ໂຄງການ ທລຍ 3 ໃຊ້ງົບປະມານຫຼາຍກວ່າ 435 ຕື້ກວ່າກີບ

199 11 ມີ.ນ. 2019 ຂ່າວໜ້າ​ໜຶ່ງ
ໂຄງການ ທລຍ 3 ໃຊ້ງົບປະມານຫຼາຍກວ່າ 435 ຕື້ກວ່າກີບ

    ກອງ​ປະ­ຊຸມ​ສະ­ໄໝ​ສາ­ມັນ ຄັ້ງ​ທີ 4 ຂອງ​ສະ­ພາ​ບໍ­ລິ­ຫານ​ກອງ​ທຶນ​ຫຼຸດ­ຜ່ອນ​ຄວາມ­ທຸກ​ຍາກ (ທລຍ) ຈັດ​ຂຶ້ນ​ວັນ​ທີ 6-7 ມີ­ນາ 2019 ຢູ່​ສະ​ຖາ​ບັນ​ຄົ້ນ­ຄວ້າ​ກະ­ສິ­ກຳ ປ່າ­ໄມ້ ແລະ ພັດ­ທະ­ນາ​ຊົນ­ນະ­ບົດ ໂດຍ​ເປັນ​ປະ­ທານ​ຂອງ​ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ​ກະ­ສິ­ກຳ ແລະ ປ່າ­ໄມ້ ມີ​ບັນ­ດາ​ຄະ­ນະ​ສະ­ພາ​ບໍ­ລິ­ຫານ​ກອງ​ທຶນ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ກະ­ຊວງ ອົງ​ການ­ຈັດ­ຕັ້ງ​ສາ­ກົນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ພ້ອມ​ກັນ​ປຶກ­ສາ​ຫາ­ລື ແລະ ຕີ​ລາ­ຄາ​ຄືນ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ທລຍ 3 ປີ (2017-2019) ເປັນ­ຕົ້ນ ການ​ປະ­ຕິ­ບັດ​ວຽກ​ງານ ທລຍ ປີ 2018 ເຊິ່ງ​ໂຄງ­ການ ທລຍ 3 ມີ​ງົບ­ປະ­ມານ 435 ຕື້​ກວ່າ​ກີບ ປະ­ມານ 54 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 463,56 ຕື້​ກີບ ໃນ​ນີ້ ທຶນ​ສົມ­ທົບ​ຈາກ​ລັດ­ຖະ­ບານ 6 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 51,5 ຕື້​ກີບ ທຶນ​ກູ້​ຢືມ 30 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 257,55 ຕື້​ກີບ ແລະ ທຶນ​ຊ່ວຍ­ເຫຼືອ​ລ້າ​ຈາກ​ອົງ­ການ​ພັດ­ທະ­ນາ ແລະ ການ​ມີ​ສ່ວນ​ຮ່ວມ​ປະ­ເທດ​ສະ​ວິດ 18 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 154,53 ຕື້​ກີບ ຈັດ​ຕັ້ງ​ປະ­ຕິ­ບັດ​ວຽກ​ງານ​ຢູ່ 1.820 ບ້ານ 263 ກຸ່ມ​ບ້ານ 43 ເມືອງ​ທຸກ​ຍາກ ໃນ 10 ແຂວງ ມີ​ປະ­ຊາ­ກອນ​ໄດ້​ຮັບ​ຜົນ​ປະ­ໂຫຍດ​ຫຼາຍ​ກວ່າ 800.000 ຄົນ.

    ສຳ­ລັບ​ປີ 2018 ຈະ​ຈັດ​ຕັ້ງ​ປະ­ຕິ­ບັດ​ຢູ່ 326 ບ້ານ 27.371 ຄອບ­ຄົວ 168.308 ຄົນ ມູນ​ຄ່າ 155,76 ຕື້​ກີບ ໃນ​ນີ້ ຈັດ​ສັນ​ເຂົ້າ 4 ວຽກ​ງານ ທລຍ ຄື: ວຽກ​ງານ​ການ​ວາງ​ແຜນ ແລະ ກໍ່­ສ້າງ 107,48 ຕື້​ກີບ ມີ 335 ໂຄງ­ການ​ຍ່ອຍ ວຽກ​ງານ​ສ້າງ​ຄວາມ​ເຂັ້ມ­ແຂງ​ໃຫ້​ອົງ­ການ​ປົກ­ຄອງ​ທ້ອງ­ຖິ່ນ ແລະ ຊຸມ​ຊົນ 19,37 ຕື້​ກີບ ວຽກ​ງານ​ບໍ­ລິ­ຫານ​ໂຄງ­ການ 24,89 ຕື້​ກີບ ແລະ ວຽກ​ງານ​ປັບ­ປຸງ​ຊີ­ວິດ​ການ​ເປັນ​ຢູ່ ເຊື່ອມ​ສານ​ໂພ­ຊະ​ນາ​ການ 4 ຕື້​ກີບ ໃນ​ນີ້ ລັດ­ຖະ­ບານ​ໄດ້​ອະ­ນຸ­ມັດ 11 ຕື້​ກີບ ໃນ​ປີ 2018 ຈັດ​ຕັ້ງ​ປະ­ຕິ­ບັດ 38 ໂຄງ­ການ ຊຸມ​ຊົນ​ປະ­ກອບ­ສ່ວນ​ເປັນ​ແຮງ​ງານ ແລະ ອຸ­ປະ­ກອນ 6,27 ຕື້​ກີບ ກວມ​ເອົາ 7% ຄຽງ​ຄູ່​ກັນ​ນີ້ ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ທລຍ 3 ຍັງ​ໄດ້​ເອົາ­ໃຈ­ໃສ່​ປັບ­ປຸງ​ພະ­ນັກ­ງານ ແລະ ອາ­ສາ​ສະ­ໝັກ​ທີ່​ມີ​ສ່ວນ​ຮ່ວມ ໃຫ້​ໄດ້​ຮັບ​ການ​ຍົກ​ລະ­ດັບ​ສູງ​ຂຶ້ນ ເປັນ­ຕົ້ນ ຂົງ­ເຂດ​ການ​ສຶກ​ສາ ໂຍ­ທາ​ທິ​ການ ແລະ ຂົນ­ສົ່ງ ສາ­ທາ­ລະ­ນະ​ສຸກ ວຽກ​ງານ​ພະ­ລັງ­ງານ-ບໍ່​ແຮ່ ການ​ປັບ­ປຸງ​ຊີ­ວິດ​ການ​ເປັນ​ຢູ່ ແລະ ໂພ­ຊະ​ນາ​ການ ສົ່ງ­ເສີມ​ການ​ນຳ​ໃຊ້​ເຕົາ​ດັງ­ໄຟ​ແບບ​ປະ­ຢັດ ແລະ ຮັກ­ສາ​ສຸ­ຂະ­ພາບ.

ຂ່າວທີ່ກ່ຽວຂ້ອງ