ຂ່າວຫຼ້າສຸດ

ສ ເກົາຫຼີ ສືບຕໍ່​ໃຫ້ການ​ຊ່ວຍເຫຼືອ​ຕໍ່​ຜູ້​ປະສົບ​ໄພພິບັດ ຢູ່​ແຂວງ ອັດ​ຕະ​ປື

350 07 ມ.ນ. 2019 ຂ່າວໜ້າ​ໜຶ່ງ
ສ ເກົາຫຼີ ສືບຕໍ່​ໃຫ້ການ​ຊ່ວຍເຫຼືອ​ຕໍ່​ຜູ້​ປະສົບ​ໄພພິບັດ ຢູ່​ແຂວງ ອັດ​ຕະ​ປື

      ເຫດການ​ສັນ​ອ່າງ​ຄູ​ກັນ​ນ້ຳ ເຂື່ອນ​ເຊ​ປຽນ-ເຊ​ນ້ຳ​ນ້ອຍ ຢູ່​ເມືອງ​ສະໜາມ​ໄຊ ແຂວງ​ອັດ​ຕະ​ປື ແຕກ ໃນ​ເດືອນ​ກໍລະກົດ 2018 ລັດຖະບານ ກໍ​ຄື​ປະຊາຊົນ ສ ເກົາຫຼີ ຈຳນວນ​ຫຼາຍ ຮູ້ສຶກ​ເສຍ​ໃຈ​ຕໍ່​ກັບ​ເຫດການ​ທີ່​ເກີດ​ຂຶ້ນ ແລະ ຕ້ອງການ​ໃຫ້​ເຂດ​ດັ່ງກ່າວ​ໄດ້​ຮັບ​ການ​ຟື້ນ​ຟູ​ຢ່າງ​ໄວວາ ສະນັ້ນ ວັນ​ທີ 5 ມີນາ 2019 ຢູ່​ສະຖານທູດ ສ ເກົາຫຼີ ໄດ້​ຈັດ​ຖະແຫຼງ​ຂ່າວ ເພື່ອ​ແນະນຳ​ສື່​ມວນ​ຊົນ​ໄດ້​ຮັບ​ຊາບ​ກ່ຽວ​ກັບ​ການ​ຊ່ວຍເຫຼືອ​ຂອງ ສ ເກົາຫຼີ ໂດຍ​ການ​ຖະແຫຼງ​ຂ່າວ​ຂອງ​ທ່ານ Shin Sung Soon ເອກ​ອັກ​ຄະ​ລັດ​ຖະ​ທູດ ສ ເກົາຫຼີ ປະຈຳ ​ສປປ ລາວ ມີ​ຜູ້ຕາງໜ້າ​ຈາກ​ອົງການ KOICA ອົງການ KOFIH ແລະ ສື່​ມວນ​ຊົນ​ເຂົ້າ​ຮ່ວມ.

  ທ່ານ Shin Sung Soon ກ່າວ​ວ່າ: ພາຍຫຼັງ​ເຫດການ​ສັນ​ອ່າງ ເຂື່ອນ​ເຊ​ປຽນ-ເຊ​ນ້ຳ​ນ້ອຍ ແຕກ ລັດຖະບານ ສ ເກົາຫຼີ ກໍ​ໄດ້​ຈັດ​ສົ່ງ​ຄະນະ​ກູ້​ໄພ​ສຸກ​ເສີນ​ມາ​ຊ່ວຍ 3 ຄັ້ງ ເຊິ່ງ​ໄດ້​ປິ່ນປົວ​ຜູ້​ໄດ້​ຮັບ​ຜົນ​ກະທົບ 2.430 ຄົນ ຫຼັງ​ຈາກ​ພວກ​ເຂົາ​ປະຕິບັດ​ໜ້າທີ່​ສຳເລັດ​ແລ້ວ ກໍ​ໄດ້​ມອບ​ອຸປະກອນ​ການ​ແພດ ແລະ ເຄື່ອງ​ກູ້​ໄພ​ໃຫ້​ອຳນາດ​ການ​ປົກຄອງ​ແຂວງ​ອັດ​ຕະ​ປື ມູນ​ຄ່າ 170.000 ໂດ​ລາ​ສະຫະລັດ ຫຼື ປະ ມານ 1,4 ຕື້​ກີບ ນອກ​ນີ້​ລັດຖະບານ ສ ເກົາຫຼີ ຍັງ​ໄດ້​ມອບ​ເງິນ​ຊ່ວຍເຫຼືອ 500.000 ໂດ​ລາ​ສະຫະ ລັດ ຫຼື ປະມານ 4,3 ຕື້​ກີບ ຜ່ານ​ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ແລະ ໄດ້​ຈັດ​ສົ່ງ​ເຮືອ​ຂົນສົ່ງ​ວັດຖຸ​ອຸປະກອນ​ຕ່າງໆ​ມາ​ຊ່ວຍເຫຼືອ​ຕື່ມ​ອີກ ມູນ​ຄ່າ 240.000 ໂດ​ລາ​ສະຫະລັດ ຫຼຶ ປະມານ 2 ຕື້​ກວ່າ​ກີບ ໃຫ້ການ​ຊ່ວຍເຫຼືອ​ເຝິກອົບຮົມ​ວຽກ​ງານ​ປົກ​ປ້ອງ​ເດັກ​ຢູ່​ແຂວງ​ອັດ​ຕະ​ປື ໂດຍ​ຜ່ານ​ອົງການ NGO ແລະ ອົງ​ການຈັດຕັ້ງ​ສາກົນ ມູນ​ຄ່າ 300.000 ໂດ​ລາ​ສະຫະລັດ ຫຼື ປະມານ 2,5 ຕື້​ກີບ ແລະ ມອບ​ເຂົ້າສານ 1.000 ໂຕນ ເພື່ອ​ຊ່ວຍເຫຼືອ​ບັນເທົາ​ທຸກ​ໃຫ້​ຜູ້​ຮັບ​ຜົນ​ກະທົບ.

