ຂ່າວຫຼ້າສຸດ

ຍີ່ປຸ່ນ ໃຫ້​ທຶນ​ຊ່ວຍເຫຼືອ​ໂຄງການ​ເຝີກ​ອົບ​ຮົບ​ວິຊາ​ຊີບ

377 06 ມ.ນ. 2019 ຂ່າວໜ້າ​ໜຶ່ງ
ຍີ່ປຸ່ນ ໃຫ້​ທຶນ​ຊ່ວຍເຫຼືອ​ໂຄງການ​ເຝີກ​ອົບ​ຮົບ​ວິຊາ​ຊີບ

    ລັດຖະບານ​ຢີ່​ປຸ່ນ ໃຫ້ການ​ຊ່ວຍເຫຼືອ​ລ້າ​ຜ່ານ​ອົງການ IV-Japan (ອົງ​ການຈັດຕັ້ງ​ທີ່​ບໍ່​ສັງກັດ​ລັດຖະບານ​ຢີ່​ປຸ່ນ) ມູນ​ຄ່າ 271.093 ໂດ​ລາ​ສະຫະລັດ ຫຼື ປະມານ 2,32 ຕື້​ກີບ ເພື່ອ​ສະໜັບສະໜູນ​ໂຄງການ​ເຝິກອົບຮົມ​ວິຊາ​ຊີບ​ຢູ່​ນະຄອນຫຼວງ​ວຽງ​ຈັນ ໂດຍ​ສະເພາະ​ສາຂາ​ວິຊາ​ການ​ໂຮງແຮມ ແລະ  ການ​ດູ​ແລ​ເບິ່ງແຍງ​ຜູ້​ອາຍຸ​ສູງ​ໃຫ້​ຊາວ​ໜຸ່ມ ແມ່ຍິງ ແລະ ຜູ້​ດ້ອຍ​ໂອກາດ ໃຫ້​ມີ​ເງື່ອນໄຂ​ຊີວິດ​ການ​ເປັນ​ຢູ່​ດີ​ຂຶ້ນ.

    ພິທີ​ລົງ​ນາມ​ສັນຍາ​ດັ່ງກ່າວ ຈັດ​ຂຶ້ນ​ວັນ​ທີ 1 ມີນາ 2019 ຢູ່​ສະຖານທູດ​ຍີ່ປຸ່ນ ປະຈຳ​ລາວ ລະຫວ່າງ​ທ່ານ ທາ​ເຄ​ຊິ ຮິ​ຄິ​ຮາ​ຣະ ເອກ​ອັກ​ຄະ​ຣາ​ຊະ​ທູດ​ຢີ່​ປຸ່ນ ປະຈຳ ລາວ ແລະ ທ່ານ​ນາງ ຊາ​ຈິ​ໂກະ ໂຕ​ມິ​ນາ​ກະ ຜູ້ຕາງໜ້າ​ອົງການ IV-Japan ໂດຍ​ມີ​ທ່ານ ຄຳ​ຜາຍ ສີ​ສະຫວັນ ຮອງ​ລັດຖະມົນຕີ​ກະຊວງ​ສຶກ​ສາ​ທິ​ການ ແລະ ກີລາ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

  ການ​ຊ່ວຍເຫຼືອ​ຄັ້ງ​ນີ້ ເປັນ​ການ​ສະໜັບສະໜູນ​ດ້ານ​ການ​ເງິນ​ໃຫ້​ກິດຈະກຳ​ໃນ​ປີ​ທຳ​ອິດ​ຂອງ​ໂຄງການ ເຊິ່ງ​ໄລຍະ 3 ປີ ໂດຍ​ມີ​ເປົ້າ​ໝາຍ​ຊ່ວຍເຫຼືອ​ແມ່ຍິງ ແລະ ຊາວ​ໜຸ່ມ​ທີ່​ດຳລົງ​ຊີວິດ​ໃນ​ເຂດ​ຊົນນະບົດ ແລະ ເຂດ​ພູ​ດອຍ ຮຽນ​ຮູ້​ເອົາ​ທັກ​ສະ​ວິຊາ​ການ​ໂຮງແຮມ ເພື່ອ​ຊ່ວຍເຫຼືອ​ການ​ພົວພັນ​ພາຍ​ໃນ ແລະ ເຮັດ​ວຽກ​ຢູ່​ໂຮງແຮມ ແລະ ຮ້ານ​ອາຫານ ເພື່ອ​ສົ່ງຕໍ່​ຄວາມ​ຮູ້​ຄວາມ​ສາມາດ​ດ້ານ​ການ​ດູ​ແລ​ເບິ່ງແຍງ​ຜູ້​ສູງ​ອາຍຸ ແລະ ແນໃສ່​ເຮັດ​ໃຫ້​ຜູ້ກ່ຽວ​ມີ​ວຽກ​ເຮັດ​ງານ​ທຳ​ໃນ​ອະນາຄົດ.

  ອົງການ IV-Japan ໄດ້​ເຄື່ອນ​ໄຫວ​ກິດຈະກຳ​ຢ່າງ​ຫ້າວຫັນ​ໃນ​ລາວ​ແຕ່​ປີ 1994 ເປັນຕົ້ນ​ໄດ້​ຊຸກຍູ້-ສົ່ງເສີມ​ດ້ານ​ຂະແໜງການ​ປູກຝັງ ແລະ ພັດທະນາ​ຊັບພະຍາກອນ​ມະນຸດ​ເຊັ່ນ: ການ​ສ້າງ​ໂຮງຮຽນ​ປະຖົມ 21 ແຫ່ງ ແລະ ສູນ​ເຝິກອົບຮົມ 8 ແຫ່ງ ໃຫ້ການ​ເຝີກ​ອົບຮົມ​ການ​ຕັດຫຍິບ​ຊຸດ ປຸງ​ແຕ່ງອາຫານ ຕົບແຕ່ງ​ຜົມ ແລະ ວິຊາ​ການ​ຊ່າງ​ໄມ້ ເພື່ອ​ເຮັດ​ໃຫ້​ແມ່ຍິງ ແລະ ໄວ​ໜຸ່ມ​ສາມາດ​ກຸ້ມ​ຕົນ​ເອງ​ດ້ານ​ຈິດໃຈ ແລະ ເສດຖະກິດ.

ຂ່າວທີ່ກ່ຽວຂ້ອງ