ລາວ-ຝຣັ່ງ ຮ່ວມ​ກັນ​ສົ່ງເສີມ​ການ​ຜະລິດ​ໃບຊາ​ເພື່ອ​ເປັນ​ສິນຄ້າ

269 07 ມ.ນ. 2019 ຂ່າວໜ້າ​ໜຶ່ງ
ລາວ-ຝຣັ່ງ ຮ່ວມ​ກັນ​ສົ່ງເສີມ​ການ​ຜະລິດ​ໃບຊາ​ເພື່ອ​ເປັນ​ສິນຄ້າ

    ລັດຖະບານ​ລາວ ແລະ ອົງການ​ຝຣັ່ງ​ເພື່ອ​ການ​ພັດທະນາ ໂດຍ​ໄດ້​ຮັບ​ການ​ສະໜັບສະໜູນ​ຈາກ​ລັດຖະບານ​ຝຣັ່ງ ໄດ້​ຮ່ວມ​ກັນ​ຊຸກຍູ້​ສົ່ງເສີມ​ຈັດ​ຕັ້ງ​ປະຕິບັດ​ໂຄງການ​ຂະແໜງ​ກະສິກຳ​ໃບຊາ ​ເພື່ອ​ເປັນ​ສິນຄ້າ​ຢູ່​ລາວ ເປັນ​ໄລຍະ​ເວລາ 4 ປີ (2018-2022) ໃນ​ມູນ​ຄ່າ 1,5 ລ້ານ​ເອີ​ໂຣ ຫຼື ປະມານ  14,55 ຕື້​ກີບ ໃນ​ນັ້ນ ກິດຈະກຳ​ຫຼັກ​ແມ່ນ​ເສີມ​ສ້າງ​ລະບົບ​ຕ່ອງ​ໂສ້​ການ​ສະໜອງ​ສິນຄ້າ​ກະສິກຳ​ໃນ​ລະດັບ​ຊາດ ແລະ ສະໜັບສະໜູນ​ການ​ທົດ​ລອງ​ໃນ 2 ເຂດ​ບຸລິມະສິດ​ຂອງ​ໂຄງການ​ຄື: ເຂດ​ພື້ນ​ທີ່​ເປົ້າ​ໝາຍ ເມືອງ​ເມິງ ແຂວງ​ບໍ່​ແກ້ວ ແລະ ເມືອງ​ໄຊ​ສະຖານ ແຂວງ​ໄຊ​ຍະ​ບູ​ລີ ທັງ​ນີ້ ກໍ​ເພື່ອ​ແນໃສ່​ເຮັດ​ໃຫ້​ປະຊາຊົນ​ຜູ້​ປະກອບ​ອາຊີບ​ດ້ານ​ການ​ປູກ​ໃບຊາ​ເປັນ​ສິນຄ້າ​ໃນ​ຂອບ​ເຂດ​ສອງ​ແຂວງ​ທົດ​ລອງ ຈຳນວນ 633 ຄອບຄົວ ມີ​ລາຍ​ໄດ້​ຈາກ​ການ​ປູກ​ໃບຊາ​ເພີ່ມ​ຂຶ້ນ  ທັງ​ເປັນ​ການ​ຕອບ​ສະໜອງ​ໂດຍ​ກົງ​ໃຫ້​ແກ່​ການ​ສົ່ງເສີມ ແລະ ພັດທະນາ​ທະ​ນາ​ຂະແໜງ​ກະສິກຳ​ໃຫ້​ເປັນ​ສິນຄ້າ​ເສດຖະກິດ​ຂອງ​ລາວ ລວມ​ທັງ​ການ​ອຳນວຍ​ຄວາມ​ສະດວກ ແລະ ຄວາມ​ຄ່ອງ​ຕົວ​ໃນ​ການ​ຈໍ​ລະ​ຈອນ​ສິນຄ້າ​ກະສິກຳ​ໃຫ້​ສາມາດ​ເຂົ້າ​ເຖິງ​ແຫຼ່ງ​ຈຳໜ່າຍ​ຂອງ​ຕະຫຼາດ​ພາຍ​ໃນ ແລະ ຕ່າງປະເທດ ເພື່ອ​ສ້າງ​ລາຍ​ຮັບ​ຢ່າງ​ຕໍ່​ເນື່ອງ ແລະ ຍືນ​ຍົງ ສ້າງ​ຄວາມ​ສາມາດ​ໃຫ້​ແກ່​ພາກ​ລັດ ໂດຍ​ສະເພາະ​ຂະແໜງ​ກະສິກຳ ແລະ ຂະແໜງການ​ຄ້າ ພ້ອມ​ທັງ​ພາກສ່ວນ​ຜູ້​ປະກອບ​ການ​ທຸລະ​ກິດ​ດ້ານ​ໃບຊາ​ໃຫ້​ເຂັ້ມແຂງ ແລະ ສາມາດ​ຊຸກຍູ້​ຂະ​ບວນ​ການ​ຜະລິດ ແລະ ຈຳໜ່າຍ​ຜະລິດ​ຕະ​ພັນ​ໃບຊາ​ສົ່ງ​ອອກ​ໄປ​ຕ່າງປະເທດ​ນັບ​ມື້​ຫຼາຍ​ຂຶ້ນ.

  ພິທີ​ເຊັນ​ສັນຍາ​ໂຄງການ​ຂະແໜງ​ກະສິກຳ​ໃບຊາ​ເພື່ອ​ເປັນ​ສິນຄ້າ​ລະຫວ່າງ​ລັດຖະບານ​ລາວ ແລະ ຝຣັ່ງ ຈັດ​ຂຶ້ນ​ວັນ​ທີ 6 ມີນາ 2019 ທີ່​ກະຊວງ​ແຜນການ ແລະ ການ​ລົງທຶນ ຮ່ວມ​ລົງ​ນາມ​ໂດຍ​ທ່ານ ກິ​ແກ້ວ ຈັນທະ​ບູ​ຣີ ຮອງ​ລັດຖະມົນຕີ​ກະຊວງ​ແຜນການ ແລະ ການ​ລົງທຶນ ທ່ານ​ນາງ ຟໍ​ລອງ ຈອງ​ບຣອງ ຣິດ​ເລີ ເອກ​ອັກ​ຄະ​ລັດ​ຖະ​ທູດ​ຝຣັ່ງ ປະຈຳ​ລາວ ທ່ານ ມັດ​ເຈີ ໂບ​ມີ​ເຢ ຫົວໜ້າ​ອົງການ​ຝຣັ່ງ ເພື່ອ​ການ​ພັດທະນາ​ປະຈຳ​ລາວ ເຊິ່ງ​ມີ​ພາກສ່ວນ​ກ່ຽວ​ຂອງ​ສອງ​ຝ່າຍ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