ຂ່າວຫຼ້າສຸດ

ເທ​ສະການ​ອາຫານ​ຝຣັ່ງ ກຽມ​ຈັດ​ຂຶ້ນ​ກາງ​ເດືອນ​ມີນາ​ນີ້

213 07 ມີ.ນ. 2019 ຂ່າວໜ້າ​ໜຶ່ງ
ເທ​ສະການ​ອາຫານ​ຝຣັ່ງ ກຽມ​ຈັດ​ຂຶ້ນ​ກາງ​ເດືອນ​ມີນາ​ນີ້

    ເທ​ສະການ​ອາຫານ​ຝຣັ່ງ ຢູ່ ​ສປປ ລາວ ຄັ້ງ​ທີ 5 ຈະ​ຈັດ​ຂຶ້ນ​ວັນ​ທີ 15 ມີນາ 2019 ຢູ່​ເຮືອນ​ພັກ​ທ່ານ​ເອກ​ອັກ​ຄະ​ລັດ​ຖະ​ທູດ​ຝຣັ່ງ ນະຄອນຫຼວງ​ວຽງ​ຈັນ ໂດຍ​ໄດ້​ເຕົ້າໂຮມ​ເອົາ​ຮ້ານ​ອາຫານ​ຕ່າງໆ ແລະ ​ຜູ້​ມັກ​ປຸງ​ແຕ່ງອາຫານ​ເຂົ້າ​ຮ່ວມ ເພື່ອ​ສະເຫຼີມສະຫຼອງ​ວັດທະນະທຳ​ການ​ປຸງ​ແຕ່ງອາຫານ​ແບບ​ຝຣັ່ງ ທີ່​ຖືກ​ຮັບຮອງ​ຈາກ​ອົງການ​ອຸຍ​ແນັດ​ໂກ​ວ່າ ເປັນ​ມໍລະດົກ​ດ້ານ​ວັດທະນະທຳ.

   ທ່ານ​ນາງ Florence JEANBLANC-RISLER ເອກ​ອັກ​ຄະ​ລັດ​ຖະ​ທູດ​ຝຣັ່ງ ປະຈຳ ​ສປປ ລາວ ກ່າວ​ວ່າ: ພວກ​ຂ້າພະເຈົ້າ​ຮູ້ສຶກ​ດີໃຈ​ເປັນ​ຢ່າງ​ຍິ່ງ​ທີ່​ເຫັນ​ວ່າ​ເທ​ສະການ​ອາຫານ​ຝຣັ່ງ ມີ​ການ​ເຕີບ​ໃຫຍ່​ຂະຫຍາຍຕົວ​ຂຶ້ນ​ເລື້ອຍໆ​ໃນ​ແຕ່​ລະ​ປີ ແລະ ປີ 2019 ມີ​ປະມານ 150 ປະເທດ​ທົ່ວ​ໂລກ ໄດ້​ເຂົ້າ​ຮ່ວມ​ເທ​ສະການ​ອາຫານ​ຝຣັ່ງ​ຫຼາຍ​ກວ່າ 5.000 ຮ້ານ ສຳລັບ ​ສປປ ລາວ ປີ​ນີ້​ມີ​ຮ້ານ​ອາຫານ​ເຂົ້າ​ຮ່ວມ 9 ຮ້ານ ທີ່​ຈະ​ເຂົ້າ​ຮ່ວມ​ກິດຈະກຳ​ຕະຫຼອດ​ເດືອນ​ມີນາ 2019 ສຳລັບ​ລາຍການ​ອາຫານ​ໄດ້​ກຳນົດ​ເອົາ 2 ຫົວຂໍ້ ຄື: ຂົງເຂດ​ໂພຼ​ວັອງ (Provence) ແລະ ການ​ພັດທະນາ​ແບບ​ຍືນ​ຍົງ ໂດຍ​ວັນ​ທີ 15 ມີນາ ຈະ​ເປັນ​ຄ່ຳ​ຄືນ​ທຳ​ອິດ​ທີ່​ຫຼາຍ​ຮ້ານ​ອາຫານ​ຈາກ​ນະຄອນຫຼວງ​ວຽງ​ຈັນ ມາ​ຮ່ວມ​ແຮງ​ຮ່ວມ​ໃຈ​ສ້າງ​ລາຍການ​ອາຫານ​ອັນ​ພິເສດ ທີ່​ມີ​ລົດ​ຊາດ​ເອກະລັກ​ຂອງ​ຂົງເຂດ Provence ແລະ ຈະ​ມີ​ວົງ​ດົນຕີ​ແຈ​​ສ ມາ​ສ້າງ​ບັນຍາກາດ​ໃນ​ການ​ຮັບ​ປະທານ​ອາຫານ ເຊິ່ງ​ບັນດາ​ທ່ານ​ຈະ​ໄດ້​ຊີມ​ອາຫານ​ທີ່​ເປັນ​ເອກະລັກ​ເຊັ່ນ: ດອກ​ໝາກບວບ​ຍັດ​ໄສ້​ຣາ​ຕາ​ຕຸຍ ບຸຍ​ຢາ​ແບ​​ສ ອາຫານ​ຫວານ ຕັກ ໂທ​ເປ​ຊຽນ ລ່າ​ເວັນ​ເດີ ສຣໍ​ແບ​ຣີ ແລະ ອື່ນໆ ນອກ​ນີ້ ວັນ​ທີ 20 ມີນາ-1 ເມສາ ຍັງ​ສາມາດ​ໄປ​ຊິ​​ີມ​ອາຫານ​ທີ່​ເປັນ​ເອກະລັກ​ນີ້​ຢູ່​ບັນດາ​ທີ່​ເຂົ້າ​ຮ່ວມ​ເທ​ສະການ​ອາຫານ​ຝຣັ່ງ​ດັ່ງກ່າວ.

   ພິທີ​ຖະແຫຼງ​ຂ່າວ​ເທ​ສະການ​ອາຫານ​ຝຣັ່ງ ຢູ່ ​ສປປ ລາວ ຈັດ​ຂຶ້ນ​ວັນ​ທີ 4 ມີນາ 2019 ຢູ່​ເຮືອນ​ທ່ານ​ເອກ​ອັກ​ຄະ​ລັດ​ຖະ​ທູດ​ຝຣັ່ງ ໂດຍ​ມີ​ທ່ານ​ນາງ Florence JEANBLANC-RISLER ພ້ອມ​ດ້ວຍ​ແຂກ​ທີ່​ຖືກ​ເຊີນ ແລະ ສື່​ມວນ​ຊົນ​ເຂົ້າ​ຮ່ວມ. 

ຂ່າວທີ່ກ່ຽວຂ້ອງ