  ໄປ​ຄຽງ​ຄູ່​ກັບ​ການ​ຊ່ວຍເຫຼືອ​ເພື່ອ​ຟື້ນ​ຟູ​ຊີວິດ​ການ​ເປັນ​ຢູ່​ໃຫ້​ຜູ້​ໄດ້​ຮັບ​ຜົນ​ກະທົບ​ຢູ່​ແຂວງ​ອັດ​ຕະ​ປື ລັດຖະບານ ສ ເກົາຫຼີ ຍັງ​ໄດ້​ເພີ່ມ​ງົບປະມານ​ການ​ຊ່ວຍເຫຼືອ​ດ້ານ ODA ແກ່ ​ສປປ ລາວ ຕາມ​ນະ ໂຍ​ບາຍ​ໃໝ່​ສູ່​ພາກ​ໃຕ້​ຂອງ​ລັດຖະບານ​ເກົາຫຼີ ເນື່ອງ​ຈາກ ​ສປປ ລາວ ເປັນ​ປະເທດ​ບຸລິ​ມາ​ສິດ ເພື່ອ​ໃຫ້ ການ​ຊ່ວຍເຫຼືອ​ເປັນ​ພິເສດ​ຂອງ ສ ເກົາຫຼີ ພ້ອມ​ນີ້ KOICA ຍັງ​ໄດ້​ສົ່ງ​ພະນັກງານ ແລະ ອາສາ​ສະໝັກ​ມາ​ຊ່ວຍ​ແປ​ພາສາ ແລະ ອຳນວຍ​ຄວາມ​ສະດວກ​ໃຫ້​ຄະນະ​ກູ້​ໄພ​ສຸກ​ເສີນ ແລະ ໄດ້​ເພີ່ມ​ມູນ​ຄ່າ​ການ​ຊ່ວຍເຫຼືອ​ພິເສດ 600.000 ໂດ​ລາ​ສະຫະລັດ ຫຼື ປະມານ 5 ຕື້​ກີບ ໄປ​ຊ່ວຍເຫຼືອ​ຜູ້​ໄດ້​ຮັບ​ຜົນ​ກະ ທົບ ນອກ​ນີ້ ຍັງ​ໄດ້​ມອບ​ລົດ​ຮັບ-ສົ່ງ​ຄົນ​ເຈັບ 3 ຄັນ ຫ້ອງ​ນ້ຳ​ເຄື່ອນ​ທີ່ 20 ຫ້ອງ ເສື້ອ​ຊູຊີບ 1.000 ຊຸດ ໂທລະ​ໂຄ່ງ​ເຕືອນ​ໄພ 8 ຊຸດ ແລະ ຢາ​ວັກ​ແຊງ 15.000 ຊຸດ.

  ສຳລັບ​ແຜນການ​ຊ່ວຍເຫຼືອ​ຜູ້​ປະສົບ​ໄພພິບັດ​ຂອງ​ອົງການ KOICA ປີ 2019-2023 ມີ​ມູນ​ຄ່າ 12 ລ້ານ​ໂດ​ລາ​ສະຫະລັດ ຫຼື ປະມານ 100 ຕື້​ກີບ ລວມ​ມີ 5 ຂະແໜງການ​ຄື: ສາທາລະນະ​ສຸກ ສຶກ​ສາ ການ​ຊ່ວຍເຫຼືອ​ປະຊາຊົນ​ໃນ​ການ​ທຳ​ມາ​ຫາ​ກິນ ແລະ ການ​ປັບປຸງ​ຕ້ານ​ໄພ​ທຳ​ມະ​ຊາດ ນອກ​ນີ້​ອົງການ KOFIH ກໍ​ໄດ້​ມອບ​ເງິນ 3 ລ້ານ​ໂດ​ລາ​ສະຫະລັດ ຫຼື ປະມານ 25 ຕື້​ກວ່າ​ກີບ ເຄື່ອງ​ສະ ແກນ ແລະ ອຸປະກອນ​ການ​ແພດ ເພື່ອ​ຊ່ວຍເຫຼືອ​ຜູ້​ປະສົບ​ໄພພິບັດ​ຢູ່​ແຂວງ​ອັດ​ຕະ​ປື ຕື່ມ​ອີກ.

 

ຂ່າວທີ່ກ່ຽວຂ້ອງ