ຈັດບຸນມະໂຫລານສົ່ງເສີມການອ່ານ ຄັ້ງທີ 1

229 11 ມ.ນ. 2019 ຂ່າວໜ້າ​ໜຶ່ງ
ຈັດບຸນມະໂຫລານສົ່ງເສີມການອ່ານ ຄັ້ງທີ 1

    ງານ​ບຸນ­ມະ­ໂຫ­ລານ​ສົ່ງ­ເສີມ​ການ​ອ່ານ​ຂອງ​ນະ­ຄອນ­ຫຼວງ​ວຽງ​ຈັນ ຄັ້ງ​ທີ 1 ຈັດ​ຂຶ້ນ​ວັນ​ທີ 7 ມີ­ນາ 2019 ຢູ່​ສູນ​ການ​ຄ້າ​ເວີ​ເທດ​ເຊັນ​ເຕີ ໂດຍ​ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ພ້ອມ​ດ້ວຍ​ແຂກ​ຖືກ​ເຊີນ​ພາຍ​ໃນ ແລະ ຕ່າງ­ປະ­ເທດ ເຂົ້າ​ຮ່ວມ.

    ທ່ານ ສີ​ຫຸນ ສິດ­ທິ​ລື​ໄຊ ກ່າວ​ວ່າ: ບຸນ­ມະ­ໂຫ­ລານ​ຄັ້ງ​ນີ້ ເພື່ອ​ເປັນ​ການ​ໂຄ­ສະ­ນາ​ເຜີຍ­ແຜ່ ສົ່ງ­ເສີມ​ການ​ອ່ານ​ໃຫ້​ກັບ​ໂຮງ­ຮຽນ ສະ​ຖາ​ບັນ​ການ​ສຶກ​ສາ ພາກ​ລັດ ແລະ ເອ­ກະ​ຊົນ ປະ­ຊາ­ຊົນ ໄດ້​ມີ​ໂອ­ກາດ​ຢ້ຽມ​ຊົມ ແລະ ຊື້​ປື້ມ​ຫຼາຍ​ສາ­ຂາ​ວິ­ຊາ ແລະ ຫຼາຍ​ເລື່ອງ ເພື່ອ​ນຳ­ໄປ​ເສີມ​ຂະ­ຫຍາຍ ພັດ­ທະ­ນາ​ແນວ​ຄິດ ຄວາມ​ຮູ້​ຫຼາຍ​ດ້ານ ຫຼາຍ​ພາ­ສາ ເພື່ອ​ນຳ­ໄປ​ສຶກ​ສາ​ຄົ້ນ­ຄວ້າ​ຮ່ຳ­ຮຽນ​ຢ່າງ​ກວ້າງ­ຂວາງ ເຊິ່ງ​ຈຳ­ໜ່າຍ​ໃນ​ລາ­ຄາ​ທີ່​ເໝາະ​ສົມ ເຊິ່ງ​ຄັ້ງ​ນີ້​ເປັນ​ຄັ້ງ​ປະ­ຫວັດ­ສາດ​ຂອງ​ນະ­ຄອນ­ຫຼວງ​ວຽງ​ຈັນ ຈັດ​ຂຶ້ນ​ຈຸດ​ເວ­ລາ​ທີ່​ທົ່ວ​ໂລກ​ພ້ອມ​ກັນ ສະ­ເຫຼີມ­ສະ­ຫຼອງ​ວັນ​ອ່ານ​ປື້ມ​ໂລກ ທັງ​ເປັນ​ການ​ສ້າງ​ຂະ​ບວນ​ການ​ຕ້ອນ­ຮັບ​ວັນ​ແມ່­ຍິງ​ສາ­ກົນ ຄົບ­ຮອບ 109 ປີ ໂດຍ​ງານ​ດັ່ງ­ກ່າວ​ຈະ​ດຳ­ເນີນ​ແຕ່​ວັນ​ທີ 7-17 ມີ­ນາ 2019 ຢູ່​ສູນ​ການ​ຄ້າ​ເວີ​ເທດ​ເຊັນ​ເຕີ ເລີ່ມ​ແຕ່​ເວ­ລາ 9:00-21:00 ໂມງ​ຂອງ​ທຸກໆ​ວັນ ໂດຍ​ມີ​ບັນ­ດາ​ກິດ­ຈະ­ກຳ​ທີ່​ໜ້າ​ສົນ­ໃຈ ເຊັ່ນ: ມອບ​ປື້ມ​ອ່ານ​ໃຫ້​ໂຮງ­ຮຽນ 9 ຕົວ​ເມືອງ ໃນ​ນະ­ຄອນ­ຫຼວງ​ວຽງ​ຈັນ ແລະ ມອບ​ໃຫ້​ບັນ­ດາ​ຜູ້​ຊະ­ນະ​ໃນ​ການ​ແຂ່ງ­ຂັນ.

