ຈະ​ເລີ່ມ​ກໍ່­ສ້າງ​ທາງ​ດ່ວນ ບຶງ​ທາດ­ຫຼວງ-ດົງ​ໝາກ­ຄາຍ ກຳ­ນົດ​ເວ­ລາ 30 ເດືອນ

269 06 ມີ.ນ. 2019 ຂ່າວໜ້າ​ໜຶ່ງ
ຈະ​ເລີ່ມ​ກໍ່­ສ້າງ​ທາງ​ດ່ວນ ບຶງ​ທາດ­ຫຼວງ-ດົງ​ໝາກ­ຄາຍ ກຳ­ນົດ​ເວ­ລາ 30 ເດືອນ

     ໂຄງ­ການ​ກໍ່­ສ້າງ​ທາງ​ດ່ວນ ນະ­ຄອນ­ຫຼວງ​ວຽງ​ຈັນ ໝາຍ​ເລກ 1 ແຕ່​ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ-ດົງໝາກ­ຄາຍ ຈະ​ເລີ່ມ​ຈັດ​ຕັ້ງ​ປະ­ຕິ­ບັດ ໂດຍ​ມີ​ກຳ­ນົດ​ເວ­ລາ​ກໍ່­ສ້າງ 30 ເດືອນ (ປີ 2021) ລວມ​ມູນ​ຄ່າ​ການ​ກໍ່­ສ້າງ 200 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 1.716 ຕື້​ກີບ ໂດຍ​ມີ​ໄລ­ຍະ​ສຳ​ປະ­ທານ 50 ປີ ແລະ ສາ­ມາດ​ຕໍ່​ໄດ້ 20 ປີ.

  ທ່ານ ພຶດ­ສະ­ພາ ພູມ​ມະ​ສັກ ຜູ້­ອຳ­ນວຍ­ການ​ບໍ­ລິ­ສັດ​ທາງ​ດ່ວນ​ນະ­ຄອນ­ຫຼວງ​ວຽງ​ຈັນ ໝາຍ​ເລກ 1 ຈຳ­ກັດ​ຜູ້​ດຽວ ກ່າວ​ໃນ​ພິ­ທີ​ລົງ​ນາມ​ສັນ­ຍາ​ສຳ​ປະ­ທານ​ວ່າ: ໂຄງ­ການ​ກໍ່­ສ້າງ​ທາງ​ດ່ວນ ນະ­ຄອນ­ຫຼວງ​ວຽງ​ຈັນ ໝາຍ​ເລກ 1 ວ່າ: ໂຄງ ການ​ພັດ­ທະ­ນາ​ທາງ​ດ່ວນ​ນີ້​ຈະ​ເປັນ​ໜຶ່ງ​ໃນ​ເຄື່ອງ­ມື​ການ​ລົງ­ທຶນ​ຂອງ​ລັດ ໃນ​ການ​ກະ​ຕຸ້ນ​ເສດ­ຖະ­ກິດ ໂດຍ​ສະ­ເພາະ​ພາກ​ເອ­ກະ​ຊົນ​ໃຫ້​ມີ​ສ່ວນ​ຮ່ວມ​ໃນ​ຮູບ​ແບບ BOT ໂຄງ­ການ​ນີ້​ຖ້າ​ສຳ­ເລັດ​ແມ່ນ​ຈະ​ຊ່ວຍ​ແກ້​ໄຂ​ການ​ຈະ­ລາ­ຈອນ​ຢູ່​ຖະ­ໜົນ​ໄກ­ສອນ ພົມ­ວິ­ຫານ ຖະ­ໜົນ​ກຳ­ແພງ​ເມືອງ​ໄດ້​ຫຼາຍ​ກວ່າ 40% ເຊິ່ງ​ເປັນ​ຖະ­ໜົນ​ສາຍ​ຫຼັກ​ຂອງ​ນະ­ຄອນ­ຫຼວງ​ວຽງ​ຈັນ ພ້ອມ​ນີ້ ກໍ​ຍັງ​ສາ­ມາດ​ສ້າງ​ວຽກ​ເຮັດ​ງານ​ທຳ​ໃຫ້​ຄົນ​ລາວ​ເປັນ​ຈຳ­ນວນ​ຫຼວງ­ຫຼາຍ.

