ຂ່າວຫຼ້າສຸດ

ຊ່ວຍ​ແກ້​ໄຂ​ການ​ຄ້າ-ຂາຍຍ່ອຍ​ບໍ່​ເປັນ​ລະບຽບ​ຕາມ​ຖະໜົນ​ແຄມ​ຂອງ

339 07 ມີ.ນ. 2019 ຂ່າວໜ້າ​ໜຶ່ງ
ຊ່ວຍ​ແກ້​ໄຂ​ການ​ຄ້າ-ຂາຍຍ່ອຍ​ບໍ່​ເປັນ​ລະບຽບ​ຕາມ​ຖະໜົນ​ແຄມ​ຂອງ

    ສະມາຊິກ​ສະພາ​ແຫ່ງ​ຊາດ (​ສສຊ) ຊຸດ​ທີ VIII ແລະ ສະມາຊິກ​ສະພາ​ປະຊາຊົນ ນະຄອນຫຼວງ​ວຽງ​ຈັນ (​ສສ ນວ) ຊຸດ​ທີ I ນຳ​ໂດຍ​ທ່ານ ສາຍທອງ ແກ້ວ​ດວງ​ດີ ​ສສຊ ຊຸດ​ທີ VIII ປະຈຳ​ເຂດ​ເລືອກ​ຕັ້ງ 1 ນວ ປະທານ​ກຳມາ​ທິ​ການ​ກົດໝາຍ ກົດໝາຍ​ສະພາ​ແຫ່ງ​ຊາດ ລົງ​ພົບ​ປະ​ພະນັກງານ​ຫຼັກ​ແຫຼ່ງ ແລະ ປະຊາຊົນ​ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ວັນ​ທີ 4 ມີນາ 2019 ຢູ່​ເມືອງ​ດັ່ງກ່າວ ເພື່ອ​ເຜີຍແຜ່​ຜົນສຳເລັດ​ກອງ​ປະຊຸມ​ສະໄໝ​ສາມັນ ເທື່ອ​ທີ 6 ຂອງ​ສະພາ​ແຫ່ງ​ຊາດ ຊຸດ​ທີ VIII ກອງ​ປະຊຸມ​ສະໄໝ​ສາມັນ ເທື່ອ​ທີ 6 ຂອງ​ສະພາ​ປະຊາຊົນ (​ສປ ນວ) ຊຸດ​ທີ I ແລະ ຮັບ​ຟັງ​ຄຳ​ຄິດ​ເຫັນ ຄຳ​ສະເໜີ​ຂອງ​ປະຊາຊົນ​ທີ່​ຕ້ອງການ​ສະເໜີ​ຕໍ່​ຂັ້ນ​ເທິງ ກໍ​ຄື​ພາກສ່ວນ​ກ່ຽວຂ້ອງ​ປັບປຸງ-ແກ້​ໄຂ.

   ໂອກາດ​ນີ້ ກໍ​ໄດ້​ຮັບ​ຟັງ​ການ​ເຜີຍແຜ່​ຜົນສຳເລັດ​ກອງ​ປະຊຸມ​ສະໄໝ​ສາມັນ ເທື່ອ​ທີ 6 ຂອງ​ສະພາ​ແຫ່ງ​ຊາດ ຊຸດ​ທີ VIII ກອງ​ປະຊຸມ​ສະໄໝ​ສາມັນ ເທື່ອ​ທີ 6 ຂອງ ​ສປ ນວ ຊຸດ​ທີ I ຈາກ​ນັ້ນ ກໍ​ໄດ້​ເປີດ​ໂອກາດ​ໃຫ້​ປະຊາຊົນ​ສະເໜີ​ຂໍ້​ຂ້ອງ​ໃຈ​ຕ່າງໆ ໃນ​ນີ້ ບັນຫາ​ທີ່​ປະຊາຊົນ​ໃຫ້​ຄວາມ​ສົນໃຈ ແລະ ສະເໜີ​ຫຼາຍ​ກວ່າ​ໝູ່ ແມ່ນ​ບັນຫາ​ສິດ​ນຳ​ໃຊ້ ແລະ ການ​ເກັບ​ຄ່າ​ພາສີ​ທີ່​ດິນ ໂດຍ​ໄດ້​ສະເໜີ​ໃຫ້​ຂັ້ນ​ເທິງ​ແຈ້ງ​ຕື່ມ​ວິທີ​ການ​ເສຍ​ພາສີ ຜ່ານ​ລະບົບ​ທະນາຄານ ໂດຍ​ສະເພາະ​ການ​ເກັບ​ປະເພດ​ທີ່​ດິນ​ທຸລະ​ກິດ ແລະ ດິນ​ປຸກ​ສ້າງ ກວດກາ​ຄືນ​ການ​ແບ່ງ​ຂັ້ນ​ຄຸ້ມ​ຄອງ​ການ​ເກັບ​ພາສີ​ທີ່​ດິນ​ລະຫວ່າງ​ຂັ້ນ ນວ ແລະ ຂັ້ນ​ກະຊວງ ສະເໜີ​ໃຫ້​ແກ້​ໄຂ​ບັນຫາ​ການ​ຄ້າ-ຂາຍຍ່ອຍ​ທີ່​ບໍ່​ເປັນ​ລະບຽບ​ຕາມ​ຖະໜົນ​ແຄມ​ຂອງ ຂອງ​ຊາວ​ຕ່າງປະເທດ ຢາກ​ໃຫ້​ມີ​ມາດ​ຕະການ ແລະ ລະບຽບ​ການ​ຄຸ້ມ​ຄອງ​ເຂົາເຈົ້າ​ຢ່າງ​ເຂັ້ມ​ງວດ.