    ພາຍ​ໃນ​ງານ​ຍັງ​ມີ​ກິດ­ຈະ­ກຳ​ການ​ສຶກ​ສາ​ຖາມ-ຕອບ​ກ່ຽວ​ກັບ​ອາ​ຊຽນ ຮ້ອງ​ໄດ້-ໄດ້​ລ້ານ ເວົ້າ​ໄດ້-ໄດ້​ລ້ານ ອ່ານ​ໄດ້-ໄດ້​ລ້ານ ຂຽນ​ໄດ້-ໄດ້​ລ້ານ ພິມ​ໄດ້-ໄດ້​ລ້ານ ແຕ້ມ​ໄດ້-ໄດ້​ລ້ານ ຕອບ​ໄດ້-ໄດ້​ລ້ານ ທວາຍ​ໄດ້-ໄດ້​ລ້ານ ພ້ອມ​ທັງ​ກິດ­ຈະ­ກຳ​ແຂ່ງ­ຂັນ​ກີ­ລາ​ປະ­ເພດ​ຕ່າງໆ ກິດ­ຈະ­ກຳ​ປາ­ຖະ­ກະ­ຖາ ມີ​ສະ­ມາ­ຄົມ​ນັກ​ປະ­ພັນ ໂຮງ­ຮຽນ​ເອ­ກະ​ຊົນ ອົງ­ການ​ຕ່າງ­ປະ­ເທດ ແລະ ສະ­ມາ­ຄົມ​ການ​ຄ້າ​ເອີ​ຣົບ ແລະ ກິດ­ຈະ­ກຳ​ການ­ສະ­ແດງ​ຂອງ​ນັກ­ຮຽນ​ກ່ຽວ​ກັບ​ປະ­ເທດ​ອາ​ຊຽນ ນອກ​ນີ້​ຍັງ​ມີ​ສຳ­ນັກ​ພິມ​ຈາກ​ປະ­ເທດ​ສະ­ມາ­ຊິກ​ອາ​ຊຽນ ແລະ ປະ­ເທດ​ອ້ອມ​ຂ້າງ​ເຂົ້າ​ຮ່ວມ ວາງ­ສະ­ແດງ ແລະ ວາງ​ຈຳ­ໜ່າຍ​ປື້ມ ລວມ​ເຖິງ​ການ­ສະ­ແດງ​ຈາກ​ບັນ­ດາ​ເອກ​ອັກ​ຄະ​ລັດ​ຖະ​ທູດ ແລະ ອົງ­ການ​ຊ່ວຍ­ເຫຼືອ ເພື່ອ​ເຜີຍ­ແຜ່​ຄວາມ​ຮູ້ ແລະ ວັດ­ທະ­ນະ­ທຳ​ຂອງ​ເຂົາ­ເຈົ້າ ອັນ​ເປັນ​ການ​ເປີດ​ກວ້າງ​ການ​ຮຽນ​ຮູ້​ໃຫ້​ນັກ­ຮຽນ-ນັກ​ສຶກ​ສາ ທົ່ວ​ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