  ໂຄງ­ການ​ດັ່ງ­ກ່າວ ແມ່ນ​ນຳ​ໃຊ້​ມາດ­ຕະ­ຖານ​ອາ​ຊຽນ ປະ­ເພດ 1 ເຊິ່ງ​ມີ​ລາຍ​ລະ­ອຽດ​ດັ່ງ­ນີ້: ມີ​ຄວາມ​ຍາວ 15,30 ກິ­ໂລ­ແມັດ (ແຕ່​ບຶງ​ທາດ­ຫຼວງ​ຫາ​ດົງ​ໝາກ­ຄາຍ) ມີ​ຂົວ​ລອຍ 3,95 ກິ­ໂລ­ແມັດ ທາງ​ດິນ 11,35 ກິ­ໂລ­ແມັດ ກວ້າງ 45 ແມັດ (ຈຸດ​ກວ້າງ​ສຸດ ແມ່ນ​ບ່ອນ​ຕັ້ງ​ສະ­ຖາ­ນີ​ເກັບ​ເງິນ ກວ້າງ 100 ແມັດ) ສະ­ເພາະ​ໜ້າ​ທາງ​ກວ້າງ 23 ແມັດ ແລະ ເຂດ​ສະ­ຫງວນ 2 ເບື້ອງ ມີ​ພື້ນ​ຜິວ​ຈາ­ລະ​ຈອນ ທັງ​ໝົດ 4 ເລນ ກວ້າງ​ເລນ​ລະ 35 ແມັດ ລວມ 14 ແມັດ ມີ​ບ່າ​ທາງ 2 ເບື້ອງ ເບື້ອງ​ລະ 3 ແມັດ ລວມ 6 ແມັດ ມີ​ຂອບ​ເຂດ​ດອນ​ກາງ​ທາງ​ກວ້າງ 3 ແມັດ ມີ​ໄຟ​ເຍືອງ​ທາງ ແລະ ປ້າຍ​ຈະ­ລາ­ຈອນ​ຕ່າງໆ.

  ສ່ວນ​ດ່ານ​ເກັບ​ເງິນ 2 ດ່ານ ຄື: ຈຸດ​ເກັບ​ທີ 1: ບໍ­ລິ­ເວນ​ທາງ​ເຂົ້າ-ອອກ ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ ຈຸດ​ເກັບ​ເງິນ​ທີ 2: ແມ່ນ​ຢູ່​ບໍ­ລິ­ເວນ​ບ້ານ​ຮ່ອງ​ສຸ­ພາບ ກ່ອນ​ເຖິງ​ຖະ­ໜົນ 450 ປີ ແລະ ສະ­ຖາ­ນີ​ລົດ­ໄຟ ມີ​ທາງ​ຂຶ້ນ-ລົງ 8 ຈຸດ​ຄື: 1. ເຂດ​ເສດ­ຖະ­ກິດ​ພິ­ເສດ​ບຶງ​ທາດ­ຫຼວງ (ຈຸດ​ເລີ່ມ​ຕົ້ນ) 2. ບໍ­ລິ­ເວນ​ຕະ­ຫຼາດ​ຫົວ​ຂົວ 3. ບໍ­ລິ­ເວນ​ເມືອງ​ດອກ​ຈຳ­ປາ (ບ້ານ​ໂພນ​ພະ​ເນົາ ອອກ​ສູ່​ຖະ­ໜົນ​ໄກ­ສອນ ພົມ­ວິ­ຫານ) 4. ບໍ­ລິ­ເວນ​ຕະ­ຫຼາດ​ອານ​ຈີ (ບ້ານ​ໜອງ​ໜ່ຽງ) 5. ບໍ­ລິ­ເວນ​ຖະ­ໜົນ 450 ປີ (ບ້ານ​ໂຊກ​ໃຫຍ່ ແລະ ນາ​ແຄ) 6. ບໍ­ລິ­ເວນ​ບ້ານ​ໄຊ (ເຊື່ອມ​ຕໍ່​ເຂົ້າ​ຫາ​ສະ­ຖາ­ນີ​ລົດ­ໄຟ​ຄວາມ​ໄວ​ສູງ) 7. ຖະ­ໜົນ 13 ໃຕ້ (ບ້ານ​ໄຊ​ສະ­ຫວ່າງ) ແລະ 8. ບໍ­ລິ­ເວນ​ດົງ​ໝາກ­ຄາຍ (ຈຸດ​ສິ້ນ​ສຸດ).

