ຂະແໜງ​ກະສິກຳ ຕ້ອງ​ພັດທະນາ​ໃຫ້​ທັນ​ສະໄໝ ແລະ ເປັນ​ມິດ​ກັບ​ສິ່ງແວດລ້ອມ

252 06 ມີ.ນ. 2019 ຂ່າວໜ້າ​ໜຶ່ງ
ຂະແໜງ​ກະສິກຳ ຕ້ອງ​ພັດທະນາ​ໃຫ້​ທັນ​ສະໄໝ ແລະ ເປັນ​ມິດ​ກັບ​ສິ່ງແວດລ້ອມ

     ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ໄດ້​ໃຫ້​ກຽດ​ເຂົ້າ​ຮ່ວມ ແລະ ໂອ້​ລົມ​ຕໍ່​ກອງ​ປະຊຸມ​ສະຫຼຸບ​ຕີ​ລາຄາ​ວຽກ​ງານ​ກະສິກຳ ປ່າໄມ້ ແລະ ພັດທະນາ​ຊົນນະບົດ​ທົ່ວ​ປະເທດ ປະຈຳ​ປີ 2018 ແລະ ທິດ​ທາງ​ປີ 2019 ວັນ​ທີ 5 ມີນາ 2019 ຢູ່​ສະ​ຖາ​ບັນ​ຄົ້ນຄວ້າ​ກະສິກຳ ປ່າໄມ້ ແລະ ພັດທະນາ​ຊົນນະບົດ ໂດຍ​ການ​ຕ້ອນຮັບ​ຂອງ​ທ່ານ ລຽນ ທິ​ແກ້ວ ລັດຖະມົນຕີ​ກະຊວງ​ກະສິກຳ ແລະ ປ່າໄມ້ ບັນດາ​ຮອງ​ລັດຖະມົນຕີ ແລະ ພາກສ່ວນ​ກ່ຽວຂ້ອງ.

    ທ່ານ ສອນ​ໄຊ ສີ​ພັນ​ດອນ ກ່າວ​ວ່າ: ປັດຈຸບັນ​ຕົວ​ເລກ​ລວມ​ຍອດ​ຜະລິດ​ຕະ​ພັນ​ພາຍ​ໃນ (GDP) ມີ​ການ​ເພີ່ມ​ຂຶ້ນ ແຕ່​ລາຍ​ຮັບ​ຂອງ​ປະຊາຊົນ​ສ່ວນ​ຫຼາຍ​ຍັງ​ຕ່ຳ ໂດຍ​ສະເພາະ​ຢູ່​ເຂດ​ຊົນນະບົດ​ຫ່າງ​ໄກ​ສອກຫຼີກ ຕົວ​ເລກ​ຄວາມທຸກ​ຍາກ​ເຖິງ​ວ່າ​ຫຼຸດ​ລົງ (ເຫຼືອ​ປະມານ 6%) ແຕ່​ການ​ປ່ຽນແປງ​ດ້ານ​ລະດັບ​ຊີວິດ​ການ​ເປັນ​ຢູ່​ຂອງ​ປະຊາຊົນ​ຍັງ​ບໍ່​ທັນ​ໄດ້​ດີ ການ​ຜະລິດ​ກະສິກຳ​ຂອງ​ຊາວ​ກະສິກອນ​ໃນ​ປະເທດ​ເຮົາ ໂດຍ​ລວມ​ຍັງ​ເປັນ​ການ​ຜະລິດ​ຂະໜາດ​ນ້ອຍ ກະ​ແຈກ​ກະຈາຍ ຂຶ້ນ​ກັບ​ທຳ​ມະ​ຊາດ ເປັນ​ການ​ຜະລິດ​ທີ່​ມີ​ຄຸນ​ນະ​ພາບ​ຕ່ຳ ມູນ​ຄ່າ​ເພີ່ມ​ບໍ່​ສູງ ແລະ ທ່າແຮງ​ດ້ານ​ດິນ​ກະສິກຳ​ທີ່​ສາມາດ​ຂະຫຍາຍ​ການ​ຜະລິດ​ພືດ​ຜັກ ອາຫານ​ສົດ ສະອາດ ແລະ ປອດ​ສານພິດ​ທີ່​ເປັນ​ມູນເຊື້ອ​ຂອງ​ປະຊາຊົນ​ສ່ວນ​ໃຫຍ່​ບໍ່​ທັນ​ໄດ້​ຮັບ​ການ​ເອົາໃຈໃສ່ ຫຼື ສົ່ງເສີມ​ດ້ວຍ​ນະໂຍບາຍ ແລະ ໂຄງການ​ພັດທະນາ​ທີ່​ເປັນ​ລະບົບ​ຈະແຈ້ງ ຈຶ່ງ​ເຮັດ​ໃຫ້​ຜູ້​ປະກອບ​ການ​ຂົງເຂດ​ນີ້​ບໍ່​ທັນ​ມີ​ຫຼາຍ ແລະ ຍັງ​ອ່ອນ​ນ້ອຍ ເຮັດ​ໃຫ້​ຂະ​ບວນ​ການ​ຜະລິດ​ສິນຄ້າ​ຍັງ​ບໍ່​ທັນ​ສົມ​ຄູ່​ກັບ​ທ່າແຮງ​ທີ່​ມີ ຈຶ່ງ​ບໍ່​ສາມາດ​ນຳ​ເອົາ​ລາຍ​ຮັບ ແລະ ອາຊີບ​ທີ່​ໝັ້ນຄົງ​ມາສູ່​ຊາວ​ກະສິກອນ ເຮັດ​ໃຫ້ການ​ປະກອບ​ອາຊີບ ການ​ຈັດ​ສັນ​ພູມລຳເນົາ​ບໍ່​ທັນ​ມີ​ຄວາມ​ເປັນ​ລະບຽບ ເຮັດ​ໃຫ້​ປະຊາກອນ​ສ່ວນ​ຫຼາຍ​ຍັງ​ທຸກ​ຍາກ ສະນັ້ນ ຕ້ອງ​ເບິ່ງ​ຢ່າງ​ພາວະ​ວິໄສ ບໍ່​ຄວນ​ແລ່ນນຳ​ແຕ່​ຕົວ​ເລກ ແລະ ຊື່ນ​ຊົມ​ກັບ​ຜົນງານ​ແບບ​ລວມໆ ເວລາ​ຈັດ​ຕັ້ງ​ປະຕິບັດ​ຕົວ​ຈິງ ຕ້ອງ​ໃຫ້​ເບິ່ງ​ສາເຫດ​ຕົວ​ຈິງ​ທີ່​ຕິດ​ພັນ​ກັບ​ຄວາມ​ຮັບຜິດຊອບ​ໃນ​ການ​ປະຕິບັດ​ໜ້າທີ່​ວຽກ​ງານ​ຂອງ​ຕົນ.

