ຂ່າວຫຼ້າສຸດ

ພິ​ພິ​ທະ​ພັນ​ວຽງ​ຈັນ​ສິລະ​ປະ​ຮ່ວມ​ສະໄໝ ຈະ​ໃຫ້​ບໍລິການ​ເດືອນ​ພຶດສະພາ​ນີ້

287 06 ມີ.ນ. 2019 ຂ່າວໜ້າ​ໜຶ່ງ
ພິ​ພິ​ທະ​ພັນ​ວຽງ​ຈັນ​ສິລະ​ປະ​ຮ່ວມ​ສະໄໝ ຈະ​ໃຫ້​ບໍລິການ​ເດືອນ​ພຶດສະພາ​ນີ້

   ພາຍຫຼັງ​ຈັດ​ພິທີ​ເປີດ​ເປັນ​ທາງ​ການ ໃນ​ວັນ​ທີ 20 ກຸມພາ 2019 ຜ່ານ​ມາ ພິ​ພິ​ທະ​ພັນ​ວຽງ​ຈັນ​ສິລະ​ປະ​ຮ່ວມ​ສະໄໝ ຫຼື Vientiane Museum of Contemporary Art ຍັງ​ໄດ້​ເລັ່ງ​ພັດທະນາ​ໃຫ້​ສຳເລັດ ແລະ ສາມາດ​ໃຫ້​ບໍລິການ​ໄດ້​ຢ່າງ​ເປັນ​ປົກກະຕິ ແນໃສ່​ປະກອບສ່ວນ​ໃນ​ການ​ສົ່ງເສີມ​ປີ​ທ່ອງ​ທ່ຽວ​ລາວ-ຈີນ ປີ 2019.

    ທ່ານ ພິສິດ ໄຊ​ຍະ​ທິດ ປະທານ​ພິ​ພິ​ທະ​ພັນ​ວຽງ​ຈັນ​ສິລະ​ປະ​ຮ່ວມ​ສະໄໝ ໃຫ້​ສຳພາດ​ໃນ​ອາທິດ​ຜ່ານ​ມາ​ວ່າ: ພາຍຫຼັງ​ທີ່​ໄດ້​ຈັດ​ພິທີ​ເປີດ​ເປັນ​ທາງ​ການ ທາງ​ພິ​ທິ​ທະ​ພັນ​ຂອງ​ພວກ​ເຮົາ ກໍ​ໄດ້​ເປີດ​ໃຫ້​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງປະເທດ​ເຂົ້າ​ມາ​ທ່ຽວ​ຊົມ​ໂດຍ​ບໍ່​ໄດ້​ເສຍ​ຄ່າ​ຜ່ານ​ປະຕູ ເຊິ່ງ​ເຫັນ​ໄດ້​ວ່າ ພາຍຫຼັງ​ທີ່​ເປີດ​ບໍ່​ທັນ​ເຖິງ​ເດືອນ​ກໍ​ມີ​ນັກ​ທ່ອງ​ທ່ຽວ​ເຂົ້າ​ມາ​ຊົມ​ຫຼາຍ​ຮ້ອຍ​ຄົນ ໂດຍ​ສະເພາະ​ກຸ່ມ​ນັກ​ທ່ອງ​ທ່ຽວ​ຈີນ ເຊິ່ງ​ນັບ​ແຕ່​ໄລຍະ​ເປີດ​ໃຫ້​ເຂົ້າ​ທ່ຽວ​ຊົມ​ແຕ່​ເດືອນ​ມັງກອນ​ເປັນຕົ້ນ​ມາ ມີ​ນັກ​ທ່ອງ​ທ່ຽວ​ຈີນ​ເຂົ້າ​ມາ​ທ່ຽວ​ຊົມ​ຫຼາຍ​ກວ່າ 7 ພັນ​ຄົນ ເຊິ່ງ​ໃນ​ໄລຍະ​ນີ້ ການ​ເຂົ້າ​ທ່ຽວ​ຊົມ​ຍັງ​ບໍ່​ເສຍ​ຄ່າ​ຜ່ານ​ປະຕູ.

    ປັດຈຸບັນ ການ​ພັດທະນາ​ພິ​ພິ​ທະ​ພັນ​ແຫ່ງ​ດັ່ງກ່າວ ແມ່ນ​ສຳເລັດ 70% ແລະ ຈະ​ສືບຕໍ່​ພັດທະນາ​ໃຫ້​ສຳເລັດ​ໃນ​ເດືອນ ພຶດສະພາ 2019 ເພື່ອ​ໃຫ້​ບໍລິການ​ເປັນ​ທາງ​ການ ເຊິ່ງ​ການ​ບໍລິການ​ແມ່ນ​ຈະ​ເກັບ​ຄ່າ​ຜ່ານ​ປະຕູ ສຳລັບ​ຄົນ​ລາວ​ແມ່ນ 40 ພັນ​ກີບ ສ່ວນ​ຄົນ​ຕ່າງປະເທດ​ແມ່ນ 10 ໂດ​ລາ​ສະຫະລັດ ຫຼື ປະມານ 85 ພັນ​ກີບ ຢ່າງໃດ​ກໍ​ຕາມ ອາດ​ຈະ​ມີ​ການ​ພັດທະນາ​ເປັນ​ພິ​ພິ​ທະ​ພັນ​ຂະໜາດ​ໃຫຍ່​ກວ່າ​ນີ້ ແຕ່​ກໍ​ຕ້ອງ​ໄດ້​ລໍຖ້າ​ເບິ່ງ​ຈຳນວນ​ນັກ​ທ່ອງ​ທ່ຽວ​ທີ່​ຈະ​ເຂົ້າ​ມາ​ທ່ຽວ​ຊົມ​ຕົວ​ຈິງ.

