ຂ່າວຫຼ້າສຸດ

ສະເຫຼີມສະຫຼອງ​ວັນ​ສາກົນ​ຕ້ານ​ເອດ 5 ມີນາ

205 07 ມີ.ນ. 2019 ຂ່າວໜ້າ​ໜຶ່ງ
ສະເຫຼີມສະຫຼອງ​ວັນ​ສາກົນ​ຕ້ານ​ເອດ 5 ມີນາ

    ສູນ​ຕ້ານ​ເອດ ແລະ ພະຍາດ​ຕິດຕໍ່​ທາງ​ເພດ​ສຳພັນ ກົມ​ຄວບ​ຄຸມພະ​ຍາດ​ຕິດຕໍ່ ກະຊວງ​ສາທາລະນະ​ສຸກ ຈັດ​ງານ​ຂະ​ບວນ​ການ​ຕ້ານ​ເອດ ປະຈຳ​ປີ 2019 ເພື່ອ​ສະເຫຼີມສະຫຼອງ​ວັນ​ສາກົນ​ຕ້ານ​ເອດ (5 ມີນາ) ແນໃສ່​ໃຫ້​ຂໍ້​ມູນ​ຂ່າວສານ ການ​ສະກັດ​ກັ້ນ ແລະ ຕ້ານ​ເຊື້ອ​ເຮ​​ສ​ໄອ​ວີ/ພະຍາດ​ເອດ ແລະ ໃຫ້​ທຸກ​ຄົນ​ມີ​ສິດ​ເຂົ້າ​ເຖິງ​ການ​ບໍລິການ​ດ້ານ​ສຸຂະພາບ​ທີ່​ມີ​ຄຸນ​ນະ​ພາບ ຂຶ້ນ​ວັນ​ທີ 5 ມີນາ 2019 ຢູ່​ຫໍ​ວັດທະນະທຳ​ແຫ່ງ​ຊາດ ໂດຍ​ມີ​ທ່ານ ບຸນ​ກອງ ສີ​ຫາ​ວົງ ລັດຖະມົນຕີ​ກະຊວງ​ສາທາລະນະ​ສຸກ ປະທານ​ຄະນະ​ກຳມະການ​ແຫ່ງ​ຊາດ​ຕ້ານ​ເອດ ທ່ານ ບຸນ​ຕາ ເທບ​ພະ​ວົງ ຮອງ​ເລຂາ​ຄະນະ​ບໍລິຫານ​ງານ​ສູນ​ກາງ​ຊາວ​ໜຸ່ມ ​ປປ ລາວ ພ້ອມ​ດ້ວຍ​ຜູ້ຕາງໜ້າ​ອົງ​ການຈັດຕັ້ງ​ມະຫາຊົນ​ຈາກ 18 ກະຊວງ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

  ທ່ານ ບຸນ​ກອງ ສີ​ຫາ​ວົງ ກ່າວ​ວ່າ: ອີງ​ຕາມ​ການ​ລາຍ​ງານ​ຂອງ​ອົງການ UNAIDS ເລີ່ມ​ແຕ່​ປີ 1980 ຮອດ​ປີ 2017 ທົ່ວ​ໂລກ ມີ​ຜູ້​ຕິດເຊື້ອ​ເຮ​​ສ​ໄອ​ວີ 77,3 ລ້ານ​ຄົນ ເສຍ​ຊີວິດ​ຍ້ອນ​ພະຍາດ​ເອດ 35,4 ລ້ານ​ຄົນ ສະເພາະ​ປີ 2017 ມີ​ຜູ້​ຕິດເຊື້ອ​ເຮ​​ສ​ໄອ​ວີ​ໃໝ່ 1,8 ລ້ານ​ຄົນ ເສຍ​ຊີວິດ 940.000 ຄົນ ຈຳນວນ​ຜູ້​ຕິດເຊື້ອ​ເຮ​​ສ​ໄອ​ວີ ມີ​ທ່າ​ອ່ຽງ​ຫຼຸດ​ລົງ​ຄື​ປີ 1996 ມີ 3,4 ລ້ານ​ຄົນ ແລະ ຮອດ​ປີ 2017 ມີ 75% ໄດ້​ກວດ​ເລືອດ ແລະ ຮູ້​ສະພາບ​ການ​ຕິດເຊື້ອ 79% ໄດ້​ຮັບ​ການ​ປິ່ນປົວ​ດ້ວຍ​ຢາ ARV 81% ຈຳນວນ​ເຊື້ອ​ເຮ​​ສ​ໄອ​ວີ<1.000 ຕົວ ທຽບໃສ່ 90-90-90 ແມ່ນ​ບັນລຸ​ໄດ້ 75-79-81.

