ກຽມ​ສົ່ງ​ນັກກີລາ​ດຶງເຊືອກ ຮ່ວມ​ຊີງ​ແຊັມ​ອາຊີ 2019

175 05 ມ.ນ. 2019 ວົງຈອນກີລາ
 ກຽມ​ສົ່ງ​ນັກກີລາ​ດຶງເຊືອກ ຮ່ວມ​ຊີງ​ແຊັມ​ອາຊີ 2019

     ສະຫະພັນ​ກີລາ​ດຶງເຊືອກ​ແຫ່ງ​ຊາດ​ລາວ ແຈ້ງ​ໃຫ້​ຮູ້ເມື່ອ​ບໍ່​ດົນ​ມາ​ນີ້​ວ່າ: ສະຫະພັນ​ກີລາ​ດຶງເຊືອກ​ແຫ່ງ​ອາຊີ ໄດ້​ແຈ້ງ​ເຊີນ​ສະຫະພັນ​ດຶງເຊືອກ​ແຫ່ງ​ຊາດ​ລາວ ລະຫວ່າງ​ວັນ​ທີ 11-14 ເມສາ 2019 ຈະ​ຈັດການ​ແຂ່ງຂັນ​ກີລາ​ດຶງເຊືອກ (ຍິງ-ຊາຍ) ຊີງ​ແຊັມ​ອາຊີ ຄັ້ງ​ທີ 9 ຢູ່​ປະເທດ​ໄທ ໂດຍ​ຄາດ​ວ່າ​ຈະ​ມີ​ນັກກີລາ​ຈາກ 19 ປະເທດ​ເຂົ້າ​ຮ່ວມ.

    ການ​ແຂ່ງຂັນ​ຄັ້ງ​ນີ້ ມີ 3 ປະເພດ ຄື: ປະເພດ​ຊາຍ ນ້ຳໜັກ​ລວມ 600 ກິ​ໂລ 8 ຄົນ ປະເພດ​ຍິງ ນ້ຳໜັກ​ລວມ 500 ກິ​ໂລ 8 ຄົນ ແລະ ຄູ​ປະສົມ ຊາຍ-ຍິງ ນ້ຳໜັກ​ລວມ​ບໍ່​ເກີນ 500 ກິ​ໂລ ເຊິ່ງ ຈະ​ແບ່ງ​ອອກ​ເປັນ 4 ກຸ່ມ ໂດຍ​ຈະ​ຄັດ​ເລືອກ​ເອົາ​ທີມ​ທີ່​ມີ​ຄະແນນ ອັນ​ດັບ 1-2 ເຂົ້າ​ຮອບ 2 ເພື່ອ​ຄັດ​ເອົາ 4 ທີມ​ເຂົ້າ​ໄປ​ຫຼິ້ນ​ໃນ​ຮອບ​ຮອງ​ຊະນະ​ເລີດ ແລະ ຊີງ​ຊະນະ​ເລີດ ໃນ​ນີ້​ທີມ​ຊະນະ​ເລີດ​ຈະ​ໄດ້​ຮັບ​ລາງວັນ ຂັນ+ເງິນສົດ 1 ລ້ານ​ບາດ (ປະມານ 270 ລ້ານ​ກີບ) ອັນ​ດັບ 2 ໄດ້​ຮັບ​ລາງວັນ 500.000 ບາດ ອັນ​ດັບ 3 ຈະ​ໄດ້​ຮັບ 100.000 ບາດ ອັນ​ດັບ 4 ຈະ​ໄດ້​ຮັບ 50.000 ບາດ.

    ສຳລັບ​ຄວາມ​ຫວັງ​ຂອງ​ນັກກີລາ​ດຶງເຊືອກ​ທີມ​ຊາດ​ລາວ ມີ​ໂອກາດ​ທີ່​ຈະ​ຜ່ານ​ເຂົ້າ​ໄປ​ຫຼິ້ນ​ໃນ​ຮອບ 3 ຫຼື ຮອບ 4 ທີມ​ສຸດ​ທ້າຍ ເຊິ່ງ​ປັດຈຸບັນ​ນັກກີລາ​ທີມ​ຊາດ​ລາວ ກຳລັງ​ເກັບ​ຕົວ​ເຝິກຊ້ອມ​ຢູ່​ປະເທດ​ໄທ ເພື່ອ​ກຽມ​ເຂົ້າ​ຮ່ວມ​ແຂ່ງຂັນ​ຄັ້ງ​ນີ້ ໂດຍ​ຜົນງານ​ຫຼ້າ​ສຸດ ທີ່​ເຂົ້າ​ຮ່ວມ​ແຂ່ງຂັນ​ຊີງ​ແຊັມ​ອາຊີ ປີ 2017 ສາມາດ​ຍາດ​ໄດ້​ອັນ​ດັບ​ທີ 4 ຈາກ​ການ​ເຂົ້າ​ຮ່ວມ 17 ປະເທດ.

ຂ່າວທີ່ກ່ຽວຂ້ອງ