ຂ່າວຫຼ້າສຸດ

ສ້າງເຂດພັດທະນາກວມລວມໄຊເຊດຖາ ແລະ ເຂດເສດຖະກິດສະເພາະບຶງທາດຫຼວງ ໃຫ້ເປັນເຂດພັດທະນາສີຂຽວ ແລະ ຍືນຍົງ

547 11 ມ.ນ. 2019 ຂ່າວໜ້າ​ໜຶ່ງ
ສ້າງເຂດພັດທະນາກວມລວມໄຊເຊດຖາ ແລະ ເຂດເສດຖະກິດສະເພາະບຶງທາດຫຼວງ ໃຫ້ເປັນເຂດພັດທະນາສີຂຽວ ແລະ ຍືນຍົງ

    ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ພ້ອມ​ຄະ­ນະ ເຄື່ອນ​ໄຫວ​ຢ້ຽມ­ຢາມ ແລະ ຊີ້​ນຳ​ວຽກ​ງານ​ການ​ພັດ­ທະ­ນາ​ໂຄງ­ການ ຢູ່​ເຂດ​ພັດ­ທະ­ນາ​ກວມ​ລວມ​ໄຊ​ເຊດ​ຖາ ແລະ ເຂດ​ເສດ­ຖະ­ກິດ​ສະ­ເພາະ ນະ­ຄອນ­ຫຼວງ​ວຽງ​ຈັນ ວັນ​ທີ 7 ມີ­ນາ 2019 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ຫ້ອງ­ການ​ສົ່ງ­ເສີມ ແລະ ຄຸ້ມ​ຄອງ​ເຂດ​ເສດ­ຖະ­ກິດ​ພິ­ເສດ ຄະ­ນະ​ຄຸ້ມ​ຄອງ​ເຂດ​ເສດ­ຖະ­ກິດ​ພິ­ເສດ​ບຶງ​ທາດ­ຫຼວງ ແລະ ບໍ­ລິ­ສັດ​ຜູ້​ພັດ­ທະ­ນາ​ໂຄງ­ການ.

    ຈຸດ­ປະ­ສົງ​ເພື່ອ​ຕິດ­ຕາມ​ຄວາມ​ຄືບ​ໜ້າ ແລະ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ພ້ອມ​ທັງ​ຮັບ​ຟັງ​ຂໍ້​ຄິດ​ເຫັນ ແລະ ຂໍ້​ສະ­ເໜີ​ຈາກ​ຜູ້​ພັດ­ທະ­ນາ​ທັງ 2 ເຂດ ກ່ຽວ​ກັບ​ຄວາມ​ສະ­ດວກ ບັນ­ຫາ​ຂໍ້­ຄົງ­ຄ້າງ​ທີ່​ຕ້ອງ­ການ​ໃຫ້​ຂັ້ນ​ເທິງ​ຊ່ວຍ​ແກ້​ໄຂ ເພື່ອ​ຮັບ­ປະ­ກັນ​ການ​ພັດ­ທະ­ນາ​ທີ່​ມີ​ປະ​ສິດ­ທິ​ຜົນ.

    ໂອ­ກາດ​ນີ້ ຜູ້​ພັດ­ທະ­ນາ​ທັງ 2 ເຂດ ກໍ​ໄດ້​ສະ­ເໜີ​ຕໍ່​ຂັ້ນ​ເທິງ ໂດຍ​ສະ­ເພາະ​ການ​ສະ­ໜັບ­ສະ­ໜູນ-ສົ່ງ­ເສີມ​ດ້ານ​ນະ­ໂຍ­ບາຍ​ໃນ​ເຂດ​ເສດ­ຖະ­ກິດ​ພິ­ເສດ ຢາກ​ໃຫ້​ມີ​ຄວາມ​ລະ­ອຽດ ຈະ­ແຈ້ງ ແລະ ເປັນ​ເອ­ກະ​ພາບ ເພື່ອ​ສະ­ດວກ​ໃນ​ການ​ໂຄ­ສະ­ນາ​ໃຫ້​ຜູ້​ທີ່​ຈະ​ເຂົ້າ​ມາ​ລົງ­ທຶນ ການ­ຈັດ­ຕັ້ງ​ປະ­ຕິ­ບັດ​ກົນ​ໄກ​ການ​ບໍ­ລິ­ການ​ປະ­ຕູ​ດຽວ ໃຫ້​ມີ​ຄວາມ​ສະ­ດວກ​ວ່ອງ­ໄວ ແລະ ສາ­ມາດ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ການ​ລົງ­ທຶນ​ຢ່າງ​ແທ້​ຈິງ.