  ສຳ­ລັບ​ຜູ້​ໄດ້​ຮັບ​ຜົນ​ກະ­ທົບ​ຈາກ​ການ​ກໍ່­ສ້າງ​ໂຄງ­ການ​ທາງ​ດ່ວນ​ວຽງ​ຈັນ​ມີ​ທັງ​ໝົດ 689 ຕອນ​ດິນ (ເມືອງ​ໄຊ​ເຊດ​ຖາ 510 ຕອນ+ໄຊ​ທາ­ນີ 179 ຕອນ) ແລະ ເຮືອນ 159 ຫຼັງ (ເມືອງ​ໄຊ​ເຊດ​ຖາ 115 ຫຼັງ + ໄຊ​ທາ­ນີ 44 ຫຼັງ) ຊຶ່ງ​ມີ​ທັງ​ໃນ​ເຂດ​ສະ­ຫງວນ​ຂອງ​ລັດ ແລະ ເປັນ​ສິດ​ນຳ​ໃຊ້​ບຸກ­ຄົນ ມີ​ມູນ​ຄ່າ​ການ​ຊົດ​ເຊີຍ​ທັງ​ໝົດ 452 ຕື້​ກວ່າ​ກີບ (ເມືອງ​ໄຊ​ເຊດ​ຖາ 350 ຕື້​ກວ່າ​ກີບ+ເມືອງ​ໄຊ​ທາ­ນີ 102 ຕື້​ກວ່າ​ກີບ) ພາຍ­ຫຼັງ​ເຊັນ​ສັນ­ຍາ​ຄັ້ງ​ນີ້ ບໍ­ລິ­ສັດ​ຈະ​ຮ່ວມ​ກັບ​ຄະ­ນະ​ຮັບ­ຜິດ­ຊອບ​ໄກ່​ເກ່ຍ ສ້າງ­ຕັ້ງ​ສູນ​ເພື່ອ​ໃຫ້​ປະ­ຊາ­ຊົນ ເຂົ້າ​ມາ​ພົວ­ພັນ​ເອົາ​ຄ່າ​ຊົດ​ເຊີຍ ໂດຍ​ຈະ​ຊຳ­ລະ​ເຂົ້າ​ບັນ­ຊີ​ໂດຍ​ກົງ​ຂອງ​ເຈົ້າ​ຂອງ​ດິນ ແລະ ຄາດ​ວ່າ​ຈະ​ໃຫ້​ສຳ­ເລັດ​ການ​ໄກ່​ເກ່ຍ ແລະ ເວນ​ຄືນ ພາຍ​ໃນ​ກຳ­ນົດ​ເວ­ລາ 120 ວັນ.

  ພິ­ທີ​ລົງ​ນາມ​ຄັ້ງ​ນີ້​ມີ​ຂຶ້ນ​ລະ­ຫວ່າງ ທ່ານ ພູ​ໂຂງ ບັນ­ນະ​ວົງ ພະ​ແນກ​ແຜນ­ການ-ການ​ລົງ­ທຶນ ນະ­ຄອນ­ຫຼວງ​ວຽງ​ຈັນ ແລະ ທ່ານ ພຶດ­ສະ­ພາ ພູມ​ມະ​ສັກ ເປັນ​ກຽດ​ເຂົ້າ​ຮ່ວມ​ໃນ​ພິ­ທີ​ຄັ້ງ​ນີ້​ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ມີ​ບັນ­ດາ​ທ່ານ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ກະ­ຊວງ​ກ່ຽວ­ຂ້ອງ ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ພ້ອມ​ບັນ­ດາ​ຂະ­ແໜງ­ການ ແລະ ພາກ­ສ່ວນ​ກ່ຽວ­ຂ້ອງ.

ຂ່າວທີ່ກ່ຽວຂ້ອງ