   ​ສປປ ລາວ ແຕ່​ປີ 1990-ເດືອນ​ກັນຍາ 2018 ມີ​ຜູ້​ຕິດເຊື້ອ​ເຮ​​ສ​ໄອ​ວີ 11.890 ຄົນ ເສຍ​ຊີວິດ 2.080 ຄົນ ໃນ​ນີ້ 88% ຂອງ​ການ​ຕິດເຊື້ອ​ແມ່ນ​ທາງ​ເພດ​ສຳພັນ​ທີ່​ບໍ່​ປອດ​ໄພ ລະຫວ່າງ​ຊາຍ​ກັບ​ຍິງ 4,8% ຈາກ​ແມ່​ຫາ​ລູກ 2,9% ຈາກ​ການ​ມີ​ເພດ​ສຳພັນ​ລະຫວ່າງ​ຊາຍ​ກັບ​ຊາຍ ສະເພາະ 9 ເດືອນ​ຕົ້ນ​ປີ 2018 ມີ​ຜູ້​ຕິດເຊື້ອ​ເຮ​​ສ​ໄອ​ວີ​ໃໝ່ 1.076 ຄົນ ເສຍ​ຊີວິດ 116 ຄົນ ປີ 2017 ມີ​ຜູ້​ຕິດເຊື້ອ​ເຮ​​ສ​ໄອ​ວີ 1.494 ຄົນ ຮອດ​ປີ 2017 ມີ 82% ໄດ້​ກວດ​ເລືອດ ແລະ ຮູ້​ສະພາບ​ການ​ຕິດເຊື້ອ 63% ໄດ້​ຮັບ​ການ​ປິ່ນປົວ​ດ້ວຍ​ຢາ ARV 82% ຈຳນວນ​ເຊື້ອ​ເຮ​​ສ​ໄອ​ວີ<1.000 ຕົວ ທຽບໃສ່ 90-90-90 ບັນລຸ​ໄດ້ 82-63-82.

   ປັດຈຸບັນ​ສາມາດ​ຂະຫຍາຍ​ຕາ​ໜ່າງ​ການ​ໃຫ້​ຄຳ​ປຶກສາ ແລະ ກວດ​ເລືອດ​ໄດ້ 198 ແຫ່ງ ໃນ​ນີ້ ຂັ້ນ​ແຂວງ ສູນ​ບໍລິການ​ສຸຂະພາບ ໂຮງໝໍ​ທະຫານ ແລະ ຕຳຫຼວດ ຂັ້ນ​ເມືອງ ແລະ ສຸກສາລາ​ຈຳນວນ​ໜຶ່ງ​ແມ່ນ​ສາມາດ​ໃຫ້ການ​ບໍລິການ​ກວດ​ເລືອດ​ຊອກ​ຫາ​ເຊື້ອ​ເຮ​​ສ​ໄອ​ວີ​ໄດ້​ແລ້ວ ນອກ​ນີ້ ຍັງ​ມີ​ສູນ​ປົວ​ພະຍາດ​ເອດ​ດ້ວຍ​ຢາ ARV ຈຳນວນ 11 ແຫ່ງ​ໃນ 8 ແຂວງ ຄື: ໂຮງໝໍ​ເຊດ​ຖາ​ທິ​ຣາດ ໂຮງໝໍ​ມິດຕະພາບ ໂຮງໝໍ ເມືອງ​ຕົ້ນ​ເຜິ້ງ ແຂວງ​ບໍ່​ແກ້ວ ໂຮງໝໍ​ແຂວງ​ບໍ່​ແກ້ວ ໂຮງໝໍ​ແຂວງ​ຫຼວງ​ນ້ຳ​ທາ ໂຮງໝໍ​ແຂວງ​ຫຼວງ​ພະ​ບາງ ໂຮງໝໍ​ແຂວງ​ຈຳປາ​ສັກ ໂຮງໝໍ​ແຂວງ​ຄຳ​ມ່ວນ ແລະ ໂຮງໝໍ​ແຂວງ​ຫົວພັນ ອີງໃສ່​ສະພາບ​ການ​ແຜ່​ລະ ບາດ​ຂອງ​ເຊື້ອ​ເຮ​​ສ​ໄອ​ວີ ມີ​ຄວາມ​ຈຳເປັນ​ຕ້ອງ​ໄດ້​ສືບຕໍ່​ຂະຫຍາຍ​ວຽກ​ງານ​ຕ້ານ​ເອດ ເພື່ອ​ໃຫ້​ບັນລຸ​ເປົ້າໝາຍ​ໃໝ່​ຂອງ​ອົງການ​ສະຫະ​ປະຊາ​ຊາດ ຄື​ຢຸດຕິ​ການ​ລະບາດ​ຂອງ​ເຊື້ອ​ເຮ​​ສ​ໄອ​ວີ​ພາຍ​ໃນ​ປີ 2030 ແລະ ຕ້ອງ​ບັນລຸ​ເປົ້າ​ໝາຍ​ໃໝ່​ໃນ​ການ​ປິ່ນປົວ​ພາຍ​ໃນ​ປີ 2020 ຄື 90-90-90.

 

ຂ່າວທີ່ກ່ຽວຂ້ອງ