    ສຳລັບ​ພິ​ພິ​ທະ​ພັນ​ວຽງ​ຈັນ​ສິລະ​ປະ​ຮ່ວມ​ສະໄໝ ຫຼື Vientiane Museum of Contemporary Art ສະຖານທີ່ ແມ່ນ​ຕັ້ງ​ຢູ່: ຖະໜົນ​ໄກສອນ ພົມວິຫານ ບ້ານ​ຊ້າງ​ຄູ້ ເມືອງ​ໄຊ​ທານີ ນະຄອນຫຼວງ​ວຽງ​ຈັນ (ຢູ່​ແຄມ​ທາງ​ໃຫຍ່ ໃກ້​ກັບ​ສູນ​ໂຄ​ລາວ ຫຼື ຄິວ​ລົດເມ​ສາຍ​ໃຕ້​ເກົ່າ ໃກ້​ກັບ 4 ແຍກ​ໄຟ​ແດງ​ດົງ​ໂດກ-ທາງ 450 ປີ) ພິ​ພິ​ທະ​ພັນ​ແຫ່ງ​ນີ້ ແມ່ນ​ໄດ້​ນຳ​ເອົາ​ເສດ​ໄມ້ ຊາກ​ຕໍ​ໄມ້ ຮາກ​ເຫງົ້າ​ຂອງ​ຕົ້ນໄມ້​ໃຫຍ່ ທີ່​ບໍ່​ທັນ​ມີ​ມູນ​ຄ່າ ນຳ​ມາ​ຂວັດ​ແກະ​ສະ​ລັກ ແລະ ປຸງ​ແຕ່ງ​ຄືນໃໝ່ ໃຫ້​ມີ​ຮູບຊົງ ມີ​ລວດລາຍ ແລະ ສີສັນ ທີ່​ງົດ​ງາມ ຕາມ​ແນວ​ຄິດ-ຈິນຕະນາການ​ຂອງ​ຊ່າງ​ແກະ​ສະ​ລັກ ແລະ ຜູ້​ຂວັດ​ລາຍ ແຕ່​ກໍ​ຄົງ​ໄວ້​ມູນ​ເຄົ້າ​ເດີມ​ຂອງ​ຮາກ​ໄມ້​ແຕ່​ລະ​ຊະນິດ​ທີ່​ນຳ​ມາ​ປະດິດ.

     ນອກ​ນີ້ ກໍ​ຍັງ​ມີ​ຮູບ​ພາບ​ປະຫວັດສາດ ວິຖີ​ການ​ດຳລົງ​ຊີວິດ ແລະ ລວດລາຍ​ອື່ນໆ ທີ່​ນາຍ​ຊ່າງ ນັກ​ຈິດຕະກອນ​ໄດ້​ບັນຈົງ​ວາດ​ແຕ້ມ​ລວດລາຍ​ລົງ​ແຜນ​ໄມ້​ຂະໜາດ​ໃຫຍ່ ເພື່ອ​ຊົງ​ຈຳ​ໄວ້​ໃຫ້​ເປັນ​ງານ​ສິລະ​ປະ​ເທິງ​ແຜນ​ໄມ້ ເກີດ​ເປັນ​ມູນ​ຄ່າ​ມະຫາສານ ແລະ ເປັນ​ເອກະລັກ​ສະເພາະ​ຂອງ​ລາວ ເອີ້ນ​ໄດ້​ວ່າ​ພິ​ພິ​ທະ​ພັນ​ແຫ່ງ​ນີ້ ໄດ້​ທ້ອນໂຮມ​ເອົາ​ງານ​ສິລະ​ປະການ ຂວັດ​ລາຍ ການ​ແກະ​ສະ​ລັກ​ໄມ້ ເຊີ່ງ​ເກີດ​ຈາກ​ຫົວຄິດ​ປະດິດ​ສ້າງ​ຂອງ​ປະທານ​ພິ​ພິ​ທະ​ພັນ​ວຽງ​ຈັນ​ສິລະ​ປະ​ຮ່ວມ​ສະໄໝ ທີ່​ໄດ້​ສະ​ສົມ​ເອົາ​ຮາກ​ໄມ້​ທີ່​ບໍ່​ໄດ້​ໃຊ້​ແລ້ວ ມາ​ສ້າງ​ເປັນ​ງານ​ສິລະ​ປະ​ທີ່​ລ້ຳ​ຄ່າ ແລະ ມາ​ຮວບ​ຮວມ​ໄວ້​ທີ່​ພິ​ພິ​ທະ​ພັນ​ແຫ່ງ​ນີ້ ມີ​ຫຼາຍ​ພັນ​ກວ່າ​ຜົນງານ ຮັບຮອງ​ວ່າ​ບໍ່​ເຄີຍ​ເຫັນ​ຢູ່​ແຫ່ງ​ໃດ​ມາ​ກ່ອນ.

ຂ່າວທີ່ກ່ຽວຂ້ອງ