ຖະ­ແຫຼງ­ການ​ຂອງ​ໂຄ­ສົກ​ກະ­ຊວງ​ການ​ຕ່າງ­ປະ­ເທດ ​ສປປ ລາວ ຕໍ່​ການ​ພົບ​ປະ​ຂອງ​ຜູ້­ນຳ ​ສປປ ເກົາ­ຫຼີ ແລະ ສ ອາ​ເມ​ຣິ​ກາ

361 05 ມ.ນ. 2019 ຂ່າວໜ້າ​ໜຶ່ງ

    ນະ­ຄອນ­ຫຼວງ​ວຽງ​ຈັນ ວັນ​ທີ 1 ມີ­ນາ 2019 ສປປ ລາວ ຕີ​ລາ­ຄາ​ສູງ​ຕໍ່​ຄວາມ​ພະ­ຍາ­ຍາມ​ຂອງ​ຜູ້­ນຳ ສປປ ເກົາ­ຫຼີ ແລະ ສ ອາ​ເມ​ຣິ​ກາ ໃນ​ການ​ຈັດ­ການ​ພົບ​ປະ​ສຸດ​ຍອດ ຄັ້ງ​ທີ 2 ລະ­ຫວ່າງ​ຜູ້­ນຳ​ສອງ​ປະ­ເທດ ຊຶ່ງ​ໄດ້​ຈັດ​ຂຶ້ນ​ທີ່​ນະ­ຄອນ­ຫຼວງ​ຮ່າ​ໂນ້ຍ ສສ ຫວຽດ­ນາມ ແຕ່​ວັນ​ທີ 27-28 ກຸມ­ພາ 2019 ພ້ອມ​ກັນ​ນັ້ນ ກໍ​ຂໍ​ຊົມ­ເຊີຍ​ການ​ເປັນ​ເຈົ້າ­ພາບ​ທີ່​ດີ­ເລີດ​ຂອງ​ລັດ­ຖະ­ບານ ແລະ ປະ­ຊາ­ຊົນ ສສ ຫວຽດ­ນາມ ເຊິ່ງ​ເປັນ​ການ​ປະ­ກອບ­ສ່ວນ​ທີ່​ສຳ­ຄັນ​ເຂົ້າ​ໃນ​ຂະ​ບວນ​ການ​ສ້າງ​ສັນ­ຕິ­ພາບ​ໃນ​ພາກ​ພື້ນ ແລະ ໃນ​ໂລກ ເຖິງ​ແມ່ນ​ວ່າ​ສອງ​ຝ່າຍ​ຈະ​ບໍ່​ສາ­ມາດ​ບັນ­ລຸ​ຂໍ້​ຕົກ­ລົງ​ໃດໆ​ຮ່ວມ​ກັນ​ກໍ​ຕາມ.

   ສປປ ລາວ ເຫັນ​ວ່າ ການ​ພົບ​ປະ​ຄັ້ງ​ນີ້​ໄດ້​ສ້າງ​ຄວາມ​ໄວ້​ເນື້ອ​ເຊື່ອ​ໃຈ ແລະ ເຂົ້າ­ໃຈ​ເຊິ່ງ​ກັນ ແລະ ກັນ​ຕື່ມ ລະ­ຫວ່າງ​ຜູ້­ນຳ ສປປ ເກົາ­ຫຼີ ແລະ ສ ອາ​ເມ​ຣິ​ກາ ເຊິ່ງ​ຈະ​ເປັນ​ພື້ນ­ຖານ​ສຳ­ຄັນ​ໃຫ້​ແກ່​ການ​ເຈລະ­ຈາ​ສ້າງ​ສາຍ​ພົວ­ພັນ​ແບບ​ໃໝ່​ລະ­ຫວ່າງ​ສອງ​ປະ­ເທດ ກໍ​ຄື​ການ​ສ້າງ​ແຫຼມ​ເກົາ­ຫຼີ ໃຫ້​ເປັນ​ເຂດ​ປອດ​ອາ­ວຸດ​ນິວ​ເຄລຍ ໃນ​ອະ​ນາ ຄົດ.

  ສປປ ລາວ ຫວັງ​ຢ່າງ​ຍິ່ງ​ວ່າ ທຸກ​ຝ່າຍ​ທີ່​ກ່ຽວ­ຂ້ອງ​ຈະ​ສືບ­ຕໍ່​ຄວາມ​ພະ­ຍາ­ຍາມ​ຮ່ວມ​ກັນ ເພື່ອ​ຮັກ­ສາ​ບັນ​ຍາ ກາດ​ໃນ​ປັດ­ຈຸ­ບັນ ແລະ ສ້າງ​ເງື່ອນ­ໄຂ​ສະ­ດວກ​ໃຫ້​ແກ່​ການ​ເຈລະ­ຈາ​ຫາ​ຊ່ອງ​ທາງ​ແກ້​ໄຂ​ບັນ­ຫາ​ແຫຼມ​ເກົາ­ຫຼີ ໃນ​ສັນ­ຕິ​ວິ­ທີ ເພື່ອ​ປະ­ກອບ­ສ່ວນ​ສຳ­ຄັນ​ເຂົ້າ​ໃນ​ການ​ປົກ​ປັກ​ຮັກ­ສາ​ສັນ­ຕິ­ພາບ ແລະ ສະ­ຖຽນ​ລະ​ພາບ ໃນ​ແຫຼມ​ເກົາ­ຫຼີ ແລະ ໃນ​ໂລກ.

  ສປປ ລາວ ຢືນ­ຢັນ​ຄືນ​ທັດ­ສະ­ນະ​ອັນ​ສະ­ເໝີ​ຕົ້ນ​ສະ­ເໝີ​ປາຍ​ຂອງ​ຕົນ ໃນ​ການ​ສະ­ໜັບ­ສະ­ໜູນ​ການ​ສ້າງ​ແຫຼມ​ເກົາ­ຫຼີ ໃຫ້​ປອດ​ອາ­ວຸດ​ນິວ​ເຄລຍ ດ້ວຍ​ສັນ­ຕິ​ວິ­ທີ ເພື່ອ​ຜົນ​ປະ­ໂຫຍດ ກໍ​ຄື​ສັນ­ຕິ­ພາບ ສະ­ຖຽນ​ລະ​ພາບ ແລະ ການ​ຮ່ວມ​ມື ໃນ​ແຫຼມ​ເກົາ­ຫຼີ ກໍ​ຄື​ພາກ​ພື້ນ ແລະ ໃນ​ໂລກ.

 

ຂ່າວທີ່ກ່ຽວຂ້ອງ