູດ​ຊັ້ນ​ສູງ 5 ຫຼັກສູດ​ປະກອບ​ມີ: ບໍລິຫານ​ທຸລະ​ກິດ ການ​ເງິນ ການ​ບັນຊີ ຜູ້​ປະກອບ​ການ ແລະ ພາສາ​ອັງກິດ ຫຼັກສູດ​ປະລິນຍາ​ຕີ​ມີ​ຫຼັກສູດ​ບໍລິຫານ​ທຸລະ​ກິດ ຜູ້​ປະກອບ​ການ ແລະ ຫຼັກສູດ​ພາສາ​ອັງກິດ ແລະ ຫຼັກສູດ​ປະລິນຍາ​ຕີ​ຮ່ວມ​ມື​ກັບ​ມະຫາວິທະຍາໄລ FPT ຫວຽດນາມ ປະກອບ​ມີ ວິສະວະກຳ ຊອບ​ແວ ແລະ ການ​ຄ້າ​ເອ​ເລັກ​ໂຕຣ​ນິກ ນອກ​ນີ້ ຍັງ​ໄດ້​ຮ່ວມ​ມື​ດ້ານ​ວິຊາ​ການ ແລະ ການ​ບໍລິການ​ວິຊາ​ການ​ກັບ​ຫຼາຍ​ສະ​ຖາ​ບັນ​ຢູ່​ຕ່າງປະເທດ​ເຊັ່ນ: ມະຫາວິທະຍາໄລ​ເດິ​ຊິດ​ຕີ ບົວລະພາ ຄິງ​ມຸງກຸດ ແລະ ມະຫາວິທະຍາໄລ​ກຸງ​ເທບ​ທົນ​ບູ​ລີ ສະ​ຖາ​ບັນ​ເຕັກ​ໂນ​ໂລ​ຊີ​ວູ​ຊີ ສະ​ຖາ​ບັນທຸ​ລະ​ກິດ​ມົງ​ປາ​ຣີ​ເຢ້ ແລະ ອື່ນໆ.

          ສຳລັບ​ການ​ເປີດ​ການ​ຮຽນ-ການ​ສອນ​ປະລິນຍາ​ຕີ​ໃນ 3 ສາຂາ​ວິຊາ ຈະ​ເລີ່ມ​ຕົ້ນ​ໃນ​ທ້າຍ​ເດືອນ​ມີນາ 2019 ເປັນຕົ້ນ​ໄປ ໃນ​ນີ້ ຈະ​ໄດ້​ມີ​ການ​ສອບເສັງ​ຄັດ​ເລືອກ ເນື່ອງ​ຈາກ​ກະຊວງ​ສຶກ​ສາ​ທິ​ການ ແລະ ກີລາ ອະນຸມັດ​ໃຫ້​ຮັບ​ນັກ​ສຶກ​ສາ​ພຽງ​ແຕ່​ຫຼັກສູດ​ລະ 100 ຄົນ​ເທົ່າ​ນັ້ນ ທັງ​ນີ້ ກໍ່​ເພື່ອ​ແນໃສ່​ເຮັດ​ໃຫ້​ນັກ​ສຶກ​ສາ​ທີ່​ເຂົ້າ​ມາ​ສຶກ​ສາ​ຮ່ຳຮຽນ​ຢູ່​ສະ​ຖາ​ບັນ​ການ​ສຶກ​ສາ​ແຫ່ງ​ນີ້​ໄດ້​ມີ​ຄຸນ​ນະ​ພາບ.

ຂ່າວທີ່ກ່ຽວຂ້ອງ