    ເພື່ອ​ເຮັດ​ໃຫ້​ວຽກ​ງານ​ຂະແໜງ​ກະສິກຳ ປ່າໄມ້ ແລະ ພັດທະນາ​ຊົນນະບົດ ມີ​ການ​ຫັນປ່ຽນ​ທີ່​ຕັ້ງໜ້າ ແລະ ບັນລຸ​ບັນດາ​ຄາດໝາຍ​ທີ່​ໄດ້​ກຳນົດ​ໄວ້​ໃນ​ທິດ​ທາງ-ແຜນການ​ປີ 2019 ຂໍ​ສະເໜີ​ເອົາໃຈໃສ່​ຕື່ມ​ບາງ​ຈຸດ​ຄື: ດ້ານ​ນະໂຍບາຍ ໃຫ້​ກະຊວງ​ກະສິກຳ ແລະ ປ່າໄມ້ ດຳເນີນ​ການ​ຄົ້ນຄວ້າ ແລະ ປັບປຸງ​ແຜນ​ຍຸດ​ທະ​ສາດ​ພັດທະນາ​ກະສິກຳ ປ່າໄມ້ ແລະ ພັດທະນາ​ຊົນນະບົດ​ຄືນໃໝ່ ສຸມ​ໃສ່​ພັດທະນາ​ຂົງເຂດ​ກະສິກຳ ໃຫ້​ທັນ​ສະໄໝ ໂດຍ​ນຳ​ໃຊ້​ວິທະຍາສາດ ແລະ ເຕັກ​ໂນ​ໂລ​ຊີ​ໃໝ່ ທີ່​ເປັນ​ມິດ​ຕໍ່​ສິ່ງແວດລ້ອມ​ໃນ​ການ​ຜະລິດ ແລະ ໃຫ້​ສອດຄ່ອງ​ກັບ​ສະພາບ​ດິນ​ຟ້າ​ອາກາດ ເນັ້ນ​ໃສ່​ການ​ຜະລິດ​ຕະ​ພັນ​ສົດ ສະອາດ ປອດ​ສານພິດ ເພື່ອ​ສົ່ງ​ອອກ​ຕ່າງປະເທດ ສົ່ງ​ອອກ​ກັບ​ທີ່ ແລະ ບໍລິໂພກ​ພາຍ​ໃນ ຫັນປ່ຽນ​ໂຄງ​ປະກອບ​ກະສິກຳ​ຈາກ​ການ​ຜະລິດ​ກະສິກຳ​ຊະນິດ​ດຽວ ໄປ​ສູ່​ການ​ຜະລິດ​ກະສິກຳ​ຫຼາຍ​ຊະນິດ (ປະສົມ​ປະສານ) ກໍ່ສ້າງ ແລະ ຂະຫຍາຍ​ພື້ນຖານ​ໂຄງ​ລ່າງ​ກະສິກຳ​ຢູ່​ຊົນນະບົດ​ໃຫ້​ມີ​ຄວາມ​ເຂັ້ມແຂງ ຕ້ອງ​ຮັບປະກັນ​ໃຫ້​ປະຊາຊົນ​ບັນດາເຜົ່າ​ຢູ່​ເຂດ​ຫ່າງ​ໄກ​ສອກຫຼີກ ທີ່​ເຮັດ​ວຽກ​ງານ​ກະສິກຳ ສາມາດ​ຮັບປະກັນ​ໃຫ້​ຕົນ​ເອງ​ມີ​ເຂົ້າ​ກິນ ຫຼື ມີ​ສະບຽງ​ອາຫານ​ພຽງພໍ.

 

ຂ່າວທີ່ກ່ຽວຂ້ອງ