ປະຊາຊົນ​ເມືອງ​ນາ​ຊາຍ​ທອງ ສະເໜີ​ຂັ້ນ​ເທິງ​ຊ່ວຍ​ແກ້​ໄຂ​ຜົນ​ກະທົບ​ຈາກ​ໂຄງການ​ຕ່າງໆ

280 06 ມ.ນ. 2019 ຂ່າວໜ້າ​ໜຶ່ງ
ປະຊາຊົນ​ເມືອງ​ນາ​ຊາຍ​ທອງ ສະເໜີ​ຂັ້ນ​ເທິງ​ຊ່ວຍ​ແກ້​ໄຂ​ຜົນ​ກະທົບ​ຈາກ​ໂຄງການ​ຕ່າງໆ

     ສະມາຊິກ​ສະພາ​ແຫ່ງ​ຊາດ (​ສສຊ) ແລະ ສະມາຊິກ​ສະພາ​ປະຊາຊົນ ນະຄອນຫຼວງ​ວຽງ​ຈັນ (​ສສ ນວ) ລົງ​ພົບ​ປະ ແລະ ເຜີຍແຜ່​ຜົນສຳເລັດ​ກອງ​ປະຊຸມ​ສະໄໝ​ສາມັນ ເທື່ອ​ທີ 6 ຊຸດ​ທີ VIII ແລະ ກອງ​ປະຊຸມ​ສະພາ​ປະຊາຊົນ ນະຄອນຫຼວງ​ວຽງ​ຈັນ (​ສປ ນວ) ເທື່ອ​ທີ 6 ຊຸດ​ທີ I ວັນ​ທີ 4 ມີນາ 2019 ຢູ່​ເມືອງ​ນາ​ຊາຍ​ທອງ ນຳ​ໂດຍ​ທ່ານ ອານຸພາບ ຕຸ​ນາ​ລົມ ປະທານ ​ສປ ນວ ມີ​ທ່ານ ວິລະ​ສັກ ນາມ​ມຸນຕີ ເຈົ້າເມືອງ​ນາ​ຊາຍ​ທອງ ພ້ອມ​ດ້ວຍ​ຫ້ອງການ ແລະ ພະນັກງານ​ຫຼັກ​ແຫຼ່ງ​ເຂົ້າ​ຮ່ວມ.

    ​ສສຊ ແລະ ​ສສ ນວ ໄດ້​ຜັດປ່ຽນ​ກັນ​ຂຶ້ນ​ລາຍ​ງານ​ຜົນສຳເລັດ​ຂອງ​ສອງ​ກອງ​ປະຊຸມ​ດັ່ງກ່າວ ຈາກ​ນັ້ນ ກໍ​ໄດ້​ເປີດ​ໂອກາດ​ໃຫ້​ປະຊາຊົນ​ສະແດງ​ຄວາມ​ຄິດ​ເຫັນ​ຕໍ່​ບັນຫາ​ຕ່າງໆ​ທີ່​ໃຫ້​ພາກສ່ວນ​ກ່ຽວຂ້ອງ​ຊ່ວຍ​ຊີ້​ແຈງ ແລະ ແກ້​ໄຂ ໃນ​ນີ້ ປະຊາຊົນ​ເມືອງ​ນາ​ຊາຍ​ທອງ​ໃຫ້​ຄວາມ​ສົນໃຈ ແລະ ສະເໜີ​ຫຼາຍ​ກວ່າ​ໝູ່​ແມ່ນ​ຢາກ​ໃຫ້​ຂັ້ນ​ເທິງ​ຊ່ວຍ​ແກ້​ໄຂ​ຫຼາຍ​ບັນຫາ​ເຊັ່ນ: ການ​ຈ່າຍ​ຄ່າ​ຊົດ​ເຊີຍ​ທີ່​ດິນ​ທີ່​ໄດ້​ຮັບ​ຜົນ​ກະທົບ​ຈາກ​ການ​ກໍ່ສ້າງ​ເສັ້ນທາງ​ລົດໄຟ ລາວ-ຈີນ ເສັ້ນທາງ​ດ່ວນ ການ​ຂະຫຍາຍ​ເສັ້ນທາງ​ແຕ່​ສີ​ເກີດ-ສົງ​ເປືອຍ ມີ​ຄວາມ​ຊັກ​ຊ້າ ການ​ຝາກ​ເງິນ​ຢູ່​ສະ​ຖາ​ບັນ​ການ​ເງິນ​ຈຸ​ລະ​ພາກ​ຢູ່​ບ້ານ​ສົງ​ເປືອຍ​ໃຕ້ ການ​ແກ້​ໄຂ​ເຂດ​ທຳ​ມາ​ຫາ​ກິນ​ຂອງ​ປະຊາຊົນ​ທີ່​ນັກ​ລົງທຶນ​ມາ​ຊື້​ດິນ ແລ້ວ​ບໍ່​ໃຫ້​ປະຊາຊົນ​ເຂົ້າ​ໄປ​ໃນ​ເຂດ​ທີ່​ເຄີຍ​ທຳ​ມາ​ຫາ​ກິນ ຖົມ​ດິນ​ຕັນ​ຄອງ​ນ້ຳ​ເຮັດ​ໃຫ້​ນ້ຳ​ຖ້ວນ ບໍ່​ສາມາດ​ເຮັດ​ນາ​ໄດ້ ການ​ຂຶ້ນ​ສຳມະໂນ​ຄົວ​ຢູ່​ບາງ​ບ້ານ​ຍັງ​ພົບ​ບັນຫາ​ຫຍຸ້ງຍາກ ແລະ ການ​ແກ້​ໄຂ​ຮ້ານ​ບັນ​ເທິງ​ທີ່​ເປີດ​ສຽງ​ດັງ ປິດ​ກາຍ​ເວລາ ແລະ ປາກົດການ​ຫຍໍ້ທໍ້​ອື່ນໆ.

    ໂອກາດ​ນີ້ ທ່ານ ອານຸພາບ ຕຸ​ນາ​ລົມ ໄດ້​ສະເໜີ​ໃຫ້​ທຸກ​ອົງການ​ຢູ່​ເມືອງ​ນາ​ຊາຍ​ທອງ​ທີ່​ຈະ​ພັດ​ທະນາ​ວຽກ​ງານ​ຕ່າງໆ ຕ້ອງ​ໄດ້​ມີ​ການ​ສຶກ​ສາ​ຄົ້ນຄວ້າ​ເຖິງ​ຜົນ​ກະທົບ​ທີ່​ຈະ​ເກີດ​ຕໍ່​ປະຊາຊົນ ສັງຄົມ ແລະ ສິ່ງແວດລ້ອມ ຖ້າ​ອຳນາດ​ການ​ປົກຄອງ​ຂັ້ນ​ບ້ານ ເມືອງ ບໍ່​ສາມາດ​ແກ້​ໄຂ​ບັນຫາ​ໄດ້ ຕ້ອງ​ສະເໜີ​ໃຫ້ ນວ ຄົ້ນຄວ້າ​ແກ້​ໄຂ​ຊ່ວຍ.

 

ຂ່າວທີ່ກ່ຽວຂ້ອງ