ໂຈ້ບຸນມີ ກຣຸບ ສືບຕໍ່ລົງທຶນໄລຍະທີສອງຢູ່ ຂພສ ທ່າແຂກ

155 11 ມີ.ນ. 2019 ຂ່າວໜ້າ​ໜຶ່ງ
ໂຈ້ບຸນມີ ກຣຸບ ສືບຕໍ່ລົງທຶນໄລຍະທີສອງຢູ່ ຂພສ ທ່າແຂກ

    ພິ­ທີ​ວາງ​ສີ​ລາ​ລຶກ​ເປີດ​ການ​ກໍ່­ສ້າງ​ສູນ​ການ​ຄ້າ-ຮ້ານ​ຊັບ​ພະ​ສິນ­ຄ້າ ຜະ­ລິດ​ຕະ​ພັນ​ສິນ­ຄ້າ ປຸງ​ແຕ່ງ-ຫຸ້ມ​ຫໍ່ ປະ­ກອບ​ຊິ້ນ​ສ່ວນ​ຕ່າງໆ​ຂອງ​ບໍ­ລິ­ສັດ ໂຈ້​ບຸນ​ມີ ພັດ­ທະ­ນາ​ເຕັກ​ໂນ​ໂລ​ຊີ ຈຳ­ກັດ​ຜູ້​ດຽວ ຈັດ​ຂຶ້ນ​ໃນ​ວັນ​ທີ 4 ມີ­ນາ 2019 ທີ່​ເຂດ​ເສດ­ຖະ­ກິດ​ສະ­ເພາະ​ທ່າ​ແຂກ​ແຂວງ​ຄຳ​ມ່ວນ ໃຫ້​ກຽດ​ຕັດ​ແຖບ​ຜ້າ​ຂອງ​ທ່ານ ອາ​ລຸນ​ແກ້ວ ກິດ​ຕິ​ຄຸນ ລັດ­ຖະ­ມົນ­ຕີ​ປະ­ຈຳ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ທ່ານ ພົນ​ຕີ ອ່ອນ​ສີ ແສນ​ສຸກ ຮອງ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ທ່ານ ບຸນ​ມີ ພິມ​ມະ​ສອນ ຮອງ​ເຈົ້າ­ແຂວງ​ຄຳ​ມ່ວນ ທ່ານ​ນາງ ບຸນ​ມີ ບັງ­ອອນ​ແສງ​ເດດ ປະ­ທານ​ບໍ­ລິ­ສັດ ໂຈ້​ບຸນ​ມີ ພັດ­ທະ­ນາ​ເຕັກ​ໂນ​ໂລ​ຊີ ຈຳ­ກັດ​ຜູ້​ດຽວ ມີ​ຕາງ­ໜ້າ​ຈາກ​ກະ­ຊວງ​ທີ່​ກ່ຽວ­ຂ້ອງ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ ນົງ​ສະ­ຫວັນ ທຳ​ມະ​ວົງ ຮອງ​ປະ­ທານ​ສະ­ພາ​ບໍ­ລິ­ຫານ​ເຂດ​ເສດ­ຖະ­ກິດ​ສະ­ເພາະ​ທ່າ​ແຂກ ກ່າວ​ວ່າ: ໄລ­ຍະ​ຜ່ານ​ມາ ບໍ­ລິ­ສັດ ໂຈ້​ບຸນ​ມີ ກຣຸບ ໄດ້​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ​ກັບ​ເຂດ​ພວກ​ເຮົາ ໃນ​ການ​ສຳ​ປະ­ທານ​ເນື້ອ­ທີ່​ດິນ 114 ເຮັກ­ຕາ ເຊິ່ງ​ຕາມ​ແຜນ​ຂອງ​ບໍ­ລິ­ສັດ ແບ່ງ​ອອກ​ເປັນ​ສອງ​ໄລ­ຍະ ດ້ວຍ​ມູນ​ຄ່າ​ການ​ລົງ­ທຶນ​ທັງ​ໝົດ 2 ຕື້​ໂດ​ລາ​ສະ­ຫະ­ລັດ ໃນ​ນີ້ ໄລ­ຍະ​ທີ​ໜຶ່ງ​ແມ່ນ​ລົງ­ທຶນ​ສ້າງ​ສະ­ຖາ­ນີ​ຂົນ​ສົ່ງ­ຄ່ຽນ​ຖ່າຍ​ຕູ້​ຄອນ​ເທັນ​ເນີ​ສິນ­ຄ້າ ເນື້ອ­ທີ່ 45 ເຮັກ­ຕາ ມູນ​ຄ່າ 100 ລ້ານ​ໂດ​ລາ ຫຼື ປະ­ມານ 860 ຕື້​ກີບ ໃນ​ປີ 2015 ແລະ ເປີດ​ນຳ​ໃຊ້​ສະ­ຖາ­ນີ​ບໍ­ລິ­ການ​ເມື່ອ​ປີ 2017 ແຕ່​ມາ​ຮອດ​ປັດ­ຈຸ­ບັນ ຕາມ​ການ​ຕົກ­ລົງ​ເຫັນ​ດີ​ຂອງ​ລັດ­ຖະ­ບານ ບໍ­ລິ­ສັດ​ຈຶ່ງ​ໄດ້​ສືບ­ຕໍ່​ລົງ­ທຶນ​ໃນ​ໄລ­ຍະ​ທີ​ສອງ ໂດຍ​ການ​ສຸມ​ໃສ່​ພັດ­ທະ­ນາ​ເປັນ​ການ​ກໍ່­ສ້າງ​ສູນ​ການ​ຄ້າ-ຮ້ານ​ຊັບ​ພະ​ສິນ­ຄ້າ ຜະ­ລິດ​ຕະ​ພັນ​ສິນ­ຄ້າ ປຸງ​ແຕ່ງ-ຫຸ້ມ​ຫໍ່ ປະ­ກອບ​ຊິ້ນ​ສ່ວນ​ຕ່າງໆ ຈຸດ­ປະ­ສົງ​ກໍ​ເພື່ອ​ຜະ­ລິດ​ຊົມ­ໃຊ້​ພາຍ​ໃນ ແລະ ສົ່ງ​ອອກ​ຕ່າງ­ປະ­ເທດ ໃນ​ເນື້ອ­ທີ່​ທັງ​ໝົດ 100,88 ເຮັກ­ຕາ ດ້ວຍ​ມູນ​ຄ່າ​ການ​ລົງ­ທຶນ 500 ລ້ານ​ໂດ​ລາ ຫຼື​ປະ­ມານ 4.300 ຕື້​ກີບ ມີ​ອາ­ຍຸ​ການ​ສຳ​ປະ­ທານ 68 ປີ ແລະ ສາ­ມາດ​ຕໍ່​ໄດ້​ຕາມ​ລະ­ບຽບ​ກົດ­ໝາຍ​ທີ່​ກຳ­ນົດ​ໄວ້.

ຂ່າວທີ່ກ່ຽວຂ້ອງ