ຂ່າວຫຼ້າສຸດ

ເຊີນ​ຮ່ວມ​ງານ​ຕະຫຼາດນັດ ເມືອງ​ໄຊ​ທານີ ເພື່ອ​ສົ່ງເສີມ​ຜະລິດ​ຕະ​ພັນ​ສິນຄ້າ

318 07 ມ.ນ. 2019 ຂ່າວໜ້າ​ໜຶ່ງ
ເຊີນ​ຮ່ວມ​ງານ​ຕະຫຼາດນັດ ເມືອງ​ໄຊ​ທານີ ເພື່ອ​ສົ່ງເສີມ​ຜະລິດ​ຕະ​ພັນ​ສິນຄ້າ

   ເມືອງ​ໄຊ​ທານີ ໄດ້​ເລີ່ມ​ຈັດ​ງານ​ວາງສະແດງ ແລະ ຂາຍ​ສິນຄ້າ ຄັ້ງ​ທຳ​ອິດ​ໃນ​ປີ 2014 ມີ​ຊາວ​ກະສິກອນ ຊ່າງ​ຫັດຖະກຳ ແລະ ຫົວໜ່ວຍ​ທຸລະ​ກິດ​ພາຍ​ໃນ​ເມືອງ​ໃຫ້​ຄວາມ​ສົນໃຈ ແລະ ເຂົ້າ​ຮ່ວມ​ງານ​ນັບ​ມື້​ເພີ່ມ​ຂຶ້ນ​ຢ່າງ​ຕໍ່​ເນື່ອງ ແລະ ໃນ​ປີ 2019 ງານ​ດັ່ງກ່າວ ໄດ້​ຖືກ​ກຳນົດ​ຈັດ​ຂຶ້ນ​ຢ່າງ​ເປັນ​ທາງ​ການ ວັນ​ທີ 5-11 ມີນາ 2019 ທີ່​ບ້ານ​ໂນນ​ສະອາດ ເມືອງ​ໄຊ​ທານີ ນະຄອນຫຼວງ​ວຽງ​ຈັນ (ເສັ້ນທາງ​ເລກ 10 ທາງ​ໄປ​ທ່າ​ງອນ) ຄາດ​ວ່າ​ຈະ​ມີ​ສິນຄ້າ​ກະສິກຳ ຫັດຖະກຳ ສິນຄ້າ ODOP ແລະ ບັນດາ​ນັກທຸລະກິດ​ຜູ້​ປະກອບ​ການ​ເຂົ້າ​ຮ່ວມ​ງານ​ຄັ້ງ​ນີ້​ເປັນ​ຈຳນວນ​ຫຼາຍ​ກວ່າ 120 ຫົວໜ່ວຍ.

   ງານ​ຕະຫຼາດນັດ​ວາງສະແດງ​ສິນຄ້າ ແລະ ຂາຍເຄື່ອງ​ກະສິກຳ ຫັດຖະກຳ ແລະ ອຸດສາຫະກຳ ຂອງ​ເມືອງ​ໄຊ​ທານີ ປະຈຳ​ປີ 2019 ໄຂ​ຂຶ້ນ​ເປັນ​ທາງ​ການ​ໃນ​ວັນ​ທີ 5 ມີນາ 2019 ທີ່​ບ້ານ​ໂນນ​ສະອາດ ເຊິ່ງ​ມີ​ທ່ານ ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ທ່ານ ຈັນທະ​ລາ ອິນ​ທະລັງ​ສີ ເຈົ້າເມືອງ​ໄຊ​ທານີ ພ້ອມ​ດ້ວຍ​ຜູ້ຕາງໜ້າ​ຈາກ​ບັນດາ​ເມືອງ ແລະ ນັກທຸລະກິດ ຕະຫຼອດ​ເຖິງ​ພໍ່​ແມ່​ປະຊາຊົນ​ພາຍ​ໃນ​ເມືອງ​ເຂົ້າ​ຮ່ວມ.

   ທ່ານ ຄຳ​ປ່ຽນ ອິນ​ທະ​ລືຊາ ຮອງ​ເຈົ້າເມືອງ​ໄຊ​ທານີ ກ່າວ​ວ່າ: ງານ​ຕະຫຼາດນັດ​ວາງສະແດງ ແລະ ຂາຍ​ສິນຄ້າ ເມືອງ​ໄຊ​ທານີ ປະຈຳ​ປີ 2019 ເປົ້າ​ໝາຍ​ສຳຄັນ​ການ​ຈັດ​ງານ​ຕະຫຼາດນັດ ເພື່ອ​ຊຸກຍູ້​ສົ່ງເສີມ​ການ​ຜະລິດ​ກະສິກຳ ຫັດຖະ ກຳ ແລະ ອຸດສາຫະກຳ​ປຸງ​ແຕ່ງ ຕະຫຼອດ​ເຖິງ​ຫົວຄິດ​ປະດິດ​ສ້າງ​ຂອງ​ປະຊາຊົນ ຜູ້​ປະກອບ​ການ​ພາຍ​ໃນ​ເມືອງ​ໃຫ້​ມີ​ການ​ຂະຫຍາຍຕົວ ແລະ ກາຍເປັນ​ສິນຄ້າ​ທີ່​ມີ​ຄຸນ​ນະ​ພາບ​ສູງ ສາມາດ​ແຂ່ງຂັນ​ກັບ​ຕະຫຼາດ​ໄດ້ ພ້ອມ​ນີ້ ຍັງ​ແນໃສ່​ເປີດ​ໂອກາດ​ໃຫ້​ບັນດາ​ກຸ່ມ​ການ​ຜະລິດ​ຕ່າງໆ ໄດ້​ພົບ​ປະ​ແລກປ່ຽນ​ປະສົບ​ການ ເຕັກນິກ​ການ​ຜະລິດ ການ​ວາງ​ແຜນ​ຕະຫຼາດ​ທີ່​ຮັດກຸມ ແລະ ເປີດ​ກວ້າງ​ສູ່​ຕະຫຼາດ​ພາກ​ພື້ນ​ເທື່ອ​ລະ​ກ້າວ ໃນ​ງານ​ຄັ້ງ​ນີ້ ມີ​ຜູ້​ປະກອບ​ການ​ນຳ​ເອົາ​ສິນຄ້າ​ມາ​ວາງ​ຈຳໜ່າຍ​ທັງ​ໝົດ 87 ຫົວໜ່ວຍ ເພີ່ມ​ຂຶ້ນ​ຈາກ​ປີ 2018 ຈຳນວນ 15 ຫົວໜ່ວຍ ນອກຈາກ​ຈຳໜ່າຍ​ສິນຄ້າ​ຄຸນ​ນະ​ພາບ​ດີ ລາຄາ​ເໝາະ​ສົມ​ແລ້ວ ຜູ້​ເຂົ້າ​ຮ່ວມ​ງານ​ຍັງ​ຈະ​ໄດ້​ຮັບ​ຊົມ​ການ​ແຂ່ງຂັນ​ສິລະ​ປະ ແລະ ກິລາ​ກະຕໍ້​ຫວາຍ ຂັ້ນ​ມັດທະຍົມ ຊີງ​ຂັນ​ເຈົ້າເມືອງ​ໄຊ​ທານີ ຕື່ມ​ອີກ.

ຂ່າວທີ່ກ່ຽວຂ້ອງ