   ນອກ​ນີ້ ຍັງ​ໄດ້​ສະເໜີ​ກ່ຽວ​ກັບ​ວຽກ​ງານ 3 ສ້າງ ໂດຍ​ສະເພາະ​ການ​ສ້າງ​ຫົວໜ່ວຍ​ເຂັ້ມແຂງ ປັດຈຸບັນ​ແມ່ນ​ມີ​ແຜນ​ລະອຽດ​ແລ້ວ ພະນັກງານ​ກ່ຽວຂ້ອງ​ກໍ​ໄດ້​ເອົາໃຈໃສ່​ຢ່າງ​ຫ້າວຫັນ ແຕ່​ຂາດ​ງົບປະມານ ຈຶ່ງ​ສະເໜີ​ໃຫ້​ຂັ້ນ​ເທິງ​ຊ່ວຍ​ຈັດ​ແບ່ງ​ງົບປະມານ​ເພື່ອ​ຊຸກຍູ້-ສົ່ງເສີມ ເຮັດ​ໃຫ້​ວຽກ​ງານ​ດັ່ງກ່າວ​ດຳເນີນ​ໄປ​ຢ່າງ​ມີ​ຜົນສຳເລັດ ສະເໜີ​ໃຫ້​ກວດກາ​ຄືນ​ຜູ້​ທີ່​ເຮັດ​ວຽກ​ຢູ່​ຂັ້ນ​ພື້ນຖານ​ໃຫ້​ໄດ້​ຮັບ​ການ​ຍ້ອງຍໍ​ຈາກ​ຂັ້ນ​ເທິງ​ຕາມ​ຄວາມ​ເໝາະ​ສົມ ການ​ສົ່ງເສີມ​ດ້ານ​ການ​ລົງທຶນ ໂດຍ​ສະເພາະ​ການ​ສົ່ງເສີມ​ການ​ຜະລິດ​ພືດ​ປອດ​ສານພິດ ຍັງ​ບໍ່​ມີ​ຕະຫຼາດ​ຮອງ​ຮັບ​ເທົ່າ​ທີ່​ຄວນ ຢາກ​ໃຫ້​ມີ​ການ​ກຳນົດ​ຈຸດ​ຂາຍ​ຢ່າງ​ຊັດ​ເຈນ ສະເໜີ​ໃຫ້​ຂັ້ນ​ເທິງ​ເຂັ້ມ​ງວດ​ຕື່ມ​ເລື່ອງ​ການ​ເອົາ​ພະ​ພຸດ​ທະ​ຮູບ​ເຂົ້າ​ມາ ໂດຍ​ບໍ່​ໄດ້​ຮັບ​ອະນຸຍາດ ເຮັດ​ໃຫ້​ເກີດ​ມີ​ປາກົດການ​ຫຍໍ້ທໍ້​ໃນ​ສັງຄົມ​ຕາມ​ມາ ແລະ ບັນຫາ​ອື່ນໆ​ອີກ.

 

ຂ່າວທີ່ກ່ຽວຂ້ອງ