    ປັດ­ຈຸ­ບັນ​ຢູ່ ສປປ ລາວ ມີ​ເຂດ​ເສດ­ຖະ­ກິດ​ພິ­ເສດ 12 ແຫ່ງ ໃນ 7 ແຂວງ ລຽບ​ຕາມ​ເສັ້ນ­ທາງ​ຍຸດ​ທະ​ສາດ​ຂອງ​ການ​ພັດ­ທະ­ນາ ເພື່ອ​ສ້າງ​ໃຫ້​ກາຍ­ເປັນ​ຈຸດ​ເຊື່ອມ​ຕໍ່​ລະ­ຫວ່າງ​ປະ­ເທດ​ລາວ ກັບ​ບັນ­ດາ​ປະ­ເທດ​ໃນ​ພາກ​ພື້ນ ເຊິ່ງ​ມີ 593 ບໍ­ລິ­ສັດ​ເຂົ້າ​ມາ​ລົງ­ທຶນ​ແລ້ວ ໃນ​ນີ້ ບໍ­ລິ­ສັດ​ຕ່າງ­ປະ­ເທດ 474 ບໍ­ລິ­ສັດ ສ້າງ​ວຽກ​ເຮັດ​ງານ​ທຳ​ໄດ້ 25.000 ກວ່າ​ຕຳ­ແໜ່ງ​ງານ ປະ­ກອບ­ສ່ວນ​ເຂົ້າ​ງົບ­ປະ­ມານ​ໄດ້ 31 ລ້ານ​ກວ່າ​ໂດ​ລາ​ສະ­ຫະ­ລັດ ແລະ ຄາດ​ວ່າ​ຈະ​ເພີ່ມ​ຂຶ້ນ​ຫຼາຍ​ເທົ່າ​ໂຕ ພາຍ­ຫຼັງ​ບັນ­ດາ​ໂຮງ​ຈັກ-ໂຮງ­ງານ​ສຳ­ເລັດ​ການ​ກໍ່­ສ້າງ ແລະ ດຳ­ເນີນ​ການ​ຜະ­ລິດ.

    ໂອ­ກາດ​ນີ້ ທ່ານ ບຸນ​ຍັງ ວໍ­ລະ​ຈິດ ກໍ​ໄດ້​ສະ­ແດງ​ຄວາມ​ຊົມ­ເຊີຍ​ຜູ້​ພັດ­ທະ­ນາ​ທັງ 2 ເຂດ ທີ່​ໄດ້​ເອົາ­ໃຈ­ໃສ່​ປະ­ຕິ­ບັດ​ໜ້າ­ທີ່​ຢ່າງ​ຕັ້ງ­ໜ້າ ເຊິ່ງ​ສາ­ມາດ​ດູດ​ດຶງ​ການ​ລົງ­ທຶນ ກໍ​ຄື​ສ້າງ​ວຽກ​ເຮັດ​ງານ​ທຳ​ໄດ້​ເປັນ​ຈຳ­ນວນ​ຫຼວງ­ຫຼາຍ ທີ່​ສຳ­ຄັນ​ແມ່ນ​ທັງ​ສາ­ມາດ​ຕອບ​ສະ­ໜອງ​ນະ­ໂຍ­ບາຍ​ຂອງ​ລັດ­ຖະ­ບານ ລາວ-ຈີນ ພ້ອມ​ນີ້ ທ່ານ​ຍັງ​ໄດ້​ເນັ້ນ​ໃຫ້ 2 ເຂດ​ພັດ­ທະ­ນາ​ດັ່ງ­ກ່າວ ສືບ­ຕໍ່​ເພີ່ມ​ທະ­ວີ​ການ​ພົວ­ພັນ​ຮ່ວມ​ມື​ມິດ­ຕະ­ພາບ​ລະ­ຫວ່າງ​ສອງ​ຊາດ ສ້າງ​ໃຫ້​ເປັນ​ເຂດ​ພັດ­ທະ­ນາ​ສີ­ຂຽວ ຍືນ​ຍົງ ແລະ ສາ­ມາດ​ຍົກ​ສູງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ດີ​ຂຶ້ນ ປະ­ກອບ­ສ່ວນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ ສປປ ລາວ.

ຂ່າວທີ່ກ່ຽວຂ້ອງ